Kapitali 1

Inatsisitigut inissisimanera suliassaalu

 

  § 1.  Universiteti Ilisimatusarfik pisortat suliffeqarfiutigaat namminersortoq.

 

  § 2.  Ilisimatusarfiup suliassarai ilisimatusarfimmi ilinniagassat iluanni ilisimatuutut misissuinissaq aamma ilisimatusarnermik tunngavilimmik ilinniartitsinermik neqeroornissaq nunani tamani annerpaamik angusassaq tikillugu. Ilisimatusarfiup qulakkiissavaa ilisimatusarnerup, inerisaanerup aamma ilinniartitaanerup naligiillutik suleqatigiinnissaat, kiisalu ilisimatusarnermi aamma ilinniartitaanermi ilinniagassanik ingerlatassaminik ingerlaavartumik inerisaanissaq aamma siaruarterinissaq ilisimasanillu ilisimatusarnermi suleriaatsinik paasisanillu paarlaasseqatigiinnissaq.

  Imm. 2.  Ilisimatusarfik ilisimatusarnermi kiffaanngissuseqarpoq. Ilisimatusarfiup ilisimatuullu ataasiakkaat ilisimatusarnermut kiffaanngissuseqarnerat ilisimatusarnermilu ileqqorissaarnissaq Ilisimatusarfiup attattuarniartussaavaa. Isumalluutit pisariaqartut pigineqarpata, Naalakkersuisut Ilisimatusarfik tusarniaavigeriarlugu immikkut ilisimatusagassanik, qulaajagassanik aamma ilinniartitsissutissanik suliassissinnaavaat.

  Imm. 3.  Ilisimatusarfiup inuiaqatigiit avatangiiserineqartut suleqatigissavai aamma nunat akornanni suleqatigiinnermik inerisaaqataassaaq. Ilisimatusarfiup ilisimatusarnikkut aamma ilinniartitaanikkut angusamigut Kalaallit Nunaanni nunanilu issittumiittuni siuariartorneq, atugarissaarneq ineriartornerlu siuarsaaqataaffigissavai. Ilisimatusarfik qitiusumik aamma kultureqarfittut suliffeqarfiunermigut ilisimasatigut piginnaasatigullu inuiaqatigiinnut paarlaasseqatiginnittassaaq aamma sulisuni inuiaqatigiinni oqallinnermi peqataaqqullugit kajumissaartassallugit.

  Imm. 4.  Ilisimatusarfiup suliassaqarfinni attuumassuteqartuni ilisimasat nutaanerpaat Kalaallit Nunaanni ilinniakkanit tamanit pissarsiarineqarsinnaanerat qulakkeerinneqataaffigissavaa.

 

Kapitali 2

Aqutsineq

 

Siulersuisut

 

  § 3.  Siulersuisut tassaapput Ilisimatusarfimmi qullersaallutik oqartussaasut. Ilisimatusarfiup ilisimatusarnermi aamma ilinniartitaanermi soqutigisai siulersuisut isumagissavaat aamma Ilisimatusarfiup aaqqissuussaaneranut ungasinnerusumullu isigaluni suliaanut ineriartorneranullu najoqqutassiussallutik.

  Imm. 2.  Siulersuisut Ilisimatusarfiup ingerlatsinera pillugu Naalakkersuisunut akisussaapput, tassungalu ilaassaaq aningaasaqarnikkut ingerlatsinera.

 

  § 4.  Siulersuisut rektorip inassuteqareerneratigut missingersuutit akuersissutigisassavaat, tamatumunnga ilanngullugit aningaasat agguataarnissaat aamma atorneqarnissaannut tunngavissat.

  Imm. 2.  Siulersuisut naatsorsuutit atsiortassavaat.

 

 § 5.  Siulersuisut Ilisimatusarfiup malittarisassai suliarissavaat. Malittarisassani tulliuttuni maleruagassat erseqqinnerusut aalajangersarneqassapput:

1)  Ilisimatusarfiup naleqartitatut tunngavii,

2)  Ilisimatusarfiup oqaatsit pillugit politikkia,

3)  siulersuisut sulinerat pillugu ammasuuneq,

4)  sulisunik aqutsisunik atorfinitsitsineq,

5)  siulersuisut iluanni ilaasortanik qinersineq,

6)  siulersuisut suliaat,

7)  ilinniagartuut siunnersuisoqatigiivinut aamma instituttit siunnersuisoqatigiivinut ilaasortanik qinersineq kiisalu

8)  ilinniagartuut siunnersuisoqatigiivisa aamma instituttit siunnersuisoqatigiivisa suliaat. 

  Imm. 2.  Malittarisassat kingusinnerusukkullu allannguutit Naalakkersuisunit akuerineqassapput.

