Kapitali 1
Siunertaq aamma atuuffigisaa

§ 1.  Inatsisartut inatsisaanni matumani inuiaqatigiinni meeqqat pisinnaatitaaffiisa soqutigisaasalu iluaquserneqarnissaat siunertaavoq.
Imm. 2.  Inatsisartut inatsisaanni tunngavigineqarpoq Meeqqat Pisinnaatitaaffii pillugit Naalagaaffiit Peqatigiit Isumaqatigiissutaat.

§ 2.  Inatsisartut inatsisaat meeqqanut 18-it inorlugit ukiulinnut, Kalaallit Nunaanni najugaqartunut atuuppoq.
Imm. 2.  Aammattaaq Inatsisartut inatsisaat meeqqanik inuusuttunillu ikiorsiisarneq pillugu inatsit naapertorlugu inunnut Kalaallit Nunaanni najugaqavissunut aamma suliniuteqareernermi malinnaaffigineqartunut atuuppoq.

Kapitali 2
Meeqqat pisinnaatitaaffiinik sullissivimmik pilersitsineq

§ 3.  Naalakkersuisut meeqqat pisinnaatitaaffii pillugit suliffeqarfimmik pilersitsissapput, inuttaralugit Meeqqat illersuisuat, Meeqqat pillugit Siunnersuisoqatigiit aammalu allattoqarfik.
Imm. 2.  Meeqqat pisinnaatitaaffii pillugit suliffeqarfik Namminersorlutik Oqartussat ataanni politikkimut attuumassuteqanngitsumik suliffeqarfiussaaq. Suliffeqarfik Meeqqat illersuisuannit aqunneqassaaq.

Meeqqat illersuisuat

§ 4.  Meeqqat illersuisuat Naalakkersuisunit toqqarneqassaaq. Meeqqat illersuisuat Meeqqat pillugit Siunnersuisoqatigiinni siulittaasuussaaq.
Imm. 2.  Meeqqat Illersuisuat piffissami ukiunut pingasunut killissaleriikkamik ivertinneqartassaaq. Ataasiarluni ivertitsisoqaqqissinnaavoq.
Imm.3.  Meeqqat illersuisuat piffissami ukiut pingasut iluanni Naalakkersuisunit tunuartinneqarsinnaavoq, tamatumunnga pissutaasinnaasoq ataaseq arlallilluunniit kinguliini taaneqartut naammassineqarsimappata:
1) Inatsisartut inatsisaat manna malillugu Meeqqat illersuisuata suliassaasa suliarineqarnerat Meeqqat illersuisuannit annertuumik sumiginnarneqarsimappata,
2) Meeqqat illersuisuat iliuuseqarsimappat Meeqqat illersuisuata Inatsisartut inatsisaannut tunngatillugu suliassaasa Meeqqat illersuisuannit isumannaatsumik suliarineqarnissaannik nalorninarsitsilersumik.
3) Meeqqat illersuisuat soraartussatut Meeqqat pillugit Siunnersuisoqatigiit ilaasortaannit tallimanit innersuussutigineqartassaaq aammalu Meeqqat illersuisuata soraarnissaanut pissutsinik misissuilluareernikkut Naalakkersuisunit.

Meeqqat pillugit Siunnersuisoqatigiit

§ 5.  Naalakkersuisut Meeqqat pillugit Siunnersuisoqatigiit pilersissavaat. Meeqqat pillugit Siunnersuisoqatigiit suliatigut assigiinngitsunit katitigaapput. Ilaasortat tamarmiullutik suliassaqarfiit ilaatigut uku pillugit annertuumik ilisimasaqassapput:
1) meeqqat peroriartorneri ineriartornerilu,
2) meeqqat atuarnerat,
3) meeqqat kulturikkut sunngiffimmilu inuunerat,
4) meeqqat peqqissuunerat,
5) meeqqat inatsisitigut inissisimanerat, aamma
6) meeqqat immikkut pisariaqartitsisut.
Imm. 2.  Meeqqat pillugit siunnersuisoqatigiit 7-inik ilaasortaqassapput. Taakkunannga Naalakkersuisut ilaasortat 6-it toqqassavaat, §5, imm. 1, 3 aamma 4 aamma § 6, kiisalu Meeqqat illersuisuat toqqassallugu, tak. § 4.
Imm. 3.  Ilaasortat piffissamut ukiunut pingasunut toqqarneqassapput. Ilaasortap nutaap toqqarneqarnissaata tungaanut ilaasortaareersut atuutissapput. Ataasiarluni toqqagaaqqittoqarsinnaavoq.
Imm. 4.  Ilaasortat toqqarneqarsimasut akornanni tunuartoqartillugu, kingullermik qinigassatut inassutigineqarsimasut akornanni ilaasortassamik nutaamik Naalakkersuisut toqqaassapput.

