§ 1

 

Meeqqat illersuisuat aamma Meeqqat pillugit Siunnersuisoqatigiit pillugit Inatsisartut inatsisaanni nr. 11, 22. november 2011-meersumi, Inatsisartut inatsisaannit nr. 27, 28. november 2019-imeersumit allanngortinneqartumi ima allannguisoqarpoq: 

 

1.  Inatsisartut inatsisaat imatut taaguuserneqassaaq:

” Meeqqat Oqaaseqartartuat aamma Meeqqat pillugit Siunnersuisoqatigiit pillugit Inatsisartut inatsisaat”.

 

2. Meeqqat Oqaaseqartartuat aamma Meeqqat pillugit Siunnersuisoqatigiit pillugit Inatsisartut inatsisaat imatut oqaasertalerneqassaaq:

 

 

” Kapitali 1

Siunertaq aamma atuuffigisaa

 

  § 1.  Inatsisartut inatsisaanni matumani inuiaqatigiinni meeqqat pisinnaatitaaffiisa soqutigisaasalu iluaquserneqarnissaat siunertaavoq.

  Imm. 2. Inatsisartut inatsisaanni Meeqqat Pisinnaatitaaffii pillugit Naalagaaffiit Peqatigiit Isumaqatigiissutaat tunngavigineqarpoq.

 

  § 2.  Inatsisartut inatsisaat meeqqanut 18-it inorlugit ukiulinnut tamanut Kalaallit Nunaanni najugaqartunut atuuppoq.

  Imm. 2. Aammattaaq Inatsisartut inatsisaat meeqqanik inuusuttunillu ikiorsiisarneq pillugu inatsit naapertorlugu inunnut Kalaallit Nunaanni najugaqavissunut aamma suliniuteqareernermi malinnaaffigineqartunut atuuppoq.

 

Kapitali 2

Meeqqat pisinnaatitaaffiinik sullissivimmik pilersitsineq

 

 § 3.  Naalakkersuisut meeqqat pisinnaatitaaffiinik sullissivimmik pilersitsissapput Meeqqat pillugit Oqaaseqartartumik, Meeqqat pillugit Siunnersuisoqatigiinnik allattoqarfimmillu inuttaqartumik.

  Imm. 2.  Meeqqat pisinnaatitaaffiinik sullissivik Namminersorlutik Oqartussat ataanni sullissiviuvoq naalakkersuinikkut pituttorsimanngitsoq. Sullissivik Meeqqat pillugit Oqaaseqartartumit aqunneqassaaq.

 

Meeqqat pillugit oqaaseqartartoq

 

  § 4.  Meeqqat pillugit oqaaseqartartoq Naalakkersuisunit toqqarneqassaaq. Meeqqat pillugit oqaaseqartartoq Meeqqat pillugit Siunnersuisoqatigiinni siulittaasuussaaq.
  Imm. 2.  Meeqqat pillugit oqaaseqartartoq piffissami ukiunut sisamanut killissaleriikkamik ivertinneqartassaaq. Ivertitsisoqaqqissinnaavoq.
  Imm. 3. Meeqqat pillugit oqaaseqartartoq piffissami toqqagaaffiup iluani Naalakkersuisunit tunuartinneqarsinnaavoq, tamatumunnga pissutaasinnaasoq ataaseq arlallilluunniit ataani taaneqartut naammassineqarsimappata:
1)  Inatsisartut inatsisaat manna malillugu Meeqqat pillugit oqaaseqartartup suliassaasa suliarineqarnerat Meeqqat pillugit oqaaseqartartuannit annertuumik sumiginnarneqarsimappata.
2)  Meeqqat pillugit oqaaseqartartoq iliuuseqarsimappat Meeqqat pillugit oqaaseqartartup Inatsisartut inatsisaannut tunngatillugu suliassaasa Meeqqat pillugit oqaaseqartartuannit isumannaatsumik suliarineqarnissaannik nalornisitsilersumik.
3)  Meeqqat pillugit oqaaseqartartoq soraartussatut Meeqqat pillugit Siunnersuisoqatigiit ilaasortaannit ikinnerpaamik tallimanit innersuussutigineqartassaaq aamma Meeqqat pillugit oqaaseqartartup soraarnissaanut Naalakkersuisut pissutsinik misissuilluareernerisigut soraarsitsineq pissaaq. Innersuussutigineqartoq allagaassaaq tunngavilersorneqarsimassallunilu.

