Nakorsaatit pillugit inatsisartut peqqussutaanni nr. 1-imi 12. maj 2005-imeersumi § 2, imm. 2, § 5, imm. 2, § 16, imm. 3, § 24, imm. 4, aamma § 25, imm. 2, naapertorlugit aalajangersarneqarput:

 

Atuuffissaa

§ 1. Nakorsaatinut uninngasuutitanut tamanut tunngasuni nalunaarut atorneqassaaq.

 

Nassuiaatit

§ 2. Nakorsaatit uninngasuutitat tassaapput nakorsaatit aalajangersimasumik uninngasuutigineqartut peqqinnissaqarfimmi sulisunut, uumasut nakorsaannut, napparsimasunut, uumasuutilinnut, niuertarfinnut nakorsaatinik tuniniaasartunut imaluunniit nakorsaatinik uninngasuutilinnut allanut tunniunneqartartut. Ikiueqqaarnermi atortut nakorsaatinik nakorsamit allagartamik peqqaarani pisiarineqarsinnaasunik imallit kiisalu nakorsaatit napparsimasut, uumasuutillit imaluunniit angerlarsimaffiit namminneq pigisaat nalunaarut una malillugu nakorsaatitut uninngasuutitatut isigineqassanngillat.
Imm. 2. Nakorsaatinik piniartarnerit tassaapput nakorsaatinik qinusarnerit, Nunatta nakorsaataasivianit, nakorsaatinik uninngasuutitassatut nakorsaasiortut qullersaata innersuussimasaanit imaluunniit nakorsaatinik pilersuisumit akuerineqarsimasumit nakorsaatit piniarneqartut.
Imm. 3. Nakorsaatinik piniartoq tassaavoq peqqissaaveqarfik imaluunniit napparsimmavimmi immikkoortortaq, peqqissaanermik suliaqartoq namminersortoq, uumasut nakorsaat imaluunniit niuertarfik nakorsaatinik tuniniaasartoq sinnerlugu nakorsaatinut akisussaasuutitaasoq.
Imm. 4. Nakorsaatinik inniminniisoq tassaavoq inuk sulinerminut atatillugu suliffiup nakorsaataatissaanik piniartoq.

 

Nakorsaatinut uninngasuutitanut aamma taakku passunnerannut akisussaaneq

§ 3. Suliffeqarfinnut il.il. nakorsaatinik uninngasuutitalinnut akisussaanerpaaq nakorsaatinut akisussaasuusussamik toqqaassaaq, taassumalu nakorsaatit eqqortumik passunnissaat isumagissavaa.

§ 4. Nakorsaatinut akisussaasutut toqqarneqarsinnaapput nakorsat, nakorsaasiortut imaluunniit nakorsaatilerisut. Taakkuttaaq saniatigut peqqissaanermi suliallit allat imaluunniit uumasut nakorsaat toqqarneqarsinnaapput, taakku suliassamittut akuerisaaffimmik iluanni nakorsaatinik pineqartunik nakorsaasiisussatut akuerineqarsimappata.
Imm. 2. Niuertarfinni nakorsaatinik tuniniaaviusartuni nakorsaatinut akisussaasoq tassaavoq nakorsaatinik pisiarineqarsinnaasunik tuniniaanissamut passussinissamullu akuerisaasimasoq.
Imm. 3. Dronning Ingridip Napparsimmavissuani nakorsaatinut uninngasuutitanut taakkulu passunnissaannut akisussaasoq tassaavoq napparsimmavimmi immikkoortortami nakorsaaneq aqutsisoq, tassa allamik nakorsaatinut akisussaasumik toqqaasoqarsimanngikkaangat.

§ 5. Nakorsaatinut akisussaasoq sulisumik/ikiortimik suliamut piukkunnartumik nakorsaatinik passussisussamik toqqaasinnaavoq. Taamaattoqartillugu suliamik tigusisussap ilinniartinnissaa ilitsersuunnissaalu kiisalu suliap eqqortumik suliarineqarnissaa nakorsaatinut akisussaasup isumagissavaa.
Imm. 2. Kialuunniit nakorsaatinik passussinissamut suliassinneqarsimasup malittarisassat tassunga tunngassuteqartut ilisimassavai.