 

  § 6.  Siulersuisut Ilisimatusarfiup rektorianik atorfinitsitsisarput soraarsitsisarlutillu.

  Imm. 2.  Siulersuisut prorektorimik aamma universitetsdirektørimik rektorip inassuteqareerneratigut atorfinitsitsisarput.

  Imm. 3.  Siulersuisut Ilisimatusarfimmi atorfilittanut allanut imaluunniit ilinniartunut tunngasuni sulianut ataasiakkaanut akulerussinnaatitaanngillat.

 

  § 7.  Naalakkersuisut ineriartortitsinissaq pillugu siulersuisunut isumaqatigiissuteqassapput.

  Imm. 2.  Ineriartortitsinissaq pillugu isumaqatigiissutip imarisassai pillugit maleruagassanik Naalakkersuisut aalajangersaasinnaapput.

 

  § 8.  Siulersuisut 11-nik ilaasortaqarput, imatut inuttalersugaallutik:

1)  Avataanit ilaasortat 6.

2)  Ilaasortat marluk, Ilisimatusarfiup ilisimatuuinut aamma ilinniartitsisuinut sinniisuusut, taakkununnga ilanngullugit ph.d.-mik ilinniartut.

3)  Ilaasortaq ataaseq allaffimmi illumilu atorfeqavissut aallartitarissavaat.

4)  Ilaasortat marluk ilinniartut aallartitarissavaat.

  Imm. 2.  Siulersuisut inuttalersugaanerat Ilisimatusarfiup ataatsimoortumik suliassaanik takutitsisuussaaq. Siulersuisunut ilaasortat ataatsimoorlutik Kalaallit Nunaanni nunarsuarmilu, ilanngullugu issittumi pissutsinik ilisimasaqarnermikkut, aqutsinermik, ilisimatusarnermik kiisalu ilinniartitaanermik, kiisalu ilisimasanik paasisitsinermik paarlaaqatigiinnermillu misilittagaqarnermikkut paasisimasaqarnermikkullu Ilisimatusarfiup ineriartorneranik siuarsaaqataassapput.

  Imm. 3.  Ilaasortat avataaneersut Naalakkersuisut toqqartassavaat. Naalakkersuisut Ilisimatusarfimmit ilaasortassanik pituttuisuunngitsumik inassuteqaqqusisinnaapput. Naalakkersuisut aamma peqataasunit attuumassuteqartunit allaniit pituttuisuunngitsumik inassuteqaqqusisinnaapput.

  Imm. 4.  Ilaasortat toqqarneqartassapput inuttut piginnaasaqarnerat tunngavigalugu. Toqqaanermi pingaartinneqartassapput suliamut inuttullu piginnaasat aamma suliffinnik kiisalu ilisimatusarnikkut ilinniartitaanikkullu avatangiiserisanik inerisaanermik misilittakkat, ajornanngippat nunarsuarmut tamarmut sammisut. Ilaasortat avataaneersut aqutsinermik, aaqqissuussaanermik aningaasaqarnermillu misilittagaqassapput, ilanngullugu missingersuutinik naatsorsuutinillu nalilersuisinnaassallutik.

  Imm. 5.  Taamaallaat atorfillit piffissaq tamaat ukiup affaata nalinganik qaangerluguluunniit suliaqartartut piffissarlu tamaat ilinniartut qinigaasinnaatitaapput qinersisinnaallutillu.

  Imm. 6.  Imm. 1, nr. 2 aamma 3-mi taaneqartut aallartitat sulisut sinniisuinut malittarisassat malillugit illersorneqassapput.

  Imm. 7.  Siulersuisut siulittaasussaminnik ilaasortat avataaneersut akornannit qinersissapput.

  Imm. 8.  Taasinerit amerlaqatigiitsillugit siulittaasup taasinera aalajangiisuussaaq.

 

  § 9.  Siulersuisut piffissami ukiunik sisamanik sivisussusilimmi ivertitaassapput, atuuffissaq siulleq 1. marts 2020-miit 29. februar 2024-mut ingerlassaaq, taamaattoq tak. imm. 3.

  Imm. 2.  Ilaasortat avataaneersut ilaasortallu suliffimmeersut ataasiarlutik toqqagaaqqissinnaapput qinigaaqqissinnaallutillu, taamaattoq tak. imm. 3.

  Imm. 3.  Ilaasortat § 8, imm. 1, nr. 4-mi taaneqartut, piffissami ukiunik marlunnik sivisussusilimmi ilaasortaassapput, ataasiarlutillu qinigaaqqissinnaallutik, pineqartut ukiut ilinniarfigisassatut piffissaliussaasut marluk sinnerlugilluunniit suli amigaatigippatigit.

