Ilisimatusarfik pillugu Inatsisartut inatsisaanni nr. 12, 12. juni 2019-imeersumi § 14, imm 3 aamma § 32-mi, imm. 3 naapertorlugu aalajangersarneqarput:

Ilinniarnermut ileqqorissaarnermullu malittarisassanik aalajangersaaneq aamma tusarniaaneq

  § 1.  Kattuffik ilinniartunut sinniisuutitaasoq tusarniaavigineqareerpata rektori ilinniarnermut ileqqorissaarnermullu malittarisassanik ilinniartitsinermi avatangiisinik pitsaasunik aamma ilinniartut pitsaasumik atugarissaarnissaannik qulakkeerinneqataasussanik aalajangersaassaaq.

Tamanit pissarsiarisassanngortitsineq aamma ilisimatitsineq

  § 2.  Ilisimatusarfiup ilinniarnermut ileqqorissaarnermullu malittarisassai ilinniartunit pissarsiarineqarsinnaassapput aammalu ilisimatusarfiup nittartagaani allassimassallutik. Ilinniarnerit aallartinneranni ilinniarnermut ileqqorissaarnermullu malittarisassat pillugit Ilisimatusarfiup ilinniartut ilisimatissavai aammalu malittarisassat malinneqanngippata tamanna qanoq kinguneqarsinnaanersoq pillugu ilisimatissallugit.

Imarisai

  § 3.  Ilinniarnermut ileqqorissaarnermullu malittarisassat minnerpaamik makkuninnga  ilassapput:
1)  Ilinniakkamik ingerlataqarnissaq pillugu malittarisassat, ilinniarnermik ingerlatsineq pillugu malittarisassat ilanngullugit aamma napparsimasoqartillugu, ernisoqartillugu, sulinngiffeqartoqartillugu il. il. qanoq isummertoqartassanersoq pillugit malittarisassat. 
2)  Pinngitsoorani takkuttarnissaq, takkutinngitsoorneq, takkutinngitsoornermik nalunaarsuineq, ilinniartitsinermi pinngitsoorani peqataasussaatitaaneq pillugit malittarisassat, tassunga ilanngullugit suliassanik tunniussinissaatitaaneq misilitsinnernullu peqataasussaatitaaneq pillugit malittarisassat.
3)  Soraarummeernermi peqquserlunneq, assiliineq, peqquserlulluni allannguineq assingusullu pillugit malittarisassat.
4)  Nalinginnaasumik torersaarnermut ataatsimooqatigiinnermullu malittarisassat.
5)  Kinguneqartitsinernik tunniussisarnermut malittarisassat, tak. § 5. 
  Imm. 2.  Ilinniarnermut ileqqorissaarnermullu malittarisassat imaqassapput, inuit innarluutillit qanoq immikkut eqqarsaatigineqassanersut.

Perorsaanikkut avoqqaarinninneq

  § 4.  Ilisimatusarfiup ilinniarnermut ileqqorissaarnermullu malittarisassaanik annikinnerusumik unioqqutitsisoqarnerani ilinniartoq perorsaanikkut rektorimit avoqqaarineqarsinnaavoq. Perorsaanikkut avoqqaarinninneq kinguneqartitsinerunngilaq, tak. § 5.

  § 5.  Ilinniartumut ilinniarfiup ilinniarnermut ileqqorissaarnissamullu malittarisassanik malinninngitsumut perorsaanikkut avoqqaarinninneq ilinniarfiup rektorianit naammanngitsutut isigineqarpat iliuuserisassat makku atorneqarsinnaapput:
1)  Mianersoqqussut.
2)  Soraarummeernermiit aneqqusineq.
3)  Aaqqissuussani ingerlataniluunniit aalajangersimasuni peqataaqqusinnginneq. 
4)  Ilisimatusarfimmiit anisitaagallarneq.
5)  Ilisimatusarfimmiit anisitsineq. 
  Imm. 2.  Kinguneqartitsineq ilinniarnermi ileqqorissaarnissamilu malittarisassaanik unioqqutinneqartumut naleqquttuussaaq. 
  Imm. 3.  Imm. 1-imi, nr. 4 aamma 5 malillugit kinguneqartitsinissaq aatsaat erseqqissumik nalilersuisoqareernermi tamannalu sioqqullugu allakkatigut mianersoqqussummik tunniussisoqareeraangat aatsaat iliuuserineqartassaaq, taamaattorli tak. imm. 4.
  Imm. 4.  Ilungersunarluinnartumik pisoqarsimatillugu tassunga ilanngullugu atortunik inummilluunniit ajoqusiiniarnerit unitsinniarlugit iliuuseqarnerni imaluunniit taamatut pisoqaqqitsillugu, siumut allakkatigut mianersoqqussummik tunniusseqqaarani kinguneqartitsisoqarsinnaavoq.

Naammagittaalliorneq

  § 6.  Nalunaarut manna aamma ilinniarnermut ileqqorissaarnermullu malittarisassat naapertorlugit aalajangiinerit aalajangiinermiit sapaatip akunneri 4-t qaangiutsinnagit ilinniartumit Ilinniartitaanermut Naalakkersuisoqarfimmut naammagittaalliuutigineqarsinnaapput. Perorsaanikkut avoqqaarinninnerit naammagittaalliuutigineqarsinnaanngillat. 
  Imm. 2.  Naammagittaalliuut allaganngorlugu rektorimut tunniunneqassaaq. Rektorip aalajangiisimanini aalajangiusimappagu, nammineq suliamut oqaaseqaasiani ilanngullugu piaartumik naammagittaalliuut Ilinniartitaanermut Naalakkersuisoqarfimmut ingerlateqqissavaa. Suliaq ingerlateqqinneqartinnagu, rektorip naammagittaalliuuteqartoq oqaaseqaammut oqaaseqaateqarnissaanut periarfississavaa. Naammagittaalliuuteqartoq sapaatip akunnerata 1-ip ingerlanerani oqaaseqaammut oqaaseqaateqarnissaminut periarfissinneqassaaq. Naammagittaalliuuteqartup oqaaseqaatigisinnaasai Ilinniartitaanermut Naalakkersuisoqarfimmut ilanngullugit nassiunneqassapput. 
  Imm. 3.  Pisuni immikkut ittuni Ilinniartitaanermut Naalakkersuisoqarfik aalajangiisinnaavoq, § 5, imm. 1 naapertorlugu kinguneqartitsinermut naammagittaalliut ingerlaannartumik sunniuteqartinneqassasoq.

Atuutilernera

  § 7.  Nalunaarut 1. marts 2021-mi atuutilissaaq.
  Imm. 2.  Ilinniarnermut ileqqorissaarnermullu malittarisassat piffissami nalunaarutip atuutilernerani ilisimatusarfimmi atuutsinneqartut atuutiinnassapput nalunaarut manna tunngavigalugu ilinniarnermut ileqqorissaarnermullu malittarisassanit nutaanit taarserneqarnissamik tungaanut, taamaattorli tak. imm. 3.
  Imm. 3.  Ilinniarnermut ileqqorissaarnermullu malittarisassanik atuuttunik nutarterineq ullup nalunaarutip matuma atuutilerfiata kingorna kingusinnerpaamik qaammatit arfillit kingorna ingerlanneqassaaq.

Namminersorlutik Oqartussat ulloq 2. februar 2021

Katti Frederiksen

/

Karsten Peter Jensen