§ 6.  Kattuffinnit, peqatigiiffinnit il.il. meeqqat atugaannik suliaqartunit inassuteqartoqarneratigut Meeqqat pillugit Siunnersuisoqatigiinnut qinigassanngortitanik pingasunik Naalakkersuisut toqqaassapput.
Imm. 2.  Pisortatigut oqartussanit aamma pisortat namminersortullu meeqqanut paaqqinnittarfiannit inassuteqartoqarneratigut Meeqqat pillugit Siunnersuisoqatigiinnut qinigassanngortitanik pingasunik Naalakkersuisut toqqaassapput.
Imm. 3.  Qinigassanngortitatut inassutigineqartut § 5, imm. 1-mi taaneqartuni piginnaasaqarfiusut arlaanni ataatsimi arlalinniluunniit ilisimasaqarluarlutillu suliatigut piginnaasaqassapput.
Imm. 4.  Meeqqat pillugit Siunnersuisoqatigiinnut qinigassanngortitsinissamut inassuteqarnissaq pillugu maleruagassanik erseqqinnerusunik, aamma Meeqqat pillugit Siunnersuisoqatigiinnut qinigassanngortitanik toqqaanissamut piumasaqaatinik erseqqinnerusunik Naalakkersuisut aalajangersaasinnaapput.
Imm. 5.  Kattuffiit, peqatigiiffiit il.il. sorliit kiisalu pisortatigut oqartussat aamma pisortat namminersortullu suliffiutaat sorliit siunnersuisoqatigiinnut qinigassanngortitsisinnaanersut Naalakkersuisunit aalajangiiffigineqassaaq.

§ 7.  Meeqqat pillugit Siunnersuisoqatigiinni ilaasortaq piffissami ukiut pingasut iluannii Naalakkersuisunit tunuartinneqarsinnaavoq, tamatumunnga pissutaasinnaasoq ataaseq arlallilluunniit kinguliini taaneqartut naammassineqarsimappata:
1) Inatsisartut inatsisaat manna malillugu Meeqqat pillugit Siunnersuisoqatigiinnut ilaasortap suliassani annertuumik sumiginnarsimappagit,
2) Meeqqat pillugit Siunnersuisoqatigiinnut ilaasortaq iliuuseqarsimappat ilaasortap Inatsisartut inatsisaannut tunngatillugu suliassaminik isumannaatsumik suliarinnissinnaaneranik nalorninarsitsilersumik.
3) Meeqqat pillugit Siunnersuisoqatigiinnut ilaasortaq soraartussatut Meeqqat pillugit Siunnersuisoqatigiit ilaasortaannit arfinillinit innersuussutigineqartassaaq aammalu Meeqqat pillugit Siunnersoqatigiinut ilaasortap soraarnissaanut pissutsinik misissuilluareernikkut Naalakkersuisunit.

