Inatsisartut Naalakkersuisullu pillugit Inatsisartut inatsisaanni nr. 26, 18. november 2010-meersumi, Inatsisartut inatsisaanni nr. 12, 29. november 2013-imeersumi allanngortinneqartumi, § 31, imm. 2 naapertorlugu aalajangersarneqarput:

  § 1.  Namminersorlutik Oqartussat inatsisitigut maleruagassiaasa saqqummiunneqarnerat nittartakkami, www.nalunaarutit.gl, qarasaasiat atorlugit pissaaq. www.nalunaarutit.gl-imi ikkussat tamarmik immikkut inatsisitigut maleruagassaq qanoq normoqarnersoq kiisalu ulloq suni ikkussineq pinersoq, pillugit paasissutissanik imaqassapput.

  § 2.  Inatsisartut inatsisai aamma Namminersorlutik Oqartussat nalunaarutai www.nalunaarutit.gl-ikkut saqqummiunneqassapput.

  Imm. 2.  Taamatuttaaq kommunini malittarisassat, Inatsisartut inatsisaat, Inatsisartut peqqussutaat imaluunniit Namminersorlutik Oqartussat nalunaarutaat naapertorlugu aalajangersarneqartut, taakkua innuttaasunut ingerlaannaq atuutilertussaappata, www.nalunaarutit.gl-imi saqqummiunneqassapput.

  § 3.  Allaffissornikkut najoqqutassiat allat www.nalunaarutit.gl-imi saqqummiunneqarsinnaasut, Naalakkersuisut Siulittaasuata Naalakkersuisoqarfiani Inatsisilerinermut immikkoortortap akuerisinnaavaa imaluunniit aalajangersinnaallugu.

  § 4.  Nalunaarut manna saqqummiunneqareernermi aqaguani atuutilerpoq.

  Imm. 2.  Peqatigisaanik qarasaasiat atorlugit saqqummiisarnermut Namminersorlutik Oqartussat nalunaarutaat nr. 1, 2. januar 2014 atorunnaarsinneqarpoq.

Namminersorlutik Oqartussat, ulloq 20. marsi 2023

Múte Bourup Egede (atsior.)

Naalakkersuisut Siulittaasuat

/ Jógvan Svabo Samuelsen (atsior.)