  Imm. 4.  Ilaasortaq ataaseq ilaasortalluunniit amerlanerit piffissap atuuffimmik ingerlanerani tunuassappata, ilaasortanik nutaanik toqqaasoqassaaq, siulersuisut qaqugukkulluunniit 11-nik ilaasortaqartuaqqullugit.

 

  § 10.  Naalakkersuisut siulersuisut peqqusinnaavaat pissutsit inatsisinik unioqqutitsisut iluarseqqullugit.

  Imm. 2.  Naalakkersuisut siulersuisut tunuaqqusinnaavaat, siulersuisut inatsisinik unioqqutitsinernik iluarseeqqusinerit maleruanngippatigit, taamaalillunilu siulersuisunik nutaanik ivertitsisoqassalluni. Siulersuisut suliassaat, taakkualuunniit ilaat, siulersuisuugallartunit Naalakkersuisunit toqqarneqartunit piffissap ilaa isumagineqarsinnaapput.

  Imm. 3.  Siulersuisunut ilaasortaq siulersuisut akisussaaffiannik sakkortuumik sumiginnaasimasoq, imaluunniit siulersuisuni sulinissamut imminut naleqqukkunnaartissimasoq Naalakkersuisut tunuartissinnaavaat.

 

  § 11.  Siulersuisuni ilaasortat avataaneersut akissarsiaqartinnissaat pillugu Naalakkersuisut maleruagassanik aalajangersaassapput.

 

Rektoreqarfik

 

  § 12.  Ilisimatusarfiup ulluinnarni aqunneqarnera rektorimit isumagineqassaaq siulersuisut sinaakkusiussaat naapertorlugit. Ilisimatusarfiup aqutsisuisa allat rektorip tunaartarisassaliaa piginnaatitsineralu naapertorlugit suliassatik isumagissavaat.

  Imm. 2.  Rektori rektorip tullersortaanik taperserneqassaaq, taannalu rektorimut paarlattaasassaaq. Rektori aamma rektorip tullersortaa tassaapput Ilisimatusarfiup rektoreqarfia.

  Imm. 3.  Rektori aamma rektorip tullersortaa ph.d.-mik ilinniarsimasuussapput, tak. § 34, aamma Kalaallit Nunaanni pissutsinik ilisimasaqassapput ilinniartitaanermullu pissutsinik paasisimasaqassallutik. Aammattaaq rektori ilisimatusarnermik ilinniartitaanermillu sammisaqarfinnik aqutsinermik inerisaanermillu misilittagaqassaaq, universitetillu suliaannik inuiaqatigiinnilu avatangiiserisaminnik suleqateqarnerannik paasisimasaqassalluni.

 

  § 13.  Rektori Ilisimatusarfiup sinniiseraa suliassanilu tamani aalajangiisuusassaaq piginnaatitaaffik siulersuisunut, ilinniagartuut siunnersuisoqatigiivinut, instituttimi aqutsisunut imaluunniit instituttip siunnersuisoqatigiivinut inissinneqarsimanngikkaangat.

  Imm. 2.  Rektorip instituttini aqutsisut, atorfinitsittassavai soraarsittassallugillu.

  Imm. 3.  Rektori aningaasartuutinut missingersuutit naatsorsuutillu siulersuisunut akuerisassanngortillugit innersuuteqartassaaq.

 Imm. 4.  Avataaneersunik suleqateqarnissamut isumaqatigiissutit, Ilisimatusarfimmik pisussaaffiliisut tamaasa, rektorip akuersissutigisassavai.

  Imm. 5.  Ilinniagartuut siunnersuisoqatigiivisa suliassartik annertuumik paarinerluppassuk, rektorip siunnersuisoqatigiit atorunnaarsissinnaavai suliassaallu nammineq tigullugit.

 

  § 14.  Rektorip ilinniarnermi pissuserissaarnissamillu malittarisassat aalajangersassavai, taamaattoq tak. imm. 3. Rektorip ilinniartut ilinniarnermi pissusserissaarnissamillu malittarisassanik ilisimatissavai. Rektorip ilinniarnermi pissuserissaarnissamillu malittarisassat Naalakkersuisunut ilisimatitsissutitut naasiutissavai.

  Imm. 2. Rektorip ilinniartunut ilinniarnermi pissuserissaarnissamillu malittarisassanik maleruaanngitsunut pineqaatissiinissat aalajangiiffigisassavai. Rektorip ilinniartut arlaleriarlutik sakkortuumilluunniit ilinniarnermi pissuserissaarnissamillu malittarisassanik unioqqutitsisut anisissinnaavai.

