Matumuuna Nunalerineq pillugu Inatsisartut inatsisaat nr. 5, 2. maj 1996-imeersoq, Inatsisartut inatsisaatigut nr. 15, 19. november 2007-imeersutigut, Inatsisartut inatsisaatigut nr. 11, 5. december 2008-meersutigut aamma Inatsisartut inatsisaatigut nr. 21, 22. november 2011-meersutigut allanngortinneqartoq, nalunaarutigineqarpoq.

 

Inatsisip atuutsinneqarfia

 

  § 1.  Inatsit Kalaallit Nunaanni nunalerinermut atorneqarpoq.

  Imm. 2.  Inatsimmi matumani nunalerinertut paasineqassaaq naatitanik naatitsinermut, neriniartitsivinnut imaluunniit uummasuuteqarnermut imaani imermilu uumassusilinnik allisaaviuteqarnermut nunaminertanik inuussutissarsiutigalugu atuineq, taamatuttaaq siunertanut taaneqartunut sanaartukkat illuutillu nunami aalaakkaasut suugaluartulluunniit inatsimmi ilaatinneqarput. Tassunga peqatigitillugu taamatut atuinissamut pisinnaatitaaffik inummut inunnulluunniit arlalinnut, ingerlatseqatigiiffinnut assigisaannulluunniit tunniunneqartartussaavoq.  Inatsimmi inuussutissarsiutigalugu qimmeqarneq ilaatinneqanngilaq.

 

Inatsisip siunertaa

 

  § 2. Imaaliortoqarneratigut nunalerinermi ineriartortoqarnissaanut periarfissat, periarfissallu piujuartitsinermik tunngaveqarluni aqutsiviginissaannut tunngavissamik pilersitsinissap qulakkeernissaat inatsimmi siunertaavoq

1) nunalerinermik inuussutissarsiutillit tulluartumik ineriartortitsiffiunissaasa aamma inuussutissarsiutini taakkunani unammillersinnaassuseqarnerup nukittorsarnissaata qulakkeernerisigut,

2) nunat naatitsisarfiit, nunaminertat ivigartorfiusartut taakkununngalu nunaminertat nalillit attuumassutillit mianerinerisigut, taamaasilluni avatangiisinut eqqaaniittunut aamma nunalerinermi inuussutissarsiortut aningaasaqarnikkut soqutigisaannut soqutiginninneq isiginiarneqassammat, soorlu inuussutissarsiutigalugu suliffeqarfimmut allamut tunngatillugu,

3) nunaminertat nunalerinermi isumalluutit piujuartitsineq tunngavigalugu atugaanissaasa qulakkeernerisigut, aamma

4) uumasuutinut naammaginartumik atugassaqartitsinissap qulakkeerneratigut.

  Imm. 2. Inatsisip aqutsiviginerani avatangiisinut eqqaaniittunut, allatut inuussutissarsiornikkut soqutigisanut kiisalu innuttaasut isumassarsiortarnikkut pisariaqartitaannut tunngatillugu nunalerinermi ineriartorneq uuttuiffigineqassaaq.

 

Nunalerinermik ingerlatsisinnaanermut piumasaqaatit

 

  § 3.  Kalaallit Nunaanni nunalerinermik inuussutissarsiuteqarneq taamaallaat ingerlanneqarsinnaavoq inunnit:

1)  Kalaallit Nunaanni inuiaqatigiinnut aalajangersimasumik attuumassuteqartunit,

2) Kalaallit Nunaanni inuit nalunaarsorsimaffianni allanneqarsimallutik najugaqartunit Kalaallit Nunaannilu inuit nalunaarsorsimaffianni allanneqarsimallutik ukiuni siuliini marlunni najugaqarsimasunit,

3) oqartussaassuseqalersimasunit.

  Imm. 2.  Pineqartup Kalaallit Nunaannut attuumassuteqarnera aallaavigalugu tamanna naammattutut nalilerneqarsimappat Naalakkersuisut imm. I, nr. 2-mit saneqqutsisinnaapput, soorlu pineqartoq ilinniarnikkut allatulluunniit pissuteqarluni Kalaallit Nunaata avataani najugaqarsimappat.