Meeqqat illersuisuata suliassai

§ 8.  Meeqqat illersuisuata Meeqqat pillugit Siunnersuisoqatigiit siunnersuisoralugit meeqqat nalinginnarmik inuttullu pisinnaatitaaffiisa soqutigisaasalu iluaqusernissaat suliarissavai kiisalu inuiaqatigiinni meeqqat atugaat pillugit isiginninniarlunilu paasissutissiisassaaq.
Imm. 2.  Pingaartumik Meeqqat illersuisuat:
1) Meeqqat pisinnaatitaaffii naammagittaalliuuteqarsinnaanerilu pillugit meeqqanut siunnersuillunilu ilitsersuisassaaq.
2) Meeqqat atugaat aamma meeqqat pisinnaatitaaffii naammagittaalliuuteqarsinnaanerilu pillugit apeqqutinut tunngassuteqartunik, pisortatigut oqartussanut, pisortat namminersortullu suliffiinut kiisalu kattuffinnut peqatigiiffinnullu il.il. siunnersuillunilu ilitsersuisassaaq.
3) Meeqqat Pisinnaatitaaffii pillugit Naalagaaffiit Peqatigiit Isumaqatigiissutaannut tunngatillugu Kalaallit Nunaata inatsisitigut atuutsitsinikkullu pisussaaffii naapertuunnersut misissortassavai.
4) Meeqqat Pisinnaatitaaffii pillugit Naalagaaffiit Peqatigiit Isumaqatigiissutaanni aalajangersakkani siunertat aallaavigalugit meeqqat Kalaallit Nunaanni inuuneranni pissutsit nalilersortassavai.
5) Meeqqat pillugit paasissutissat ingerlateqqittassavai, apeqqutit saqqumilaartut oqallisigisassanngortittarlugit, tamanut ammasumik oqallinnermi meeqqat illersortarlugit kiisalu oqallinnermi meeqqat peqataanissaannut periarfissat pitsaanerulersinnissaat sulissutigalugit inuiaqatigiinnilu ineriartornermut sunniuteqarluni.
6) Meeqqat inatsisitigut inissisimaffiinut nukittorsaataasinnaasunik suliniutissanik siunnersuuteqartassaaq, aamma meeqqat inuiaqatigiillu akornanni aporaaffiusunik aaqqiissuteqarnissamut imaluunniit pitsaaliuinissamut suliniutissanik siunnersuuteqartassalluni.
Imm. 3.  AammattaaqMeeqqat illersuisuat meeqqanut atugassarititaasut ineriartorteqqinne-qarnerannut tunngatillugu ilisimasanik katersissaaq ingerlatitseqqittassallunilu, assersuutigalugu ilaqutariinnermut tunngasut, isumaginninnermut, peqqissutsimut, atuarnermut-  ineqarnermullu tunngasut. Taamatut aamma Meeqqat illersuisuat:
1) Meeqqanut atugassarititaasut pillugit misissuisimanernut, nalunaarusiornernut, ilisimatusarnikkut angusanut, naliliineq pillugu nalunaarusianut, kisitsisitigut paasissutissanut, misileraanermi inernernut il.il. paasissutissanik piviusunik pioreersunik katersineq aaqqissuusseqqissaarnerlu isumagissavaa.
2) Meeqqanut atugassarititaasut pillugit paasissutissanik malinnaasitsisumik aaqqissuussineq aammaluu meeqqanut atugassarititaasut pillugit ilisimasanik nutaanik ineriartortitseqqinneq.
3) Meeqqanut atugassarititaasut pillugit ilisimasanik tamanut ingerlatitseqqinneq, ilanngullugit makkununnga ilinniagaqartunut, ilisimatusartunut, suliamik ingerlatalinnut, politikerinut aammalu soqutiginnittunut allanut.
Imm. 4.  Meeqqat illersuisuata sulineranut meeqqat akuliutsinneqassapput aamma § 8, imm. 2, nr. 1-6 tunngavigalugit  suliniutit pillugit meeqqat sapinngisaq naapertorlugu tusarniarneqartassapput.

§ 9.  Meeqqat atugaannut aamma meeqqat pisinnaatitaaffiinut pingaaruteqartunik inatsisitigut suliniutinut allatigullu suliniutinut atatillugu Meeqqat illersuisuat tusarniarneqartassaaq.

§ 10.  Apeqqutini nalinginnaasuni tamani meeqqat atugaannut pingaaruteqartuni Inatsisartut, Naalakkersuisut pisortatigullu oqartussat allat Meeqqat illersuisuannut isumasiuisinnaapput.

