Kapitali 1
Atuuffia

  § 1.  Inatsisartut inatsisaat manna Kalaallit Nunaanni inissialiortiternermut tapersiissuteqartarneq pillugu Inatsisartut peqqussutaat nr. 10, 22. december 1986-imeersoq, inissialiornermut, illunut ataatsimoorussanut, illuliassanut il.il. tapersiissuteqartarneq pillugu Inatsisartut peqqussutaat nr. 1, 9. april 1992-imeersoq, inissialiornermut tapersiissuteqartarneq pillugu Inatsisartut peqqussutaat nr. 11, 19. november 2007-imeersoq atuuttuusimasut naapertorlugit Namminersorlutik Oqartussanut taarsigassarsianut ingerlasunut atorneqassaaq.

  § 2.  Inatsisartut inatsisaanni matumani aalajangersakkat naapertorlugit Naalakkersuisut:

1)  akiitsullit nikinnissaannut akuersissuteqarsinnaapput,

2)  allannguisinnaapput nuussisinnaallutillu, kiisalu

3)  taarsigassarsianik ingerlasunik isumakkeerinninnissamut akuersissuteqarsinnaapput.

  § 3.  Inatsisartut inatsisaanni matumani aalajangersakkat naapertorlugit Naalakkersuisut taarsigassarsianut ingerlasunut akilersuutinut aamma taarsigassarsianik ingerlasunik allannguilluni taarsigassarsinermut tapiissuteqarsinnaapput.

Aalajangersakkat tamanut atuuttut

  § 4.  Inissiaq ingerlasunik taarsigassarsiaqarfiusoq sukkulluunniit ikuallattoornissamut ajoqusernissamullu sillimmaserneqarsimassaaq.

  § 5.  Akiitsullit nikinnissaanut, allannguinissamut, nuussinissamut isumakkeerinissamullu allakkatigut qinnuteqaat Naalakkersuisuni suliarineqartussanngorlugu nassiunneqassaaq.
  Imm. 2.  Taarsigassarsiallip Naalakkersuisunit tapiissutitut tiguneqartut tunngavissaqanngitsut, qinnuteqaatip suliarineqarneranut imaluunniit kingusinnerusukkut pissutsit allanngornerinut atatillugu eqqunngitsumik amigartumilluunniit paasissutissiinerup kingunerisaanik taarsigassarsiallip pissarsiarisimasani utertillugit akilissavai.

  § 6.  § 5 naapertorlugu qinnuteqaatinik suliaqarnissamut Naalakkersuisut uku pillugit maleruagassanik aalajangersaasinnaapput:
1)  qinnuteqartarnerup ingerlasarnera,
2)  paasissutissanik ilassutissanik pissarsiniartarneq,
3)  qinnuteqarnissamut immersugassanik assigiissaakkanik suliaqarneq atuinerlu, kiisalu
4)  pissutsit, qinnuteqartumut tunngatillugu immikkut ittumik pingaaruteqartinneqartut.
  Imm. 2.  Naalakkersuisut allamut, akiitsullit nikinnissaannut, allannguinissamut, nuussinissamut isumakkeerinissamullu qinnuteqaatinik aqutsinermut atatillugu sullissinernik suliallu piareersarnerinik isumaginnittussamut isumaqatigiissuteqarsinnaapput.

  § 7.  Naalakkersuisut inissiamik, Inatsisartut inatsisaanni matumani ilaasunik taarsigassarsiaqarfiusumik tigusaqarpata, Naalakkersuisut inissiat teknikkikkut aningaasaqarnikkullu naliliiffigineqarnissaannut Naalakkersuisut aalajangersaasinnaapput.

Kapitali 2
Piginnittut nikinnerat

  § 8.  Naalakkersuisut allanik aalajangigaqanngippata, piginnittut nikinneranni taarsigassarsiat ingerlasut akiligassanngortinneqassapput, taamaattorli tak. imm. 2.
  Imm. 2.  Taarsigassarsiat ingerlasut piginnittut nikinneranni akiligassanngortinneqassanngillat:
1)  taarsigassarsisumiit aappaasumut, aappaasutut nalunaarsorsimasumut inooqataasumulluunniit, imaluunniit
2)  taarsigassarsiallip toqunerani taarsigassarsiallip kingornussisussaanut.
  Imm. 3.  Inuk piginnittut nikinnissaat sioqqullugu sivikinnerpaamik ukiuni marlunni taarsigassarsiallip inoqutaanut ilaasimasoq inuillu nalunaarsorsimaffianni nalunaarsorsimasimasoq inooqataasutut isigineqassaaq.

