Filmiliornermut tapiissuteqartarneq pillugu Namminersorlutik Oqartussat nalunaarutaat
Filmiliortarneq pillugu Inatsisartut inatsisaanni nr. 65, 6. december 2024-meersumi § 21, § 28, imm. 2, § 29, imm. 2, aamma § 34, imm. 2 naapertorlugit aalajangersarneqarput:
Kapitali 1
Atuuffia nassuiaatillu
§ 1. Nalunaarut Kalaallit Nunaanni Filminstituttip kalaallit filmiliaannut filmilioqataaffigisaannullu aningaasatigut tapiissuteqartarnermik nunamilu allamiut filmiliornerminni Kalaallit Nunaanni aningaasartuutaannik utertitsisarnermik atuuppoq.
§ 2. Filmilianut § 1 naapertorlugu, ilaapput filmit takinngitsut, filmit aliikkutassiat, oqaluttualiat nangeqattaartuliat, filmit pisimasuinnik tunngavillit, pisimasuinnik tunngavillit nangeqattaartut, filmit animationit, animationit nangeqattaartuliat.
Imm. 2. Filmit ussassaarisut, nutaarsiassat aallakaatitassiat, piviusunik aliikkusersuinermillu isiginnaagassiat, nipilersukkanik videot timersortunillu aallakaatitsinerit uani nalunaarummi ilaanngillat.
§ 3. Filmi naatsuliaq ima paasineqassaaq filmi oqaluttualiaq 60 minutsit inorlugit sivisussusilik.
§ 4. Filmi takisuuliaq ima paasineqassaaq filmi oqaluttualiaq sivikinnerpaamik 60 minutsinik sivisussusilik.
§ 5. Oqaluttualiat nangeqattaartuliaq ima paasineqassaaq oqaluttualiamik ataqatigiissumik nangeqattaartuliaq, immikkoortunik ataqatigiissunik arlalinnik, ataasiakkaanik ingerlaannartunilluunniit oqaluttuartalinnik immikkoortulik.
§ 6. Filmit pisimasuinnik tunngavillit ima paasineqassaaq filmi ataaseq, oqaluttualiaanngitsoq aamma sammisanik, pisunik, aaqqissuussanik, inunnik il.il. eqqumiitsuliorluni isumassarsiorlunilu filmiliaq.
§ 7. Pisimasuinnik tunngavillit nangeqattaartuliaq ima paasineqassaaq oqaluttuamik ataqatigiissumik, oqaluttualiaanngitsumik aamma sammisanik, pisunik, aaqqissuussanik, inunnik il.il. eqqumiitsuliorluni isumassarsiorlunilu nangeqattaartuliaq. Pisimasuinnik tunngavilik nangeqattaartuliat immikkoortunik ataqatigiissunik arlalinnik, ataasiakkaanik ingerlaannartunilluunniit oqaluttuartalinnik immikkoortoqarput.
§ 8. Filmit aminationit ima paasineqassaaq, aliikkutassiaralugu filmiliaq imaluunniit filmiliaq naatsoq assinik nipinillu pilersinneqartoq, aalasulianik inuttalik, aalasuusorinnittuliaq isigisatigullu sunniiniutitalik, assit ataasiakkaartut arlallit immiunnerisigut pilersinneqartoq. Filmiliaq grafikimik assiliartaliussanillu suliaavoq oqaluttuanillu piviusulersaarutinilluunniit tunngaveqarsinnaalluni.
§ 9. Animationit nangeqattaartuliaq ima paasineqassaaq oqaluttuaq ataqatigiissoq immikkoortunut ataqatigiissunut arlalinnut, ataasiakkaanik ingerlaannartunilluunniit nipinik assinillu oqaluttuartaqarluni agguataarsimasoq, aalasulianik inuttalik, aalasuusorinnittuliaq isigisatigullu sunniiniutitalik, assit ataasiakkaartut arlallit immiunnerisigut pilersinneqartoq. Filmiliaq grafikimik assiliartaliussanillu suliaavoq oqaluttuanillu piviusulersaarutinilluunniit tunngaveqarsinnaalluni.
§ 10. Filmiliorneq kulturilu pillugit misilitsinneq ima paasineqassaaq pointilersuineq, nalunaarut manna malillugu utertitsiffigineqarnissamik qinnuteqaatit qanoq tulleriiaarneqarnissaannut aalajangiinermi atorneqartoq.
