§ 1

Nakorsaatit pillugit Inatsisartut peqqussutaanni nr. 1-imi 12. maj 2005-imeersumi ima allannguuteqartitsisoqarpoq:

1. § 3, imm. 2, ima oqaasertalerneqassaaq:
"Imm. 2. Nakorsaatit pillugit ataatsimiititaliap aammattaaq suliassarai:
1) § 7, imm. 1, naapertorlugu nakorsaatit inatsisitigut akuerisaasut allattorsimaffiliornissaat.
2) Nakorsaatit assigiinngitsut pigineqartut pisariillisarnissaat nakorsaatinillu atuinerup annikillisarnissaa, katsorsaanerup ajunnginnerpaajunissaa, aningaasaqarneq, isumannaatsuunissaq katsorsaasarnermilu ileqqut eqqarsaatigiitigalugit.
3) Nakorsaatit atorlugit katsorsaasarnerup pisariitsuunissaanut tunngaviusut qulakkeernissaat, tassunga ilanngullugit nakorsaatinik passussinerup atuinerullu qularnaatsuunissaat aningaasartuutillu sapinngisamik annikitsuutinniarnissaat.
4) Nakorsaatinik atuineq nappaatillu ineriartornerat malinnaaffigissallugit.
5) Nakorsaatit passunneqartarneranni innersuussisarnermilu pitsaassutsip qulakkeernissaanut peqataanissaq.".

2. § 3-mi, imm. 3-p, kingorna nutaatut ivertinneqassaaq:
"Imm. 4. Nakorsaatit pillugit ataatsimiititaliaq piffissap sivikitsup ingerlanerani ataatsimiissinnaanngippat Nakorsaatit pillugit ataatsimiititaliap siulittaasua Nakorsaatit pillugit ataatsimiititaliaq sinnerlugu aalajangiisinnaavoq, suliamik ilisimasallit attuumassuteqartut siunersioreernerisa kingorna tamanna pisinnaalluni.".

Imm. 4, tamatuma kingorna imm. 5-itut inissippoq.

3. § 7 ima oqaasertalerneqassaaq:
"§ 7. Nakorsaat inatsisitigut akuerisaasutut isigineqassaaq Nakorsaatit pillugit ataatsimiititaliap nakorsaatit allattorsimaffiisa uku arlaannut ilanngutereerpagu:
1) Nakorsaatit innersuussutigineqartussaasut nalunaarutigineqartussaasullu (allattorsimaffik A).
2) Nakorsaatit innersuussutigineqartussaasut (allattorsimaffik B).
3) Nakorsaatit pisiassat (allattorsimaffik H).
Imm. 2. Nakorsaatit allattorsimaffii minnerpaamik qaammammut ataasiarluni iluarsaanneqartassapput tamanullu saqqummiunneqarlutik peqqinnissaqarfiup nittartagaani.
Imm. 3. Nakorsaatit, imm. 1, naapertorlugu nakorsaatitut inatsisitigut akuerisaasutut akuerineqanngitsut Nakorsaatit pillugit ataatsimiititaliaq akuersissuteqaqqaartinnagu:
1) Eqqunneqarsinnaanngillat, anninneqarsinnaanngillat, nioqqutigineqarsinnaanngillat, agguaanneqarsinnaanngillat allatigulluunniit kaaviiartinneqalersinnaanngillat.
2) Passunneqarsinnaanngillat.
3) Innersuussutigineqarsinnaanngillat allatigulluunniit inunnik uumasunilluunniit nakorsaanermi nappaatillu suussusersiornerini atorneqassanngillat.".

4. § 8, ima oqaasertalerneqassaaq:
"§ 8.Nakorsaatip sunniuteqarnerata, ilakutaqarnerata imaluunniit pissutsit allat pingaaruteqartut nioqqusiap allagartaanit allaanerunerat akuersaarneqarsinnaasumik tunngavissaqartumik pasineqarpat § 7, imm. 1-imi nakorsaatit allattorsimaffiini ilaatinneqartunik Nakorsaatit pillugit ataatsimiititaliaq inerteqquteqarsinnaavoq. Tassunga atatillugu nakorsaatip taassuma erseqqinnerusumik innersuussineq malillugu peerneqarnissaa, tunniunneqarnissaa suujunnaarsinneqarnissaaluunniit Nakorsaatit pillugit ataatsimiititaliamit peqqussutigineqarsinnaavoq.".

5. § 24, imm. 1 aamma 2, ima oqaasertalerneqassapput:
"§ 24. § 6, imm. 1, § 7, imm. 3, § 9, imm. 1, § 10, imm. 1 aamma 2, § 13, imm. 1, § 14, imm. 1, § 16, imm. 1 aamma 2, § 18, imm. 1, § 19, imm. 1 aamma 2, § 20 aamma § 21, imm. 1, naapertorlugit aalajangersakkanik unioqqutitsinerit pillugit akiliisitsisoqarsinnaavoq. § 8-p nassatarisaanik peqqusissummik inerteqqummilluunniit naapertuutsitsinnginneq akiliisitsinertaqarsinnaavoq.
Imm. 2. § 8 aamma § 9, imm. 1, naapertorlugit aalajangersakkanik unioqqutitsinikkut nakorsaatit pineqartut arsaarinnissutigineqarsinnaapput.".

6. § 24-mi imm. 4-p kingorna nutaatut ivertinneqassaaq:
"Imm. 5. Najoqqutassiani peqqussut manna naapertorlugu sananeqartuni aktieselskabip, anpartsselskabip, andelsselskabip assigisaasaluunniit unioqqutitsinerisa akiliisitaanermik pineqaatissinneqarsinnaanerat pillugu maleruagassiortoqarsinnaavoq. Aammattaaq kommunalbestyrelset, nunaqarfinni aqutsisut il.il. pillugit inatsisartut inatsisaanni § 64-imi pineqartut pillugit Namminersornerullutik Oqartussat, kommunip kommuniniluunniit ataatsimoorussat unioqqutitsinerisa akiliisitaanermik pineqaatissinneqartarnissaat pillugu maleruagassanik aalajangersaasoqarsinnaavoq.".

7. § 25, imm. 4, ima oqaasertalerneqassaaq:
"Imm. 4. § 6, imm. 1, § 7, imm. 3, § 16, imm. 1 aamma 2, kiisalu §§ 19-21 naapertorlugit aalajangersakkat eqquutinneqarnissaat Peqqinnissakkut Nakkutilliisoqarfiup nakkutigaa.".

Inatsisartut peqqussutaat atuutilerpoq ulloq 1. juli 2006. Atortuulersitsinerup peqatigisaanik nakorsaatit inatsisitigut akuerisaasut pillugit nalunaarut nr. 22, 14. november 2005-imeersoq atorunnaarsinneqarpoq.

Hans Enoksen

/

Asii Chemnitz Narup