Matumuuna Inatsisartut Naalakkersuisullu pillugit Inatsisartut inatsisaat nr. 26, 18. november 2010-meersoq, tak. inatsit pillugu nalunaarut nr. 14, 14. december 2021, Inatsisartut inarsisaat nr. 32 af 25. novembari 2022-meersumi kingunerisaanik allannguutit ilanngullugit nalunaarutigineqarpoq.

Kapitali 1
Namminersorlutik Oqartussat

  § 1.  Kalaallit Nunaanni Namminersorlutik Oqartussat suliassaqarfiit tigusatik pillugit inatsisiliortutut atuutsitsinissamullu pissaaneqarput. Eqqartuussiviit, Namminersorlutik Oqartussat pilersitaat Kalaallit Nunaanni suliassaqarfinnut tamanut eqqartuussivittut pissaaneqarput. Tamanna naapertorlugu inatsisiliorneq Inatsisartuniippoq, atuutsitsineq Naalakkersuisuniilluni eqqartuussivittullu pissaaneq eqqartuussivinniilluni.

Kapitali 2
Inatsisiliortutut pissaaneq

  § 2.  Inatsisartut nalinginnaasumik, toqqaannartumik isertortumillu qinersinikkut ukiunut sisamanut qinerneqartunik 31-inik ilaasortaqarput. Nutaamik qinersisoqarsimatinnagu qanorluunniit pisoqaraluarpat ilaasortaaffiit annaaneqarsinnaanngillat.
  Imm. 2.  Inatsisartunut qinersinermut maleruagassat immikkut Inatsisartut inatsisaatigut aalajangersarneqassapput.

  § 3.  Ilaasortat qinigaanerisa atuuttuussusiat kiisalu ilaasortaq qanoq qinigaasinnaassusiiagaasinnaanersoq pillugu apeqqut Inatsisartut nammineerlutik aalajangigassaraat.

  Imm. 2.  Inatsisartunut ilaasortap qinigaasinnaassusiiagaasinnaavoq, pisumi inuup nalinginnaasumik isigineqarnermini Inatsisartunut ilaasortaanermini ataqqinaataaruppat inaarutaasumik eqqartuussummik akiliisinneqarnermilluunniit akuersissuteqarnermik pinerluttulerinermi inatsisit tunngavigalugit pineqaatissinneqarsimaguni.

  § 4.  Inatsisartunut ilaasortaaneq inuiaqatigiinnit toqqagaanikkut suliassiissutitut pisussaaffiuvoq. 
  Imm. 2.  Inatsisartunut ilaasortaq tunuarniuteqarpat imaluunniit sulinngiffeqarnissamik akuerineqaqquppat qinnuteqarneq akuerineqarsinnaanersoq Inatsisartut aalajangissavaat.

  § 5.  Inatsisartut innimiginarluinnartussaapput.
  Imm. 2.  Inatsisartunut ilaasortat sulinerminni namminneq nalunngeqatiginnissusertik kisiat tunngavigissavaat.

  Imm. 3.  Inatsisartut suleriaasertik nammineerlutik aalajangersassavaat.

  § 6.  Inatsisartunut ilaasortaq kinaluunniit Inatsisartuni nammineq oqaaserisaminut Inatsisartut avataanni Inatsisartut akuerinngisaannik akisussaatinneqarsinnaanngilaq.
  Imm. 2.  Inatsisartunut ilaasortaq kinaluunniit, iliuuseqarnermini pakasarneqarsimanngippat, Inatsisartut akuersisimatinnagit unnerluutigineqarsinnaananilu qanorluunniit ittumik kiffaanngissusiiarneqarsinnaanngilaq.

  § 7.  Inatsisartut nutaamik qinersinerup kingornatigut sapinngisamik piaartumik kingusinnerpaamillu ullut 45-t qaangiutsinnagit katersuutissapput. Ataatsimiigiaqqusisuussaaq ilaasortaq sivisunerpaamik Inatsisartunut ilaasortaasoq imaluunniit ilaasortat arlallit sivisoqatigiimmik ilaasortaasimappata angajulleq. Qinigaanerup nalilerneqarnissaata aammalu Inatsisartut Siulittaasoqarfiannik qinersisoqarnissaata tungaanut ilaasortap taassuma Inatsisartut ataatsimiinneri aqussavai.

