Quppernerup imai iserfigikkit
Oqaatsit toqqakkit
Ujaasinermut uterit
Inatsisit
Nr. 1
12. maaji 2005
Atuuttut

Nakorsaatit pillugit Inatsisartut peqqussutaat

Kalaallit Nunaanni Peqqinnissaqarfik pillugu Inatsimmi nr. 369-imi, 6. juni 1991-imeersumi  § 1 aamma § 3 imm. 1 aamma 2 naapertorlugit aalajangersarneqarpoq:

 

Kapitali 1
Atuuffissaa

 

§ 1. Inatsisartut peqqussutaanni pineqarput nakorsaatit. Nakorsaatitut pineqarput suulluunniit:
1) inunni uumasunilu nappaatit katsorsarnissaannut pitsaaliornissaannulluunniit atorneqarsinnaasutut ilisaritinneqartut, imaluunniit
2) inunnut uumasunulluunniit atorneqarsinnaasut imaluunniit tunniunneqarsinnaasut nakorsaatitortitsinikkut, tunillatsitsinaveersaarnikkut imaluunniit timip inuussutissaminik suliarinninneranut sunniuteqartitsinikkut timip pigisaasa atuutileqqitsinneqarnissaat, allanngortinnissaat sunniuteqarfiginissaalluunniit, imaluunniit nappaammik suussusersinissaq siunertaralugit.
Imm. 2. Peqqussummi pineqanngillat:
1) Uumasunut akiuussutissat serummillu.
2) Inuussutissiat inuulluarniutillu, uumasunut nerukkaatissat, nerisanut nerukkaatissanullu tapertat, ilanngullugit vitaminit mineralpræparatillu kiisalu nioqqutissiat kusassaanissaq kisiat siuneraralugu ammip qaavatigut atugassiat.
Imm. 3. Inatsisartut peqqussutaanni aporfissaqartinneqanngilaq qallunaat nunallu allamiut illersornissatigut issimaffiisa, umiarsuit sorsuutit sakkutuullu silaannakkut angallataasa sakkutooqarnikkut pilersuiffiit aqqutigalugit nakorsaatinik tamakkiisumik pilersorneqarsinnaanerat.

 

Kapitali 2
Qitiusumik nakorsaatileriffik Nakorsaatillu pillugit ataatsimiititaliaq

 

§ 2. Qiutiusumik nakorsaatileriffik Naalakkersuisut pilersittussaavaat. Qitiusumik nakorsaatileriffik Nakorsaatit pillugit ataatsimiititaliamut allatsitut suliassanik § 3 naapertorlugu sullissisuussaaq, nakorsaatinullu tunngasut ineriartortinneqarnerat malinnaaffigissallugu.
Imm. 2. Naalakkersuisut qitiusunik nakorsaatileriffik allaffissornikkut suliassanik annertunerusunik suliakkersorsinnaavaat.

 

§ 3. Nakorsaatit pillugit ataatsimiititaliaq Naalakkersuisunit pilersinneqassaaq, taanna nakorsamik siulittaasoqassaaq, ilaasortallu sinneri toqqarneqassapput peqqinnissaqarfimmi nakorsanut, peqqissaasunut, nakorsaatinut tunngasunut, allaffissornermut aningaasaqarniarnermullu pissutsit tunngasut ilisimasaqarfigineqarnissaasa qulakkeerneqarnissaat eqqarsaatigalugit. Nakorsaatit pillugit ataatsimiititaliaq nakorsaatit pillugit apeqqutini Naalakkersuisunut siunnersuisassaaq.
Imm. 2. Nakorsaatit pillugit ataatsimiititaliap makkuttaaq suliassarai
1) Nakorsaatit assigiinngitsut pigisat akunnaallisarneqarnissaat nakorsaatinillu atuinerup annikillisarnissaa; katsorsaanerup sunniuteqarluarnissaa, aningaasaqarneq, isumannaatsuunissaq katsorsaasarnermilu ileqquliussat eqqarsaatigalugit .
2) Nakorsaatinut tunngasumik akunnaatsunik tunngavissiinissaq qulakkiissallugu, nakorsaatit qularnaatsumik aningaasartuutillu qissimigaarlugit passunneqartarnissaat atorneqartarnissaallu ilanngullugit.
3) Nakorsaatinik atuineq nappaatillu ineriartornerat malinnaavigissallugit.
4) Nakorsaatinik passussinermi innersuussisarnermilu pitsaassusissap qulakkeernissaanut peqataanissaq.
Imm. 3. Nakorsaatit pillugit ataatsimiititaliaq nakorsaatit passunneqarnerat, sunut atortussaanerat atuinerlu pillugit Naalakkersuisunut siunnersuuteqarlutillu saaffiginnissinnaapput.
Imm. 4. Nakorsaatit pillugit ataatsimiititaliap katitigaanera suliassaalu pillugit Naalakkersuisut erseqqinnerusunik maleruagassaliussapput.