 

Nakorsaatinik piniartarneq

§ 6. Nakorsaatinik piniartarneq Nunatta nakorsaataasiviata immersugassaatai atorlugit allakkatigut, imaluunniit piniarfissat qarasaasiakkut atugassiat nakorsaasiortut qullersaannit akuerisaasut atorlugit pisassaaq.
Imm. 2. Nakorsaatinik piniarnerit tamarmik ataasiaannarluni piniarnerupput.
Imm. 3. Allakkatigut piniarnerit inniminniisup atsiorsimasussaavai.

§ 7. Nakorsaatinik piniartartussaq tassaavoq nakorsaatinut akisussaatitaasoq, taamaattoq §§ 8, 9 aamma 10 naapertorlugit allatut pisoqarsinnaavoq. Ikiorti taamaallaat piniarsinnaatitaavoq nakorsaasiortut qullersaannit taamaasiornissamut namminerpiaq akuerineqareersimaguni, taamaattoq tak. imm. 2.
Imm. 2. Nakorsaatit nalunaarutigineqartussaatitaasut taamaallaat nakorsaatinut akisussaasumit namminermit piniarneqarsinnaapput.

§ 8. Nakorsaatinik nakorsap allagartaliineratigut taamaallaat tunniunneqarsinnaasunik, malittarisassat malillugit pinngitsooratik angallatip nakorsaataasiviani pigineqartussaasunik angallatit naalagaat angallatinillu piginnittut allakkatigut piniarsinnaapput.

§ 9. Annanniusiortartut kiisalu annanniutinik misissuisarfinni pisortat nakorsaatinik nakorsap allagartaliineratigut taamaallaat tunniunneqarsinnaasunik, malittarisassat malillugit annanniutiniittussanik allakkatigut piniarsinnaapput, nakorsaatileriffimmit akuersissummik peqarnertik takutissinnaagunikku.
Imm. 2. Nakorsaatinik piniarnerni annanniutit sananeqarfiat normuallu allassimassapput.

§ 10. Suliffeqarfinni svejseriffiusartuni pisortat isinut tarnutinik cinchocain 0,5 pct.-imik imalinnik ataasiarluni atugassanik piniarsinnaapput.
Imm. 2. Taakkuninnga piniarneq immersugassat Sullivinnik Nakkutilliivimmit immikkut sanaat atorlugit pisassaaq.

§ 11. Nakorsaatinik piniarnermi allattukkat eqqortumik suliarineqarsimanngippata, tamanna nakorsaatinik piniartup saaffigineratigut aaqqinniarneqassaaq. Kukkunerusinnaasut amigaataasinnaasulluunniit aaqqinnissaat ajornarpat, nakorsaatinik piniarluni qinnuteqaat suliarineqarsinnaanngilaq, makkuninnga pisoqartinnagu
1) nakorsaammik piniarneq suliarineqanngippat napparsimasup passunnissaata kinguartinneqarnerata kingunerisaanik napparsimasup nakorsaat pinngikkuniuk peqqissutsimigut annertuumik akornusernissaa ilimagineqarpat, imaluunniit
2) qularutissaanngitsumik ersippat nakorsaatinik piniartup suna piniarlugu kissaatigisimaneraa.
Imm. 2. Nassiussisup imm. 1 naapertorlugu sulinini uppernarsassavaa.

§ 12. Nakorsaatinik nassiussinnginnermi nassiussiviup aqqa, ulloq suliarineqarfia nassiussisullu aqqa, suliffia atsiorneralu ersissapput, kiisalu §§ 8 aamma 9 naapertorlugit tunniussisoqartillugu angallatit nakorsaatinik pilersorneqarnissaannik piumasaqaataajunnartut pillugit malittarisassat malinneqarnerat ersersinneqarsimassalluni.