  Imm. 3. Naalakkersuisut nunalerinermik ingerlatsisinnaanissamut pisinnaatitaaffeqalernissaq pillugu malittarisassanik aalajangersaasinnaapput, soorlu pisinnaasanut tunngatillugu, taamaaliornikkut inuup inuussutissarsiummut aalajangersimasumut aalajangersimasumik ilinniarnermik pikkorissarnermilluunniit ingerlatsisimanissaa pillugu piumasaqartoqarsinnaassammat.

 

  § 4.  Ingerlatseqatigiiffik Kalaallit Nunaanni nunalerinermik ingerlatsisinnaavoq piumasaqaatit makku naammassineqarpata:

1) Ingerlatseqatigiiffik andelsselskabiussaaq, anpartselskabiussaaq, aktieselskabiussaaq imaluunniit interessentselskabiussaaq,

2) minnerpaamik ingerlatseqatigiiffiup aningaasaataasa 2/3-ii toqqaannartumik toqqaannanngitsumilluunniit inunnit ataasiakkaanit inatsimmi § 3, imm. I-imi piumasaqaatinik naammassinnissimasunit pigineqassapput,

3) ingerlatseqatigiiffiup aningaasaataasa affai sinnerlugit toqqaannartumik toqqaannanngitsumiluunniit nunalerisunit § 3, imm. 3 naapertorlugu aalajangersakkanik naammassinnittunit pigineqassapput, aamma

4)  nunalerinermik pineqartumik ingerlatsineq immini inunnit § 3, imm. I-imi aalajangersakkanik aammalu § 3, imm. 3 naapertorlugu aalajangersakkanik aalajangersarneqartunik naammassinnittunit isumagineqassaaq.

  Imm. 2. Naalakkersuisut immikkut pisoqarsimatillugu § 3, imm. I-mit aamma aalajangersakkami matumani imm. I-imit immikkut akuersissuteqarallarsinnaapput, matumani tamanna Kalaallit Nunaanni nunalerinermik inuussutissarsiutip ineriartornissaanut soqutiginaateqartutut nalilerneqarsimappat.

 

Nunalerinermi ingerlatsinermut pissutsinik maleruagassaqartitsineq.

 

  § 5.  Naalakkersuisut uumasuuteqarfinni ataasiakkaani uummasuutit amerlanerpaaffissalerniarlugit uumasuutit amerlassusiisa narsaatit annertussusiannut naleqqussarneqartarnissaanik, uummasuutit inaasa, uummasuutinut oqqittarfiit nerukkaasarfiillu qanoq ilusilersorneqartarnissaanik, kiisalu nerukkaatissaatigineqartussat minnerpaaffissaanik ivikkat nerukkaatissallu kimittuut imminnut oqimaaqatigiissinneqartarnissaannik maleruagassanik aalajangersaasinnaapput.

 

  § 6.  Naalakkersuisut neriniartitsiviit atorneqarnerannut maleruagassanik aalajangersaasinnaapput, soorlu aalajangersakkanik qaqugukkut neriniartitsivigineqartarnissaannut aalajangersaasunik, uumasuutit katersorneqartarnerannut piumasaqaatinik, neriniartitsivinni ataasiakkaani uumasuutit amerlassusilertarnissaannut kiisalu taakku malittarisassaqartitsinikkut aqunneqarnissaannik imalinnik. Tassunga atatillugu maleruagassanik aalajangersaasoqarsinnaavoq, aalajangersakkanilu immikkorluinnaq pisoqarsimatillugu aammalu naasoqarfiup sukumiinerusumik aqutsiffiginera aqqutigalugu nerukkaatissanik atuivallaarnissaq qulakkeersinnaaniarlugu imaluunniit sumiiffinni naasoqareersuni naasoqarneq pilerseqqissinnaaniarlugu ungalusamik pilersitsinissaq pillugu piumasaqaasiorsinnaanissaq.

  Imm. 2. Naalakkersuisut nerititsisarfiit aqutsiviginissaannut maleruagassanik aalajangersaasinnaapput, soorlu imm. 1 naapertorlugu maleruagassat eqqortittarnissaasa qulakkeernissaat siunertaralugu tamatuma isumaginissaanut suliffeqarfinnut piginnaatitsissummik tunniussinikkut.

