Kapitali 1
Siunertaq suliassallu

§ 1. Meeqqat Inuusuttullu Pillugit Ilisimasaqarfik uppernarsaatinik katersiffiuvoq, tassani nunatsinni meeqqat inuusuttullu atugarisaat pillugit ilisimasat pioreersut katersorneqarlutillu aaqqissuunneqassallutik.

§ 2. Meeqqat Inuusuttullu Pillugit Ilisimasaqarfiup suliassaraa meeraq aallaavigalugu paasissutissanik katersuinissaq, soorlu ilaqutariinnermut, inooqataanermut, peqqissutsimut, atuartitaanermut ineqarnermullu tunngasunik.
Imm. 2. Meeqqat Inuusuttullu Pillugit Ilisimasaqarfiup taamatuttaaq:
1) Paasissutissanik attuumassutilinnik aamma qarasaasiakkut katersineq isumagissavaa.
2) Misissuinerit, nalunaarusiat, ilisimatusarnermit inernerit, nalunaarusiat naliliissutaasut, kisitsisitigut paasissutissat, misiligutit inerneri il.il. pioreersut katersussallugit.
3) Ilisimasat allanit atorneqarsinnaalersinnissat, soorlu ilinniagaqartunit, ilisimatusartunit, sullissisunit, naalakkersuinermik suliaqartunit allanillu soqutiginnittunit.
4) Kalaallit Nunaat tamakkerlugu attuumassutilinnik meeqqat inuusuttullu pillugit paasissutissat nutartertuarnissaat.
5) Ilisimatusartunut, Ph.d.-mik ilinniagaqartunut suliassanik aalajangersimasunik naammassinnissinnaasunut attaveqarnissaq.
Imm. 3. Meeqqat Inuusuttullu Pillugit Ilisimasaqarfik ukiumi qaangiuttumi sulianik ukiumoortumik nalunaarusiortassaaq. Ukiumut nalunaarusiaq ukiumi tulliuttumi aprilip aallaqqaataa nallertinnagu tunniunneqartassaaq.

Kapitali 2
Aqutsineq

§ 3. Meeqqat Inuusuttullu Pillugit Ilisimasaqarfik siulersuisunit aqunneqarpoq.
Imm. 2. Siulersuisut amerlanerpaamik arfineq marlunnik amerlassuseqarput, Naalakkersuisunit toqqarneqassallutik. Ilisimatusarfik, Nunatta Atuagaateqarfiat, ilanngullugu Groenlandica, Naatsorsueqqissaartarfik kiisalu Kalaallit Nunaanni Kommuneqarfiit Kattuffiat siulersuisunut ilaasortassamik ataatsimik tamarmik inassuteqassapput. Naalakkersuisunut ilaasortat, ulluunerani paaqqinniffinnut atuarfinnullu, peqqissutsimut pinaveersaartitsinermullu kiisalu isumaginninnermut akisussaasut, tamarmik immikkut ilaasortamik ataatsimik, amerlanerpaamillu pingasunik inassuteqartassaput. Siulersuisuni siulittaasoq ilaasortassatut inassutigineqartut akornannit Naalakkersuisunit toqqarneqassaaq.
Imm. 3. Siulersuisut ukiunut pingasunut toqqarneqartassapput sulilu ukiunut pingasunut toqqaqqinneqarsinnaallutik.
Imm. 4. Siulersuisut suleriaasissartik nammineq aalajangersassavaat.
Imm. 5. Ilisimasaqarfimmi sulisut ataatsimeeqataasartutut siulersuisut ataatsimiinneranni peqataasassapput.
Imm. 6. Siulersuisunut allatseqarneq Ilisimasaqarfimmi sulisumit isumagineqassaaq.

§ 4. Meeqqat Inuusuttullu Pillugit Ilisimasaqarfiup sulinera piffissarlu ungasinnerusoq eqqarsaatigalugu taassuma ineriartortinnissaanut najoqqutassanik siulersuisut aalajangersaassapput. Suliassat pilersaarusiornerat siulersuisut aalajangersassavaat taamaasillutillu siunertamut naapertuuttuunissaat akisussaaffigissallugu, takuuk § 1.

Kapitali 3
Ingerlatsineq

§ 5. Meeqqat Inuusuttullu Pillugit Ilisimasaqarfimmi sulisut malittarissat atuuttut najoqqutassallu siulersuisunit aalajangersarneqartut malillugit ilisimasaqarfiup ulluinnarni ingerlanneqarnera isumagissavaat.

§ 6. Pisortaqarfik naalakkersuisunut ilaasortap isumaginninnermut tunngasunik akisussaaffeqartup ataaniittoq, siulersuisut innersuussuteqareerneratigut ilisimasaqarfimmi sulisunik atorfinitsitsillunilu soraarsitsisassaaq.

§ 7. Pisortaqarfiup naalakkersuisunut ilaasortap isumaginninnermut tunngasunik akisussaaffeqartup ataanniittup naalakkersuinikkut suliassat Meeqqat Inuusuttullu Pillugit Ilisimasaqarfimmut tunngassutillit isumagissavai.

Kapitali 4
Aningaasalersorneqarnera

§ 8. Ilisimasaqarfiup sulinera aningaasalersorneqassaaq Nunatta karsianut aningaasanut inatsisikkut ukiumoortumik akuersissuteqartarnikkut.
Imm. 2. Tamatuma saniatigut Ilisimasaqarfik sulinerminut atatillugu namminersortut ingerlatsiviinut imaluunniit pisortanut oqartussanut aningaasaliinissamik qinnuteqarsinnaavoq.
Imm. 3. Ilisimasaqarfik anguniakkami iluanni, takuuk § 1, isertitaqarfiusumik suliaqarsinnaavoq.

§ 9. Siulersuisuni ilaasortat Namminersornerullutik Oqartussani atorfeqanngitsut ataatsimiinnersiutinik, ullormusianik aamma angalanermut aningaasartuutinut matussutissanik tunineqartassapput, Inatsisartunut Naalakkersuisunullu ilaasortanut il.il. ataatsimiinnersiutut il.il. pillugit Inatsisartut inatsisaanni malittarisassat malillugit. Aningaasartuutit taakku aningaasanut inatsimmi Meeqqat Inuusuttullu Pillugit Ilisimasaqarfimmut aningaasaliissutit iluanni akilerneqartassapput.

Kapitali 5
Atuutilersitsineq

§ 10. Inatsit manna 1. januar 2004 atuutilerpoq.

Namminersornerullutik Oqartussat, ulloq 18. december 2003

Hans Enoksen

/

Asii Chemnitz Narup