  § 8.  Inatsisartut aalajangiisinnaassuseqarput ikinnerpaamik ilaasortat affaat najuuppata. Aalajangiisoqartarpoq aalajangiineq taasisunit ilaasortat najuuttut affaannit amerlanerusunit taperserneqarpat.

  Imm. 2.  Inatsisartut Siulittaasoqarfiata suliaq kinguartinneqarsinnaanngitsutut nalilerpagu, Inatsisartut imm. 1 apeqqutaatinnagu elektroniskimik ataatsimiissinnaapput

  § 9.  Inatsisartuni ataatsimiinnerit tamanut ammasuupput. Taamaattorli Inatsisartut isumaqatigiissutigisinnaavaat suliassat ataasiakkaat matoqqasumik ataatsimiinnermi oqaluuserineqarnissaat. Suliassap matoqqasumik ataatsimiissutigisariaqarneranik apeqqut matoqqasumik ataatsimiinnermi isumaqatiginninniutaassaaq, taamaaliornissaq Inatsisartunit imaluunniit ataatsimiinnermi aqutsisumit aalajangerneqarpat.
  Imm. 2.  Inatsisartuni isumaqatiginninniarnerit kalaallisut ingerlanneqassapput. Inatsisartunut Naalakkersuisunullu ilaasortat kalaallit oqaasiinik atuinngitsut danskisut oqalussinnaatitaapput, oqaasiilu kalaallisuumut nutserneqassallutik taamatuttaarlu isumaqatigiinniarnerit danskisut aamma malinnaaffigineqarsinnaassallutik.
  Imm. 3.  Inatsisartut isumaqatiginninniutaat taakkununngalu ilanngussat tamanut saqqummiunneqartassapput kalaallisut danskisullu.
  Imm. 4.  Naalagaaffiup Sinniisaa Inatsisartut tamanut ammasumik ataatsimiinnerini najuuffiginninnissamik pisinnaatitaavoq.

  § 10.  Inatsisartut katersuuttassapput Inatsisartut siulittaasuata pisariaqartitsisorineratut akulikitsigisunik, taamatullu aamma katersuuttassallutik Naalakkersuisut siulittaasuata imaluunniit Inatsisartunut ilaasortat ikinnerpaamik affaasa tamanna piumasarigaangassuk.
  Imm. 2.  Inatsisartut ileqquusumik katersuunnermi aalajangissavaat Inatsisartut tullianik ileq-quusumik katersuunnissaannut piffissaq ataatsimiiffiusussaq.

  § 11.  Inatsisartut Siulittaasoqarfiata ataatsimiinnissaq sioqqullugu Inatsisartut ilaasortaannut, Naalakkersuisunut Naalagaaffiullu Sinniisuanut oqaluuserineqartussatut naatsorsuutigineqartut nalunaarsorneri nassiutissavai. Nalunaarsuutit tamanut saqqummiunneqassapput.

  § 12.  Inatsisartunut ilaasortaq pisortat suliassaataat pillugu paasissutissinneqarnissaminik kissaateqarpat, tamanna Naalakkersuisunut apeqquteqarnikkut pisinnaavoq.

  Imm. 2.  Naalakkersuisut apeqqummut akissuteqarnissaminnut pisussaaffeqanngillat:

1)  Naalakkersuisut paasissutissanik akissuteqarnissaminnut atugassaminnik pissarsisinnaanngippata,

2)  malunnartumik piffissaq nukissallu paasissutissanik akissuteqarnissamut atugassanik pissarsiniarnermut atortariaqassappata, imaluunniit

3)  paasissutissat kissaatigineqartut nipangiussisussaatitaanermut ilaatinneqarpata.