  Imm. 4.  Taarsigassarsiallip toqunerani taarsigassarsiallip aappaa, taarsigassarsisumut aappaasutut nalunaarsorsimasoq kingornussisussaaluunniit taarsigassarsinissamut piumasaqaatit piffissarlu akilersuiffissaq allanngortinnagit taarsigassarsianut ingerlasunut akiitsulittut inississaaq.

  § 9.  Inissiamik pisisup taarsigassarsinissamut piumasaqaatit piffissarlu akilersuiffissaq allanngortinnagit taarsigassarsianut ingerlasunut akiitsulittut inissinnissaanut Naalakkersuisut akuersissuteqarsinnaapput.

  Imm. 2.  Inissiamik pisisup inoqutigiinni ukiumut isertitaanik akileraarutaasussanik, pigisaanut nalilinnut aammalu siunissami Namminersorlutik Oqartussanut inissiamut taarsigassarsianut ingerlasunut ernianut akilersuutinullu akiliisinnaassuseqarneranik, aammalu inissiamik isumannaatsumik aserfallatsaaliuisinnaaneranik ataatsimut naliliineq tunngavigalugu Naalakkersuisut akuersissuteqassapput.

  Imm. 3.  Piginnittut nikinnerannut atatillugu piginnittut nikinneranni akilersuutit akilersorneqartarnerinut, kiisalu piffissamut akilersuiffiusussamut allannguisoqarnissaanut piumasaqaatinik Naalakkersuisut aalajangersaasinnaapput.
 

  § 10.  §§ 8 aamma 9 naapertorlugu akiitsullit nikinneranni inuit inersimasutut oqarsinnaatitaasut aamma Kalaallit Nunaanni inuit nalunaarsorsimaffianni nalunaarsorneqarsimasut kisimik akuerineqarsinnaapput.

Kapitali 3
Taarsigassarsianik ingerlasunik allannguisarneq

  § 11.  Taarsigassarsianik ingerlasunik, aammattaaq akilersuutinut tapiissuteqarfiusaartunik allannguinermi Naalakkersuisut akilersuinermut tapiissutitalinnik taarsigassarsititsisinnaapput.
  Imm. 2.  Allannguinermut taarsigassarsiat amerlassusaannik aalajangersaanermut akiitsut sinneri, akiligassat akiligassanngortinneqartut, akiitsut akilinngitsuukkat, sillimmasiinermut akiliussigallarneq taarsigassarsianullu ingerlasunut akiligassat ilaatinneqassapput, tak. imm. 1.

  Imm. 3.  Naalakkersuisut allannguinissamut taarsigassarsititsippata, taarsigassarsisunut ataasiakkaanut akilersuinissamut pilersaarusiortoqassaaq, tassanilu akiliutissat piffissarlu taarsigassarsiat allanngortinneqartut akilersorneqarfissaat allassimassaaq.

  § 12.  Naalakkersuisut allannguinermut taarsigassarsititsisinnaapput:

1)  inunnut, ukiuni akileraarfiusuni kingullerni marlunni inoqutigiinni ukiumut 180.000 koruuninik amerlanerusunilluunniit isertitaqarsimasunut, imaluunniit

2)  inunnut, piffissami qanittumi maannamut isertitarisarsimasaat apeqqutaatinnagit inoqutigiinni ukiumut 180.000 koruuninik amerlanerusunilluunniit isertitaqalernissamut naatsorsuutigineqartunut.

  Imm. 2. Meeqqanut angerlarsimaffimmi najugaqartunut, 18-it inorlugit ukioqartunut, najukkami inuit nalunaarsorsimaffianni nalunaarsorsimasunut, taamaattorli amerlanerpaamik meeqqanut arfinilinnut imm. 1-imi nr. 1 aamma 2-mi isertitassanut killigititat meeqqamut ataatsimut 4.000 koruuninik qaffanneqartassapput.