 

§ 4 . Nakorsaatit pillugit ataatsimiititaliap nakorsaatit pillugit najoqqutassiaq tamakkiisoq elektroniskiusumik naqitanngorlugulu ingerlaavartumik tamanut saqqummiuttarpaa.
Imm. 2. Nakorsaatit pillugit ataatsimiititaliap pasitsaappagu najoqqutassiatut allattukkani nikingasoqartoq, Nunatta nakorsaataasivia imaluunniit inniminniisoq nassuiaataasumik oqaaseqaateqaqquneqarsinnaapput.

 

Kapitali 3

 

Nakorsaatit

Nalinginnaasumik

 

§ 5. Nakorsaatinik passussineq imatut paasineqassaaq nakorsaatinik assartuineq, tigusineq, uninngasuuteqarneq, poortueqqinneq, puulersuineq tunniussinerlu. Nakorsaasersuineq taamatut oqarnermut ilaatinneqanngilaq.
Imm. 2. Nakorsaatinik pissarsiniarneq passussinerlu pillugit malittarisassanik erseqqinnerusunik Naalakkersuisut aalajangersaasinnaapput.

 

§ 6. Nakorsaatit taamaallaat nakorsanit, uumasut nakorsaannit imaluunniit nakorsaasiortunit Nakorsaatit pillugit ataatsimiititaliamut nakorsaasiorfimmit siumut nalunaaruteqareernikkut aammalu nioqqusiassap nalunaarutigineqareerneratigut sanaartorneqarsinnaapput. Tamatuma peqatigisaanik nakorsat nakorsaasiortullu sanaartorneq Peqqinnissakkut Nakkutilliisoqarfimmut nalunaarutigissavaat.
Imm. 2. Inuit imm. 1-imi taaneqartut saniatigut suliffeqarfiit allalluunniit nakorsaatinik aalajangersimasunik sanaartornissaannut Nakorsaatit pillugitataatsimiititaliap inassuteqarneratigut Naalakkersuisut akuersissuteqarsinnaapput.
Imm. 3. Imm. 1 naapertorlugu nalunaaruteqarnissamut iliuusissanik aammalu imm. 2 malillugu aalajangersimasunik nakorsaasiornissamut akuerineqarnissamut qinnuteqaatit aamma akuersissutit nalunaarutiginissaat pillugit Naalakkersuisut malittarisassanik erseqqinnerusunik aalajangersaasinnaapput.

 

§ 7. Nakorsaat akuerisaasutut isigineqassaaq Naalakkersuisut Nakorsaatit pillugit ataatsimiititaliap inassuteqarnera naapertorlugu nalunaarusiornikkut nakorsaatit allattorsimaffiinut ukununnga nakorsaammik ikkussisimappata:
1) Nakorsaatit innersuussutigineqartussaasut nalunaarutigineqartussaasullu (allattuiffik A).
2) Nakorsaatit innersuussutigineqartussaasut (allattuiffik B).
3) Nakorsaatit pisiassat (allattuiffik H).
Imm. 2. Nakorsaatit imm. 1 naapertorlugu akuerisaanngitsut Naalakkersuisut akuersissuteqaqqaartinnagit:
1) eqqunneqarsinnaanatillu anninneqarsinnaanngillat, nioqqutigineqarsinnaanngillat, agguaanneqarsinnaanngillat imaluunniit allatigut kaaviiaartinneqarsinnaanngillat,
2) passunneqarsinnaanngillat, imaluunniit
3) innersuussutigineqarsinnaanngillat allatigulluunniit inunnik uumasunilluunniit nakorsaanermi nappaatillu suussusersiornerini atorneqaqqusaanngillat.
Imm. 3. Nakorsaatip sunniuteqarnerata, ilakutaqarnerata imaluunniit pissutsit allat pingaaruteqartut nioqqusiap allagartaanit allaanerunerat akuersaarneqarsinnaasumik tunngavissaqartumik pasineqarpat Nakorsaatit pillugit ataatsimiititaliamut tusarniaareernerup kingorna nakorsaammik imm. 1-imi nakorsaatit allattorsimaffianni ilaatinneqartumik Naalakkersuisut inerteqquteqarsinnaapput. Tassunga atatillugu nakorsaatip taassuma erseqqinnerusumik innersuussineq malillugu peerneqarnissaa, tunniunneqarnissaa suujunnaarsinneqarnissaaluunniit Naalakkersuisunit peqqussutigineqarsinnaavoq.