  § 13.  Inatsisartut inatsisissaattut, inatsisartut peqqussutissaattut aalajangiiffigisassanillu allanik siunnersuutinik Inatsisartunut Naalakkersuisunullu ilaasortaq kinaluunniit saqqummiussisinnaavoq.
  Imm. 2.  Kalaallit Nunaannut sunniutilinnik inatsisissatut naalagaaffiilluunniit isumaqatigiissutissaattut danskit naalakkersuisuisa siunnersuutaat Inatsisartut aalajangiiffigisassaattut siunnersuutitut Naalakkersuisunit saqqummiunneqartassapput.

  § 14.  Inatsisartut inatsisissaattut siunnersuutit inatsisitut ilusilerlugit saqqummiunneqassapput Inatsisartunilu pingasoriarlugit suliarineqassallutik.

  § 15.  Naalakkersuisut ukiumi ukioq aningaasanut inatsiseqarfiusoq sioqqullugu kingusinnerpaamik novembarip ulluisa 15-ianni inaarutaasumik akuersissuteqarnissaq siunertaralugu ukiumut aningaasanut inatsiseqarfiusumut tulliuttumut Inatsisartut aningaasanut inatsisissaattut siunnersuut saqqummiutissavaat.

  § 16.  Inatsisartut Aningaasaqarnermut Ataatsimiititaliaat Naalakkersuisut aningaasanut inatsisissatut siunnersuutaata siullermeerlugu aappassaaneerlugulu oqaluuserineqarnerata akornanni nunap karsianut missingersuutitut siunnersuutit pillugit isumaliutissiissuteqassaaq, Inatsisartut isertitanut- aamma aningaasartuutinut politikkikkut ingerlatsinerannut najoqqutassianut pingaarnernut oqaaseqarfiginnillunilu siunnersuuteqassalluni kiisalu suliassani Inatsisartunit Naalakkersuisunilluunniit ataatsimiititaliamut innersuunneqarsimasuni Inatsisartut sinnerlugit oqaaseqartassalluni.
  Imm. 2.  Inatsisartut Aningaasaqarnermut Ataatsimiititaliaata siunertanut aningaasartuutaasussat aningaasanut inatsisip akuersissutigineqarnerani siumut naatsorsuutigineqarsimanngitsut Inatsisartut sinnerlugit akuersissutigisinnaavai. Tamanna pillugu Inatsisartunut Inatsisartullu Ombudsmandianut aningaasartuutaasussat siunertanut aningaasanut inatsisip akuersissutigineqarnerani siumut naatsorsuutigineqarsimanngitsunut tunngatillugu aningaasartuutaasussat Inatsisartut sinnerlugit Suleriaaseq pillugu Ataatsimiititaliamit akuersissutigineqarsinnaapput, inatsisartut ataatsimiinginneranni.
  Imm. 3.  InatsisartutAningaasaqarnermut Ataatsimiititaliaata aningaasartuutissatut akuersissutai ukiumoortumik ilassutitut aningaasaliissutinut inatsimmi, ukiumi aningaasanut inatsiseqarfiusumi tulliuttumi Inatsisartut ileqquusumik siullermeerlutik ataatsimiinneranni oqaluuserineqartussami, katersorneqassapput.
  Imm. 4.  Naalakkersuisut aningaasanut inatsisip suliarinerani missingersuusiornermi maleruagassanik malittarisassat aalajangersassavaat.