§ 11. Tamakkiisumik missingersuutit ima paasineqassapput filmiliornermi najoqqutassamut, ineriartortitsinermut, filmiliornissamut piareersarnermut, filmiliornermut filmilioreernerullu kingorna aningaasartuutit tamaasa, allaffissornermut nikingassutinullu nalorninassutsitullu killiliussat ilanngullugit.
§ 12. Siammasissumik siammarterineq ima paasineqassaaq filmiliamut ataatsimut tulluunnerpaanut, soorlu filmertarfiit aqqutigalugit, tv-eqarfinnut imaluunniit internetikkut isiginnaartarfinnut siammarterineq il.il., tassuunakkut filmiliat ataasiakkaat siunnerfittut nassuiagaannut nunanullu tamalaanut anngunnissaat pitsaanerpaamik qulakkeerneqassalluni.
Kapitali 2
Kalaallit filmiliaannut aamma filmilioqataaffigisanut aningaasatigut tapiissutit
Tapiissutip suunera amerlassusaalu
§ 13. Filmiliornermut aningaasatigut tapiissutit ingerlatsinernut ukununnga tunniunneqarsinnaapput:
1) Filmiliornermi najoqqutassaliorneq.
2) Filmiliornermut suliniutip ineriartortinnera.
3) Filmiliorneq.
4) Filmiliamik saqqummersitsineq, pilerisaarineq allanillu tuniniaanissamik suliniutit.
5) Filmiliamik takutitsineq.
6) Filmimik siammarterineq.
§ 14. Kalaallit Nunaanni Filminstitutti ingerlatsinernut § 13-mi taaneqartunut tapiissutinut najoqqutassanik erseqqinnerusunik, matumani ingerlatat ataasiakkaat qanoq paasineqarnissaannik ingerlatanullu ataasiakkaanut ataatsimulluunniit tapiisarnermut killiliussanik aalajangersaassaaq.
Imm. 2. Najoqqutassat Kalaallit Nunaanni Filminstituttip nittartagaani tamanut saqqummiunneqassapput.
§ 15. Kalaallit Nunaanni Filminstitutti filminut aliikkutassianut, oqaluttualianut nangeqattartulianut, filminut takinngitsunut, filminut pisimasuinnik tunngavilinnut, pisimasuinnik tunngavillit nangeqattaartunullu aningaasatigut tapiissutissat annerpaaffissaannik aalajangersaasinnaavoq.
Imm. 2. Kalaallit Nunaanni Filminstituttip tamanna immikkut ittumik pissutissaqarpat, aningaasat amerlanerpaaffissaattut aalajangersagaq sanioqqussinnaavaa.
Imm. 3. Aningaasat amerlanerpaaffissaat aalajangersarneqartut Kalaallit Nunaanni Filminstituttip nittartagaani tamanut saqqummiunneqassapput.
Piumasaqaatit
§ 16. Filmiliornermut aningaasatigut tapiissuteqartoqarsinnaavoq, piumasaqaatit makkua naammassineqarsimappata:
1) Piumasaqaatit qinnuteqarnermi periutsimut aalajangersarneqartut qinnuteqarnermi naammassineqassapput.
2) Qinnuteqaat filmiliortumit allamiilluunniit filmiliortumut sinniinissamut inatsisitigut pisinnaatitaaffeqarnerminik uppernarsaasinnaasumit atsiorneqarsimassaaq.
3) Filmiliorneq annertuumik siammarterneqartussatut naatsorsorneqarsimassaaq.
4) Filmip qanoq ittuussusia, §§ 3-9 takukkit, filmillu oqaluttuartaa (storyline) imarisaalu ataatsimut isigalugit allaaserineqarneri allassimassapput.
5) Filmiliornernut tapiissutinut piumasaqaatit Kalaallit Nunaanni Filminstituttip najoqqutassaanit aalajangersarneqartut qinnuteqaammi naammassineqassapput, tak. § 14.
§ 17. Ukununnga aningaasatigut tapiissuteqartoqarsinnaanngilaq
1) Qinnuteqarnissamut piffissarititaq nallereersoq filmilianut aallartinneqareersimasunut.
2) Ilinniarnernut.
3) Sakkunik, atortunik, nipilersuutinik, pequtinik, qarasaasianik imaluunniit qarasaasiami programminik pisinermut, taamaattoq tak. imm. 2.