  § 13.  Allannguinissamut taarsigassarsinissamik qinnuteqaatinik suliaqarnermi Naalakkersuisup immikkut eqqarsaatigissavai, qinnuteqartup:
1)  pigisai nalillit,
2)  akiitsuisa sinneri,
3)  maannamut akiliisinnaanissamut piginnaaneqarnera piumassuseqarneralu,
4)  inuussutissarsiorsinnaanera naatsorsuutigineqartoq, aamma
5)  taarsigassarsianik akilersuisinnaanissaata ilimanaateqarnera.
  Imm. 2.  Aamma inissiap pisoqaassusia, niuerutigineqarnermi nalinga inissiallu tunineqarsinnaaneranut periarfissat Naalakkersuisunit pingaartinneqassapput.

  § 14.  Allannguinermut taarsigassarsiat inissiap qularnaveeqqusiunneqarneratigut qulakkeerneqassapput.

  Imm. 2.  Inissiamik qularnaveeqqusiissuteqarnermi salliutitsinikkut allannguinermut taarsigassarsititsisoqassaaq. Kisiannili allannguinermut taarsigassarsiani inissiaq qularnaveeqqusiullugu atugassarititaasut tulleriiaarinerillu allanngortinnagit taarsigassarsiarititat ataqqineqassapput.

Kapitali 4
Taarsigassarsiallip akiliutai, tapiissutit aamma meeqqanut tapiissutit

  § 15.  Naalakkersuisut taarsigassarsianut ernialinnut ingerlasunut aamma akiliutinut tapiissuteqartarnermut piumasaqaatit atorlugit allannguinissamut taarsigassarsianut akiliutinut tapiissuteqarsinnaapput.

  § 16.  Taarsigassarsiat akiliutinut tapiissutitallit taarsigassarsianut piumasaqaatit atuuttut allanngortinneqaratik erniaqartinneqassapput akilersorneqassallutillu.
  Imm. 2.  Allannguinermut taarsigassarsiat ukiumut 6 procentinik erniaqartinneqassapput. Qaammammut akiligassat aalajangersarneqarnerini taarsigassarsianut ingerlasunut allannguinermullu taarsigassarsianut utertitsilluni akilersuineq tamarmiusoq sivisunerpaamik ukiunik 25-inut sivisussuseqartinneqassaaq.
  Imm. 3.  Taarsigassarsialik sukkulluunniit immikkut ittumik akilersuisinnaavoq, taamaalillunilu piffissaq utertitsilluni akilersuiffiusussaq sivikillineqarsinnaalluni. Immikkut ittumik akilersukkat § 17 naapertorlugu Naalakkersuisunit tapiiffigineqarnissamik pisinnaatitaaffigineqarput. Taarsigassarsisorli immikkut ittumik akilersuissappat, akilersuinermi meeqqanut tapiffigineqarnissamut pisinnaatitaaffeqartoqassanngilaq, tak. § 17, imm. 2.

  § 17.  Taarsigassarsialik akiliutit 70 procentiinik akiliisassaaq, Naalakkersuisullu akiliutit 30 procentiinut tapiissuteqartassallutik, tak. § 15 aamma § 16.
  Imm. 2.  Taarsigassarsialik qaammammut akiliutissat akiligassanngorfiini 18-it inorlugit ukiulinnik angerlarsimaffimmi najugaqartunik, inuit nalunaarsorsimaffianni nalunaarsorsimasunik meeraqarpat, taarsigassarsiallip tassunga akiligassai ikilisinneqassapput, tak. imm. 1. Meeqqamut ataatsimut, taamaattorli amerlanerpaamik meeqqanut arfinilinnut, taarsigassarsiallip qaammammut akiligassai 7,5 procentinik ikilisinneqassapput.
  Imm. 3.  Meeraq akiligassanut ilanngaataasoq angerlarsimaffimmi najugaqarunnaarpat, imaluunniit inuit nalunaarsorsimaffianni angerlarsimaffimmi najugaqartutut nalunaarsorsimajunnaarpat taarsigassarsialik pisussaavoq tamanna pillugu allakkatigut Naalakkersuisunut nalunaaruteqassalluni.

  § 18.  Taarsigassarsiallip qaammammoortumik akiligassani piffissaq eqqorlugu akilinngippagu, Naalakkersuisut tunngavissaqanngitsumik uninngatitsinatik akiligassap akilerneqarnissaanut allakkatigut piumasaqaateqassapput. Piumasaqaatini tamani akiitsunut akilinngitsuukkanut piumasaqaateqarnermut akiliut 50 koruuniusoq, 1.000 koruunit sinnerlugit akiitsorisanut 2 procentinik ilallugu ilaliunneqassaaq.