  § 17.  Aktiaateqarluni ingerlatseqatigiiffinni Namminersorlutik Oqartussanit tamakkiisumik ilaannakuusumilluunniit pigineqartuni aningaasaliinissamik qularnaveeqqusiinissamilluunniit allatulluunniit aningaasatigut iluaqusiinissanik pingaarutilinnik siunnersuutinik qinnuteqaatinilluunniit ataatsimiititaliap suliarinninnerani atugassatut ingerlatseqatigiiffimmit pineqartumit, pisariaqarpat aktiaateqarluni ingerlatseqatigiiffiit pillugit inatsimmi ingerlatseqatigiiffiulluunniit malittarisassaanni periarfissiissutaasut atornerisigut, paasissutissanik erseqqinnerusumik nalunaakkanik pissarsiniarnissamik Inatsisartut Aningaasaqarnermut Ataatsimiititaliaata Naalakkersuisut peqqusinnaavai. Ataatsimiititaliap kaammattuineratigut paasissutissat Naalakkersuisut pissarsiatik kinguarsaanertaqanngitsumik ataatsimiititaliamut atugassanngortissavaat.
  Imm. 2.  Paasissutissat ataatsimiititaliamit pisariaqartutut nalilerneqartut tigunissaasa tungaanut siunnersuutinik qinnuteqaatinilluunniit imm. 1-imi taaneqartunik suliarinninnini ataatsimiititaliap unitsikkallarsinnaavaa.
  Imm. 3.  Paasissutissat isertuussassatut tunniunneqarsimappata ataatsimiititaliami ilaasortat allallu ataatsimiititaliap oqaluuserinninnerani najuuttut imm. 1 naapertorlugu ataatsimiititaliami ilisimalikkaminnik isertuussinissaminnut pisussaatitaapput. Nutaatut ilaasortanngortoq kinaluunniit pisussaaffimmik tamatuminnga eqquutsitsinissamik uppernarsaalluni atsiussaaq.

  § 18.  Kukkunersiuinermut Ataatsimiititaliap Nunatta Karsiata naatsorsuutai kukkunersiuisullu taakkununnga oqaaseqaataat ukiumut ataasiarluni misissortassavai, naatsorsuutillu pisariaqalersitaannik Naalakkersuisunut apeqquteqarlunilu oqaaseqarfiginnittassalluni. Ataatsimiititaliap apeqqutai oqaaseqaataalu Naalakkersuisut akissutaat ilanngullugit Inatsisartunut saqqummiunneqartassapput.

  Imm. 2.  Ataatsimiititaliaq qaqugukkulluunniit uku pillugit misissuinernik aallartitsisinnaavoq oqaluuserinnissinnaalluniluunniit:

1)  aningaasat aqunneqarneranni suliffeqarfiillu naatsorsuutinut ilaatinneqartut ingerlanneqarne-ranni aningaasanut tunngasutigut isiginiagassat naapertuuttumik isiginiarneqarsimanersut, aamma

2)  iliuutsit naatsorsuutit saqqummiunneqarnerinut ilaatinneqartut aningaasaliissutinut nalunaa-rutigineqartunut, inatsisinut najoqqutassianullu allanut kiisalu isumaqatigiissutinut isumaqati-giissutigineqarsimasunut nalinginnaasumillu suleriaatsimut naapertuuttuunersut.

  Imm. 3.  Ataatsimiititaliap sapinngisamik piaarnerpaamik Naalakkersuisut periarfississavaat nassuiaatit, nalunaarusiat immikkullu ilisimasalinnit naliliinerit il.il. ataatsimiititaliap imm. 2 malillugu pissarsiarisimasaasa oqaluuseriniarlugilluunniit aalajangersimasaasa oqaaseqarfiginissaannut.

  Imm. 4.  Ataatsimiititaliaq, ataatsimiititaliap tamanna pisariaqartippagu, Nunatta Karsiata naatsorsuutai pillugit isumaliutissiissuteqarnissaq utaqqinngikkaluarlugu ingerlatsinermik misissuineq imm. 2-mut ilaatinneqartoq pillugu Inatsisartunut ilisimatitsissuteqarsinnaavoq.

  Imm. 5.  Ataatsimiititaliap qinnuteqarneratigut, paasissutissat atortussallu suugaluartulluunniit imm. 1-2 tunngavigalugit ataatsimiititaliap suliassaanik ataatsimiititaliap isumaginninneranut pingaarutillit, Naalakkersuisut nalunaarutigisassavaat tunniuttassallugillu.

  Imm. 6.  Ataatsimiititaliamut ilaasortap ikinnerpaamik ataatsip tamanna piumasarippagu imm. 5 malillugu paasissutissanik atortussanillu ataatsimiititaliaq pissarsiniassaaq.