Imm. 2. Filmiliornermut tapiiffigineqarnissamut qinnutigineqartumut pingaaruteqarluinnarpat, sakkunik atortunillu pisinermut aningaasatigut tapiissuteqartoqarsinnaavoq.
Qinnuteqarnermi periutsit
§ 18. Nalunaarut una malillugu filmiliornermut aningaasatigut tapiiffigineqarnissamik qinnuteqaat Kalaallit Nunaanni Filminstituttip qinnuteqarnermi immersuiffissiaa atorlugu elektroniskimik tunniunneqassaaq.
§ 19. Aningaasatigut tapiiffigineqarnissamik qinnuteqaat, minnerpaamik, imm. 3 naapertorlugu, uku pillugit paasissutissanik imaqassaaq:
1) Filmiliortup aqqa attaveqarfissatullu paasissutissai.
2) Filmiliortup filmip pilersinnissaanut, suliarinissaanut siammarternissaanullu isumassarsianut pisinnaatitaaffinnut pisarialinnut tamanut piginnittuuneranut uppernarsaat allagartarluunniit.
3) Tunisassiornerup ilai sorliit aningaasatigut tapiiffigineqarnissamik qinnutigineqarnersut nalunaarsorneri.
4) Filmiliornermut tamakkiisumik missingersuutit.
5) Filmiliornissamut pilersaarut.
6) Filmiliaq sumut qanorlu siammarterneqarnissaa naatsorsuutigineqarnersoq.
7) Filmiliornermut aningaasalersuinissamik pilersaarut, tassunga ilanngullugu pisortanit namminersortunilluunniit tapiissutit allat, sulianut filmiliornermut atassuserneqarsinnaasunut pissarsiarineqartut pissarsiarineqartussatulluunniit naatsorsuutigineqartut nalunaarsorneri.
Imm. 2. Qinnuteqaammut ilanngussatut makku ilanngunneqassapput:
1) Siammarterinissamut pilersaarummut uppernarsaat tak. imm. 1 nr. 6, aamma § 16, nr. 3.
2) Aningaasalersuinissamik neriorsuut, Letter of Commitmentimik taaneqartoq imaluunniit minnerpaamik taamaaqataanik uppernarsaammik allamik.
3) Qinnuteqaammi paasissutissat tunniunneqartut tamarmik eqqortuussusaannik uppernarsaat immersorneqarsimasoq filmiliortumiillu atsiorneqarsimasoq.
Imm. 3. Filminstitutti nalilersueqqissaarneq tunngavigalugu imm. 1-imi paasissutissat piumasaqaatigineqartut ilaat, imm. 2, nr. 1-imi aamma 2-mi allagartap ilanngussap piumasaqaatigineqartoq, ataaseq arlallilluunniit mininneqarsinnaasut kingusinnerusukkulluunniit nassiunneqarsinnaasut aalajangersinnaavoq.
§ 20. Kalaallit Nunaanni Filminstitutti § 18 malillugu qinnuteqaatinik tunniussinissamut piffissaliussanik aalajangersaasinnaavoq.
Imm. 2. Qinnuteqarnissamut piffissaliussaqarpat, qinnuteqaatit piffissaliussaq qaangiutereersoq tiguneqartut akuerineqarsinnaassanngillat.
Imm. 3. Qinnuteqarnissamut piffissaliussat Kalaallit Nunaanni Filminstituttip nittartagaani tamanut saqqummiunneqassapput.
§ 21. Kalaallit Nunaanni Filminstituttip aningaasatigut tapiissutinik qinnuteqaatit, tassaasut filmiliornermi najoqqutassanut aamma filmiliornissamut siunnersuutit, soorlu filminut aliikkutassianut, oqaluttualianut nangeqattaartunut, filmit takinngitsunut, filmit pisimasuinnik tunngavilinnut aamma pisimasuinnik tunngavilinnut nangeqattaartulianut, suliarinerini qulakkiissavaa filmiliornermi suliniutip eqqumiitsuliornikkut, aningaasaqarnikkut aamma teknikkikkut filmiliorsinnaanermut tunngasutigut naliliiffigineqarnissaa.
Imm. 2. Filmiliornermi suliniutip eqqumiitsuliornikkut aamma filmiliorsinnaanermut teknikkikkut nalilersorneqarneratigut qulakkeerneqassaaq, filmiliap eqqumiitsuliornikkut aamma teknikkikkut pitsaassusissaa filmiliornermi inuussutissarsiutigalugu suliaqartarnermi pitsaassutsimut piumasaqaatinik naammassinninnissaa naatsorsuutigineqarsinnaanersoq.