 

Nakorsaatit paarineqarnerat

§ 13. Nakorsaatit tiguneqarnerminni poorisaminniitinneqassapput, malittarisassat matumaniittut naapertorlugit poortoqqinneqarsimanngikkunik.

§ 14. Nakorsaatit susassaqanngitsunit tiguneqarsinnaajunnaarlugit paarineqassapput.
Imm. 2. Nakorsaatit nalunaarutigineqartussaatitaasut parnaarullugit nakorsaatinillu allanit immikkoortillugit paarineqassapput.

 

Nakorsaatinik poortueqqittarneq

§ 15. Nakorsaatit bakteriaajagaanngitsut kisimik poortoqqinneqarsinnaapput, taakku ataasiarluni pisassatut poortorneqarsimappata, soorlu iisartakkat, nakorsaatit sequtsikkat qallikkat assigisaallu.
Imm. 2. Nakorsaatit taamaallaat poortoqqinneqarsinnaapput katsorsaasup ilitsersuinera malillugu napparsimasup nammineq nakorsaasersornissaanut atugassaappata.
Imm. 3. Taamaattorli napparsimmaviit qaammatit arfinillit ingerlaneranni atugassanik nakorsaatinik ataatsikkut poortueqqittarsinnaapput, pissutsit immikkorluinnaq ittut tamaaliornissaq pisariaqalersissimappassuk.

§ 16. Nakorsaatit poortoqqitat paasissutissanik ersarissunik atuaruminartunillu makkuninnga allattuiffigineqarsimassapput:
1) nakorsaatip taaguutaa,
2) nakorsaatip qanoq ittuunera,
3) sakkortussusia,
4) amerlassusii,
5) ulloq poortueqqiffik,
6) ulloq pisoqaliffissaq, aamma
7) qanoq ililluni nakorsaatip atornissaanik ilitsersuut ilanngunneqarsinnaavoq
Imm. 2. Nakorsaatit kingusinnerusukkut tunniussassanngorlugit poortoqqinnerini, poortoqqitat tamaasa immikkut allattuivigineqassapput nakorsaatip poortoqqinneqartup aqqanik normuanillu, kiisalu poortukkat imaasa amerlassusii, ulloq immiiffik kiisalu poortueqqiisup atsiornera allassimassallutik.

§ 17. Nakorsaatit puui imaarneqarsimasut tassungalu peqatigitillugu immerneqarlutillu allagartalersorneqarsimasut ataatsimoortillugit nakorsaatinit ulluinnarni atortakkanit immikkoortillugit inissinneqassapput, nakorsaatinut akisussaasup akuersinissaata tungaanut.

§ 18. Nakorsaatinut akisussaasup poortueqqissimaneq misissoqqissaassavaa allattuiffimmilu atsiornermigut akuerissallugu.
Imm. 2. Poortueqqinnermi nakorsaatinut akisussaasoq peqataasimappat poortueqqissimaneq sulisumit allamit akuerineqassaaq.

 

Nakorsaatinik tunniussisarneq

§ 19. Nakorsaatit nakorsap allagartaliineratigut taamaallaat tunniunneqarsinnaasut, innersuussisuunngitsumit taamaallaat tunniunneqarsinnaapput, nakorsaasiineq nakorsaasiussanut allagartamut nakorsaatissanulluunniit allagartaq eqqortumik uppernarsarneqarsimappat, tak. nakorsaatit pillugit peqqussummi § 16, imm. 2.
Imm. 2. Nakorsaatinik tunniussisup tunniussineq nakorsaasiussanut allagartamut nakorsaatissanulluunniit allagartamut allassavaa, nakorsaatip taaguutaa, amerlassusaat/annertussusaat sakkorsussusaallu kiisalu sumit tunniunneqarnera, ulloq tunniussivik tunniussinerullu kimit suliarineqarnera ilanngullugit. Nakorsaasiussanut allagartat imaluunniit nakorsaatissanut nakorsap allagartaliinera qarasaasiaq atorlugu ingerlanneqartarpata paasissutissat qarasaasiakkut allanneqassapput.
Imm. 3. Nakorsaasiussanut allagartat aamma nakorsaatinut nakorsap allagartaliineri pappiaqqat atorlugit ingerlanneqartut tunniussisumit atsiorneqartassapput.