 

Meeqqat pillugit Siunnersuisoqatigiit

 

  § 5.  Naalakkersuisut Meeqqat pillugit Siunnersuisoqatigiit pilersissavaat. Meeqqat pillugit Siunnersuisoqatigiit suliatigut assigiinngitsunit katitigaapput. Ilaasortat tamarmiullutik suliassaqarfiit ilaatigut uku pillugit annertuumik ilisimasaqassapput:
1)  meeqqat peroriartorneri ineriartornerilu,
2)  meeqqat atuarnerat,
3)  meeqqat kulturikkut sunngiffimmilu inuunerat,
4)  meeqqat peqqissuunerat,
5)  meeqqat inatsisitigut inissisimanerat, aamma
6)  meeqqat immikkut pisariaqartitsisut.
  Imm. 2.  Meeqqat pillugit Siunnersuisoqatigiit 7-inik ilaasortaqarput, taakkunannga Naalakkersuisut ilaasortat 6-it toqqassavaat, takuuk §5, imm. 1, 3 aamma 4, aamma § 6, kiisalu Meeqqat pillugit oqaaseqartartoq toqqassallugu, takuuk § 4.
  Imm. 3.   Ilaasortat piffissamut ukiunut 4-nut toqqarneqassapput, taamaaliornikkut ukioq allortarlugu ilaasortanik 3-nik toqqaasoqartassaaq. Ilaasortat nutaat toqqarneqarnissaata tungaanut ilaasortaareersut atuutissapput. Ataasiarluni toqqagaaqqittoqarsinnaavoq.
  Imm. 4.   Ilaasortat toqqarneqarsimasut akornanni tunuartoqartillugu, kingullermik qinigassatut inassutigineqarsimasut akornanni ilaasortassamik nutaamik Naalakkersuisut toqqaassapput.

 

  § 6.  Kattuffinnit, peqatigiiffinnit il.il. meeqqat atugaannik suliaqartunit inassuteqartoqarneratigut Meeqqat pillugit Siunnersuisoqatigiinnut qinigassanngortitanik 3-nik Naalakkersuisut toqqaassapput.
  Imm. 2.   Pisortatigut oqartussanit aamma pisortat namminersortullu meeqqanut paaqqinnittarfiannit inassuteqartoqarneratigut Meeqqat pillugit Siunnersuisoqatigiinnut qinigassanngortitanik 3-nik Naalakkersuisut toqqaassapput.
  Imm. 3.   Qinigassanngortitatut inassutigineqartut § 5, imm. 1-mi taaneqartuni piginnaasaqarfiusut arlaanni ataatsimi arlalinniluunniit ilisimasaqarluarlutillu suliatigut piginnaasaqassapput.
  Imm. 4.   Meeqqat pillugit Siunnersuisoqatigiinnut qinigassanngortitsinissamut inassuteqarnissaq pillugu maleruagassanik erseqqinnerusunik, aamma Meeqqat pillugit Siunnersuisoqatigiinnut qinigassanngortitanik toqqaanissamut piumasaqaatinik erseqqinnerusunik Naalakkersuisut aalajangersaasinnaapput.
  Imm. 5.   Kattuffiit, peqatigiiffiit il.il. sorliit kiisalu pisortatigut oqartussat aamma pisortat namminersortullu suliffiutaat sorliit siunnersuisoqatigiinnut qinigassanngortitsisinnaanersut Naalakkersuisunit aalajangiiffigineqassaaq.

 

  § 7.  Meeqqat pillugit Siunnersuisoqatigiinni ilaasortaq piffissami toqqagaaffiup iluani

Naalakkersuisunit tunuartinneqarsinnaavoq, tamatumunnga pissutaasinnaasoq ataaseq arlallilluunniit ataani taaneqartut naammassineqarsimappata:
1)  Inatsisartut inatsisaat manna malillugu Meeqqat pillugit Siunnersuisoqatigiinnut ilaasortap suliassani annertuumik sumiginnarsimappagit. 
2)  Meeqqat pillugit Siunnersuisoqatigiinni ilaasortaq iliuuseqarsimappat ilaasortap Inatsisartut inatsisaannut tunngatillugu suliassaminik isumannaatsumik suliarinnissinnaaneranik nalornisitsilersumik.
3)  Meeqqat pillugit Siunnersuisoqatigiinni ilaasortaq soraartussatut Meeqqat pillugit Siunnersuisoqatigiit ilaasortaannit 6-init innersuussutigineqartassaaq aamma Meeqqat pillugit Siunnersuisoqatigiinni ilaasortap soraarnissaanut Naalakkersuisut pissutsinik misissuilluareernerisigut soraarsitsineq pissaaq. Innersuussutigineqartoq allagaassaaq tunngavilersorneqarsimassallunilu.