Kapitali 5
Taarsigassarsianik nuussisarneq isumakkeerinnittarnerlu

  § 19.  Naalakkersuisut taarsigassarsianut ukiuni tallimani erniaqanngitsunut akilersugassaanngitsunullu akiligassanngortitanik, akiitsunik akilinngitsuukkanik, piumasaqaateqarnermut akiliutinik akiitsullu sinnerinik allannguisinnaapput. Allannguinermi taarsigassarsiallip ukiuni akileraarfiusuni kingullerni marlunni inoqutigiinni ukiumut 180.000 koruuninik inorlugilluunniit isertitaqarsimanissaa, imaluunniit piffissami qanittumi maannamut isertitarisarsimasaat apeqqutaatinnagit inoqutigiinni ukiumut 180.000 koruuninik inorlugilluunniit isertitaqartussanngornissaa piumasarineqarpoq.

  Imm. 2.  Naalakkersuisut piffissaq erniaqartitsiviunngitsoq akilersuititsiviunngitsorlu ukiut tallimakkaarlugit sivitsortarsinnaavaat. Taarsigassarsiallip imm. 1 naapertorlugu nussinissamut piumasaqaatit suli naammassisimanngippagit, taarsigassarsiat akiligassanngortinneqassapput. Naalakkersuisut taarsigassarsianik allannguinissamut akilersuutinut tapiiffigineqartunut taarsigassarsititsisinnaapput. Taamatuttaaq allannguinissamut taarsigassarsititsisarnermut aalajangersakkat atuutissapput.
  Imm. 3.  Meeqqanut angerlarsimaffimmi najugaqartunut, 18-it inorlugit ukioqartunut, najukkami inuit nalunaarsorsimaffianni nalunaarsorsimasunut, taamaattorli amerlanerpaamik meeqqanut arfinilinnut, isertitassanut killigititat, tak. imm. 1, meeqqamut ataatsimut 4.000 koruuninik qaffanneqartassapput..
 Imm. 4.  Eqqartuussinikkut taarsigassarsiallip tammaaneqartup toqusimasutut isigineqarnerani, piginnittut nikinneranni kiisalu inissiamik isaterinermi taarsigassarsialik akiliisinnaajunnaarsimappat, akiliisarnermik unitsitsisimappat, isumaqatigiissutit uniorlugit iliuuseqarsimappat, akiliisinnaannginneq peqqutigalugu atorunnaarsinneqarsimappat taarsigassarsiat erniaqanngitsut akilersugassaanngitsullu akiligassanngortinneqassapput. Piginnittut nikinnerat akiitsullit nikinnerannik qanorluunniit ittumik paasineqassaaq, tassungalu niueqatigiilluni aamma akeqanngitsumik tunniussinerit ilaatinneqarput, taamatullu piginneqataasumut, aappaasumut, aappaasutut nalunaarsorsimasumut, kingornussisussanut imaluunniit inooqataasumut tunniussinerit piginnittut nikinnerattut isigineqassapput.

  § 20.  Taarsigassarsialinnut, ukiuni akileraarfiusuni kingullerni marlunni inoqutigiinni ukiumut 180.000 koruunit inorlugit isertitaqarsimasunut, aammalu taarsigassarsianik nungutsisimasunut, taamaallaalli akilinngitsuukkanik akiitsulinnut Naalakkersuisut akiitsunik akilinngitsuukkanik peqqusinermullu akiliutinik qaammatit 60-it ingerlanerini amerlaqatigiinnik aningaasartalinnik ikilisitsiartuaassapput.

  § 21.  § 19, imm. 1 naapertorlugu taarsigassarsiat akiligassanngortinneqarpata, qinnuteqartoqarneratigut taarsigassarsiallip akiligassai, piginnittut nikinneranni isertitanit matussuserneqarsinnaanngitsut Naalakkersuisunit isumakkeerinniffigineqarsinnaapput.
  Imm. 2.  Qinnuteqaatip naliliiffigineqarnerani pingaartumik qinnuteqartup pigisai nalillit inuussutissarsiorsinnaanissaanullu naatsorsuutigisat, tunisinermi pissutsit, tassungalu ilanngullugu tunisinermi pitsaanerpaaq anguneqarsimanersoq eqqarsaatigineqassapput.
  Imm. 3.  Naalakkersuisut imm. 2 naapertorlugu qinnuteqaatinik suliaqarnissamut, sullissinissamut naliliinissamullu maleruagassanik aalajangersaasinnaapput, tassungalu isertitanut pigisanullu nalilinnut tunngavissat suut, isumakkeerinniffigineqarnissamut anguneqarsimassanersut, kiisalu issutsit suut piginnittut nikinneranni naliliinermut ilaatinneqassanersut ilanngunneqassapput.