§ 20. Nakorsaatit nakorsap allagartaliineratigut taamaallaat tunniunneqarsinnaasut napparsimasumut tunniuneqaleraangata nakorsaatit allagartannguamik ikkussivigineqartassapput paasissutissanik makkuninnga imaqartumik:
1) napparsimasup aqqa,
2) ulloq tunniussivik,
3) atuinissamut ilitsersuut napparsimasumit paasiuminartoq,
4) ulloq nakorsaatip pisoqaliffissaa, kiisalu
5) kina nakorsaammik tunisisuunersoq.
Imm. 2. Paasissutissat imm. 1 naapertorlugu nakorsaatit puuisa qaavinut allattorneqarsinnaanngippata, taava allattukkat immikkut poorlugit nakorsaammut ilanngullugit tunniunneqartassapput imaluunniit nakorsaammut isumannaatsumik ikkunneqartassallutik.

§ 21. Nakorsaatit nakorsap allagartaliineratigut taamaallaat tunniunneqarsinnaasut nakorsaatinit uninngasuutitanit napparsimasunut tunniussisoqarnissaata piareersarnerani imaluunniit tunniussinermi, nakorsaatinut akisussaasup sulinermi malittarisassat ileqqussallu aaqqissussavai illersorneqarsinnaasumik nakkutigineqarnissaat isumannaatsuunissaallu anguniarlugu,
1) nakorsaatit nakorsamit allagartalikkat tunniunneqartut naammattumik eqqortumillu nakorsaasiussat allagartaannut imaluunniit nakorsap allagartaliussaanut uppernarsarneqarsimanissaat, aamma
2) nakorsaatit nakorsamit allagartalikkat tunniunneqarneranni nakorsaatillu allagartalerneqarneranni nakorsaatissiinermi ilitsersuutigineqartut nalunaarummilu matumani malittarisassat malinneqarnissaat.

§ 22. Kinaluunniit nakorsaatinik tunniussinermi peqataasoq kukkunnginnissamut maligassaq § 21-mi taaneqartoq malissallugu pisussaavoq.
Imm. 2. Tunniussineq nakorsamit, nakorsaasiortumit imaluunniit nakorsaatilerisumit suliarineqarpat aamma taakku pisussaapput makku kukkunersiussallugit,
1) nakorsaatip sakkortussusaa, amerlassusernera/annertussusernera sumullu atornissaa eqqortumik nalilerneqarsimanersoq kiisalu apeqqutaajunnartut paatsuuisinnaanermik akissusiisut isumannaarsimanissat, aamma
2) nakorsaatip atornissaanut il.il. napparsimasup pisariaqartitsinini naapertorlugu ilitsersuunneqarsimanissaa.
Imm. 3. Imm. 2-mi kukkunersiuisussaatitaaneq aamma peqqissaanermut suliaqartunut allanut atuuppoq, suliassatut akuerisaaffimmi nakorsaasersuisinnaatitaaffiup iluani.

 

Uppernarsaanissamut pisussaaffiit

§ 23. Nakorsaatinik piniarnerit kiisalu § 11, imm. 2 naapertorlugu uppernarsaatit suliarinninnerup kingorna sivikinnepaamik ukiuni pingasuni suliarinniffimmi toqqortarineqassapput.

§ 24. Nakorsaatinik tunniussisimanermut uppernarsaatit § 22 malillugu kukkunersiuisoqarsimaneranik kiap peqataasimaneranik takussutissaasut tunniussinerup kingorna sivikinnerpaamik ukiumi ataatsimi takuneqarsinnaanissaat nakorsaatinut akisussaasup isumagissavaa.

