Inissialiornermut tapersiissuteqartarneq pillugu Inatsisartut peqqussutaani nr. 1-imi 9. april 1992-imeersumi § 12, imm. 5, § 29, imm. 2, amma § 32, imm. 3, naapertorlugit aalajangersarneqarpoq.

§ 1. Inissialiornermut tapersiissuteqartarneq pillugu Inatsisartut peqqussutaani kapitalit 4, 6 imaluunniit 7 malillugit taarsigassarsiaritinneqarsimasut ukiup affakkaarlugit taarsersorneqassapput akiligassanngortassallutillu 1. maj aamma 1. november.
Imm. 2. Illup inaarneqarneraniit imaluunniit inerneqanngikkaluartorluunniit iserterfigineqarneraniit akilersuinissaq aallartinneqartassaaq. Illup sananeqarluni inerneraniit imaluunniit iserternermiit akiliiffissanngortussap siulliup tungaanut taamaallaat erniat akilerneqartassapput.
Imm. 3. Sanaartukkanut naatsorsuutit naammassineqarnissaasa tungaanut taarsersuutissat naatsorsorneqartassapput taarsigassarsiassatut neriorsuutit tunngavigalugit.

§ 2. Illup kommuunimiiffigisaani akiliutissaq nassiunnera akeqanngitsumik kommuunimut akilerneqartassaaq, imaluunniit akiliutissaq akilerneqartassalluni taarsigassarsisitsisup akiliisarfissatut toqqarsimasaanut.
Imm. 2. Akiliinerit tamarmik piffissamik eqquilluni akiliinerussapput kingusinnerpaamik akiliiffissanngortussap ullua qaammammik ataatsimik kingoqqullugu akilerneqarunik. Akiliiffissanngortussaq imaluunniit piffissaq eqqorlugu akiliiffissaq nalliuttuuppat arfininngornerulluniluunniit akiliinissaq ulluinnarmut tulliuttumut kinguartinneqartassaaq.

§ 3. Piffissaq eqqorlugu akiliisoqanngippat akiliinissaq piserlugu ukiup affaanut akiliutissaq 2,5%-imik pillaatitut ernialerneqartassaaq taarsigassarsisup akiligassaanik.

§ 4. Nalunaarut atulissaaq ulloq 1. april 1994.

Namminersornerullutik Oqartussat, ulloq 22. marts 1994.

Emil Abelsen

/

Peter Beck