Filmiliortarneq pillugu Inatsisartut inatsisaat nr. 65, 6. december 2024-meersumi § 30, imm. 2, § 31, imm. 3, aamma § 34, imm. 2, naapertorlugit aalajangersarneqarpoq:

Atuuffia nassuiaatillu

  § 1.  Nalunaarut nunani allamiut filmiliortartunut, Kalaallit Nunaani aningaasarsiutigalugu filmiliorusuttunut atuutsinneqarpoq.

  Imm. 2.  Aningaasarsiutigalugu ingerlatsineq, nalunaarummi matumani ima paasineqassaaq, filmiliornermi ingerlatsinermi akissarsiaqartinneqarnermik imaluunniit ajunngitsorsiaqartinneqarnermik ilaqartumik, Atuuffiit A-t § 4, imm. 1 nr. 8, litra b naapertorlugu.

  § 2. Najukkami sulisut atorfeqartinneqartut tassaapput, inuit inuussutissarsiortut akuusut Kalaallit Nunaani najugallit.

  Imm. 2.  Nunanit allanit sulisut atorfeqartinneqartut tassaapput, inuit inuussutissarsiortut akuusut Kalaallit Nunaani najugaqanngitsut.

Kalaallit Nunaani filmiliorsinnaanermut akuerineqarnissaq pillugu qinnuteqaat

  § 3.  Kalaallit Nunaani aningaasarsiutigalugu filmiliorsinnaanermut akuersissummik (filmiliorsinnaanermut akuersissut) qinnuteqaat Kalaallit Nunaanni Filminstitutimut nassiunneqassaaq, instituttip qinnuteqarnissamut immersuiffissaa atorlugu.

  Imm. 2.  Kalaallit Nunaanni Filminstitutip qinnuteqaat qarasaasiakkut nassiunneqarnissaa piumasaqaatigisinnaavaa.

  § 4.  Qinnuteqaat paasissutissanik makkuninnga imaqassaaq:

1) Qulequtaq imaluunniit filmiliornermi suliniutaasup qulequtaa.

2) Filmiliornermi pilersaarusiorlugu suliniutip suussusaa, immikkoortiterneqassappullu ima: filminik aliikkutassiat, filminut naatsut- piviusulersaarusiat, ussassaarutit kiisalu “filmiliornermi pilersaarusiorlugit suliniutit allat”.

3) Pilersitsiniarluni qinnuteqartup aqqa, najugaa aamma attaveqarfissatut paasissutissai (oqarasuaatip normua taavalu e-mail).

4) Pilersitsiniartup piginnittuunermut tunuliaqutai.

5) Pilersitsiniartup kinaassutsimik normua, assersuutigalugu akiitsuutsinut nalunaarsuinermi normu (VATidentification-imut normu) assigisaaluunniit.

6) Ingerlatsisup aqqa, qulequtaa attaveqarfissatullu paasissutissai (oqarasuaatip normua taavalu e-mail) pilersitsiniap qinnuteqartuusup filmiliornermi pilersaarusiorlugu suliniummut akisussaasup assinganik.

7) Filmiliornermi pilersaarusiorlugu suliniuteqarluni Kalaallit Nunaaniinnissami ullut pilersaarutigineqartut, matumani ilanngullugit Kalallit Nunaani sumiiffissat sumilu filmiliortoqarnissaa naatsorsuutigineqarnersoq.

8) Filmiliornermi pilersaarusiorlugit suliniummut missingersuusiaq, pilersitsiniarnermut suleqatigiit annertussusaat ilisimasallillu peqataasut amerlassusaat suussutsinut makkununnga immikkoortinneqarneri paasissutigineqarnerilu: 

a) Najukkami tamatumunngalu nunanit allanit sulisut.

b) Sulisut suussusaat: Atuuffiit A-t (ingerlatsisoq, ilitsersuisoq, assiliisoq, atuakkiortoq) isiginnaartitsisartut, sulisut teknikkilerisut, allaffissornikkut sulisut aamma“allat”.

9) Kalaallit Nunaani oqartussanit akuersissutit, qinnuteqaatigineqarsimasut nalunaarutigineqarsimasulluunniit.

10)   Filmiliornermut missingersuummik tamakkiisumik imaluunniit ilisimatitsissutitut tunniunneqartut ilaannaannik toqqarneqartunik isertuussinissaq pillugu qinnuiginnissinnaaneq. Pisortat ingerlatsinerat pillugu paasitinneqarsinnaatitaaneq pillugu Inatsisartut inatsisaanni kapitali 3 naapertorlugu qinnuteqaat tunngavilersorneqassaaq.