 

§ 8. Nakorsaatit pillugit ataatsimiititaliap nakorsaatit allattorsimaffiini A-mi, B-mi H-miluunniit allannguutaajunnartut ikinnerpaamik ukiumut ataasiarluni Naalakkersuisunut inassutigisassavai.
Imm. 2. Allattorsimaffinniit nakorsaammik Naalakkersuisut peersisinnaapput Nakorsaatit pillugit ataatsimiititaliamit tamatuma inassutigineqarnissaa piumasaqaataanngikkaluartoq.

 

§ 9. § 7, imm. 1 naapertorlugu nakorsaatit akuerisaasut taamaallaat Nunatta nakorsaataasivia aqqutigalugu eqqunneqarsinnaapput, taamaattorli takuuk § 10 imm. 1 aamma 2.
Imm. 2. Inuit suliffeqarfiilluunniit nunami maani nakorsaatinut toqqortaatinut akisussaasut nakorsaatinik pisiortorfimmiit toqqaannartumik nakorsaatinik pissarsiniarnissaannut Nakorsaataasivinnut nuna tamakkerlugu qullersap akuersissuteqarfigisinnaavai. Nakorsaatit pillugit inatsimmi malittarisassat pissarsiniartumit malinneqarsimannginnerinik tunngavissaqartumik pasinnittoqarpat akuersissut utertinneqarsinnaavoq.
Imm. 3. Imm. 2 naapertorlugu akuersissummik Nakorsaataasivinnut nuna tamakkerlugu qullersap akuersissummik itigartitsinera imaluunniit utertitsinera Naalakkersuisunut suliassanngortinneqarsinnaavoq.

 

§ 10. Nappaatip nakorsarneqarnissaa pitsaaliornissaaluunniit siunertaralugu nammineq atugassanik akuerisaasumik pigilersimasanik inuit nunamut isernerminni nakorsaatinik nassarsinnaapput. Annertussusaasa najugaqarnissap sivisussusissaatut naatsorsuutigisami atugassatut naatsorsuutigisat sinnersimassanngilaat, sivisunerpaamilli qaammatini pingasuni atugassaassallutik.
Imm. 2. Nakorsaatit innersuussutigineqartussaasut nalunaarutigineqartussaasullu allattuiffianni A-mi ilanngunneqarsimasunik nakorsaatinik eqqussinermi taamaallaat najugaqarnissap sivisussusissaatut naatsorsuutigisami atugassatut annertutigisut eqqunneqarsinnaapput, sivisunerpaamilli ulluni 30-ni atugassat. Aammattaaq nunamut isernermi uppernarsaammik nassartoqassaaq, nunami najugaqarfimmi oqartussamit piginnaatitaasumit tunniunneqarsimasumik imaluunniit uppernarsarneqarsimasumik, angalasullu nakorsaatinik pisariaqartitsineranik uppernarsaasumik.
Imm. 3. Nakorsaatinik inuit eqqussisinnaanerat annissisinnaanerallu pillugit Naalakkersuisut erseqqinnerusunik malittarisassaliorsinnaapput.

 

§ 11. Peqqinnissaqarfimmi sulisut allatulluunniit nakorsaatinik eqqussuinissamut, passussinissamut imaluunniit tunniussisinnaanermut akuersissutaateqartut nakorsaatinik atuinermi, matuma ataani akiuussutissaliinermi, ilakutaritinneqartut siunertaanngitsumillu pisut Naalakkersuisunut nalunaarutiginissaannut pisussaapput.
Imm. 2. Paasissutissat imm. 1 naapertorlugu nalunaarutigineqartut Naalakkersuisut Naala-gaaffeqatigiinnerup iluani nunaniluunniit allani oqartussaasunut allanut ingerlateqqissinnaa-vaat, inunnik ajoqusertoqarnissaa pitsaaliorniarlugu pisariaqartutut nalilerneqarpat.
Imm. 3. Imm. 1 naapertorlugu nalunaartussaatitaaneq pillugu Naalakkersuisut erseqqinnerusunik maleruagassaliorsinnaapput.  