  § 19.  Namminersorlutik Oqartussat aktiaatilittut soqutigisaannik Naalakkersuisut qanoq isumaginninnerat Kukkunersiuinermut Ataatsimiititaliap taamatuttaaq nakkutigissavaa.
  Imm. 2.  Aktiaateqarluni ingerlatseqatigiiffiit Namminersorlutik Oqartussanit tamakkiisumik ilaannakuusumilluunniit pigineqartut ingerlanneqarneranni aningaasaqarnikkut innimigisassanik Naalakkersuisut naammattumik annertussuseqartumik qulakkeerinninniarsimanersut ataatsimiititaliap imm. 1 naapertorlugu nakkutilliinerminut ilaatillugu nalilersorsinnaavaa.
  Imm. 3.  Aktiaateqarluni ingerlatseqatigiiffinni Namminersorlutik Oqartussanit tamakkiisumik ilaannakuusumilluunniit pigineqartuni Namminersorlutik Oqartussat aktiaatilittut soqutigisaannik ataatsimiititaliap nakkutilliinermini atugassatut ingerlatseqatigiiffimmit, pisariaqarpat aktiaateqarluni ingerlatseqatigiiffiit pillugit inatsimmi ingerlatseqatigiiffiulluunniit malittarisassaani periarfissiissutaasut atornerisigut, paasissutissanik erseqqinnerusumik nalunaakkanik pissarsiniarnissamik Naalakkersuisut peqqusinnaavai. Ataatsimiititaliap kaammattuineratigut paasissutissat Naalakkersuisut pissarsiatik kinguarsaanertaqanngitsumik ataatsimiititaliamut atugassiissutigissavaat.
  Imm. 4.  Ataatsimiititaliami ilaasortaq kinaluunniit aalajangiiffigisassatut siunnersuummik Inatsisartut aalajangiiffigisassaannik imm. 2-3-lu naapertorlugit saqqummiussisinnaavoq. Inatsisartunut ilaasortat ikinnerpaamik 2/5-liisa siunnersuut isumaqatigalugu taasippata siunnersuut akuersissutigineqartutut isigineqassaaq. Siunnersuummut allannguutissatut siunnersuummik saqqummiussisoqarsinnaanngilaq.
  Imm. 5.  Paasissutissat isertuussassatut tunniunneqarsimappata ataatsimiititaliami ilaasortat allallu ataatsimiititaliap oqaluuserinninnerani najuuttut imm. 1 naapertorlugu ataatsimiititaliami ilisimalikkaminnik isertuussinissaminnut pisussaatitaapput. Nutaatut ilaasortanngortoq kinaluunniit pisussaaffimmik eqquutsitsinissamik uppernarsaalluni atsiussaaq. Pissutsinik Namminersorlutik Oqartussat aktiaatilittut soqutigisaannut tunngasunik Inatsisartut ilisimatitsissuteqarfigineqarnissaat ataatsimiititaliap pisariaqartutut isigiguniuk ataatsimiititaliaq immikkuullarissumik isumaliutissiissuteqassaaq. Isumaliutissiissut paasissutissanik isertuussassanik imaqarpat matoqqasumik ataatsimiinnermi suliarineqassaaq.

  § 20.  Inatsisartut Ombudsmandimik qinersisassapput Inatsisartut sinnerlugit Namminersorlutik Oqartussat kommunillu ingerlatsinerannik malinnaasussamik. Ombudsmandi inatsisartunut ilaasortaasinnaanngilaq inatsisilerituutullu ilinniarsimasuussalluni.
  Imm. 2.  Ombudsmandi Inatsisartunit tatigineqarunnaarpat Inatsisartut soraarsissinnaavaat.
  Imm. 3.  Ombudsmandip sulinera Inatsisartut Inatsisit Atortinneqarnerannut Ataatsimiititaliaata ingerlaavartumik malinnaavigissavaa. Ombudsmandi ingerlatani pillugit ukiumoortumik nalunaarummik Inatsisartunut saqqummiussisassaaq.
  Imm. 4.  Ombudsmandip pissutsit atugarisai erseqqinnerusut immikkut Inatsisartut inatsisaatigut aalajangersarneqassapput.