  § 22.  Taarsigassarsisumut, inissiamut Naalakkersuisunut utertinneqarsimasumut imaluunniit Naalakkersuisunit utertillugu tiguneqarsimasumut akiitsoqartumut akiligassanngortitat, akiitsut akilinngitsuukkat, peqqusinermut akiliutit akiitsullu sinneri nalikilliartuaartinneqassapput.

  § 23.  Taarsigassarsisunut aningaasaqarnikkut annertuumik ajornartorsiortunut, akiligassanngortitanik, akiitsunik akilinngitsuukkanik, peqqusinermut akiliutinik akiitsullu sinnerinik isumakkeerinninnissamut allannguinissamulluunnit piumasaqaatinik naammassinnissimanngikkarluartunut Naalakkersuisut akiliisarnermik unitsitsigallarsinnaapput.
  Imm. 2.  Naalakkersuisut akiliisarnermik unitsitsigallarsinnaapput:
1)  taarsigassarsiallip annertuumik aningaasaqarnikkut ajornartorsiornera qaangiuttussaappat, aammalu taarsigassarsiallip ukiup ataatsip iluani nalinginnaasumik akiliisarnini aallarteqqissinnaagaa naatsorsuutigineqarpat, imaluunniit
2)  taarsigassarsiallip taarsigassarsianut akilersuinissaa ilimanaateqanngippat, aammalu taarsigassarsiallip ukiut marluk iluanni isumakkeerinninnissamut allannguinissamullu piumasaqaatit naammassisimappagit.
  Imm. 3.  Naalakkersuisut qinnuteqaammik naliliinerminni akiitsut sinnerisa amerlassusii, qinnuteqartup maannamut akiliisinnaasimanera piumassuseqarneralu, qinnuteqartup pigisai nalillit aammalu inuussutissarsiorsinnaaneranut naatsorsuutigisat eqqarsaatigissavaat.

  Imm. 4.  Naalakkersuisut akilersuinermik unitsitsigallarnissamut aalajangersakkanik sukumiinerusunik aalajangersaasinnaapput.

Kapitali 6
Pitsanngorsaanissamut taarsigassarsianik nuussisarneq

  § 24.  Taarsigassarsiat akiliisarnermut tapiissutitallit ingerlasut, alliliinermut pitsanngorsaanermulluunniit taarsigassarsiaritinneqartut qinnuteqartoqarnerani taarsigassarsianut erniaqanngitsunut akilersugassaanngitsunullu nuunneqarsinnaapput.
  Imm. 2.  Taarsigassarsianut ingerlasunut akiitsut 1. januar 2020-mi nuunneqassapput. Akiitsut naatsorsornerini aallaqqaammut taarsigassarsiaasunit akiligassanngortinneqanngitsut, akiligassat akiligassanngortinneqartut, akiitsut akilerneqanngitsut, sillimmasiinermut akiliussigallarneq akiligassallu katinneqassapput.

  § 25.  Taarsigassarsiat erniaqanngitsut akilersugassaanngitsullu piginnittut nikinneranni § 24 naapertorlugu akiligassanngortinneqassapput, tassanili pineqanngillat:
1)  aappariit akornanni piginnittut nikinneri,
2)  averusernermut avinnermulluunniit atatillugu piginnittut nikinneri, imaluunniit

3)  Naalakkersuisut allamik aalajangigaqarpata.