 

Meeqqat pillugit oqaaseqartartup suliassai

 

  § 8.  Meeqqat pillugit Oqaaseqartartuata Meeqqat pillugit Siunnersuisoqatigiit siunnersuisoralugit meeqqat nalinginnarmik inuttullu pisinnaatitaaffiisa soqutigisaasalu iluaqusernissaat suliarissavai kiisalu inuiaqatigiinni meeqqat atugaat pillugit isiginninniarlunilu paasissutissiisassaaq.

  Imm. 2.   Pingaartumik Meeqqat pillugit oqaaseqartartoq:
1)  Meeqqat pisinnaatitaaffii naammagittaalliuuteqarsinnaanerilu pillugit meeqqanut siunnersuillunilu ilitsersuisassaaq.

2)  Meeqqat atugaat aamma meeqqat pisinnaatitaaffii naammagittaalliuuteqarsinnaanerilu pillugit apeqqutinut tunngassuteqartunik, pisortatigut oqartussanut, pisortat namminersortullu suliffiinut kiisalu kattuffinnut peqatigiiffinnullu il.il. siunnersuillunilu ilitsersuisassaaq.
3)  Meeqqat Pisinnaatitaaffii pillugit Naalagaaffiit Peqatigiit Isumaqatigiissutaannut tunngatillugu Kalaallit Nunaata inatsisitigut atuutsitsinikkullu pisussaaffii naapertuunnersut misissortassavai.

4)  Meeqqat Pisinnaatitaaffii pillugit Naalagaaffiit Peqatigiit Isumaqatigiissutaanni aalajangersakkani siunertat aallaavigalugit meeqqat Kalaallit Nunaanni inuuneranni pissutsit nalilersortassavai.

5)  Meeqqat pillugit paasissutissat ingerlateqqittassavai, apeqqutit saqqumilaartut oqallisigisassanngortittarlugit, tamanut ammasumik oqallinnermi meeqqat illersortarlugit kiisalu oqallinnermi meeqqat peqataanissaannut periarfissat pitsaanerulersinnissaat sulissutigalugit inuiaqatigiinnilu ineriartornermut sunniuteqarluni.
6)  Meeqqat inatsisitigut inissisimaffiinut nukittorsaataasinnaasunik suliniutissanik siunnersuuteqartassaaq, aamma meeqqat inuiaqatigiillu akornanni aporaaffiusunik aaqqiissuteqarnissamut imaluunniit pitsaaliuinissamut suliniutissanik siunnersuuteqartassalluni.
  Imm. 3.   Aammattaaq Meeqqat pillugit oqaaseqartartoq meeqqanut atugassarititaasut ineriartorteqqinneqarnerannut tunngatillugu ilisimasanik katersissaaq ingerlatitseqqittassallunilu, assersuutigalugu ilaqutariinnermut tunngasut, isumaginninnermut, peqqissutsimut, atuarnermut ineqarnermullu tunngasut. Taamatut aamma Meeqqat pillugit oqaaseqartartoq:
1)  Meeqqanut atugassarititaasut pillugit misissuisimanernut, nalunaarusiornernut, ilisimatusarnikkut angusanut, naliliineq pillugu nalunaarusianut, kisitsisitigut paasissutissanut, misileraanermi inernernut il.il. paasissutissanik piviusunik pioreersunik katersissaaq aaqqissuusseqqissaarnerlu isumagalugu.
2)  Meeqqanut atugassarititaasut pillugit paasissutissanik malinnaatitsisumik aaqqissuussissaaq aammalu meeqqanut atugassarititaasut pillugit ilisimasanik nutaanik ineriartortitseqqilluni.
3)  Meeqqanut atugassarititaasut pillugit ilisimasanik tamanut ingerlatitseqqissaaq, ilanngullugit makkununnga ilinniagaqartunut, ilisimatusartunut, suliamik ingerlatalinnut, politikerinut aammalu soqutiginnittunut allanut.
Imm. 4.   Meeqqat pillugit Oqaaseqartartuata sulineranut meeqqat akuliutsinneqassapput aamma § 8, imm. 2, nr. 1-6, tunngavigalugit suliniutit pillugit meeqqat sapinngisaq naapertorlugu tusarniarneqartassapput.