Kapitali 3
Nunanut allanut sillimaniarnermullu tunngasut

  § 21.  Inatsisartut Nunanut Allanut Sillimaniarnermullu Ataatsimiititaliaata nunanut allanut sillimaniarnermullu pissutsit Naalakkersuisuneersut suliassarai taakkununngalu attuumassuteqartunut sammisamut apeqquteqarsinnaallunilu oqaaseqaateqarsinnaavoq. Ataatsimiititaliap suliassaqarfimmini ineriartornermut malinnaalluarnissani pisussaaffigaa.
  Imm. 2.  Nunanut Allanut Sillimaniarnermullu Ataatsimiititaliami ilaasortat allallu ataatsimiititaliami oqallittoqarnerani peqataasimasut paasissutissanik ataatsimiititaliami paasineqarlutik paasissutissanik isertuussanik danskit naalakkersuisuinit Naalakkersuisuniillu tunniunneqartunik aammalu ataatsimiititaliap siulittaasuata tamakku saniatigut aalajangigaanut isertuussinissamik pisussaaffeqarput. Kinaluunniit ilaasortaq nutaaq aalajangersagaq taanna malinniarlugu inatsisinik malinninniarluni allakkatigut uppernarsaalluni atsiortinneqassaaq.

Kapitali 4
Atuutsitsisutut pissaaneq

  § 22.  Naalakkersuisunut ilaasortat Inatsisartunit taakku qinigaaffiannut atuuttumik qinerneqassapput.
  Imm. 2.  Naalakkersuisut siulittaasuat Inatsisartunut ilaasortat akornannit qinerneqassaaq.
  Imm. 3.  Naalakkersuisut siulittaasuat Naalakkersuisunut ilaasortanik qinigassanik amerlassusilikkanik aqqisigut taasanik Inatsisartunut inassuteqassaaq. Naalakkersuisunut ilaasortassanik qinersineqassaaq siulittaasup siunnersuutaa ataatsimut taasissutigineratigut.
  Imm. 4.  Naalakkersuisunut ilaasortaq Inatsisartunut ilaasortaanngitsoq Inatsisartunut qinigaasinnaaneq pillugu aalajangersakkanik sukkulluunniit atuuttunik eqquutsitsissaaq.
  Imm. 5.  Naalakkersuisunutilaasortaaneq inuiaqatigiinnit toqqagaanikkut suliassiissutitut pisussaaffiuvoq.
  Imm. 6.  Naalakkersuisunut ilaasortat ataasiakkaat akisussaatinneqartarnerat Inatsisartut inatsisaatigut immikkut aalajangersarneqassaaq.

  § 23.  Naalakkersuisut siulittaasuata Naalakkersuisunut ilaasortat akornanni Naalakkersuisut suliassaqarfii agguataassavai.
  Imm. 2.  Naalakkersuisut siulittaasuata Inatsisartunut nalunaaruteqarnermigut Naalakkersuisunut ilaasortaq qinikkatut atuuffianit atuukkunnaarsissinnaavaa, § 27, imm.1 naapertorlugu ilaasortap Inatsisartunit atuukkunnaarsinneqarneratulli sunniuteqartumik.

  § 24.  Naalakkersuisunut ilaasortaq peqqiilliornerminik assigisaanilluunniit pingaarutilimmik pissuteqarluni sulinngiffeqartitaanissaminik qinnuteqaateqarpat Naalakkersuisut siulittaasuata qinnuteqaat akuerineqarsinnaanersoq aalajangissavaa.
  Imm. 2.  Naalakkersuisunut ilaasortaq naalakkersuisunit tunuarniuteqarluni qinnuteqarpat Inatsisartut qinnuteqaat akuerineqarsinnaanersoq aalajangissavaat.