Kapitali 7
Atuisinnaanermut killiliinerit aamma taarsigassarsianik akiligassanngortitsisarneq

  § 26.  Taarsigassarsiat ingerlasut, allannguinermut taarsigassarsiat imaluunniit taarsigassarsiat nuutat akilerneqarnissaasa tungaanut inissiamut tunngatillugu atuisinnaanermut killiliinerit uku atuutissapput:
1)  Inissiaq sallunaveeqqusiullugu eqqartuussivilersuussisoqassanngilaq.
2)  Taarsigassarsinermi inissiaq qularnaveeqqusiunneqassanngilaq.
  Imm. 2.  Sillimmasiisarfik illumi ikuallattoornissamut sillimmasiiffiusoq imm. 1-imi allassimasut apeqqutaatinnagit sillimmasiissummut ernianut aningaasartuutinullu allanut sallunaveeqqusiiffigineqarnissamut pisinnaatitaaffeqarpoq. Kiisalu sillimmasiisarfik ullormit akiliiffissamiit ukiumi ataatsimi illumut sillimmaserneqartumut akiliutinut qularnaveeqqusiiffiusunit allanit salliutinneqarluni qularnaveqqusiiffigineqarnissamut pisinnaatitaaffeqarpoq.

  § 27.  Taarsigassarsiat ingerlasut, allannguinermut taarsigassarsiat imaluunniit nuussinermut taarsigassarsiat akilerneqarnissaasa tungaanut taarsigassarsialik inissiamik Namminersorlutik Oqartussanut, inissiap tigunissaanut pisussaaffeqartunut utertitsinissamik pisinnaatitaaffeqarpoq.
  Imm. 2.  Taarsigassarsiallip inissiaq Namminersorlutik Oqartussanut utertippagu, Namminersorlutik Oqartussat taarsigassarsisullu akornanni aningaasaqarnikkut iluarsisassat Naalakkersuisunit naatsorsorneqassapput.
  Imm. 3.  Aningaasaqarnikkut iluarsisassat inissiap piffissami Namminersorlutik Oqartussanut tunniunneqarfiani niueruteqarnermut nalinganut, Namminersorlutik Oqartussat akiligassanut akiligassanngortinneqartunut akiitsullu sinnerinut, kiisalu akiitsunut akilinngitsuugaasimasinnaasunut, sillimmasiinermut akiliussigallarnerusinnaasunut akiligassaasinnaasunullu, kiisalu inissiap naliliiffigineqarneranut aningaasartuutinut piumasaqaataannik ilanngarlugit naatsorsorneqassapput. Taarsigassarsiallip iluanaarutissai tunniunneqassapput. Namminersorlutik Oqartussat iluanaarutissaat 0 koruuninut nalikillisinneqassapput.
  Imm. 4.  Inissiap niuerutigineqarnermini nalinga illunik tuniniaasartumit, Kalaallit Nunaanni suliffeqarfimmik, pigisanik aalaakkaasunik pisisarnermi tunisisarnermilu akunnermuliuttumik ingerlatsisumit, Namminersorlutik Oqartussanit toqqarneqartumit aalajangersarneqassaaq.

  § 28.  Taarsigassarsiat ingerlasut, allannguinermut taarsigassarsiat taarsigassarsiallu nuunneqartut akiligassanngortinneqassapput:
1)  Taarsigassarsianut erniat akilersuutillu akilerneqarsinnaanngippata, aammalu taarsigassarsiallip akiligassat akilinngitsuukkat pigisamut aalaakkaasumut qularnaveeqqusiussaqarluni taarsigassarsinermi allagartaq, tak. Kalaallit Nunaanni qularnaveeqqusiisarnermut inatsit, malillugu ernianut akilersuinermullu maleruagassat naapertorlugit piffissaliussap naannginnerani akiitsut akilinngitsuukkat akilersimanngippagit.
2)  Taarsigassarsiallip inissiaq isumannaatsumik aserfallatsaalisimanngippagu, taamaalillunilu Naalakkersuisut qularnaveeqqusiiffigineqarnerat ajornerulersinneqartoq paasineqarpat.
3)  Taarsigassarsiallip inissiaq ikuallattoornissamut ajoqusernissamullu sillimmasersimanngippagu.
4)  Taarsigassarsiallip inissiaq isaterpagu.
5)  Inissiami init inuussutissarsiorfittut iluarsaanneqarpata, imaluunniit inissiamiit inuussutissarsiutinik ingerlatsisoqarpat. Tassungali inuussutissarsiutit iluanaarnannginnerusut ilaatinneqanngillat..
6)  Taarsigassarsialik Naalakkersuisunit akuerineqaqqaarani inissiamit nuuppat inissiamilluunniit attartortitsippat.
7)  Taarsigassarsialik inissiaq qularnaveeqqusiullugu taarsigassarsippat.
8)  Taarsigassarsialik Naalakkersuisut inissiamik takuniaaneranni iseqqusinngippat.
9)  Taarsigassarsiallip iluarsaassineq, alliliineq pitsanngorsaanerluunniit Naalakkersuisut taarsigassarsititsivigisaat naammassinngippagu.