Imm. 3. Filmiliornermi suliniutip aningaasaqarnikkut nalilersorneqarnerani qulakkeerneqassaaq, qinnuteqartup filmiliassamut pilersaarutaa, aningaasartuutissanut missingersuutai tamarmiusut aamma aningaasalersuinissamut pilersaarutaa piviusorsiortutut isigineqarsinnaanersut.
§ 22. Kalaallit Nunaanni Filminstitutti aningaasatigut tapiiffigineqarnissamut qinnuteqaatinik suliarinninnermut, tassunga ilanngullugu aningaasatigut tunisassiornermilu teknikkimut tunngasut eqqarsaatigalugit eqqumiitsuliornikkut qinnuteqaammillu qanoq nalilersuisoqassanersoq pillugit najoqqutassanik aalajangersaassaaq.
Imm. 2. Najoqqutassat Kalaallit Nunaanni Filminstituttip nittartagaani tamanut saqqummiunneqassapput.
§ 23. Tapiissutissat akuerineqartut qinnuteqartup aqqani kontu pilersinneqarsimasoq innersuussaanut tunniunneqassapput. Kontu aningaaserivimmi Kalaallit Nunaanni, Danmarkimi imaluunniit Savalimmiuniittumi imaluunniit aningaaseriviup immikkoortortaqarfiani taakkunani inissisimasumiissaaq.
Imm. 2. Tapiissutit tunniunneqartinnagit qinnuteqartup aningaaserivimmit uppernarsaat saqqummiutissavaa, uppernarsarlugu qinnuteqartoq kontumik piginnittuusoq. Uppernarsaat kontop paasissutissartaanik kiisalu aningaaseriviup imaluunniit aningaaseriviup immikkoortortaqarfia, kontup ingerlanneqartup, aqqa aamma najugaa pillugit paasissutissanik imaqassaaq.
Imm. 3. Aningaasatigut tapiissutinik pissarsisoq tapiissutillu amerlassusaat pillugit paasissutissat Kalaallit Nunaanni Filminstituttip nittartagaani tamanut saqqummiunneqassapput.
Kapitali 3
Nunami allamiut filmiliornerannut utertitsineq
Aningaasartuutit utertinneqarsinnaatitaasut amerlassusaallu
§ 24. Qinnuteqarnikkut aningaasartuutit makku ilaannakortumik utertinneqarsinnaapput tak. § 27:
1) Kalaallit Nunaanni akileraarutigineqartunik Kalaallit Nunaanni sulinermi akissarsiat.
2) Nioqqutissanik kiffartuussinernillu Kalaallit Nunaanni pilersuisunit, Kalaallit Nunaanni akileraartartunit tunniunneqartunik pisiat.
Imm. 2. Aningaasartuutit akilerneqarsimasut utertitsivigineqarnissaannut qinnuteqarluni taamaallaat utertinneqarsinnaapput.
§ 25. Nioqqutissanik kiffartuussinernilluunniit pisinermi aningaasartuutit utertinneqarsinnaapput taamaallaat aningaasartuutit:
1) filmiliornermut toqqaannartumik attuumassuteqarpata,
2) filmiliornerup naammassinissaanut pisariaqarpata,
3) niuerfimmi akigitinneqartut nalinginnaasut malillugit akilerneqarsimappata, aamma
4) akilerneqarsimasutut uppernarsarneqarsinnaappata.
Imm. 2. Aningaasartuutit Kalaallit Nunaanni sulianut taamaallaat ilaannakortumik tunngassutillit, aningaasartuutit utertinneqarsinnaatitaasut taakku amerlassusaannut naapertuuttumik uppernarsarneqarsinnaappata ilanngunneqarsinnaapput.
§ 26. Aningaasartuutinik utertitsisoqarsinnaanngilaq:
1) ilinniakkanut tunngappata,
2) filmiliortumut akissarsiaappata tak. § 24, imm. 1, nr 1.
3) aningasalersuinermut akiitsunulluunniit tunngappata.