 

 

  § 9.  Meeqqat atugaannut aamma meeqqat pisinnaatitaaffiinut pingaaruteqartunik inatsisitigut suliniutinut allatigullu suliniutinut atatillugu Meeqqat pillugit oqaaseqartartoq tusarniarneqartassaaq.

 

  § 10.  Apeqqutini nalinginnaasuni tamani meeqqat atugaannut pingaaruteqartuni Inatsisartut, Naalakkersuisut pisortatigullu oqartussat allat Meeqqat pillugit oqaaseqartartoq isumasioqatigisinnaavaat.

 

Meeqqat pillugit oqaaseqartartup piginnaatitaaffii

 

  § 11.  Pissutsit Meeqqat pillugit oqaaseqartartup suliaqarfiinut attuumassuteqartut pillugit Meeqqat pillugit oqaaseqartartoq killilersorneqarnani oqaaseqarsinnaatitaavoq, taamaattorli takuuk § 19. Oqaaseqaatit kimut sammitinneqassanersut Meeqqat pillugit oqaaseqartartup nammineq aalajangertassavaa.
  Imm. 2.  Meeqqat pillugit oqaaseqartartoq namminerisaminik imaluunniit allat saaffiginnissuteqarnerisigut sulianik misissuisinnaallunilu qaqitsisinnaavoq. Meeqqat pingaarnersiuinermi salliunneqartassapput. Meeqqat pillugit oqaaseqartartup pissutsit meeqqanut ataasiakkaanut tunngassuteqartut pinnagit, pissutsit meeqqanut nalinginnaasumik tunngassuteqartut kisiisa oqaaseqarfigisinnaavai.
  Imm. 3.  Pisup suliarineqarnissaanut naammattumik pissutissaqarnersoq Meeqqat pillugit oqaaseqartartup nammineq aalajangissavaa.
  Imm. 4.  Meeqqat pillugit oqaaseqartartoq taamaallaat oqaaseqaateqarsinnaatitaavoq. Meeqqat pillugit oqaaseqartartoq aalajangiisinnaatitaanngilaq.

 

  § 12.  Pisortat namminersortullu meeqqanut paaqqinnittarfiinut aamma meeqqat pillugit peqatigiiffinnut kattuffinnullu il.il. tamanut Meeqqat pillugit oqaaseqartartoq kinaassutsimut uppernarsaatip takutinneratigut aammalu eqqartuussivimmit aalajangiisoqarnanilu killilersorneqarnani isersinnaatitaavoq.
  Imm. 2.  Pisortatigut oqartussat kiisalu pisortat namminersortullu meeqqanik paaqqinnittarfiutaat aamma peqatigiiffiit kattuffiillu meeqqat atugaat pillugit suliaqartut nipangiussisimasussaatitaagaluarlutik inatsit manna naapertorlugu Meeqqat pillugit oqaaseqartartup sulianik suliarinninnissaanut pisariaqartinneqartunik paasissutissanik Meeqqat pillugit oqaaseqartartumut ingerlatitseqqittussaapput, tassa ingerlateqqinneqartoq inatsimmut allamut akerliunngippat.
  Imm. 3.  Pisortatigut oqartussat suliffeqarfiillu imm. 2-mi, taaneqartut saniatigut allat nipangiussisimasussaatitaagaluarlutik Meeqqat pillugit oqaaseqartartup § 8, imm. 2, nr. 3 naapertorlugu sulianik suliarinninnissaanut pisariaqartinneqartunik paasissutissanik Meeqqat pillugit oqaaseqartartumut ingerlatitseqqittussaapput.
  Imm. 4.   Pisortatigut oqartussat aamma pisortat namminersortullu meeqqanik paaqqinnittarfiutaat kiisalu peqatigiiffiit kattuffiillu meeqqat atugaat pillugit suliaqartut, § 8, imm. 2, nr. 1-6-mi, taaneqartut iluanni suliat pillugit aalajangiinerit suliaqarfiillu nassuiaateqarfigissagaat Meeqqat pillugit oqaaseqartartup noqqaassutigisinnaavaa.

 

  § 13.  Meeqqat pillugit oqaaseqartartup allattoqarfimmi suleqataasut ilaata Meeqqat pillugit oqaaseqartartup suliaanik suliaqarallarnissaa aalajangersinnaavaa.