Meeqqat illersuisuata piginnaatitaaffii

§ 11.  Pissutsit Meeqqat illersuisuata suliaqarfiinut attuumassuteqartut pillugit Meeqqat illersuisuat killilersorneqarnani oqaaseqarsinnaatitaavoq, taamaattorli tak. § 19. Oqaaseqaatit kimut sammitinneqassanersut Meeqqat illersuisuata nammineq aalajangertassavaa.
Imm. 2.  Meeqqat illersuisuat namminerisaminik imaluunniit allat saaffiginnissuteqarnerisigut sulianik misissuisinnaallunilu qaqitsisinnaavoq. Meeqqat tamatigut sallerpaatinneqassapput. Meeqqat illersuisuata pissutsit meeqqanut ataasiakkaanut tunngassuteqartut pinnagit, pissutsit meeqqanut nalinginnaasumik tunngassuteqartut kisiisa oqaaseqarfigisinnaavai.
Imm. 3.  Pisup suliarineqarnissaanut naammattumik pissutissaqarnersoq Meeqqat illersuisuata nammineq aalajangissavaa.
Imm. 4.  Meeqqat illersuisuat taamaallaat oqaaseqaateqarsinnaatitaavoq. Meeqqat illersuisuat aalajangiisinnaatitaanngilaq.

§ 12.  Pisortat namminersortullu meeqqanut paaqqinnittarfiinut aamma meeqqat pillugit peqatigiiffinnut kattuffinnullu il.il. tamanut Meeqqat illersuisuat kinaassutsimut uppernarsaatip takutinneratigut aammalu eqqartuussivimmik aalajangiiffigineqaqqaanngikkaluarluni killilersorneqarnani isersinnaatitaavoq.
Imm. 2.  Pisortatigut oqartussat kiisalu pisortat namminersortullu meeqqanik paaqqinnittarfiutaat aamma peqatigiiffiit kattuffiillu meeqqat atugaat pillugit suliaqartut nipangiussisimasussaatitaagaluarlutik inatsit manna naapertorlugu Meeqqat illersuisuata sulianik suliarinninnissaanut pisariaqartinneqartunik paasissutissanik Meeqqat illersuisuannut ingerlatitseqqittussaapput, tassa ingerlateqqitaq inatsimmut allamut akerliunngippat.
Imm. 3.  Pisortatigut oqartussat suliffeqarfiillu imm. 2-mi taaneqartut saniatigut allat nipangiussisimasussaatitaagaluarlutik Meeqqat illersuisuata § 8, imm. 2, nr. 3 naapertorlugu sulianik suliarinninnissaanut pisariaqartinneqartunik paasissutissanik Meeqqat illersuisuannut ingerlatitseqqittussaapput.
Imm. 4.  Pisortatigut oqartussat aamma pisortat namminersortullu meeqqanik paaqqinnittarfiutaat kiisalu peqatigiiffiit kattuffiillu meeqqat atugaat pillugit suliaqartut, § 8, imm. 2, nr. 1-6-mi taaneqartut iluanni suliat pillugit aalajangiinerit suliaqarfiillu nassuiaateqarfigissagaat Meeqqat illersuisuata noqqaassutigisinnaavaa.

§ 13.  Meeqqat illersuisuata allattoqarfimmi suleqataasut ilaata Meeqqat illersuisuata suliaanik suliaqarallarnissaa aalajangersinnaavaa.

Meeqqat pillugit Siunnersuisoqatigiit suliassaat

§ 14.  Meeqqat pisinnaatitaaffiinik Sullissiviup suliassai inatsisitigut tunngavilikkat aallaavigalugit Meeqqat pisinnaatitaaffiinik Sullissiviup ukiumoortumik qitiutillugit suliassai suliniutissaalu Meeqqat pillugit Siunnersuisoqatigiit aalajangersartassavaat.
Imm. 2.  Meeqqat pillugit suliaqarfimmi pilersaarutit ineriartortinnissaat, tassunga ilanngullugit pilersaarutit meeqqanut attaveqarnissamik oqaloqateqarnissamillu qulakkeerisut pillugit Meeqqat illersuisuata suliaqartarnerani Meeqqat pillugit Siunnersuisoqatigiit ikiuuttassapput.
Imm. 3.  Apeqqutini meeqqanut tunngassuteqartuni tamani Meeqqat illersuisuata siunnersuinerani ilitsersuineranilu Meeqqat pillugit Siunnersuisoqatigiit ikiuuttassapput.