  Imm. 2.  Qinnuteqaammut ilanngunneqassapput oqartussanit akuersissutit, qinnuteqaatigineqarsimasut nalunaarutigineqarsimasulluunniit.

  § 5.  Qinnuteqaatip tunniunneranut atatillugu tunisassiorfik ingerlatseqatigiiffik qinnuteqartuusoq qinnuteqarnermut akiliutit 5.000 koruunit akilissavai.

  Imm. 2.  Imm. 1 malillugu qinnuteqarnermut akiliut tiguneqaqqaartinnagu qinnuteqaatit suliarineqarsinnaanngillat.

  Imm. 3.  Qinnuteqaatip akuerineqannginnera, akitsuummik utertitsinissamik pisinnaatitsinngilaq.  

  § 6.  Kalaallit Nunaanni Filminstitutip qinnuteqarnermut piffissaliussat aalajangersarsinnaavai.

Akuersissutitaarnissamut piumasaqaatit

  § 7.  Qinnuteqaatip akuerineqarnissaanut piumasaqaatigineqarpoq, pilersitsiniartup

1) paasissutissat pisussaaffigisani nalunaarutigissagai, tak. § 4 aamma,

2) najuinissamut, sulinissamut, angallannissamut ingerlatsinissamullu tunngatillugu oqartussanit akuersissutit pisariaqartinneqartut pigissagai.

Paasissutissanik pingaarnernik nalunaarsuineq

  § 8.  Kalaallit Nunaanni Filminstitutip filmiliorsinnaanermut akuersissummut qinnuteqaatinik suliaqarnerminut atatillugu paasissutissat tulliuttut nalunaarsussavai:

1) Filmip suussusaa, agguataarneqartut ukununnga filminut aliikkutassiat, filmit naatsut, dokumentarit, filmit pilersaarutit aamma ”filmiliat suliniutaasut allat”..

2) Pilersitsisup nunagisaa.

3) Ingerlatsisup nunagisaa.

4) Filmiliornermut ataatsimut missingersuutit.

5) Ilisimasallit peqataasut ullut sulisimanerisa amerlassusaat immikkoortiternerilu

a) najukkami tamatumunngalu nunanit allanit sulisut,

b) sulisut suussusaat: Atuuffiit A-t (ingerlatsisoq, ilitsersuisoq, assiliisoq, atuakkiortoq) isiginnaartitsisartut, sulisut teknikkilerisut, allaffissornikkut sulisut, allat.

Tamanut ammasumik saqqummiussineq

  § 9.  Kalaallit Nunaanni Filminstitutip nittartakkamini kalaallisut, qallunaatut tuluttullu saqqummiutissavai:

1) Qinnuteqarnissamut piffissaliussaasinnaasut.

2) Paasissutissat filmiliorsinnaanermut akuersissutit nalunaarutigineqartut paasissutissallu pingaarnerit tak. § 8.

  Imm. 2.  Qinnuteqartoq filmiliornermut missingersuutip tamakkiisuusup imaluunniit ilisimatitsissutitut tunniunneqartut ilaannik toqqarneqartunik isertuussinissaq pillugu qinnuteqarsimappat, ilisimatitsissutit taakku tamanut saqqummiunneqaqqusaanngillat, qinnuteqaatip suliarineranut atatillugu isertuussinissaq qinnuteqarneq akuerineqarsimappat.

Pineqaatissiinerit

  § 10.  Qinnuteqartoq, qinnuteqaammi paasissutissanik pisussaaffigisamini eqqunngitsunik tunniussisimaguni, tak. § 4, Kalaallit Nunaanni Pinerluttulerineq pillugu inatsimmi malittarisassat malillugit akiligassinneqarneratigut pineqaatissinneqarsinnaavoq.

Atuutilersitsineq

  § 11.  Nalunaarut ulloq 1. juli 2026 atuutilissaaq aamma 1. januar 2027-ip kingorna filmiliornernut atuutissaaq.

Namminersorlutik Oqartussat, ulloq 2. juuni 2026

Nivi Olsen

Ilinniartitaanermut, Kultureqarnermut, Timersornermut Ilageeqarnermullu Naalakkersuisoq

/Nuka Kleemann