Avatangiisit innarlitsaaliorneqarnissaanik Inatsisartut inatsisaanni nr. 9-mi, 22. november 2011-meersumi § 10, imm. 1, nr. 11 aamma § 66, imm. 1, imm. 3 naapertorlugit aalajangersarneqarput:

Nassuiaatit

  § 1.  Nalunaarummi matumani immiaaqqat pineqartut tassaapput imeruersaatit ethanol-imik akullit aammalu suliarineqarnerminni malt, humle mamarsaataasinnaasullu imermut akulerullugit qappiortinneqarsimasut pineqarput.
  Imm. 2.  Nalunaarummi matumani imeruersaatit kulsyrimik akullit pineqartut tassaapput imeruersaatit imermi namminerisaminnik imaluunniit akuliunneqartumik kuldioxid-itallit, aammalu tungusunnissaatinik mamarsaatinillu akuneqarsimasinnaasut, kisiannili ethanol-imik akuneqarsimanngitsut pineqarput.
  Imm. 3.  Nalunaarummi matumani poortuutit utertittakkat pineqartut tassaapput poortuutit, utertitsisarnermut ilaatinneqartut, tassanilu poortuutit amerlanersaat atuisunit imaarneqareernerminni immeqqitassanngorlugit utertinneqartarput.
  Imm. 4.  Nalunaarummi matumani poortuutinik ataasiaannarluni atortakkanik utertitsisarnermi pineqartoq tassaavoq poortuunik utertitsisarneq, poortuutit atuisunit imaarneqareernerini niuertarfimmut, atortut atoqqitassanngorlugit utertinneqartarnissaannik qulakkeerisussamut utertinneqartarnissaannik qulakkeeriviusoq.

Utertitsisarnerit

  § 2.  Immiaaqqat imeruersaatillu kulsyrimik akullit taamaallaat nalunaarummut uunga ilanngussami immikkut nalunaarsukkanik eqqortitsisunik utertittakkanik pooqartillugit tuniniarneqarsinnaapput.

  § 3.  Immiaaqqat imeruersaatillu kulsyrimik akullit taamaallaat utertitsisarnermut, Naalakkersuisut akuerisaannut ilaatinneqarsinnaasunik ataasiarluni atorneqarsinnaasunik pooqartillugit tuniniarneqarsinnaapput.

  § 4.  Immiaaqqat maqittakkat, atuisunut sassaalliutissatut neriniartarfinnut, akunnittarfinnut sassaallertarfinnullu tunineqartut taamaallaat nappartaaqqanut, § 1, imm. 3 imaluunniit imm. 4 naapertorlugit utertitsisarnermut, Naalakkersuisut akuerisaannut ilaatinneqarsinnaasunik pooqartillugit tuniniarneqarsinnaapput.

  § 5.  Immiaaqqat literimut ethanol-imik 0,5 procentimik minnerusumilluunniit akullit §§ 2-4-mut ilaatinneqanngillat.
  Imm. 2.  Poortuutissaq, § 2 naapertorlugu puukutut utertitassatut akuerisaasoq, imaluunniit § 3 imaluunniit § 4 naapertorlugu utertitsisarnermut ilaatinneqarsinnaasoq immiaaqqat imeruersaatillu kulsyrimik akullit, imaluunniit immiaaqqat imm. 1-imut ilaatinneqartut saniatigut imeruersaatinut allanut atorneqassappat, atuisussamut kingullermut tunisinermi poortuutissap akilersinneqartussap, poortuutissap immiaaqqamut imeruersaammullu kulsyrimik akullip atorneqartup annertoqataata utertinneqarnissaanut akiliisitsisoqassaaq.

  § 6.  Kinaluunniit immiaaqqanik imeruersaatinillu kulsyrimik akulinnik sunilluunniit tuniniagaqartoq suut poorineqarnerannik, puukunik utertitsisarnerup qanoq ingerlaneranik, tassungalu ilanngullugu puukut utertinneqartartut procentit qassiunerinik aamma puukut utertinneqartut qanoq akilerneqartarnerinik Naalakkersuisut piumasaqarnerisigut paasissutissiinissamut aammalu poorineqartunut misiligutinik tunniussinissaminut pisussaaffeqarpoq. 
  Imm. 2.  Avatangiisit mingutsinneqannginnissaat aamma eqqaavilerisut pisariaqanngitsumik persaqusersorneqannginnissaat suusupagineqarsimasut paasineqarpat, Naalakkersuisut puukut utertinneqartut qanoq akilerneqartarnissaat aamma puukunik utertitsisarnermi periaaseq pillugit immikkut piumasaqaatinik aalajangersaasinnaapput.

  § 7.  Immiaaqqat imeruersaatillu kulsyrimik akullit, nalunaarummut ilanngussami immikkut nalunaarsukkanik naammassinniffiunngitsunik puullit Kalaallit Nunaata kitaani tuniniarneqarsinnaanissaannut Naalakkersuisut akuersisinnaapput, tamanna pilersuinermi ajornakusoortitsinermik pissuteqarpat imaluunniit tuniniarneqartut ataasiakkaat amerlanngippata. Naalakkersuisut utertitsisarnermik, poortuutissat atoqqitassanngorlugit utertinneqarsinnaanerinut qulakkeeriviusumik pilersitsinissamut piumasaqaatinik aalajangersaasinnaapput.

Nakkutilliineq pineqaatissiisarnerlu

  § 8.  Nalunaarummi matumani maleruagassat malinneqarnerannut kommunalbestyrelsi nakkutilliisuuvoq.
  Imm. 2.  Poortuutissanik nalunaarummik malinniffiunngitsunik piiaanissamut kommunalbestyrelsi peqqusisinnaavoq.
  Imm. 3.  Aammattaaq nakkutilliinermut atuutsitsinermullu avatangiisit innarlitsaaliorneqarnissaanik Inatsisartut inatsisaanni kapitali 12-imi maleruagassat atuutsinneqarput.

  § 9.  Nalunaarut manna naapertorlugu aalajangiinerit tamarmik avatangiisit innarlitsaaliorneqarnissaanik Inatsisartut inatsisaanni kapitali 14-imi maleruagassat naapertorlugit maalaarutigineqarsinnaapput.

  § 10.  §§ 2-4-mik, § 5, imm. 2 aamma § 6, imm. 1-imik unioqqutitsinermi akiligassanngortitsisoqarsinnaavoq. Tamannattaaq § 6, imm. 2, § 7 aamma § 8, imm. 2 naapertorlugu piumasaqaatinik peqqussutinillu unioqqutitsinermut atuuppoq.
  Imm. 2.  Ingerlatseqatigiiffiit il.il. (suliffeqarfiit) Kalaallit Nunaannut pinerluttulerinermut inatsimmi kapitali 5-imi maleruagassat naapertorlugit akiliisussanngortinneqarsinnaapput.

Atuutsitsilernermut, atorunnaarsitsinermut naalagaaffiullu immikkoortanut  aalajangersakkat

  § 11.  Nalunaarut ullup saqqummiunneqarfimmi aqaguani atuutilissaaq. 
  Imm. 2.  Tamatuma peqatigisaanik immiaaqqat imeruersaatillu kulsyrimik akullit puui pillugit Namminersornerullutik Oqartussat nalunaarutaat nr. 16, 28. maj 2002-meersoq atorunnaarsinneqarpoq.

  § 12.  Nalunaarut sakkutooqarfimmut Pituffimmiittumut atuutinngilaq.

Namminersorlutik Oqartussat, ulloq 25. oktober 2019

Kim Kielsen

/

Mette Skarregaard Pedersen