  Imm. 3. Nerititsisarfiit inatsimmi uani sumiiffittut killilikkatut paasineqassapput, tamakkulu inuussutissarsiutitut atuinissamut ilaasumik uumasuutit killeqartitittarnissaannut atorneqarput, tassungalu atatillugu piffissap aalajangersimasup iluani uumasuutit nerisut amerlanerpaaffissaat aalajangerneqarsimapput imaluunniit aalajangersaaffigineqarsimapput.

 

  § 7. Naalakkersuisut nunap neriuinermut illersorneqarnissaa siunertaralugu naasorissaanikkut atorneqarnissaanut imaluunniit avatangiisit eqqaaniittut mingutsitsinermut illersorneqarnissaat siunertaralugu maleruagassanik aalajangersaasinnaapput, soorlu nunamik naatitsisarnermut periutsit pillugit kiisalu naasunut illersuutit nerukkaatissallu atortarnerannut aalajangersakkanik aalajangersaasinnaaneq.

 

Uumasuutit inunnik sungiussisimasut piniartarnerat

 

  § 8. Naalakkersuisut maleruagassanik uumasuutinut inunnik sungiussisimasunut piniarnikkut pisarisanut malittarisassiorfiusunik aalajangersaasinnaapput.

  Imm. 2. Inatsimmi uani uumasuutini inunnik sungiussisimasuni uumasuutit nakkutigisamik toqunneqarlutillu uullineqarnissaat siunertaralugu uumasuutigineqartut paasineqassapput aammalu sumiiffinni nunalerisup nerititsivigisartagaanni piffikkaartumik ukioq naallugu najortagaanniittut paasineqassapput.

 

Uumasuutinik nalunaaqutsersuisarneq

 

  § 9. Naalakkersuisut uumasuutit nalunaaqutsertarnissaat pillugu maleruagassanik aalajangersaasinnaapput, tamannalu aqqutigalugu piginnittuunerup paasinissaa nakkutiginissaalu periarfissaassaaq, soorlu uumasup erniuneraniit piffissaliussap aalajangersimasup iluani nalunaaqutsiisarnissaq pillugu piumasaqaateqartoqarsinnaassalluni.

  Imm. 2. Naalakkersuisut uumasuutit nalunaaqutsertarnissaasa aqutsiviginissaannut maleruagassanik aalajangersaasinnaapput, soorlu imm. 1 naapertorlugu maleruagassat eqqortittarnissaasa qulakkeernissaat siunertaralugu suliffeqarfiit tamatuminnga isumaginninnissaannut piginnaatitsissummik tunniussaqartarnermut tunngatillugu. 

  Imm. 3. Naalakkersuisut imm. 2 malillugu pisinnaatitsissutini suliffeqarfinnut Naalakkersuisut ataanniittunut tunniutissagaluarpagit tamanna suliffeqarfiit taakkua aalajangiinerannut naammagittaalliornissamut periarfissanut maleruagassanik aalajangersaaffiusinnaavoq.

 

Uumasuutinik il.il. eqqussuisarneq

 

  § 10. Uumasuutinik uumareersunik uumasuutiniillu kinguaassiornissamut atortussanik eqqussuisoqarnerani nerisassalerinermik inatsit naapertorlugu akuersissut pigineqartussaavoq.  Tamatuma saniatigut uumasut kinguaassiorsinnaanerannut atortussat atortarnissaannut akuersissut pigineqassaaq.  Naalakkersuisut akuersissuteqarnerat inuussutissarsiortut suleqatigiiffiiniit inassuteqareernerup kingornagut pissaaq.

 

Nunalerinermut tapiissutit

 

  § 11. Naalakkersuisut nunalerinermik inuussutissarsiutilinnut tassungalu atatillugu suliffeqarfinnut tapiissuteqartarnissamut maleruagassanik piumasaqaatinillu sukumiinerusunik aalajangersaasinnaapput.