  Imm. 3.  Naalakkersuisut ilinniarnermi pissuserissaarnissamillu malittarisassat pillugit malittarisassanik erseqqinnerusunik aalajangersaassapput, tamatumunnga ilanngullugit pinngitsoorani takkuttussaaneq aamma ilinniartunut ilinniarnermi pissuserissaarnissamilu malittarisassanik maleruaanngitsunut pineqaatissiisarnissat pillugit malittarisassat.

 

Kapitali 3

Ilinniagartuut siunnersuisoqatigiivi

 

 § 15.  Ilisimatusarfiup ilinniagartuut siunnersuisoqatigiivi pilersissavai, aqutsisut, sulisut ilinniartullu aalajangeeqataanissaat ilinniagartuujunermilu pissutsit pillugit akuutinneqarnissaat qulakkeerniarlugu.

  Imm. 2.  Ilinniagartuut siunnersuisoqatigiivi tulliuttunik suliassaqarput:

1)  aningaasaliissutit agguataarnerat pillugu rektorimut oqaaseqartarlutik,

2)  ilisimatusarnermut ilinniartitaanermullu tunngasut pingaarutillit pillugit rektorimut oqaaseqartarlutik,

3)  ilisimasanik paarlaasseqatigiittarnermi pilersaarutit pillugit rektorimut oqaaseqartarlutik,

4)  ilinniakkanut aaqqissuussinernut misiligummillu aaqqissuussinernut siunnersuutit pillugit instituttini siunnersuisoqatigiit inassuteqareernerisigut rektorimut inassuteqaateqartarlutik,

5)  ilinniagassanut paasisimasalinnik ataatsimiititaliussapput atorfiit ilisimatusarnermik ingerlatsiffiusut inuttalernissaannut tunngatillugu ilisimatusarnermi sulianik naliliisussanik tamassuminngalu ph.d.-gradimik doktor-gradimillu tunniussinissaq pillugu naliliisartussanik aamma

6)  ph.d.-gradinik doktorgradinillu tunniussisarneq.

  Imm. 3.  Ilinniagartuut siunnersuisoqatigiivi ilisimatusaatinut tunngasunut tamanut, Ilisimatusarfiup aaqqissuussaaneranut suliaanullu pingaaruteqartunut oqaaseqaateqarsinnaapput aamma ilisimatusaatinut tunngasut rektorimit saqqummiunneqartut oqaluuserissallugit pisussaaffigaat.

  Imm. 4.  Naalakkersuisut doktorinngorniarluni ilisimatuutut suliat pillugit malittarisassanik aalajangersaassapput.

 

  § 16.  Pissutsit § 15, imm. 2, nr. 5-imi aamma 6-imi taaneqartut, kiisalu pissutsit ilisimatusarnerinnarmut tunngasut suliarineqartillugit, ilinniagartuut siunnersuisoqatigiivini ilisimatuut kisimik taasisinnaatitaapput.

 

  § 17.  Ilinniagartuut siunnersuisoqatigiivi imatut inuttalersugaassapput:

1)  Rektori siulittaasuusussaq.

2)  Prorektori.

3)  Ilaasortat marluk instituttini aqutsisunut sinniisut.

4)  Ilaasortat pingasut Ilisimatusarfimmi ilisimatuut aamma ilinniartitsisut aallartitarissavaat, ph.d.-mik ilinniartut atorfeqartitat ilanngullugit. Minnerpaamik ilaasortat 2 ilisimatusarnermik tunuliaqutaqassapput.

5)  Ilaasortat marluk ilinniartut sinniiserisaat.

6)  Ilaasortaq ataaseq allaffimmi illumilu atorfeqavissut aallartitarissavaat alaatsinaatsutut. Alaatsinaatsutut inissisimanerup kinguneraa pineqartut taasisinnaatitaannginnerat.

  Imm. 2.  Taamaallaat atorfillit piffissaq tamaat ukiup affaata nalinganik qaangerluguluunniit suliaqartartut piffissarlu tamaat ilinniartut qinigaasinnaatitaapput qinersisinnaallutillu.

  Imm. 3.  Ilinniagartuut siunnersuisoqatigiivi siulittaasumik ilaasortat akornanneersumik qinersissapput.

 

 § 18.  Ilinniagartuut siunnersuisoqatigiivi ukiuni sisamani atuuttumik ivertitaasassapput, siullermik piffissamut 1. november 2019-imiit 31. oktober 2023-mut atuuttumik, taamaattoq tak. imm. 3.

  Imm. 2.  Ilaasortat § 17, imm. 1, nr. 4-mi aamma nr. 6-imi taaneqartut ataasiarlutik qinigaaqqissinnaapput.