  § 29.  § 28 naapertorlugu taarsigassarsiat akiligassanngortinneqarnerini taarsigassarsiallip erngerluni taarsigassarsiat akilinngippagit Naalakkersuisut inissiaq tiguniarlugu aalajangersinnaapput.
  Imm. 2.  Naalakkersuisut inissiamik tigusineranni Namminersorlutik Oqartussat taarsigassarsisullu akornanni aningaasaqarnikkut iluarsisassat Naalakkersuisunit naatsorsorneqassapput.
  Imm. 3.  Aningaasaqarnikkut iluarsisassat inissiap piffissami Namminersorlutik Oqartussanut tunniunneqarfiani niueruteqarnermut nalinganut, Namminersorlutik Oqartussat akiligassanut akiligassanngortinneqartunut akiitsullu sinnerinut, kiisalu akiitsunut akilinngitsuugaasimasinnaasunut, sillimmasiinermut akiliussigallarnerusinnaasunut akiligassaasinnaasunullu, kiisalu inissiap naliliiffigineqarneranut aningaasartuutinut piumasaqaataannik ilanngarlugit naatsorsorneqassapput. Taarsigassarsiallip iluanaarutissai tunniunneqassapput. Namminersorlutik Oqartussat iluanaarutissaat 0 koruuninut nalikillisinneqassapput.
  Imm. 4.  Inissiap niuerutigineqarnermini nalinga illunik tuniniaasartumit, Kalaallit Nunaanni suliffeqarfimmik, pigisanik aalaakkaasunik pisisarnermi tunisisarnermilu akunnermuliuttumik ingerlatsisumit, Namminersorlutik Oqartussanit toqqarneqartumit aalajangersarneqassaaq.

  § 30.  Naalakkersuisut inissiamik, Namminersorlutik Oqartussanut utertinneqartumik imaluunniit Namminersorlutik Oqartussanit utertillugu tiguneqartumik tunisinerminni, inissiap niuerutigineqarnermini nalinga, taamaattorli minnerpaamik inissiap teknikkimut aningaasaqarnermullu nalinga atorlugu tunineqarnissaa qulakkiissavaat, taamaattorli tak. imm. 2.
  Imm. 2.  Naalakkersuisut inissiaq utertitaq tigusarluunniit kommunimut ataatsimut tunniussinnaavaa. Pisinermi akiusoq Naalakkersuisut kommunillu akornanni isumaqatigiissutigineqassaaq. Tunniussinermi kingusinnerusukkut tuniseqqinnermi niuernermut nalinga, taamaattorli minnerpaamik teknikkimut aningaasaqarnermullu nalinga akigitinneqassasoq piumasaqaatigineqassaaq,

Kapitali 8
Sioqqutsilluni akiliisarneq

  § 31.  Taarsigassarsiallip taarsigassarsiaanut ingerlasunut aamma allannguinermut taarsigassarsiaanut piffissaq sioqqullugu taarsigassarsisup taarsigassarsianik inaaraluni akiliinerani, akiliutinut tapiinissamut piumasaqaatit malillugit taarsigassarsiaritinneqartunut akiitsut 30 procentinik nalikillisinneqassapput. Tamatuma kingorna akiitsut nalikillisat piffissami taarsigassarsiallip akiliinissamut allakkatigut qinnuteqarfigisaaniit aamma taarsigassarsiat sinneruttut akilersorneqarnissaannut piffissamut 6 procentinik kingumut erniaqartitsisoqassaaq, taamaattorli taarsigassarsiat akilerneqarneriniit siusinnerpaamik ukiunut tallimanut. 
  Imm. 2.  Akiitsut naatsorsornerini aallaqqaammut taarsigassarsiaasunit akiligassanngortinneqanngitsut, akiligassat akiligassanngortinneqartut, akiitsut akilerneqanngitsut, sillimmasiinermut akiliussigallarneq akiligassallu katinneqassapput.
  Imm. 3.  Meeqqanut angerlarsimaffimmi najugaqartunut, 18-it inorlugit ukioqartunut, najukkami inuit nalunaarsorsimaffianni nalunaarsorsimasunut, taamaattorli amerlanerpaamik meeqqanut pingasunut, akiitsut sinneri 1 procentinik nalikillisinneqassapput.