 

Nalunaarsuisarnissamut nalunaaruteqartarnissamullu pisussaaffik

 

  § 12. Naalakkersuisut nunalerinerup ingerlanneranut atatillugu nalunaarsuisarnissamut nalunaaruteqartarnissamullu pisussaaffik pillugu maleruagassanik aalajangersaasinnaapput, tamannalu aqqutigalugu ingerlatsinermut atugassarititanut taamaasillunilu inatsisip eqqortittarnissaanut nakkutiginninnissap paasisaqarfiginissaa periarfissaalerpoq.

 

Nunalerinermik nakkutilliineq

 

  § 13. Nunalerinerup inatsimmi uani aalajangersakkat naapertorlugit suliarisarnerata qulakkeernissaa Naalakkersuisut pisussaaffigivaat, taamaattoq § 7 naapertorlugu aalajangersakkat minillugit, taannalu avatangiisinik allanngutsaaliuineq pillugu inatsisartut peqqussutaanni ilaatinneqarpoq.  Aalajangersakkani taama ittuni kommunalbestyrelse nakkutilliisussaatitaavoq.

  Imm. 2. Naalakkersuisut piginnittup akiligassaanik peqqusinernik inerteqquteqartitsinernillu aallartitsisinnaapput, tamakkulu §§ 5-6 aamma § 9-mi tunngaveqarluni aalajangersakkat aalajangersarneqartut eqqortittarnissaasa qulakkeernissaannut pisariaqartinneqarput, soorlu nerititsisarfiup aalajangersimasup iluani uumasuuteqarnissamut akuersissuteqarfiusumi uumasut ikilisaaffiginissaat pillugu.

  Imm. 3. Aalajangersakkat § 9, imm. I naapertorlugu aalajangersarneqartut unioqqutinneqarneranni uumasuutit pineqartut nujuartatut isigineqalersinnaapput, matumani uumasut inunnik sungiussisimasut pineqarsimassappata.

 

  § 14.  Naalakkersuisut kommunini nunalerinermik ingerlatsiffiusuni tamani ataatsimiititaliamik nakkutilliisussamik pilersitsissapput, ataatsimiititaliarlu nunalerisut inatsit manna naapertorlugu aalajangersakkanik eqqortitsisarnissaannik nakkutilliinermik ingerlatsissaaq, taamaattoq § 13, imm. 1 takuuk.

  Imm. 2.  Naalakkersuisulli kommuninut imminnut qanittunut tunngatillugu suliassaqarfiit assigiinngitsut aqqutigalugit ataatsimiititaliamik nakkutilliisussamik pilersitsisinnaapput.

  Imm. 3.  Ataatsimiititaliaq nakkutilliisussaq aallartitanik nunalerinermi kattuffinniit aamma kommunalbestyrelsimit toqqarneqartunik katitigaassaaq.  Kommunalbestyrelsit namminneq aallartitassatik kommunalbestyrelsimeersut imaluunniit kommunit ingerlatsivianeersut toqqassavaat.  Kommunit ataatsimiititaliami amerlanerussuteqassapput.

  Imm. 4. Naalakkersuisut allatseqarfimmik sulianut paasisimasalimmik ataatsimiititaliamut nakkutilliisussamut piareeqqusussamik pilersitsissapput.

  Imm. 5. Kommunit ilaasortat kommunalbestyrelsinit toqqarneqartut aningaasarsiaqartinnerannut kiisalu ataatsimiititaliap nakkutilliinermut atatillugu angalaneranut aningaasartuutinik akiliisassapput.  Namminersorlutik Oqartussat allatseqarfimmut aningaasartuutit kiisalu ilaasortat nunalerisut kattuffiinit toqqarneqartut akissarsiaqartinnissaannut kiisalu taakkua najugaanniit ataatsimiiffissamut angallannerannut aningaasartuutit akilertassavaat.

  Imm. 6. Naalakkersuisut ataatsimiititaliap nakkutilliisussap sulineranut katitigaaneranullu maleruagassanik aalajangersaasinnaapput. 

 

Nunalerineq pillugu Siunnersuisoqatigiit

 

  § 14 a.  Naalakkersuisut Nunalerineq pillugu Siunnersuisoqatigiinnik pilersitsissapput ukuninnga ilaasortalimmik:

1) siulittaasoq ataaseq Naalakkersuisunit toqqagaq.