 

Nakorsaatit pisiassat

 

§ 12. Nakorsaatit pisiassat paasineqassapput tassaasut nakorsaatinut allattuiffimmi H-mi allattorneqarsimasut.

 

§ 13. Nakorsaatit pisiassat tuniniarneqarsinnaallutillu tunniunneqarsinnaapput taamaallaat:
1) Peqqinnissaqarfimmit.
2) Uumasut nakorsaannit ingerlatsinermik iluanni nakorsaatinik passussinissaminnut akuersissutaateqartunit.
3) Inunnit peqqinnissamik suliaqartunit namminersortunit ingerlatsinermik iluanni nakorsaatinik passussinissaminnut akuersissutaateqartunit.
4) Niuertarfinnit nakorsaatinik pisiassanik tuniniaanissamut passussinissamullu akuersissutaateqartunit.
Imm. 2. Niuertarfinni nioqqutissanik assigiingitsunik ikinnerpaamik peqarnissaq kiisalu akuersissutaateqarnermut akitsuutit pillugit imm. 1, nr. 4 naapertorlugu akuersissutinik tunniussisinnaaneq utertitsisinnaanerlu pillugit Naalakkersuisut malittarisassanik erseqqinnerusunik aalajangersaasinnaapput.

 

§ 14. Nakorsaatit pisiassat taamaallaat tuniniarneqarsinnaapput tunniunneqarsinnaallutilluunniit nakorsaatip akui, atorneqarnissaa, sunniutai, ilakutai ilisimaneqartut, annertussusiliineq inassutigineqartoq, toqqorsimaneqarnissaalu pillugit kalaallisut qallunaatullu paasissutissiisumik puuanut ikisamik allagartaqartillugit. Allagartaq nakorsaatip puuanut ikisaq nakorsaammut ilanngullugu puuani matoqqasumiitillugu imaluunniit nakorsaammut aalajangersorluarneqarsimatillugu tunniunneqassaaq.
Imm. 2. Puuanut ikisaq allagartaq Nakorsaatit pillugit ataatsimiititaliamut tusarniaareernikkut Nunatta nakorsaataasivianit akuerineqarsimassaaq.

 

Nakorsaatit innersuussutigineqartussaasut

 

§ 15. Nakorsaatit innersuussutigineqartussaasut paasineqassapput tassaasut nakorsaatit akuerisaasut tamarmik nakorsaatitut pisiassaanngitsut.

 

§ 16. Nakorsaatinik innersuussutigineqartussaasunik tunniussisinnaatitaapput taamaallaat inuit akuersissutaateqarfimmik iluani peqqinnissamik suliaqartut uumasullu nakorsaat.
Imm. 2. Nakorsaatit innersuussutigineqartussaatitaasut tunniussisinnaasuunngitsumit napparsimasumut taamaallaat tunniunneqarsinnaatitaapput aatsaat nakorsaatissanut allagartami imaluunniit nakorsaatit tunniunneqarnissaannut allagartaliussami tamanna eqqortumik uppernarsarneqarsimappat.
Imm. 3. Nakorsaatissanut allagartat aamma nakorsaatit tunniunneqarnissaannut allagartaliuttakkat pillugit Naalakkersuisut erseqqinnerusunik malittarisassaliorsinnaapput.

 

§ 17. Nakorsaatinut innersuussutigineqartussaasunut nalunaarutigineqartussaasunullu allattuiffimmi A-mi ilanngunneqarsimasunik nakorsaatinik atuineq malittarisassat Naalakkersuisunit aalajangersarneqarsimasut malillugit nalunaarutigineqartussaavoq.

 

Uumasunut nakorsaatit  

 

§ 18. Uumasunut nakorsaatinik, matuma ataani nerukkaatissanik aamma nerukkaatissanut tapinik hormonitalinnik imaluunniit nakorsaatinik allanik akulinnik tunniussinissaq aatsaat pisinnaavoq uumasut nakorsaata innersuussineratigut, taamaattoq takuuk imm. 2.
Imm. 2. Nakorsaqarfimmi nakorsaq uumasut nakorsaata suliassaanik ingerlataqarpat uumasunut nakorsaatinik tunniussineq nakorsap innersuussineratigut pisinnaavoq.
Imm. 3. Uumasunut nakorsaatit, matuma ataani tigumminnikkallartarnissami piffissat nakkutilliisarnissallu Naalakkersuisut erseqqinnerusunik malittarisassaliuussinnaavaat.