Kapitali 5
Atuuffinnik allanik tigummisaqarneq

  § 25.  Inatsisartut siulittaasuat, Naalakkersuisut siulittaasuat Naalakkersuisuniluunniit ilaasortaq ivertinneqarnermi nalaani allanik atuuffeqartoq inuussutissarsiuteqartorluunniit taakkunannga tunuassaaq.
  Imm. 2.  Inatsisartut siulittaasuata, Naalakkersuisut siulittaasuata Naalakkersuisuniluunniit ilaasortap atuuffiit inuussutissarsiutilluunniit taakku ingerlatiinnarumallugit kissaatigippagu Qinersinerup Misilinneqarnissaanut Ataatsimiititaliaq tamanna pillugu erngerluni nalunaarfigissavaa. Nalunaarutip tiguneraniit sapaatip akunneri pingasut qaangiutinnginnerini pineqartup atuuffimminik inuussutissarsiumminilluunniit taamaattunik ingerlatsiinnarnissaa ataatsimiititaliap itigartitsissutigisinnaavaa.
  Imm. 3.  Inatsisartut siulittaasuata imm. 2-mi piffissaliussap naanerata kingorna atuuffiit inuussutissarsiutilluunniit sorliit siulittaasup ingerlatiinnarsinnaanerai Inatsisartunut nalunaarutigissavai. Naalakkersuisut siulittaasuata atuuffiit inuussutissarsiutilluunniit sorliit Naalakkersuisut siulittaasuata Naalakkersuisunullu ilaasortat ingerlatiinnarsinnaaneraat Inatsisartut siulittaasuannut nalunaarutigissavaa.
  Imm. 4.  Inatsisartut siulittaasuat, Naalakkersuisut siulittaasuat Naalakkersuisunilu ilaasortat atuuffinnik inuussutissarsiutinilluunniit pineqartunik ingerlatsinermik saniatigut atuuffinnik inuussutissarsiutinilluunniit nutaanik Qinersinerup Misilinneqarnissaanut Ataatsimiititaliaq akuersereersimatinnagu tiguseqqusaanngillat.

Kapitali 6
Inatsisartunut nutaamik qinersineq aamma Naalakkersuisunik atuukkunnaarsitsineq

  § 26.  Naalakkersuisut siulittaasuat piffissap qinigaaffiup atuuffiata naannginnerani Inatsisartunut nutaamik qinersinissamik nalunaaruteqassaaq.

  § 27.  Naalakkersuisut siulittaasuat imaluunniit Naalakkersuisunut ilaasortat ataasiakkaat Inatsisartunit tatigineqarunnaarpata Naalakkersuisut Inatsisartunit atuukkunnaarsinneqarsinnaapput.
  Imm. 2.  Naalakkersuisut siulittaasuat atuukkunnaarsinneqarpat Naalakkersuisut ataatsimoorlutik atuukkunnaassapput.

  § 28.  Naalakkersuisut siulittaasuat § 27 naapertorlugu Naalakkersuisunut ilaasortamik imaluunniit Naalakkersuisunik tamarmiusunik Inatsisartut atuukkunnaarsitsisimappata Inatsisartunut nutaamik qinersisoqassasoq ingerlaannartumik nalunaaruteqarsinnaavoq.

  § 29.  Naalakkersuisut atuukkunnaarsinneqarpata imaluunniit soraarnissaq qinnutigippassuk imaluunniit nutaamik qinersinissaq nalunaarutigineqarpat, Naalakkersuisut nutaat qinerneqarnissaasa tungaanut Naalakkersuisut atuukkallassapput. Naalakkersuisuugallartut atorfimmi suliassat ingerlaannarnissaannut pisariaqartunik taamaallaat suliaqarsinnaapput.

Kapitali 7
Inatsisartut inatsisaasa il.il. atuuttutut atsiorneqartarnerat atuutilersinneqartarnerallu

  § 30.  Inatsisartut inatsisissaattut siunnersuut akuersissutigineqartoq atuutilersinnaassaguni inaarutaasumik akuersissutigineqarnermi kingorna kingusinnerpaamik sapaatit akunneri sisamat qaangiutsinnagit Naalakkersuisut siulittaasuannit atuuttutut atsiorneqarsimassaaq.
  Imm. 2.  Siunnersuutip ataatsimiinnermi tullermi Inatsisartunit akuersissutigineqarnissaata tungaanut siunnersuutip inaarutaasumik akuersissutigineqarnerata kingorna ullut arfineq-pingasut ingerlaneranni Naalakkersuisut aalajangersinnaavaat atuuttutut atsiorneqarnissaa kinguartinneqassasoq. Ataatsimiinnermi maani siunnersuut allannguuteqartinnagu akuerineqarpat atorunnaassaaq.
  Imm. 3.  Aningaasaliissutinut inatsisaagallartumik imaluunniit nutaamik qinersisoqarnis-saanik inatsimmik atuuttutut atsiuinissaq Naalakkersuisut kinguartissinnaanngilaat.