2) Ilaasortaq ataaseq Pinngortitaleriffimmit inassuteqartoqareerneratigut Naalakkersuisunit toqqagaq.

3) Ilaasortat marluk Savaatillit Peqatigiit Suleqatigiissut toqqagaat.

4) Ilaasortat marluk Kommune Kujalliup toqqagai.

5) Nunalerinermut Siunnersorteqarfimmit sulisut sinniisuat ataaseq.

6) Ilaasortaq ataaseq Neqi A/S-imit toqqagaq.

7) Ilaasortaq ataaseq Namminersorlutik Oqartussat Uumasunut Nakorsaqarnermut Immikkoortortaqarfiannit toqqagaq.

  Imm. 2. Nunalerineq pillugu Siunnersuisoqatigiit sapinngisamik Islandimi nunalerinermut ilisimatusarfimmiit aallartitamik ilaasortaqartinneqassapput. Nunalerineq pillugu Siunnersuisoqatigiit pisariaqartitsinertik naapertorlugu immikkut ilisimasalinnit nunanit allaneersunit ikiorteqarsinnaapput, soorlu immikkut ilisimasallit Kalaallit Nunaanneernatik nunanit allaneersut.

  Imm. 3. Naalakkersuisut Nunalerineq pillugu Siunnersuisoqatigiit missingersuutaannut naatsorsuutaannullu tunngatillugu Nunalerineq pillugu Siunnersuisoqatigiit suleriaasissaanut malitassaanullu aalajangersaassapput.

 

  § 14 b. Nunalerineq pillugu Siunnersuisoqatigiit nunalerinermut suliat pillugit Naalakkersuisunik siunnersuisassapput.

  Imm. 2.  Naalakkersuisut Nunalerineq pillugu Siunnersuisoqatigiinnut allatsimik piareersimatitsissapput.

 

  § 14 c. Naalakkersuisut Nunalerineq pillugu Siunnersuisoqatigiit sulinerat piginnaasaallu pillugit maleruagassanik aalajangersaasinnaapput.  Naalakkersuisut maleruagassanik Nunalerineq pillugu Siunnersuisoqatigiit inatsisartut inatsisaat naapertorlugu maleruagassallu tamanna naapertorlugu aalajangersarneqartut malillugit Naalakkersuisut sinnerlugit suliassanik suliaqartarnissamut aalajangersaasinnaapput.

 

  § 14 d. Nunalerineq pillugu Siunnersuisoqatigiit aalajangiineri Naalakkersuisunut naammagittaalliuutigineqarsinnaapput.  Naammagittaalliuutip tunniunnissaanut piffissaliussaq naammagittaalliuutip innuttaasumut anngunneraniit sapaatip akunnerinut 4-nut inissinneqarpoq.

 

Pineqaatissiinerit

 

  § 15. § 10 naapertorlugu Naalakkersuisut akuersissuteqarnerisa pissarsiarinngitsoornerani akiliisitsinermik eqqartuussisoqarsinnaassaaq, piginnittullu akiligassaanik uumasuutit pineqartut uumasuutigiunnaarnissaat pillugu piumasaqaammik piumasaqartoqarsinnaassalluni.

  Imm. 2. §§ 3 aamma 4 aamma najoqqutassat § 3, §§ 5-6 aamma §§ 8 - 9 naapertorlugit aalajangersarneqartut unioqqutinneranni akiligassiissummik eqqartuussisoqarsinnaavoq.

 

  § 16. §§5-6 aamma §§8-9 naapertorlugit najoqqutassat aalajangersarneqartut unioqquteqattaarneranni Naalakkersuisut, ataatsimiititaliamit nakkutilliisussamit inassuteqartoqareerneratigut aamma inuussutissarsiutillit kattuffiiniit, kommunalbestyrelsimiit aammalu nunalerisumiit pineqartumiit oqaaseqaammik piniartoqareerneratigut, nunalerisup sumiiffimmi nunalerinermik ingerlatsisinnaaneranut pisinnaatitaaffik arsaarinnissutigineqarsinnaavoq.