  Imm. 3.  Ilaasortat § 17, imm. 1, nr. 5-imi taaneqartut ukiunut marlunnut atuuttumik qinigaassapput ataasiarlutillu qinigaaqqissinnaallutik, pineqartut ukiut ilinniarfigisassatut piffissaliussaasut marluk sinnerlugilluunniit suli amigaatigippatigit.

 

Kapitali 4

Instituttit, immikkoortortat aamma instituttit siunnersuisoqatigiivi

 

Instituttit

 

  § 19.  Ilisimatusarfimmi ilisimatusarnerit aamma ilisimatusarneq tunngavigalugu ilinniarnerit instituttini ingerlanneqartassapput. Instituttit arlaannaataluunniit ilisimatusarneq ilinniakkamut tunngaviusoq ingerlatinngippagu, pineqartup iluani ilisimatusarneq ilinniakkallu aaqqissugaanera pillugit universitetimik allamik ilisimatusarfimmilluunniit isumaqatigiissuteqartoqassaaq.

  Imm. 2.  Ilinniagaqarfiit imarisamikkut ilisimatusarnermikkullu ataqatigiissuteqartut instituttinut ilaassapput.

 

 § 20.  Institutti instituttimi aqutsisumit aqunneqassaaq.

  Imm. 2.  Instituttimi aqutsisoq aqutsisuujutigaluni immikkoortortami pisortatut suliaqarsinnaavoq, tak. § 23, imm. 1.

  Imm. 3.  Instituttimi aqutsisoq instituttimi ilinniagaqarfiit iluanni ataatsimi ph.d.-mik ilinniagaqarsimassaaq, taamaattorli tak. imm. 4 aamma § 34, imm. 1, ilinniagaqarfimmilu iluani ilinniartitsinermik misilittagaqartuussalluni.

  Imm. 4.  Ph.d.-mik ilinniagaqarsimasumik tulluartumik qinnuteqartoqarsimanngippat kandidatitut ilinniagaqarsimasoq piukkunnaateqartoq atorfinitsinneqarsinnaavoq. 

  Imm. 5.  Instituttimi aqutsisup immikkoortortani aqutsisut aamma instituttimi atorfeqartut allat atorfinitsillugillu soraarsittassavai, taamaattoq tak. imm. 2.

 

  § 21.  Instituttimi aqutsisoq immikkoortortanilu aqutsisut instituttimi aqutsisoqarfiupput.

  Imm. 2. Instituttimi aqutsisoqarfiup najoqqutassat rektorimit akuerineqartut malillugit instituttip ulluinnarni aqunneqarnera isumagissavaa, tamatumunnga ilanngullugit pilersaarusiorneq aamma suliassanik agguaassineq.

  Imm. 3.  Instituttimi aqutsisoqarfiup suleqataasut ilisimatusarnermi periutsinik kiffaanngissuseqarnerat mianeralugu suliassanik aalajangersimasunik isumaginnittussanngorlugit peqqusinnaavai. Ilisimatuutut sulisut ilisimatusarnissamut kiffaanngissuseqarput, piffissamilu suliassanik pisussaaffiligaanngisaminni Ilisimatusarfiup ilisimatusarnissamut periusissiaanut sinaakkusiussap iluani kiffaanngissuseqarlutik ilisimatusarlutik. Ilisimatusarfiup ilisimatusarnermut periusissiaanut sinaakkusiussaaniippoq universitetip suliaqarfia tamarmiusoq. Sulisut ilisimatuut piffissami sivisunerusumi piffissap suliffigisassamik ilaani annertuallaami suliassanik pisussaaffilerneqassanngillat, taamaappat ilisimatusarnissamut piviusumik kiffaanngissusiiagaassagamik.

 

Immikkoortortat

 

  § 22.  Institutti arlalinnik immikkoortortaqarsinnaavoq.

  Imm. 2.  Immikkoortortaq ataaseq ilinniarnermik ilisimatusarnermik tunngavilimmik ataatsimik arlalinnilluunniit aamma ilisimatusarnermik ingerlatitseqqinnermilluunniit suliaqarfiusunik ataatsimik arlalinnilluunniit katitigaasinnaavoq.

 

  § 23.  Immikkoortortami aqutsisup immikkoortortap ulluinnarni aqunneqarnera isumagissavaa.

  Imm. 2.  Immikkoortortami aqutsisoq suliassaqarfimmi immikkoortortap suliassaqarfigisaani ph.d.-mik ilinniagaqarsimasuussaaq, taamaattoq tak. imm. 3 aamma § 34, imm. 1, ilinniagaqarfimmilu iluani ilinniartitsinermik misilittagaqartuussalluni.