 

Kapitali 4
Nakorsaatit pillugit pilerisaarineq

 

§ 19. § 7 naapertorlugu Kalaallit Nunaani nakorsaatit akuerisaasumik nioqqutigineqarsinnaasut tunniunneqarsinnaasulluunniit kisiisa pillugit pilerisaarisoqarsinnaavoq.
Imm. 2. Nakorsaatit pisiassat kiisalu illersuutissanik akiuussutissaliinerit pitsaaliuinerillu pillugit ussassaarinerit Naalakkersuisunit akuerineqartut kisiisa pillugit tamanut ammasumik pilerisaarisoqarsinnaavoq.

 

§ 20. Nakorsaatit pillugit pilerisaarineq tamakkiisumik pineqartumullu tunngalluinnartumik pissaaq. Pilerisaarut uukapaatitsisuussanngilaq nakorsaatillu piginnaasaanik ingasattajaarissanani.

 

§ 21. Nioqqutissiat allat nakorsaataanngitsut inuit uumasulluunniit nappaataasa katsorsarnissaannut pinaveersaartinneqarnissaannulluunniit naleqquttutut tamanut ammasumik toqqaannartumik toqqaannanngitsumilluunniit ussassaarutigineqaqqusaanngillat.
Imm. 2. Nioqqutissiat allat nakorsaataanngitsut imm. 1-imi taaneqartutut sunniuttarnerat pillugu pisuni immikkut ittuni akuersissuteqarnikkut pilerisaarutigineqarsinnaanerat Naalakkersuisunit malittarisassaliuunneqarsinnaavoq.

 

§ 22. Peqqussut manna naapertorlugu pilerisaaruteqarnermut atatillugu pilerisaarisarneq tuniniaasarnerlu pillugit inatsisiliat allat aammattaaq maluginiarneqassapput.
Imm. 2. Nakorsaatit, matuma ataani nakkutiginninnissat nakkutilliisarnissallu ilanngullugit pillugit pilerisaarinissamut Naalakkersuisut erseqqinnerusunik malittarisassaliorsinnaapput.

 

Kapitali 5
Aalajangersakkat allat


Nakorsaatit pillugit kisitsisitigut takussutissiat

 

§ 23. Peqqinnissaqarfiup nakorsaatinik atuinera pillugu kisitsisitigut paasissutissanik Nakorsaataasivinnut nuna tamakkerlugu qullersaq ukiumoortumik suliaqartassaaq. Tamanna pillugu Naalakkersuisut erseqqinnerusunik malittarisassaliorsinnaapput.

 

Pineqaatissiinerit nakkutilliinerlu

 

§ 24. § 6, imm. 1, § 7, imm. 2, § 9, imm. 1, § 10, imm. 1-2, § 13, imm. 1, § 14, imm. 1, § 16, imm. 1-2, § 18, imm. 1, § 19, imm. 1-2, § 20 aamma § 21, imm. 1 naapertorlugit aalajangersakkanik unioqqutitsinerit pillugit akiliisitsisoqarsinnaavoq. § 7, imm. 3-mi, oqaaseqatigiit aappaata nassatarisaanik peqqusissummik inerteqqummilluunniit naapertuutsitsinnginneq akiliisitsinertaqarsinnaavoq.
Imm. 2. § 7, imm. 3, § 9, imm. 1 naapertorlugit aalajangersakkanik unioqqutitsinikkut nakorsaatit pineqartut arsaarinnissutigineqarsinnaapput.
Imm. 3. Imm. 1-imi ilanngunneqartunik unioqqutitsinerit, aktieselskabimit, anpartsselskabimit, andelsselskabimit assigisaannilluunniit unioqqutitsinerit ingerlatitsivimmut akiliisitsissutaasinnaapput. Namminersornerullutik Oqartussanit, kommunemit imaluunniit kommunalbestyrelsit, nunaqarfinni aqutsisut il.il. pillugit inatsisartut inatsisaanni § 64-imi ilaatinneqartunit kommunet ataatsimoorussaannit unioqqutitsinerusimappat Namminersornerullutik Oqartussanut, kommunalbestyrelsimut imaluunniit kommunet ataatsimoorussaannut akiliisitsissutaasinnaavoq.
Imm. 4. Peqqussut manna naapertorlugu najoqqutassiani unioqqutitsinernut akiliisitsinissamik arsaarinninnissamillu qanoq iliuuseqartoqarnissaa aalajangersarneqarsinnaavoq.

