Nunalerineq pillugu Inatsisartut inatsisaani nr. 5-imi, 2. maj 1996-imeersumi § 11 aamma Nunalerinermik inuussutissarsiornerup siuarsarneqarnissaa pillugu Inatsisartut inatsisaat nr. 6, 2. december 2009-meersumi § 12, imm. 1 nr. 1, naapertorlugit aalajangersarneqarpoq:

 

Atuuffii

 

§ 1.  Nunaatilinngorlaanut tapersiissutitut pilersitsinerup nalaani tapiissuteqartoqarsinnaavoq.
  Imm. 2.  Nunaateqarfiup tiguneqarneranut, tunngavianiit pilersinneqarneranut imaluunniit pilerseqqinneqarneranut ataatsimut ataasiaannarluni taamaallaat tapiissuteqartoqarsinnaavoq.
  Imm. 3.  Tapiissutit sivisunerpaamik ukiut pingasut ingerlanerini akiliutigineqartassapput.
  Imm. 4.  Tapiissutit inunnut 21-niit 65-ik ilanngullugit ukiulinnut akiliutigineqarsinnaapput.

Inuit tapiiffigineqarsinnaasut

 

§ 2.  Inuit nunalerineq pillugu inatsimmi § 3-mi piumasaqaatinik naammassinnissimasut tapiiffigineqarsinnaapput:
1) nunaateqarfik pioreersoq kisimiillutik imaluunniit ingerlatseqatigiillutik tigussagunikku imaluunniit nunaateqarfik nutaarluinnaq tunngavianiit pilersissagunikku, imaluunniit
2) nunaateqarfik imatut pissusilik tigussagunikku nunaateqarneq imminut akilersinnaasunngortinniarlugu tunngavianiit pilerseqqinneqartariaqartoq, imaluunniit
3) nunaateqarfik pissutsinik pisariaqavissumik nuuttariaqassagunikku soorlu naatitsinissamut ivigartortitsinissamullu nunaminertanik nutaanik amigaateqarneq assigisaanilluunniit peqquteqartumik.
  Imm. 2.  Qinnuteqaat, Savaatillit Peqatigiit Suleqatigiissunit, SPS, uppernarsarlugu atsiorneqarsimasoq, Aalisarnermut, Piniarnermut Nunalerinermullu Naalakkersuisoqarfimmut nassiunneqassaaq aamma assilinera kommunimut nunaateqarfiup inissisimaffigisaanut nassiunneqassaaq.

 

Tapiiffigineqarnissamut piumasaqaatit

 

§ 3.  SPS aamma Nunalerinermik Siunnersorteqarfik isumasioreerlugit Aalisarnermut, Piniarnermut Nunalerinermullu Naalakkersuisoq tapiissuteqartoqarnissaanik aalajangiissaaq. Aalisarnermut, Piniarnermut Nunalerinermullu Naalakkersuisoq aalajangiiniarnermini ilaatigut pingaartissavaa:
1) nunalerineq tapiiffigineqartussap siunissami pingaarnerutillugu inuussutissarsiutigissagaa. Tamatuma naliliivigineqarnerani nunaateqarfiup annertussusaa tunngavigineqassaaq,
2) maskiinat atortut, narsaatit neriniartitsiviillu aamma uumasuutit imminnut naapertuuttumik annertussuseqarnissaat,
3) narsaatit pilersinneqareersinnagit imaluunniit pilerseqqinneqareersinnagit ivikkanillu nerukkaatissat siulliit pigineqalereersinnagit uumasuuteqartoqalissanngitsoq taakkuluunniit amerlisinneqassanngitsut,
4) nunaatillip ingerlatsinermut illuutit ungallullu sanareersimanngippagit imaluunniit iluarsaatereersimanngippagit uumasuuteqartoqalissanngitsoq imaluunniit taakku amerlisinneqassanngitsut kiisalu
5) suliaq tapiiffigineqartoq pilersaarutigineqartutut siuariartussasoq.
  Imm. 2.  Aalisarnermut, Piniarnermut Nunalerinermullu Naalakkersuisup ataasiakkaanut tunngatillugit tunngavilersuutit naleqquttut allat pingaarnerutissinnaavai.

 

§ 4.  Tapiissutit amerlassusissaat akiliutigineqartussallu aveqatigiinnissaat kommunip pineqartup Aalisarnermut, Piniarnermut Nunalerinermullu Naalakkersuisup akornanni Nunalerinermik Siunnersorteqarfik isumasioqatigereerlugu isumaqatigiissutigineqassapput.

Tapiissutit unitsinneqarnissaat aamma utertillugit akilerneqarnissaat

 

§ 5.  Aalisarnermut, Piniarnermut Nunalerinermullu Naalakkersuisoq kommuni pineqartoq, SPS aamma Nunalerinermik Siunnersorteqarfik isumasioqatigereerlugit aalajangiisinnaavoq, tapiissutit akiliutigineqartarnerat unitsinneqassasoq
1) tapiiffigineqartartup nunalerineq pillugu inatsimmi imaluunniit Inatsisartut nunalerinermik inuussutissarsiornerup siuarsarneqarnissaa pillugu inatsisaani aalajangersakkat unioqqutissimappagit,
2) nalunaarut manna malillugu tapiiffigineqartartup tapiissutinik pisarnissaminut pinngitsoornani naammassisassat naammassisinnaajunnaarsimappagit, imaluunniit
3) tapiiffigineqartartoq eqqunngitsunik imaluunniit paatsoorneqarsinnaasunik paasissutissiisimappat imaluunniit tapiiffigineqarnissamut paasissutissanik pingaarutilinnik nipangiussisimappat.
  Imm. 2.  Immikkoortoq 1-imi nr. 1 aamma nr. 3 malillugit tapiissuteqartoqartarunnaarpat Aalisarnermut, Piniarnermut Nunalerinermullu Naalakkersuisoq kommuni najugarineqartoq, SPS aamma Nunalerinermik Siunnersorteqarfik tusarniaavigereerlugit aalajangiisinnaavoq tapiissutigineqarsimasut utertillugit akilersinneqassasut. Naalakkersuisup tapiiffigineqartoq utertillugit akilerneqarnissaat pillugu piumasaqaatinik piffissaliussanillu allakkanik isumaqatigiissuteqarfigisinnaavaa.

Atuutilersitsineq

 

§ 6.  Nalunaarut manna 15. september 2016-imi atuutilerpoq.
  Imm. 2.  Ilutigalugu Savaateqarfinnik pilersitsinernut tapiissuteqartarneq pillugu Namminersornerullutik Oqartussat nalunaarutaat nr. 23, 8. august 1993-imeersoq, atorunnaarsinneqarpoq.

 

 

Namminersorlutik Oqartussat, ulloq 5. september 2016

 

 

Nikolaj Jeremiassen

/

Jørgen Isak Olsen