  Imm. 2. Naalakkersuisut nunalerisoq sumiiffimmik qaammatinik 6-12-nik piffissalerlugu tuniseqqullugu pisussaaffilersinnaavaat.  Piffissaliussap aalajangiunneqartup iluani nunalerisoq sumiiffimmik tunisisimassanngippat Naalakkersuisut pinngitsaaliissummik pigisanik taarsiissutitalimmik piginnikkunnaarnissaq pillugu maleruagassat naapertorlugit sumiiffiup tuninissaanik aallartitsisinnaapput.

 

Atortuulersitsinermi aamma ikaarsaariarnermi aalajangersakkat

 

  § 17. Inatsisartut inatsisaat ullormi 1. juli 1996 atuutilissaaq.

  Imm. 2. Tassunga peqatigitillugu Savaateqarneq pillugu Inatsisartut inatsisaat nr. 1, 21. april 1988-meersoq atorunnaarpoq.

  Imm. 3. Savaateqarneq pillugu Inatsisartut inatsisaat nr. 1, 21. april 1988-meersoq kingusinnerusukkut allanngortinneqartoq imaluunniit nunalerineq pillugu siusinnerusukkut maleruagassat atortuulersinneqartut naapertorlugit najoqqutassat ingerlaannassapput aalajangersakkanik inatsisartut inatsisaat manna naapertorlugu suliarineqarsimasunik taarserneqarnissaat tikillugu.

 

  § 18. Nunalerinermik ingerlatsisinnaanermut pisinnaatitaaffik, taanna inatsisaasimasut malillugit atuuttoq, inatsimmi §§ 3-4 naapertorlugit aamma § 3 naapertorlugu najoqqutassat atortussanngortinneqartut naapertorlugit nunalerinermik ingerlatsinissamut piumasaqaatinut akerliussagaluarpataluunniit, ingerlaannarsinnaassaaq, matumani nunalerisup pineqartup inatsimmi aalajangersakkat allat naapertorlugit sumiiffimmik ingerlatsisimassappat.

 

Nunalerineq pillugu inatsisartut inatsisaata allanngortinnera pillugu Inatsisartut inatsisaat nr. 15, 19. november 2007-imeersoq (Nunalerineq pillugu Siunnersuisoqatigiinnut piginnaatitsissut siunnersuisoqatigiillu katitigaanerat) atortuulersitsinissamut aalajangersakkanik ukuninnga imaqarpoq: ^[1]

 

§ 2

 

Inatsisartut inatsisaat ullormi 1. december 2007 atuutilissaaq.

 

Nunat immikkoortuinut kommuninullu agguataarinerup nutaap malitsigisaanik inatsisartut inatsisaasa assigiinngitsut aamma aalisarnermut nunalerinermullu suliassaqarfinni inatsisartut peqqussutaasa allanngortinnerat pillugit Inatsisartut inatsisaat nr. 11, 5. december 2008-meersoq.  (Kalaallit Nunaanni kommunit agguataarnerat pillugu inatsisartut inatsisaata malitsigisaanik sunniutaasussanut allannguinerit)  (UKA 2008/62) atortuulersitsinissamut aalajangersakkanik imaattunik imaqarpoq:^[2]

 

§ 2

 

Inatsisartut inatsisaat ullormi 1. januar 2009 atuutilissaaq.

 

Nunalerineq pillugu Inatsisartut inatsisaata allanngortinneqarneranik Inatsisartut inatsisaat nr. 21, 22. november 2011-imeersoq (Nunalerineq pillugu Siunnersuisoqatigiinni ilaasortat katitigaanerisa allanngortinneqarnerat) atortuulersitsinissamut aalajangersakkanik makkuninnga imaqarpoq:

 

§ 2

 

Inatsisartut inatsisaat 1. januar 2012 atuutilerpoq.

 

Aalisarnermut, Piniarnermut, Nunalerinermut Imminullu Pilersornermut Naalakkersuisoqarfik, ulloq 29. september 2025

 

 

 

Emanuel Rosing (atsior.)

Naalakkersuisoqarfimmi pisortaq

 

 

 

/ Thomas Rassing (Atsior.)