  § 31.  Inatsisartunit inatsisit Namminersorlutillu Oqartussat nalunaarutaat allamik aalajangiisoqarsimanngippat atuutilertarput Inatsisartunit inatsisip Namminersorlutilluunniit Oqartussat nalunaarutaasa ulloq taanna atuutilersutut nalunaarsimanerata kingorna ulloq aallartikkaangat.

  Imm. 2.  Tamanut saqqummiussineq qarasaasiat atorlugit pisassaaq. Naalakkersuisut tamanut saqqummiussisarnermut maleruagassanik aalajangersaassapput.

  Imm. 3.  Inatsisartut inatsisaat, Inatsisartut peqqussutaat imaluunniit Namminersorlutik Oqartussat nalunaarutaat tunngavigalugit kommunit maleruaqqusaliaannut tunngatillugu imm. 1 aamma 2 taamatuttaaq atuupput.

Kapitali 8
Atuutilerfia

  § 32.  Inatsisartut inatsisaat manna 1. december 2010-mi atortuulerpoq. Inatsisartut Naalakkersuisullu pillugit Inatsisartut inatsisaat nr. 11, 20. oktober 1988-imeersoq tamatumunnga peqatigitillugu atuukkunnaarsinneqarpoq.
  Imm. 2.  Inatsisartut Naalakkersuisullu pillugit Inatsisartut inatsisaat nr. 11, 20. oktober 1988-imeersoq tunngavigalugu malittarisassatut aalajangersarneqartut malittarisassanit Inatsisartut inatsisaat manna tunngavigalugu aalajangersarneqartunit taarserneqarnissamik atorunnaarsinneqarnissamilluunniit tungaanut atuutissapput.

Inatsisartut inatsisaat nr. 12, 29. november 2013-meersoq (Qarasaasiat atorlugit tamanut saqqummiisarneq)^[i] atuutsitsilernissamut aalajangersaq una imaraa:

§ 2

Inatsisartut inatsisaat manna 1. januar 2014 atuutilissaaq.

Inatsisartut inatsisaat nr. 30, 9. december 2015-imeersoq (§ 25, imm. 3-p, aamma § 31, imm. 1-ip kalaallisoortaani inatsisip allassimanerata naqqinneqarnera)^[ii] atuutsitsilernissamut aalajangersaq una imaraa:

§ 2

Inatsisartut inatsisaat januaarip 1.-ni 2016-imi atuutilissaaq.

Inatsisartut inatsisaat, nr. 2, 29. maj 2020-meersoq (Naalakkersuisunut apeqqutit)^[iii] atuutsitsilernissamut aalajangersaq una imaraa:

§ 2

Inatsisartut inatsisaat ulloq 1. juli 2020 atuutilissaaq.

Inatsisartut inatsisaat nr. 4, 19. november 2021-meersoq (Kukkunersiuinermut Ataatsimiititaliap piginnaatitaanera aamma paasissutissanik

atortussanillu piumasaqarsinnaatitaanera)^[iv] atuutilersitsinissamik aalajangersagaq makkuninnga imaqarpoq:

§ 2

Inatsisartut inatsisaat ulloq 1. januar 2022 atuutilerpoq.

Inatsisartut inatsisaat nr. 32, 25. novembari 2022-meersoq (Inatsisartut elektroniskimik ataatsimiittarnissaannut periarfissaq)^[v] atuutilersitsinissamik aalajangersagaq makkuninnga imaqarpoq:

§ 2

Inatsisartut inatsisaat ulloq 1. januar 2022 atuutilerpoq.

Naalakkersuisut Siulittaasuata Naalakkersuisoqarfia, ulloq 4. apriili 2023

Hans-Peder Barlach Christensen (atsior.)

Naalakkersuisut Siulittaasoqarfiani Pisortaq

/ Jógvan Svabo Samuelsen (atsior.)