  Imm. 3.  Ph.d.-mik ilinniagaqarsimasumik tulluartumik qinnuteqartoqarsimanngippat kandidatitut ilinniagaqarsimasoq piukkunnaateqartoq atorfinitsinneqarsinnaavoq. 

  Imm. 4.  Immikkoortortami aqutsisup suliassai tassaapput instituttimi aqutsisunut instituttimilu siunnersuisoqatigiinnut innersuussinissaq aamma siunnersuuteqarnissaq, ilanngullugit:

1)  ilinniagassanik aaqqissuussinernut siunnersuusiornerit,

2)  ilinniartitsinermut soraarummeernernullu pilersaarusiornerit,

3)  ilisimatusarnermut ingerlatitseqqinnermullu pilersaarusiornerit, kiisalu

4)  immikkoortortap aaqqissugaaneranut siunnersuusiorneq, ilanngullugu ilinniarnernut aqutsisunik ilinniartunullu siunnersortinik toqqaaneq.

  Imm. 5.  Immikkoortortami aqutsisup suliassanut imm. 3, nr. 1-imi taaneqartunut atatillugu atuisut ilinniagaqarfimmik aamma atorfeqarfinnik ilinniakkatigut atorfiniffiusinnaasunik misilittagaqartut paasisimasaqartullu akuutittassavai.

  Imm. 6.  Immikkoortortami aqutsisup suliassanut imm. 3, nr. 1-imi aamma 2-mi taaneqartunut atatillugu ilinniagaqartut akuutittassavai.

  Imm. 7.  Immikkoortortami aqutsisut ilinniagaqartussanik tigusineq akuersissutigissavaa.

  Imm. 8.  Immikkoortortami aqutsisoq instituttip aqutsisuinut instituttillu siunnersuisoqatigiivinut immikkoortortap suliaanut pingaaruteqartunut aamma atorfinitsitsinerni soraarsitsinernilu inassuteqartassaaq aammalu suliani tamani immikkoortortaqarfimmut pingaaruteqartuni tusarniarneqartassalluni.

 

Instituttit siunnersuisoqatigiivi

 

  § 24.  Instituttini ataasiakkaani tamani instituttimi siunnersuisoqatigiit pilersinneqassapput, ilinniagaqartut ilisimatuutullu sulisut ilinniartitaanernut ilinniartitsinermullu aalajangeeqataasinnaanerat akuutinneqarnissaallu qulakkeerniarlugit.

  Imm. 2.  Instituttimi siunnersuisoqatigiit suliassaraat ilinniartitaanerit aaqqissugaanerisa, ingerlanneqarnissaasa ineriartortinneqarnissaasalu qulakkeernissaat, ilanngullugit ilinniartitaanerit ilinniartitsinerillu pitsaassutsikkut qulakkeernissaat pitsaassutsikkullu ineriartortinnissaat kiisalu ilinniartitaanernik ilinniartitsinermillu nalilersuinerit malitseqartinneqarnerat nakkutigissallugu.

  Imm. 3.  Instituttip siunnersuisoqatigiivisa najoqqutassat nalinginnaasut malillugit aamma immikkoortortani aqutsisut inassuteqareernerisigut tulliuttut akuersissutigisassavaat:

1)  angusanik nuussinerit aamma

2)  ilinniagartuutut taaguuteqalersitsisinnaaneq ph.d.-gradi doktorgradilu kisiisa pinnagit, tak. § 15, imm. 2, nr. 6.

  Imm. 4.  Instituttimi siunnersuisoqatigiit ilinniagartuut siunnersuisoqatigiivinut tulliuttut pillugit inassuteqartassapput:

1)  instituttimi ilisimatusarnermut aamma ilinniakkanut ilisimatusarnermik tunngaveqartunut najoqqutassat nalinginnaasut,

2)  instituttimi ilinniagassanik aaqqissuussinerit,

3)  ilinniakkanik misiligummik aaqqissuussinerit,

4)  ilinniakkanik ilisimasalinnik ataatsimiititaliamik pilersitsineq inuttalersuinerlu, ilisimatuutut atorfiit inuttalernissaat ph.d.-gradimik doktorgradimillu angusaqarnissamut ilisimatuussutsikkut sulianik nalilersuisarnissaq siunertaralugu,

5)  instituttip missingersuutinut siunnersuutai aamma

6)  immikkoortortanut aaqqissugaaneq taakkualu akisussaaffeqarfii.

  Imm. 5.  Instituttimi siunnersuisoqatigiit suliani tamani instituttip aaqqissugaaneranut suliaanullu pingaaruteqartuni oqaaseqaateqarsinnaatitaapput, pissutsillu tamaasa rektorip aamma instituttit aqutsisuisa instituttimi siunnersuisoqatigiinnut saqqummiussaasa oqaluuserinissaat pisussaaffigalugu.