4) allaffissornermut, tassunga ilanngullugit nioqqutissanut kiffartuussinernullu akiligassanik tunisassiortumut ingerlatseqatigiiffinniilluunniit suleqataasunit ingerlatitseqqilluni akiliutaappata aamma tunisassiornermi sulianut aalajangersimasunut toqqaannartumik atassuteqanngitsumik ingerlatsinermi nalinginnaasumik aningaasartuutaappata.
5) kukkunersiuisumut aningaasartuutaappata.
Imm. 2. Aningaasartuutit allamit aningaasalersorneqareersimasut, aningaasartuutinut pineqartunut tunngatillugu, utertillugit akilerneqarsinnaanngillat (marloriaammik aningaasalersorneqarneq).
§ 27. Aningaasartuutit tapiiffigineqarsinnaatitaasut annerpaamik 25 procentiannik utertitsisoqarsinnaavoq, tak. imm. 3 aamma 4.
Imm. 2. Filmiliornermut ataatsimut aningaasat minnerpaaffissaattut annerpaaffissaattullu killiliussat aningaasanut inatsimmi aalajangersarneqarsimasut inorlugit sinnerlugilluunniit utertitsisoqarsinnaanngilaq, tak. imm. 3 aamma 4.
Imm. 3. Kalaallit Nunaanni Filminstituttip tapiissutit iluanni aningaasartuutit utertinneqarsinnaatitaasut 50 procentii tikillugit utertissinnaavai, tak. § 21, imm. 2 Filmiliortarneq pillugu Inatsisartut inatsisaanni, filmiliornermi:
1) aningaasartuutit utertinneqarsinnaatitaasut 5 mio. kr.-t sinnerpagit aamma,
2) Kalaallit Nunaanni sulinermi akissarsianut, Kalaallit Nunaanni akileraarutigineqartunik, ulluni sivikinnerpaamik 30-ni piffissaq tamakkerlugu minnerpaamik sulisunut 30-nut amerlassuseqartunik aningaasartuuteqartoqarsimappat.
Imm. 4. Kalaallit Nunaanni Filminstitutti, tapiissutit iluanni, aningaasat amerlanerpaaffissaattut killiussat aningaasanut inatsimmi, tak. § 21, imm. 2 Filmiliortarneq pillugu Inatsisartut inatsisaanni aalajangersarneqarsimasut qaavatigut 50 procentit tikillugit utertitsisinnaavoq filmiliornermi ataatsimi, filmiliornermi
1) imm. 3-mi, piumasaqaatit naammassineqarpata imaluunniit
2) utertinneqarsinnaatitaasunik minnerpaamik 2,5 mio. kr.-nik aningaasartuuteqarpat.
Imm. 5. Kalaallit Nunaanni Filminstituttip imm. 3 naapertorlugu utertitsivigineqarnissamut annertusisamik utertitsiviginninnermut qinnuteqaat imaluunniit imm. 4 naapertorlugu annertunerpaamik aningaasaliissutigineqarsinnaasup qaffanneqarnerata qinnuteqaammik tigusaqarpat, qinnuteqaatillu akuerineqarnerata aningaasaliissutit annertusineqarnissaat pisariaqalersippagu, Kalaallit Nunaanni Filminstitutti tamanna pillugu tunngavilersuilluni kultureqarnermut naalakkersuisoqarfimmut qinnuteqarsinnaavoq, Namminersornerullutik Oqartussat missingersuutinut malittarisassiaanni nalunaarummi aalajangersakkat naapertorlugit aningaasaliinissamut pisariaqartumik tunngavissaq pilersinneqarsinnaaqqullugu.
Utertitsinissamut piumasaqaatit
§ 28. Aningaasartuutinut utertinneqarsinnaatitaasunut taamaallaat taarsiisoqarsinnaavoq, piumasaqaatit tullinnguuttut tamarmik naammassineqarsimappata:
1) Qinnuteqarnermi periuseq pillugu kapitalimi 4-mi piumasaqaatit aalajangersarneqartut naammassineqassapput tak. §§ 29-32.
2) Filmiliorneq annertuumik siammarterinissamut naatsorsorneqarsimassaaq.
3) Filmiliamik tunisassiortoq piffissaq qinnuteqarfiusoq ukiunik kingullernik tallimanik sioqqullugu filmimik siammasissumik siammarterneqartussatut ittumik, utertitsivigineqarnissamik qinnutigineqartumik minnerpaamik ataatsimik tunisassiorsimassaaq.
4) Filmimik tunisassiorneq kalaallit filmiliortarneranni eqqumiitsuliornikkut teknikikkulluunniit ilisimasanik ineriartortitseqataassaaq.
