Avatangiisit innarlitsaaliorneqarnissaannik Inatsisartut peqqussutaanni nr. 12, 22. december 1988-imeersumi, Inatsisartut peqqussutaatigut nr. 7, 13. maj 1993-imeersukkut allanngortinneqartumi, § 7, imm. 1, nr. 15, § 15 aamma § 46, imm. 2 naapertorlugit aalajangersarneqarput:

Kitaani utertitsisarneq

§ 1. Immiaaqqat imeruersaatillu kulsyrimik akullit taamaallaat tuniniarneqarlutillu sassaalliutigineqaqqusaapput utertittakkanik pooqartillugit, nalunaarummut uunga ilanngussami immikkut nalunaarsukkanik eqqortitsisunik.
Imm. 2. Puut utertittakkat nalunaarummi uani pineqartut, tassaapput puut utertitsisarnermi atorneqartut, atuisumit imaarneqareernermikkut amerlanerpaartaat immeqqitassanngorlugit utertinneqartartut.

Avannaani Tunumilu utertitsisarneq

§ 2. Immiaaqqat imeruersaatillu kulsyrimik akullit taamaallaat tuniniarneqarlutillu sassaalliutigineqaqqusaapput ataasiarluni atorneqarsinnaasunik pooqartillugit utertitsisarnermi Naalakkersuisut akuerisaanni ilaatinneqarsinnaasunik.
Imm. 2. Ataasiarluni atorneqarsinnaasunik puunik utertitsisarnermi periaaseq nalunaarummi uani pineqartoq tassaavoq akiliuteqartarneq poorineqartut atuisumit imaarneqareernermikkut pisiniarfimmut, pilersuisut aqqutigalugit poorineqartut atoqqinneqarnissaannut utertitsinissamik qularnaarisussamut, utertinneqarnissaannik qularnaarisoq.

Ataatsimut aalajangersakkat

§ 3. Kinaluunniit immiaaqqanik imeruersaatinillu kulsyrimik akulinnik sunilluunniit tuniniaallunilu sassaalliuteqartartoq suut poorineqarnerannik, puukunik utertitsisarnerup qanoq ingerlaneranik, tassunga ilanngullugu puukut utertinneqartartut procentit qassiunerannik aamma puukut utertinneqartut qanoq akilerneqartarnerannik, naalakkersuisut piumasaqarnerisigut paasissutissiinissamut aammalu poorineqartunut misiligutinik tunniussinissaminut pisussaavoq.
Imm. 2. Imm. 1 naapertorlugu paasissutissiissutigineqartut il.il. takutippassuk, avatangiisit mingutsinneqannginnissaat aamma eqqaavilerisut persaqusersorneqannginnissaat suusupagineqarsimasut, taava naalakkersuisut immikkut piumasaqaatinik aalajangersaasinnaapput, soorlu puukut utertinneqartut qanoq akilerneqartarnissaat aamma puukunik utertitsisarnermi periaaseq pillugit.

§ 4. Pilersuinikkut ajornartorsiortoqalerpat pissutsilluunniit immikkut ittut allat naatsorsuutigisariaqalerpata, Avatangiisinut Pinngortitamullu Naalakkersuisup akuersissutigisinnaavaa immiaaqqat imeruersaatillu kulsyrimik akullit ataasiaannarluni atorneqarsinnaasunik pooqartillugit tuniniarneqarlutillu sassaalliutigineqarsinnaanissaat.

Nakkutilliineq

§ 5. Nalunaarummi uani malittarisassat malinneqarnersut kommunalbestyrelsit nakkutigissavaat.
Imm. 2. Puut qanoq ittuussutsimikkut nalunaarummi uani pineqartunut naapertuutinngitsut peerneqarnissaat pillugu kommunalbestyrelsi peqqusilluni nalunaaruteqarsinnaavoq.
Imm. 3. Nakkutilliinermut atortitsinermullu Avatangiisit innarlitsaaliorneqarnissaat pillugu inatsisartut peqqussutaanni kapitali 4-mi § 44, imm. 2-mi malittarisassat aamma atuupput.

Naammagittaalliuuteqarneq

§ 6. Nalunaarut una naapertorlugu aalajangikkat tamarmik Avatangiisit innarlitsaaliorneqarnissaat pillugu inatsisartut peqqussutaanni kapitali 10-mi malittarisassat naapertorlugit naammagittaalliuutigineqarsinnaapput.

Pineqaatissiisarnermut aalajangersakkat

§ 7. § 1, imm. 1-imi, § 2, imm. 1-imi aamma § 3, imm. 1-imi aalajangersakkanik kiisalu § 3, imm. 2 naapertorlugu piumasaqaatitut aalajangersakkanik unioqqutitsinerit akiliisitaanermik pineqaatissinneqaatigineqarsinnaapput.

§ 8. Aktiaateqarluni piginneqataassuteqarluniluunniit ingerlatseqatigiiffik, piginneqatigiilluni ingerlaatseqatigiiffik (piginneqatigiiffik) assigisaalluunniit unioqqutitsisuuppat ingerlatseqatigiiffik inatsisini taama isigineqarnini naapertorlugu akiliisussanngortinneqarsinnaavoq. Namminersornerullutik Oqartussat, kommunit imaluunniit kommunit suleqatigiiffiat unioqqutitsisuuppata Namminersornerullutik Oqartussat, kommunit kommunilluunniit suleqatigiiffii taamaannermissut akiliisussanngortinneqarsinnaapput.

Atuutilersitsinermi aalajangersakkat

§ 9. Nalunaarut 1. august 2002-mi atuutilersinneqarpoq tassungalu peqatigitillugu atorunnaarsinneqarpoq immiaaqqat imeruersaatillu kulsyremik akullit puui pillugit nalunaarut nr. 8, 11. marts 1998-imeersoq

§ 10. Nalunaarut una atuutinngilaq Kalaallit Nunaata illersornissaa pillugu isumaqatigiissut 27. april 1951-imeersoq naapertorlugu danskit amerikamiullu illersorfissatut pilersitaanni.

Namminersornerullutik Oqartussat, ulloq 28. maj 2002.

Edward Geisler

/

Hans J. Høyer

Puiaasap titartarneqarnera 1

Puiaasap titartarneqarnera 2

Puiaasap titartarneqarnera 3

Puiaasap titartarneqarnera 4