Quppernerup imai iserfigikkit
Oqaatsit toqqakkit
Ujaasinermut uterit
Allaffissornikkut najoqqutassiat
Nr. 49
28. septembarip 2023
Akuerineqarpoq

Imeruersaatit immiaaqqallu puui pillugit Namminersorlutik Oqartussat nalunaarutaat

Avatangiisit innarlitsaaliorneqarnissaanik Inatsisartut inatsisaanni nr. 9-mi, 22. november 2011-meersumi § 10, imm. 1, nr. 11, 12 aamma 20, § 35, imm. 3 aamma § 66, imm. 3 naapertorlugit uku aalajangersarneqarput:

 

Atuuffissaa

 

§ 1. Nalunaarummut ilaanngillat:

1)  Poortuutit 4,9 literimik imaqqortussusillit imaluunniit 0.125 literi ataallugu imaqarsinnaasut.

2)  Immiaaqqanut maqitsivik.

3)  Dunkit.

4)  Viinninut imigassanullu poorineqartartut, taakkununnga viinnit puaasartuliortut ilanngullugit.

5)  Poortuutissat immummit tunisassianit imaqartut.

  Imm. 2. Nalunaarummut ilaanngillat poortuutit imeruersaatinik imaqartut angalanermi akileraarutitaqanngitsunik Kalaallit Nunaannut nassarlugit eqqunneqarsinnaasut.

 

Nassuiaatit

 

  § 2.  Nalunaarummi matumani uku imatut paasineqassapput:

1) Poortuutit utertittakkat: Qillertuusat aamma puiaasat, igalaaminermik, aluminiumik, plastikkimik imaluunniit sisammik sanaajusut, immiaaqqanik, imeruersaatit kulsyritallit, imeruersaatit kulsyritaqanngitsut, paarnanit naatitanillu saftiliat aamma saftiliassaq kimittuumik akulik.

2)  Immiaaqqat:, suliarineqarnerminni immiassat, sungarnitsussat mamarsaataasinnaasullu imermut akulerullugit qappiortinneqarsimasut.

3)  Imeruersaatit kulsyrimik akullit: Imeruersaatit imermi namminerisaminnik imaluunniit akuliunneqartumik kuldioxid-itallit, aammalu tungusunnissaatinik mamarsaatinillu akuneqarsimasinnaasut,tassunga ilaallutik sodavandit, imeruersaatit eqeersaatitallit, ciderit aamma sodavandit imigassanik aalakoornartulinnik akullit.

4)  Imeruersaatit kulsyretaqanngitsut: Imeruersaatit imerneqarnissaminnut piareeqqasut, kulsyritaqanngitsut, tassunga ilaallutik, imeq puilasumeersoq, imeq, imeruersaat tungusunnitsoq, tii nillertoq aamma kaffi nillertoq.

5)  Poortuutinik utertitsisarneq: Poortuutinik utertitsisarneq, poortuutit atuisunit imaarneqareernerminni tuniniaasumut, atortut atoqqitassanngorlugit utertinneqartarnerinik isumakkeerisussamut utertinneqarnissaannik qulakkeeriffiusoq.

6)  Poortuutinik aqutsisoq: Poortuutinik utertitsisarnerup ingerlanneqarneranut akisussaasuusoq.

7)  Atueqqittarneq: Suleriaaseq, poortuutit ikinnerpaamik aalajangersimasumik amerlassusilikkanik atoqqinneqarnissaannik imaluunniit allatut atoqqinneqarnissaannik allanngortinneqarnerminnilu iluaqutaalernissaannik qulakkeerinissaq siunertaralugu ilusiligaasoq.

 

Poortuutinik utertitsisarnerit

 

  § 3.  Poortuutit utertinneqartussat Kalaallit Nunaannut eqqunneqaqqusaanngillat imaluunniit tuniniaqqusaanngillat, poortuutit utertitsisarnernut periusiusunut Naalakkersuisut akuerisimasaannut ilaareersimanngippata. Naalakkersuisut poortuutit allat ingerlaavartumik utertitsisarnernut ilannguttarsinnaavaat.