§ 15.  Meeqqat pillugit Siunnersuisoqatigiit ukiumut minnerpaamik sisamariarlutik ataatsimiittassapput.
Imm. 2.  Aammattaaq ataatsimiittoqartassaaq, Meeqqat pillugit Siunnersuisoqatigiinni ilaasortat ikinnerpaamik pingasuusut Meeqqat illersuisuanut saaffiginnillutik ataatsimiinnissamik piumasaqarpata.
Imm. 3.  Meeqqat pillugit Siunnersuisoqatigiinni siulittaasoq aamma ilaasortat allat ikinnerpaamik pingasut ataatsimiinnermi najuuppata Meeqqat pillugit Siunnersuisoqatigiit aalajangiisinnaassuseqassapput.
Imm. 4.  Meeqqat pillugit Siunnersuisoqatigiit suleriaasissartik nammineq aalajangersassavaat. Suleriaasissaq tamanut saqqummiunneqartassaaq.

§ 16.  Pisortatigut oqartussanik, pisortat namminersortullu suliffiutaannik aamma kattuffinnik peqatigiiffinnillu inassuteqarsinnaatitaasunik, kiisalu meeqqanut tunngasutigut soqutigisaqaqatigiinnik allanik Meeqqat pillugit Siunnersuisoqatigiit ukiumoortumik ataatsimeeqateqartassapput.
Imm. 2.  Meeqqat pillugit Siunnersuisoqatigiit ingerlatsinerat pillugu Meeqqat pillugit Siunnersuisoqatigiit ukiut tamaasa allaganngorlugu nalunaarusiortassapput. Nalunaarusiaq tamanut saqqummiunneqartassaaq.

Allattoqarfik

§ 17.  Meeqqat illersuisuanut aamma Meeqqat pillugit Siunnersuisoqatigiinnut allattoqarfimmik pilersitsisoqassaaq.
Imm. 2.  Allattoqarfiup suliassarai allaffissornikkut suliassat aammalu Meeqqanut illersuisoq Meeqqallu pillugit Siunnersuisoqatigiit sullittassallugit.
Imm. 3.  Meeqqat illersuisuat allattoqarfimmi pisortamik atorfinitsissaaq. Allattoqarfimmi pisortap qullersaraa Meeqqanut illersuisoq.  
Imm.4.  Allattoqarfimmi atorfillit atorfinitsitsinerni atugassarititaasuni aammalu suliffeqartitaanermi soraarnermilu pissutsinut tunngatillugu Kalaallit Nunaanni Namminersortut qitiusumik allattoqarfianni aalajangersakkat sukkulluunniit atuuttut ataaniipput.
Imm. 5.  Imm. 2  naapertorlugu immikkut ittumik suliassat isumagitinnissaannut suliamik paasisimasallit avataaneersut atorneqarsinnaapput.

Kapitali 3
Suliamik suliarinninnermi malittarisassat

§ 18.  Pisortat ingerlatsiviini sulianik suliarinnittarneq pillugu Inatsisartut Inatsisaata toqqaannartumik Meeqqat illersuisuata sulianik ingerlatsinerani atorneqarsinnaanngiffiani, Inatsisartut Inatsisaanni, tassunga ilanngullugit ingerlatsivinni ingerlatsinerup inatsisitigut periutsit tunngavigisai, inatsisitigut aalajangersarneqarsimanngitsunut, taamatut atuutsinneqassapput.
Imm. 2.  Meeqqat illersuisuata § 11, imm. 2 tunngavigalugu saaffiginnissutit Meeqqat illersuisuanik tiguneqarsimasut itigartitsissutigisinnaavai. Aamma Meeqqat illersuisuata suliat Meeqqat illersuisuannik ingerlanneqartut unitsillugit toqqorsinnavai. Meeqqat illersuisuata saaffiginnissutinik itigartitsinera aamma sulianik, nammineq piumassutsini naapertorlugu suliarilersimanngisaminik, unitsitsinera allakkatigut nalunaarutigineqartassaaq aammalu tunngavilersorneqartassalluni.
Imm. 3.  Meeqqanik illersuisup saaffiginnissutinik itigartitsineri aammalu sulianik unitsitsinera Naalakkersuisunut imaluunniit allaffissornikkut oqartussaasunut allanut maalaarutigineqar-sinnanngilaq. Aamma tamanna atuuppoq Meeqqanik illersuisup oqaaseqaataanut.

§ 19.  Meeqqat illersuisuat, Meeqqat pillugit Siunnersuisoqatigiit aamma allattoqarfik nipangiussisussaatitaapput pisortani suliffeqarfinni sulinermi malittarisassat atuuttut najoqqutaralugit.