5) Filmiliorneq kalaallit kulturiannik, oqaluttuarisaanerannik pinngortitaannillu ingerlatitseqataassaaq.
6) Filmiliorneq najukkami filmiliornermik suliassaqarfimmi sulisunik malunnaatilimmik atuiffiussaaq.
7) Filmiliorneq minnerpaamik 2 mio. kr.-nik tamakkiisumik missingersuuteqassaaq.
8) Filmimik tunisassiornerup piffissami qinnuteqarnermi aningaasalersuinerup tamarmiusup minnerpaamik 60 procentia uppernarsarsimassavaa.
9) Filmiliornermi tamakkiisumik missingersuutit minnerpaamik 25 procentiisa piffissami qinnuteqarnermi nunani allani aningaasalersuisunit ataatsimit arlalinniilluunniit pissarsiaanerat uppernarsarneqassaaq.
Qinnuteqarnermi periutsit
§ 29. § 24 naapertorlugu utertitsinissamik qinnuteqaat Kalaallit Nunaanni Filmistituttip qinnuteqarnissamut immersugassatut innersuussaa atorlugu digitalikkut nassiunneqassaaq.
§ 30. Qinnuteqaat, minnerpaamik, taamaattoq tak. imm. 3 naapertorlugu, paasissutissanik makkunannga imaqassaaq:
1) Filmiliortup aqqa attaveqarfissatullu paasissutissai.
2) Filmiliortup filmip pilersinnissaanut, suliarinissaanut siammarternissaanullu isumassarsianut pisinnaatitaaffinnut pisarialinnut tamanut piginnittuuneranut uppernarsaat allagartarluunniit.
3) Filmiliornermi tamakkiisumik missingersuutit.
4) Aningaasartuutissat utertinneqarsinnaatitaasut naatsorsuutigineqartut.
5) Filmiliornissamut pilersaarut.
6) Filmiliaq sumut qanorlu siammarterneqarnissaa naatsorsuutigineqarnersoq..
7) Filmiliornermut aningaasalersuinissamik pilersaarut, tassunga ilanngullugu pisortanit namminersortumilluunniit tapiissutit allat, sulianut filmiliornermut atassuserneqarsinnaasunut pissarsiarineqartut pissarsiarineqartussatulluunniit naatsorsuutigineqartut nalunaarsorneri.
8) Uppernarsarneqarsimasumik aningaasalersuilluni aningaasalersorneqanngitsumik aningaasalersuineq.
Imm. 2. Qinnuteqaammut ilanngussatut, taamaattoq tak. imm. 3 naapertorlugu makku ilanngunneqassapput:
1) Siammarternissaa pillugu, tak. § 28, nr. 2, aamma filmiliornermut piumasaqaatit pillugit, tak. § 28, nr. 3, isumaqatigiissutit uppernarsaataat.
2) § 28, nr. 4-6-imi piumasaqaatit qanoq eqquutsinneqarnersut pillugit nassuiaat.
3) Aningaasalersuinissamik neriorsuut, Letter of Commitmentimik taaneqartoq imaluunniit minnerpaamik taamaaqataanik uppernarsaammik allamik.
4) Pisortanit imaluunniit namminersortunit tapiissutinut allanut, sulianut tunisassiornermut atassuserneqarsinnaasunut tapiissutigineqartunut tapiissutigineqartussatullu naatsorsuutigineqartunut uppernarsaat.
5) Qinnuteqaammi paasissutissat tunniunneqartut tamarmik eqqortuussusaannik uppernarsaat immersorneqarsimasoq filmiliortumiillu atsiorneqarsimasoq.
6) Tunisassiorneq kulturilu pillugit misissuinermi apeqqutinut akissutit, tak. § 10.
Imm. 3. Filminstitutti nalilersueqqissaarneq tunngavigalugu imm. 1-imi paasissutissat piumasaqaatigineqartut ilaat ataaseq arlallilluunniit aamma imm. 2-mi, nr. 1-3, ilanngussat piumasaqaatigineqartut, mininneqarsinnaasut kingusinnerusukkulluunniit nassiunneqarsinnaasut aalajangersinnaavoq.
§ 31. Kalaallit Nunaanni Filminstitutti § 24, imm.1, malillugu qinnuteqaatinik tunniussinissamut piffissaliussanik aalajangersaasinnaavoq.