  Imm. 2.  Pisiniarfiit poortuutinik tunisisartut poortuutinik, imaarneqareernerminni atuisunit utertinneqartunik tigusinissamut, atoqqitassanngorlugillu utertitsinissamik qulakkeerinissamut pisussaaffeqarput.

  Imm. 3.  Pisiniarfiit poortuutinik tunisisartut atuisut poortuutinik imaqanngitsunik utertitsineranni poortuutip akia utertitsinnerani akilissavaat.

  Imm. 4.  Sumiiffiit atuisunut sassaallertartut, taakkununngalu neriniartarfiit, akunnittarfiit sassaallertarfiillu ilanngullugit poortuutinik imaqanngitsunik poortuutinik aqutsisumut utertitsinissamut pisussaaffeqarput.

  Imm. 5.  Pilersuinermi ajornartorsiortoqarpat, ikittuinnarnilluunniit tunisaqartoqarpat imaluunniit pissutsinik immikkut ittunik allanik atuuttoqarpat Avatangiisinut suliassaqarfimmut Naalakkersuisoq imm. 1-imi piumasaqaammik saneqqutsinissamut akuersissummik piumasaqaatitalimmik nalunaaruteqarsinnaavoq.

 

Nakkutilliineq

 

  § 4.  Kommunalbestyrelsi nalunaarummi matumani maleruagassanik nakkutilliisussaatitaavoq.

  Imm. 2.  Kommunalbestyrelsi immiaaqqanik, imeruersaatinik kulsyrinik akulinnik, imaluunniit imeruarsaatit allat, tuniniaanermi nalunaarummi matumani piumasaqaatit imaluunniit taanna naapertorlugu piumasaqaatit tamanna tunngavigalugu aalajangersarneqartut uniorlugit tuniniaasoqarpat, tassungalu ilanngullugu poortuutit poortuutinik utertitsisarnermut Naalakkersuisunit akuerisaanit ilaanngitsut atorlugit tuniniaasoqarpat peqqussuteqarsinnaavoq inerteqquteqarsinnaallunilu. 

  Imm. 3. Aammattaaq nakkutilliinermut atuutsitsinermullu avatangiisit innarlitsaaliorneqarnissaanik Inatsisartut inatsisaanni kapitali 12-imi maleruagassat atuutsinneqarput.

 

Pineqaatissiisarnermut aalajangersakkat

 

  § 5.  § 3, imm. 1- 4-mik imaluunniit § 3, imm. 5 naapertorlugu immikkut ittumik akuersissummi piumasaqaatinik, kiisalu § 4, imm. 2 naapertorlugu peqqussummik inerteqqummilluunniit unioqqutitsisoqarnerani Kalaallit Nunaanni pinerluttulerinermut inatsimmi maleruagassat naapertorlugit pillaammik akiliisitsinikkut pineqaatissiisoqarsinnaavoq.

  Imm. 2. Imm. 1 naapertorlugu suliat Kalaallit Nunaanni Eqqartuussivinnut siullertut suliakkiissutigineqarsinnaapput.

 

Atuutsitsilernermut atorunnaarsitsinermullu aalajangersakkat

 

  § 6.  Nalunaarut 1. januaari 2024 aallarnerfigalugu atuutilerpoq.

  Imm. 2.  Tamatuma peqatigisaanik immiaaqqat imeruersaatillu kulsyrimik akullit puui pillugit Namminersornerullutik Oqartussat nalunaarutaat nr. 16, 25. oktobari 2019-imeersoq atorunnaarsinneqarpoq.

 

  § 7.  Immiaaqqat imeruersaatillu kulsyrinik akullit, utertitsisarnermut ilaasunik immeqqittakkanik puullit, nalunaarutip matuma atuutilinnginnerani akuerineqarsimasut akuersissummik nutarteriffigineqaqqinnissaminnut piumasaqaatitaqassanngillat.

 

 

Namminersorlutik Oqartussat, ulloq 28. september 2023

 

 

Kalistat Lund (atsior.)

Nunalerinermut, Imminut Pilersornermut, Nukissiutinut Avatangiisinullu Naalakkersuisoq

 

 

/ Natuk Lund Olsen (atsior.)