Kapitali 4
Aningaasalersuineq

§ 20.  Meeqqat pisinnaatitaaffiinik Sullissivik aningaasalersorneqassaaq nunatta karsianit tapiissutit aqqutigalugit.  
Imm. 2.  Taassuma saniatigut Meeqqat pisinnaatitaaffiinik Sullissivik sulinerminut atatillugu pisortatigut oqartussanit allanit imaluunniit kattuffinnit, peqatigiiffinnit, suliffeqarfinnit il.il. namminersortunit aningaasaliiffigineqarnissamik qinnuteqarsinnaavoq.
Imm. 3.  Meeqqat pisinnaatitaaffiinik Sullissivik Meeqqat pisinnaatitaaffiinik Sullissivimmi suliassat inatsisitigut aalajangersakkat iluanni suliffeqarfimmik ingerlatsisinnaavoq aningaasatigut isertitaqarnermik nassatalimmik.

§ 21.  Meeqqat pillugit Siunnersuisoqatigiinnut ilaasortat aningaasarsiaqarput, angalanermi ullormusiaqarput aammalu angalanermi aningaasartuutinut matussusiiffigineqassallutik Inatsisartunut, Naalakkersuisunut, il.il. ilaasortanut aningaasarsianut il.il. Inatsisartut Inatsisaanni aalajangersakkat malillugit. Aningaasartuutit taakkua akilerneqassapput nunatta karsiata ukiumoortumik tapiissutaannik.

Aningaasatigut missingersuutit aamma naatsorsuutit

§ 22.  Meeqqat illersuisuat ukiut tamaasaNaalakkersuisunut ukiumut aningaasarsiorfiusunut tulliuttumut aningaasatigut missingersuutissatut siunnersuummik tunniussaqassaaq. Siunnersuusiaq imaqassaaq isertitassatut aningaasartuutissatullu ilimagisanik. Peqatigitillugu Meeqqat illersuisuata tunniutissavaa ukiumut aningaasarsiorfiusumut pineqartumut nunatta karsiata tapiissutaasa annertussusissaannut siunnersuut.
Imm. 2.  Aningaasatigut missingersuummut siunnersuutip aammalu ukiumut aningaasarsiorfimmut tulliuttumut nunatta karsiata tapiissuteqarnissaata annertussusissaanut siunnersuutip tunniunneqarfissaannut Naalakkersuisut piffissaliissapput.

§ 23.  Meeqqat pisinnaatitaaffiinik Sullissiviani ukiup naatsorsuuteqarfiup malippaa ukioq aningaasarsiorfiusoq. Naatsorsuutit  ukiumoortut kukkunersiorneqassapput kukkunersiuisumik naalagaaffimmit akuerisaasumik.

§ 24.  Meeqqat illersuisuata, Naalakkersuisut piffissaliussaata iluani, saqqummiutissavai naatsorsuutit ukiumoortut kukkunersiorneqarsimasut, kukkunersiuisup oqaaseqaaataanik ilanngussartallit, Naalakkersuisunut akuerisassanngortillugit. 

Kapitali 5
Atortuulersitsineq ikaarsaariarnermilu aalajangersakkat

§ 25.  Inatsisartut inatsisaat manna ulloq 1. marts 2012-mi atulersinneqassaaq.
Imm. 2.  Peqatigisaanik Meeqqat Inuusuttullu pillugit Ilisimasaqarfik pillugu Inatsisartut inatsisaat nr. 26, 18. december 2003-imeersoq atorunnaarsinneqarpoq.
Imm. 3.  Meeqqat Inuusuttullu suliassaat pillugit ilisimasanik katersivik ingerlaannassaaq, soorlu tamanna Meeqqat pisinnaatitaaffiinik Sullissiviup allattoqarfiani Meeqqat Inuusuttullu Siulersuisui pillugit ilisimasanik katersivimmi aalajangerneqarsimasutut, Meeqqat pisinnaatitaaffiinik Sullissiviup ukiumoortumik qitiutillugit sammisassai- aammalu suliniuteqarfissai Meeqqat pillugit Siunnersuisoqatigiinit aalajangerneqarnissaasa tungaanut, tak. § 14, imm. 1.

Namminersorlutik Oqartussat, ulloq 22. november 2011

Kuupik Kleist