 

§ 25. Nakkutilliinerit, uppernarsaasussaatitaanerit, inunnillu suliffeqarfinnillu nakorsaatinik passussisinnaatitaasunik nakkutilliinerit pillugit maleruagassanik erseqqinnerusunik Naalakkersuisut aalajangersaasinnaapput.
Imm. 2. Kalaallit Nunannut nakorsaatinik eqqussuineq pillugu § 9, nakorsaatit pisiassat tuniniarneqarsinnaallutillu tunniunneqarsinnaasut pillugit § 13, imm. 1, allagartat nakorsaatip puuanut ikisat pillugit § 14, imm. 1 aamma § 13, imm. 2 naapertorlugu aalajangersakkat naapertorlugit nakorsaatit isumannaatsuunissaat eqqarsaatigalugu Nakorsaataasivinnut nuna tamakkerlugu qullersaasoq pisariaqartumik nakkutilliisinnaavoq. Nakorsaataasivinnut nuna tamakkerlugu qullersaq piginnaatinneqarpoq eqqartuussivimmit akuersinertaqanngitsumik nakorsaataasivinnut, pisiniarfiit initaannut assigisaannullu isernissamut, nakorsaatinik uninngasuutinik takuniaajartorluni misissuiartorlunilu. Aalajangersimasunik peqqussuteqarnissamut inerteqquteqarnissamullu maleruagassanik Naalakkersuisut aammattaaq aalajangersaasinnaapput.
Imm. 3. Uumasut nakorsaattut pisortaasoq, uumasunut nakorsaatit pillugit § 18, imm. 1-2 aamma § 18, imm. 3 naapertorlugu aalajangersakkat naapertorlugit inuussutissat isumannaatsuunissaat uumasullu atugarissaarnissaat eqqarsaatigalugit pisariaqartumik nakkutilliisinnaavoq. Uumasut nakorsaattut pisortaasoq piginnaatinneqarpoq eqqartuussivimmit akuersinertaqanngitsumik nakorsaataasivinnut, illuutinut inuussutissarsiutigalugu uumasuuteqarfinnut assigisaannullu isernissamut, nakorsaatinik uninngasuutinik uumasuutinillu takuniaanissamut misissuinissamullu. Aalajangersimasunik peqqussuteqarnissamut inerteqquteqarnissamullu maleruagassanik Naalakkersuisut aammattaaq aalajangersaasinnaapput.
Imm. 4. § 6, imm. 1-imi, § 7, imm. 2-mi, § 16, imm. 1 aamma 2-mi kiisalu §§ 19-21-mi aalajangersakkat eqquutsinneqarnersut Peqqinnissakkut Nakkutilliisoqarfiup nakkutigai.

 

Atortuulernerani atorunnaarsitsinermilu aalajangersakkat

 

§ 26. Inatsisartut peqqussutaat manna 1. januar 2006 atortuulissaaq.
Imm. 2. Atortuulernerata peqatigisaanik makku atorunnaarsinneqarput:
1) Nakorsaatit pillugit inatsit nr. 327 26. juni 1975-imeersoq.
2) Nakorsaataarniarfinnik ingerlatsineq pillugu inatsit nr. 209 11. juni 1954-imeersoq.
3) Nersutaatit nappaataat pillugit inatsimmi nr. 814-imi 21. december 1988-imeersumi § 40 (nakorsaatit pillugit inatsit), kunngip peqqussutaatigut nr. 858-ikkut 18. december 1991-imeersukkut atortuullersinneqartoq.
4) Nakorsaataarniarfinnik ingerlatsineq pillugu inatsimmi § 11, kunngip peqqussutaatigut nr. 12-ikkut 9. januar 1980-imeersukkut atortuulersinneqartoq.




Namminersornerullutik Oqartussat, ulloq 12. maj 2005




Hans Enoksen

/

Asii Chemnitz Narup

Allakkiat