Imm. 2. Qinnuteqarnissamut piffissaliussaqarpat, qinnuteqaatit piffissaliussaq qaangiutereersoq tiguneqartut akuerineqarsinnaassanngillat.
Imm. 3. Qinnuteqarnissamut piffissaliussat Kalaallit Nunaanni Filminstituttip nittartagaani tamanut saqqummiunneqassapput.
§ 32. Kalaallit Nunaanni Filminstitutti utertitsivigineqarnissamut qinnuteqaatinik suliarinninnermut najoqqutassanik sukumiinerusunik aalajangersaassaaq.
Imm. 2. Najoqqutassat Kalaallit Nunaanni Filminstituttip nittartagaani tamanut saqqummiunneqassapput.
Utertitsitassanik tunniussineq
§ 33. Utertitsivigineqarnissamut qinnuteqaat akuerineqarpat, qinnuteqartoq naatsorsuutinut kukkunersiornissaannullu piumasaqaatit naammassinerisigut aningaasartuutinik utertitsinneqarsinnaatitaasunik utertitsivigineqassaaq, tak. §§ 35-37.
Imm. 2. Utertitsineq naatsorsuutit tiguneriniit kingusinnerpaamik qaammatit pingasut qaangiunnerini pissaaq.
§ 34. Qinnuteqartup aningaaserivimmi kontomut innersuussaanut utertitsisoqassaaq, konto qinnuteqartup aqqani pilersinneqarsimassaaq. Konto aningaaserivimmi imaluunniit aningaaseriviup immikkoortortaqarfiani ingerlanneqassaaq.
Imm. 2. Akiliisoqannginnerani qinnuteqartup aningaaserivimmit uppernarsaat saqqummiutissavaa, qinnuteqartoq kontomut piginnittuuneranik uppernarsaasumik. Uppernarsaat konto pillugu paasissutissanik kiisalu aningaaseriviup imaluunniit immikkoortortaqarfiup, kontop ingerlanneqarfiani, aqqa najugaqarfialu pillugit paasissutissanik imaqassaaq.
Kapitali 4
Naatsorsuutit, kukkunersiorneri kiisalu tapiissutit akuerineqartut atorunnaarsinneri utimullu akilerneqarneri
§ 35. Filmiliornermut aningaasatigut tapiissutinik tigusisut nunanilu allamiut filmiliornerannut utertitanik tigusisut naatsorsuutinik atsiorsimasunik tak. § 39, imm. 2, filmiliornerup naammassinerata kingorna kingusinnerpaamik qaammatit pingasut kingorna Kalaallit Nunaanni Filminstituttimut nassiussissapput. Kalaallit Nunaanni Filminstitutti immikkut ittunik pissutissaqartillugu piffissaliussamik sivitsuisinnaavoq.
§ 36. Aningaasatigut tapiissutinik kr. 150.000 inorlugit tigusisoq utertitsivigineqartorluunniit tapiissuteqartartumit tapiissuteqartartuniilluunniit arlalinnit aningaasatigut tapiissutinik tigusaqarsimaguni, tapiissutinik tigusaqartoq tamanna pillugu uppernarsaammik Kalaallit Nunaanni Filminstituttimut nassiussissaaq.
§ 37. Tapiissutit imaluunniit utertitsissutit aningaasartaasa minnerpaamik 150.000 kr.-uppata, naatsorsuutit atsiorneqarsimasut, tak.§ 35, akuerisaasumik kukkunersiuisumit imaluunniit kukkunersiuinermik suliffeqarfimmit kukkunersiorneqarsimassapput.
Imm. 2. Kukkunersiuinermi misissorneqassapput:
1) naatsorsuutit eqqortuunersut aamma malunnaatilimmik kukkuneqarnersut amigaateqarnersullu,
2) tapiiffigineqarnissamut utertitsivigineqarnissamulluunniit piumasaqaatit naammassineqarsimanersut,
3) tapiissutit siunertamut atorneqarsimanersut,
4) tapiissutinik utertitanilluunniit tigusaqartoq aningaasaqarnermik pisariaqartumik mianerinnissimanersoq, aamma
5) ingerlatat pillugit paasissutissat tapiissutinik utertitanilluunniit tigusaqartup Kalaallit Nunaanni Filminstituttimut nalunaarutigisai uppernarsarneqarsimanersut.