  Imm. 6.  Pissutsit taamaallaat ilisimatusarnermut tunngasut aalajangiivigineqassatillugit, taamaallaat ilaasortat ilisimatuujusut taasisinnaatitaapput.

 

  § 25.  Instituttimi siunnersuisoqatigiit imatut inuttalersorneqassapput:

1)  Instituttimi aqutsisoq, instituttimi siunnersuisoqatigiinnut siulittaasuusoq.

2)  Instituttimi immikkoortortani aqutsisut.

3)  Ilaasortat pingasut, instituttimi ilisimatuut ilinniartitsisullu sinniiserisaat, ph.d.-mik ilinniagaqartut atorfeqartitat ilanngullugit. Ilaasortat ikinnerpaamik marluk ilisimatusarnermik tunuliaqutaqassapput.

4)  Ilasortaq ataaseq, teknikkimik allaffissornermillu atorfeqavissut sinniiserisaat.

5)  Instituttimi piffissaq tamaat ilinniakkanit ataasiakkaanit tamanit ilinniartoq ataaseq, taamaattoq ilinniartut ikinnerpaamik marluk.

  Imm. 2.  Taamaallaat atorfillit piffissaq tamaat ukiup affaata nalinganik qaangerluguluunniit suliaqartartut piffissarlu tamaat ilinniartut qinigaasinnaatitaapput qinersisinnaallutillu.

 

  § 26.  Instituttini siunnersuisoqatigiit piffissami ukiunik sisamanik sivisussusilimmi ivertinneqarsimasassapput, siullermik piffissamut 1. marts 2020-miit 29. februar 2024-mut, taamaattoq tak. imm. 3.

  Imm. 2.  Ilaasortat § 25, imm. 1, nr. 3-mi aamma 4-mi taaneqartut ataasiarlutik qinigaaqqissinnaapput.

  Imm. 3.  Ilaasortat § 25, imm. 1, nr. 5-imi taaneqartut ukiunut marlunnut qinigaassapput ataasiarlutillu qinigaaqqissinnaallutik, pineqartut ukiut ilinniarfigisassatut piffissaliussaasut marluk sinnerlugilluunniit suli amigaatigippatigit.

 

Kapitali 5

Aningaasaqarneq aamma allaffissorneq

 

Aningaasaqarneq

 

  § 27.  Suliassanut inatsisitigoortunut isumaqatigiissutitigullu aalajangigaasunut Ilisimatusarfimmut ukiumoortumik aningaasaliissutit aningaasanut inatsimmi aalajangersarneqartarput.

 Imm. 2.  Ilisimatusarfimmut aningaasaliissutit ilai annikitsut Ilisimatusarfiup isumasioreerneratigut taxamiiterit malillugit tapiissutitut tunniussaasinnaapput imaluunniit tunngavinnik aalajangersimasunik nalilerneqarsinnaasunik, ineriartortitsinissamut isumaqatigiissummi aalajangersagaasunik tunngaveqartitaasinnaallutik, tak. § 7, imm. 1.

  Imm. 3.  Ilisimatusarfik nunatta karsianiinngitsoq allanit kingornussisinnaavoq, tunissutisisinnaalluni tapiissutisisinnaallunilu.

  Imm. 4.  Ilisimatusarfik isertitanit matussuserneqartunik suliaqarsinnaavoq tapiissutinillu aningaasalersugaasunik ingerlataqarsinnaalluni.

  Imm. 5.  Ilisimatusarfiup tapiissutit isertitallu allat kiffaanngissuseqarluni atorsinnaavai. Ilisimatusarfiup missingersuutini aallaaviusut malittussaavai, suliassallu taakkunani takuneqarsinnaasut isumagissallugit.

 

  § 28.  Ilisimatusarfiup Kalaallit Nunaanni Namminersorlutik Oqartussat missingersuutit, naatsorsuuserineq naatsorsuutinillu saqqummiineq pillugit malittarisassai qaqugukkulluunniit atuuttut malissavai.

  Imm. 2.  Aningaasanut inatsisikkut aningaasaliissutit atorneqarnerat naatsorsuutini immikkut naatsorsuusiorneqassaaq.

  Imm. 3.  Ukiumoortumik naatsorsuutit Kalaallit Nunaanni Namminersorlutik Oqartussat kukkunersiuisuinit kukkunersiorneqassapput.