Kapitali 9
Taarsigassarsiat erniaqanngitsut akilersugassaanngitsullu piffissaq annikilliartuaarfissaat

  § 32.  Taarsigassarsianut erniaqanngitsunut akilersugassaanngitsunullu, ukiuni 33-ni

annikilliartuaartussatut piumasaqaateqarfiullutik tunniunneqartunut piffissaq

annikillisitsiartuaarfissatut aalajangiunneqartoq, ukiunut 20-nut allanngortinneqarpoq.

Piffissap annikillisitsiartuaarfissap sinnera 20/33-mut iluarsillugu sivikillisinneqassaaq

ukiumullu ilivitsumut qaninnerpaamut akunnaallisarneqassalluni.

  Imm. 2.  Tamatuma kingorna taarsigassarsiat erniaqanngitsut akilersugassaanngitsullu

taarsigassarsianut piffissarititap sivikillisap ingerlanerani ukiut tamaasa amerlaqatigiinnik, siullermeertumillu piffissamut 1. januar 2020-miit 31. december 2020-mut, 31. december 2020-mi annikillisikkiartuaarneqassapput.

Kapitali 10
Atuutsitsilernermut, atorunnaarsitsinermut ikaarsaarnermullu aalajangersakkat

  § 33.  Inatsisartut inatsisaat manna 1. januar 2020-mi atuutilerpoq.
  Imm. 2.  Tamatuma peqatigisaanik inissialiornermut, illunut ataatsimoorussanut, illuliassanut il.il. tapersiissuteqartarneq pillugu Inatsisartut peqqussutaat nr. 11, 19. november 2007-imeersoq atorunnaarsinneqarpoq.
  Imm. 3.  Inatsisartut peqqussutaanni imm. 2-mi peqqussutit aalajangersarneqartut atuutsiinnarneqartulluunniit, imaluunniit Inatsisartut inatsisaat manna naapertorlugu maleruagassanik aalajangersaanikkut taarserneqarnissamik imaluunniit atorunnaarsinneqarnissamik tungaanut atuutiinnassapput. Uku atuutiinnassapput:

1)  Akiliutissat akiligassanngortut taarsigassarsiallu amiakkuisa isumakkeerneqarnissaannik, taarsigassarsianik allannguinissamut kiisalu allannguiniarluni taarsigassarsinissamut qinnuteqaatit aqunneqartarnerat pillugu Namminersornerullutik Oqartussat nalunaarutaat nr. 2, 26. januar 2006-meersoq.

2)  Ukiup affakkaartumik akiliutaasartussat naatsorsorneqartarnerilu pillugit Namminersornerullutik Oqartussat nalunaarutaata allanngortinneqarneranik Namminersornerullutik Oqartussat nalunaarutaat nr. 47, 16. december 1994-imeersoq.

3)  Ukiup affakkaartumik akiliutaasartussat naatsorsorneqartarnerilu pillugit Namminersornerullutik Oqartussat nalunaarutaat nr. 11, 22. marts 1994-imeersoq.

4)  Inissialiornermut tapersiissuteqartarneq pillugu inatsisartut peqqussutaani kapitali 4 naapertorlugu taarsigassarsilluni illugineqartut attartortinneqartarnissaat pillugu Namminersornerullutik Oqartussat nalunaarutaat nr. 13, 22. marts 1994-imeersoq.

5)  Inissialiornermut tapersiissuteqartarneq pillugu Inatsisartut peqqussutaat malillugu illorsuarnut tapersiiffigineqarsimasunut silliiranasiisarneq pillugu Namminersornerullutik Oqartussat Nalunaarutaat nr. 9, 22. marts 1994-imeersoq.

6)  Init inuutissarsiornermut atorneqartut inigisamilu inuutissarsiummik ingerlatsineq pillugit Namminersornerullutik Oqartussat Nalunaarutaat nr. 7, 22. marts 1994-imeersoq.

Namminersorlutik Oqartussat, ulloq 28. november 2019