§ 38. Kalaallit Nunaanni Filminstituttip aningaasatigut tapiissutinik utertitanilluunniit tigusaqartoq filmiliorneq aningaasatigut tapiiffigineqartoq utertitsivigineqartorluunniit pillugit paasissutissanik pingaarutilinnik nassiussinissaanik sukkulluunniit piumaffigisinnaavaa.
§ 39. Tapiissutit utertinneqartussatulluunniit akuerineqartut tamakkiisumik ilaannakortumilluunniit utimut akileqquneqarsinnaapput tapiissutinik utertinneqartunilluunniit tigusisup:
1) tapiissutit utertitalluunniit tigusinnaanissaannut piumasaqaatit naammassinnissinnaajunnaarpagit,
2) tapiiffigineqarnissamut utertitsivigineqarnissamulluunniit piumasaqaatit malinngippagit,
3) paasissutissat pingaarutillit eqqunngitsut tunniussimappagit,
4) arlaleriarluni kajumissaarneqaraluarluni paasissutissanik pisariaqartunik nassiussisimanngitsoq,
5) filmiliornerup naammassinerata kingorna kingusinnerpaamik qaammatit pingasut kingorna naatsorsuutit atsiorsimasut nassiussimanngippagit, tak. imm. 2, imaluunniit
6) aningaasaliissutit amerlavallaartut tiguneqarsimappata, tassa imaappoq tapiissutinik utertitanilluunniit tunniussisoqareernerata kingorna aningaasaliissutinik allanik pissarsiaqartoqarsimappat, aningaasartuutinut atorneqartunut aningaasalersuinerup tamarmiusup naatsorsuutini tunniunneqartuni aningaasartuutit piviusumi akilerneqartunut aningaasartuutinut sanilliullugit annertuneruppata.
Imm. 2. Naatsorsuutit atsiorsimasut filmiliornerup naammassinerata kingorna kingusinnerpaamik qaammatit pingasut kingorna nassiunneqarsimanngippata, tapiissutit 10 procentii utimut akilerneqassapput. Naatsorsuutit filmiliornerup naammassinerata kingorna kingusinnerpaamik qaammatit aqqaneq-marluk kingorna nassiunneqarsimanngippata, tapiissutit tamarmik utimut akilerneqassapput. Kalaallit Nunaanni Filminstitutti immikkut ittunik pissuteqartoqarnerani utertitsinissamik piumasaqaammik saneqqutsisinnaavoq. Akiligassamik utertitsinissamik piumasaqaammik saneqqutsinissamik pilersaarut aningaasaqarnermut naalakkersuisoqarfimmut akuerisassanngorlugu saqqummiunneqassaaq.
Imm. 3. Kalaallit Nunaanni Filminstituttip tapiissutinik tigusisinnaanissamut aamma tapiissutisinissamut piumasaqaatinik malinninnissamut piumasaqaatinik suli naammassinninnersoq pillugu uppernarsaatinik pisarialinnik tapiissutinik tigusisoq piumaffigisinnaavaa, tapiiffigineqartup tapiissutip tunniunneqarneranut piumasaqaatit naammassineqarnissaat ilanngullugu.
Kapitali 5
Pineqaatissiissutit
§ 40. Aningaasatigut tapiiffigineqarnissamik utertitsivigineqarnissamilluunniit qinnuteqarnermut naatsorsuutinillu nassiussinermi imaluunniit paasissutissanik pingaarutilinnik nassiussinissamik piumasaqarfigineqarnerup kingorna paasissutissanik eqqunngitsunik, amigartunik paatsoorneqarsinnaasunilluunniit tunniussisoq Kalaallit Nunaanni Pinerluttulerinermi inatsimmi malittarisassat malillugit akiligassinneqarnermik pineqaatissinneqarsinnaavoq.
Kapitali 6
Atuutilersitsineq
§ 41. Saqqummersinneqarnerata kingorna aqaguani nalunaarut atuutilersinneqassaaq.
Imm. 2. Kalaallit Nunaanni nunani allani filmiliortartunut aningaasartuutinik akilerneqareersimasunik utertitsisarneq pillugu malittarisassat 1. januar 2027 atuutilissapput.
Namminersorlutik Oqartussat, ulloq 4. novembari 2026
Nivi Olsen (atsior.)
Ilinniartitaanermut, Kultureqarnermut, Timersornermut Ilageeqarnermullu Naalakkersuisoq
/Karl Davidsen (atsior.)