  Imm. 4.  Ukiumoortumik naatsorsuutit siulersuisunit akuerineqarsimasut, kukkunersiuisut oqaaseqaataat taakkununnga attuumassuteqartut ilanngullugit siulersuisut Naalakkersuisunut akuerisassanngorlugit saqqummiutissavaat. Naalakkersuisut piffissaliussaata qaangiutinnginnerani saqqummiunneqassapput.

Imm. 5.  Siulersuisut naatsorsuutinik Naalakkersuisunut tunniussinerminnut atatillugu naatsorsuutit tamanut saqqummiutissavaat.

 

  § 29.  Atorfinitsitsinerni atugassarititaasut pissutsillu sinneri, atorfeqarnerup nalaani pissutsit soraarsitsinerillu eqqarsaatigalugit, aalajangersakkanik Kalaallit Nunaanni Namminersorlutik Oqartussani atorfilinnut atuuttunik malinninnissamut Ilisimatusarfik pisussaaffeqarpoq.

 

  § 30.  Ilinniartut ilinniartutut anguniakkaminnik ingerlataannut Ilisimatusarfik aningaasartuutinik akiliussisassaaq atortussanillu atugassiisassalluni.

 Imm. 2.  Ilinniartut ilinniartutut anguniakkaminnik ingerlataannut allanut Ilisimatusarfik aningaasartuutinik akiliussisinnaavoq atortussanillu atugassiisinnaalluni.

 

Allaffissorneq

 

  § 31.  Ilisimatusarfiup allaffeqarfia universitetip pisortaanit aqunneqassaaq rektorip ataani inissisimasumit.

  Imm. 2.  Ilimmarfiup ingerlannera allaffissorneralu Ilisimatusarfiup isumagissavai, Ilimmarfimmilu suliffeqarfiit allat allaffissornikkut suliassaat isumaqatigiissuteqareernikkut isumagisinnaallugit.

 

Kapitali 6

Maalaartarneq

 

  § 32.  Ilisimatusarfiup aalajangiineri, ilinniartut inatsisitigut inissisimanerannut tunngassuteqartut Naalakkersuisunut suliassiissutigineqarsinnaapput. Aalajangiinerup naammagittaalliortumut nalunaarutigineqarneraniit naammagittaalliuutip tunniunnissaanut sapaatit akunneri sisamat piffissaliussaapput.

  Imm. 2.  Maalaaruteqarnerit kinguartitsinermik sunniuteqarsinnaanngillat, taamaattoq tak. imm. 3.

  Imm. 3.  Naalakkersuisut maalaarsinnaanermut periarfissat, maalaarutit suliarineqartarnerat aamma maalaarutit aalajangersimasut kinguartitsinermik sunniuteqarsinnaanerat pillugit malittarisassiorsinnaapput.

 

Kapitali 7

Atuutilersitsinermut, atorunnaarsitsinermut ikaarsaariarnermilu aalajangersakkat

 

  § 33.  Inatsisartut inatsisaat 1. august 2019-imi atuutilissaaq.

  Imm. 2.  Peqatigisaanik Ilisimatusarfik pillugu Inatsisartut inatsisaat nr. 19, 19. november 2007-imeersoq atorunnaarsinneqassaaq.

  Imm. 3.  Najoqqutassat Ilisimatusarfik pillugu Inatsisartut inatsisaat nr. 19, 19. november 2007-imeersoq malillugu aalajangersagaasut imaluunniit atuutsinneqartut, atuutiinnassapput atorunnaarsinneqarnissamik tungaanut, imaluunniit maleruagassanik Inatsisartut inatsisaat manna imaluunniit inatsisit allat tunngavigalugit aalajangersagaasunik taarserneqarnissamik tungaannut.

 

  § 34.  § 12, imm. 3-mi, § 20, imm. 3-mi kiisalu § 23, imm. 2-mi ilinniakkatigut piginnaasanut piumasaqaatit, taamaallaat Inatsisartut inatsisaata atuutilereerneratigut atorfinnut taakkununnga atorfinitsitsinernut atuutissapput.

  Imm. 2.  31. juli 2029 tikillugu rektorimik aamma prorektorimik nutaanik atorfinitsitsinerni, § 12, imm. 3-mi ilinniagaqarnermut piumasaqaatinit immikkut akuersissuteqartoqarsinnaavoq, piumasaqaatinik eqqortitsillutik piginnaasalinnik qinnuteqartoqarsimanngippat, imaluunniit taamaallaat ilinniakkatigut piginnaasanut piumasaqaatinik allanik tunngaveqarluni sanilliunneqarsinnaasunik piginnaasaqartunik qinnuteqartoqarsimappat.

 

Kalaallit Nunaanni Namminersorlutik Oqartussat, ulloq 12. juni 2019

 

 

 

Kim Kielsen