 

Nakorsaatinik uninngasuutitanik il.il. nakkutiginninneq

§ 25. Nakorsaatit pillugit peqqussummi § 25, imm. 2, oqaaseqatigiit aappaat malillugit eqqartuussisumit akuersissummik peqqaanngikkaluarluni nakorsaasiortut qullersaat nakorsaataasivinnut, pisiniarfinnut assigisaannullu isersinnaatitaavoq nakorsaatit pigineqartut misissoriartorlugit. Nakorsaatinut akisussaasoq pisussaavoq misissuinermi pisariaqarfiatigut ikiuutissalluni.
Imm. 2. Nakorsaasiortut qullersaat misissuinermini nakorsaatinik suujunnaarsitseqqusisinnavoq:
1) ulloq nakorsaatit pisoqaliffiat qaangerneqarsimappat,
2) nakorsaatit qalipaatissarinngisaminnik qalipaateqalersimappata imaluunniit imerpalasut perujoqalersimappata, imaluunniit
3) nakorsaatit allagartaat puiluunniit ima ajoqusertigisimappata imaasa suuneri pitsaassusiilu nalornissutaasinnaalerlutik.
Imm. 3. Nakorsaatit suujunnaarsinneqarneranni aningaasartuutaajumaartussat nakorsaatinik uninngasuutillip aningaasartuutigissavai.

§ 26. Allattukkat nalunaarut una malillugu pigineqartussat tamaasa kiisalu naatsorsuuserinermut tunngasut suliamillu suliarinninnermi malitassat nakorsaatinut uninngasuutitanut tunngasut nakorsaasiortut qullersaata takujumassinnaavai, taamaaliornissamut eqqartuussisumit akuersissummik takutitsinermigut.

§ 27. Nakorsaasiortut qullersaata ilisimaleruniuk malittarisassat atuuttut unioqqutillugit nakorsaatit passunneqartut, nakorsaatinut akisussaasoq tamatuminnga nalunaarfigisussaavaa pitsanngorsaaniarnermilu siunnersuissalluni.

§ 28. Nakorsaasiortut qullersaata nakorsaatit pillugit inatsisit unioqqutinneqartut ilisimaleruniuk imaluunniit pissutsit allat pillugit ilisimasaqaleruni pisariaqanngitsumik kinguarsaanani Peqqinnissakkut Nakkutilliisoqarfik nalunaarfigissavaa, tassa nalilerneqarsinnaappat nalinginnaasumik imalunniit pisumi aalajangersimasumi ataatsimi ima pisoqarnissaa aarlerinartoqartoq
1) inuit imaluunniit uumasut peqqissusaat ajoquserneqarsinnaasoq, imaluunniit
2) nakorsaatit uninngasuutit susassaqanngitsunit iserfigineqarsinnaappata.

§ 29. Nakorsaasiortut qullersaata nakorsaatit pillugit inatsisit unioqqutinneqartut ilisimaleruniuk imaluunniit pissutsit allat ilisimasaqarfigilerunigit, pisariaqanngitsumik kinguarsaanani uumasuutinut atugaritinneqartut pillugit naalakkersuisoqarfik nalunaarfigissavaa, tassa nalilerneqarsinnaappat nalinginnaasumik imalunniit pisumi aalajangersimasumi ataatsimi nerisassat isumannaatsuunissaannut uumasulluunniit ajunngitsumik pineqartussaanerannut tunngatillugu aarlerinartoqartoq.

 

Pineqaatissiisarnerit

§ 30. § 3, § 5, imm. 1, oqaaseqatigiit aappaat, §§ 6 aamma 7, §§ 11-14, § 15, imm. 1 aamma 2, §§ 16-20 aamma §§ 22 aamma 24 unioqqutinneqarpata akiliisitsinermik pineqaatissiisoqarsinnaavoq.

 

Atuutilerfia

§ 31. Nalunaarut atuutilerpoq 1. januar 2006.

Namminersornerullutik Oqartussat, ulloq 14. november 2005

Asii Chemnitz Narup

/

Søren Rendal