Meeqqat illersuisuat aamma Meeqqat pillugit Siunnersuisoqatigiit pillugit Inatsisartut inatsisaanni nr. 11, 22. november 2011-meersumi § 6, imm. 4 malillugu aalajangersarneqarpoq:

Kapitali 1
Meeqqat pillugit Siunnersuisoqatigiinnut piukkunneqartunik inassuteqarneq

§ 1.  Kattuffiit peqatigiiffiillu il.il. meeqqat atugarisaannik suliaqartut Meeqqat pillugit Siunnersuisoqatigiinnut piukkutaminnik inassuteqarsinnaapput.
Imm. 2.  Kattuffiit peqatigiiffiillu il.il. meeqqat atugarisaannik suliaqartutut paasineqassapput kattuffiit peqatigiiffiillu pisortanut ilaanngitsut, tassa imaappoq kattuffiit peqatigiiffiillu il.il. pisortat sunniuteqarfiginngisaat. Kattuffiit peqatigiiffiillu il.il. siammasissumik paasineqassapput. Aaqqissuussaasumik ataatsimoorfik ataatsimoortumik soqutigisaqarnerup siuarsarnissaanik siunertaqartoq ilaasortallu soqutigisaminnik sammisaqarnissaannik periarfissiisoq tunngaviatigut pineqarpoq. Peqatigiiffik kattuffilluunniit il.il. meeqqat atugarisaannik suliaqassaaq.

§ 2.  Pisortatigut oqartussat meeqqanullu paaqqinnittarfiit pisortanit namminersortunillu pigineqartut Meeqqat pillugit Siunnersuisoqatigiinnut piukkutaminnik inassuteqarsinnaapput.
Imm. 2.  Pisortatigut oqartussatut paasineqassapput pisortani immikkoortutut ingerlatsiviit Namminersorlutik Oqartussat kommunillu sinaakkusiussaasa iluini inatsisinik tunngaveqarlutik ingerlataqartut. Assersuutigalugu naalakkersuisoqarfiit, aqutsisoqarfiit ingerlatsiviillu pisortatigut oqartussaasuupput. Eqqartuussiviit, Inatsisartut naalagaaffiullu Kalaallit Nunaanni ingerlatsivittut oqartussaasui avataaniipput.
Imm. 3.  Paaqqinnittarfiit pisortanit namminersortunillu pigineqartutut paasineqassapput atuarfiit, meeqqanut inuusuttunullu ulloq unnuarlu paaqqinnittarfiit, ulluunerani paaqqinnittarfiit, fritidshjemmit, meeqqat ornittagaat il.il.

§ 3.  Pisortatut oqartussaasut, paaqqinnittarfiit pisortanit namminersortunillu pigineqartut aamma kattuffiit peqatigiiffiillu inassutigineqarsinnaatitaasut allattorsimaffiannik Naalakkersuisut tamanut saqqummiissapput. Allattorsimaffik allaffissornikkut oqartussaasumut allamut naammagittaalliuutigineqarsinnaanngilaq.
Imm.2.  Allattorsimaffik, naleqq. imm. 1 Meeqqat pillugit Siunnersuisoqatigiinnut ilaasortanik toqqaasoqartinnagu tamanut saqqummiunneqassaaq  naleqq. Inatsisartut inatsisaat Meeqqat Illersuisuat aamma Meeqqat pillugit Siunnersuisoqatigiit pillugit.

§ 4.  Oqartussaasoq, paaqqinnittarfik, kattuffik peqatigiiffilluunniit il.il. inassuteqarsinnaatitaasoq Meeqqat pillugit Siunnersuisoqatigiinnut piukkutaminik inassuteqarnissamik kissaateqarsimappat inassuteqarsinnaatitaasoq sapinngisamik ikinnerpaamik angummik arnamilluunniit ataatsimik inassuteqassaaq.
Imm. 2.  Inassuteqarsinnaatitaasup kina inassutigissanerlugu nammineq kiffaanngissuseqarpoq. Piukkunneqartutut inassutigineqartoq 18-nik ukioqalereersimassaaq.
Imm. 3.  Inassuteqarsinnaatitaasup inassuteqaataani inassutigineqarlutik piukkunneqartut sutigut ilisimasaqarluarlutillu suliatigut qanoq piginnaasaqarnersut takuneqarsinnaassaaq. Taaneqartut inassuteqarnermi takuneqarsinnaanngippata inassutigineqartutut piukkunneqartoq ilaasortanngorsinnaanngilaq.

§ 5.  Meeqqat pillugit Siunnersuisoqatigiinnut piukkunneqartutut inassutigineqartut Ilaqutariinnermut, Kultureqarnermut, Ilageeqarnermut Naligiissitaanermullu Naalakkersuisoqarfimmut nassiunneqassapput.  
Imm. 2.  Ilaqutariinnermut, Kultureqarnermut, Ilageeqarnermut Naligiissitaanermullu Naalakkersuisoqarfik piukkunneqartutut inassutigineqartunut piffissaliussamik tamanut nalunaaruteqassaaq

Kapitali 2
Meeqqat pillugit Siunnersuisoqatigiinnut ilaasortanik toqqaaneq

§ 6.  Meeqqat pillugit Siunnersuisoqatigiinni ilaasortat nunatsinni piffinniit assigiinngitsuneersuussapput.

Kapitali 3
Atuutilersitsineq

§ 7.  Nalunaarut manna atuutilissaaq ulloq 1. august 2012.

Namminersorlutik Oqartussat, ulloq 30 juli 2012.

Maliina Abelsen

/

Lise Lennert Olsen