 

Meeqqat pillugit Siunnersuisoqatigiit suliassaat

 

  § 14.  Meeqqat pisinnaatitaaffiinik Sullissiviup suliassai inatsisitigut tunngavilikkat aallaavigalugit Meeqqat pisinnaatitaaffiinik Sullissiviup ukiumoortumik qitiutillugit suliassai suliniutissaalu Meeqqat pillugit Siunnersuisoqatigiinnit aalajangersarneqartassapput.
  Imm. 2.  Meeqqat pillugit suliaqarfimmi pilersaarutit ineriartortinnissaat, tassunga ilanngullugit pilersaarutit meeqqanut attaveqarnissamik oqaloqateqarnissamillu qulakkeerisut pillugit Meeqqat pillugit oqaaseqartartup suliaqartarnerani Meeqqat pillugit Siunnersuisoqatigiit ikiuuttassapput.
  Imm. 3.  Apeqqutini meeqqanut tunngassuteqartuni tamani Meeqqat pillugit oqaaseqartartup siunnersuinerani ilitsersuineranilu Meeqqat pillugit Siunnersuisoqatigiit ikiuuttassapput.

 

  § 15.  Meeqqat pillugit Siunnersuisoqatigiit ukiumut minnerpaamik 4-riarlutik ataatsimiittassapput.
  Imm. 2.   Aammattaaq ataatsimiittoqartassaaq, Meeqqat pillugit Siunnersuisoqatigiinni ilaasortat ikinnerpaamik 3-t Meeqqat pillugit oqaaseqartartumut saaffiginnillutik ataatsimiinnissamik piumasaqarpata.

  Imm. 3.  Meeqqat pillugit Siunnersuisoqatigiinni siulittaasoq aamma ilaasortat allat ikinnerpaamik 3-t ataatsimiinnermi najuuppata Meeqqat pillugit Siunnersuisoqatigiit aalajangiisinnaassuseqassapput.
  Imm. 4.  Meeqqat pillugit Siunnersuisoqatigiit suleriaasissartik pillugu nammineq aalajangersaassapput. Suleriaasissaq tamanut saqqummiunneqartassaaq.

 

  § 16.  Pisortatigut oqartussanik, pisortat namminersortullu suliffiutaannik aamma kattuffinnik peqatigiiffinnillu inassuteqarsinnaatitaasunik, kiisalu meeqqanut tunngasutigut soqutigisaqaqatigiinnik allanik Meeqqat pillugit Siunnersuisoqatigiit ukiumoortumik ataatsimeeqateqartassapput.
  Imm. 2.   Meeqqat pillugit Siunnersuisoqatigiit ingerlatsinerat pillugu Meeqqat pillugit Siunnersuisoqatigiit ukiut tamaasa allaganngorlugu nalunaarusiortassapput. Nalunaarusiaq tamanut saqqummiunneqartassaaq.

 

Allattoqarfik

 

  § 17.  Meeqqat pillugit oqaaseqartartumut aamma Meeqqat pillugit Siunnersuisoqatigiinnut allattoqarfimmik pilersitsisoqassaaq.
  Imm. 2.  Allattoqarfiup suliassarai allaffissornikkut suliassat aammalu Meeqqat pillugit oqaaseqartartoq Meeqqallu pillugit Siunnersuisoqatigiit sullittassallugit.
  Imm. 3.  Meeqqat pillugit oqaaseqartartoq allattoqarfimmi pisortamik atorfinitsitsissaaq. Meeqqat pillugit oqaaseqartartoq allattoqarfimmi pisortap qullersaraa.
  Imm. 4.  Allattoqarfimmi atorfillit atorfinitsitsinerni atugassarititaasuni aammalu suliffeqartitaanermi soraarnermilu pissutsinut tunngatillugu Kalaallit Nunaanni Namminersorlutik Oqartussat qitiusumik allattoqarfianni aalajangersakkat sukkulluunniit atuuttut ataaniipput.
  Imm. 5.  Imm. 2 naapertorlugu immikkut ittumik suliassat isumagitinnissaannut suliamik paasisimasallit avataaneersut atorneqarsinnaapput.

 

Kapitali 3

Suliamik suliarinninnermi malittarisassat

 

  § 18.  Pisortat ingerlatsineranni suliassat suliarineqartarnerat pillugu Inatsisartut inatsisaat toqqaannartumik Meeqqat pillugit Oqaaseqartartup sulianik suliarinninneranut atuutinngippat, inatsisartut inatsisaanni tunngaviit, taakkununnga ilanngullugit ingerlatsineq pillugu inatsiseqartitsinermi tunngaviit inatsisitigut aalajangersarneqarsimanngitsut, taamaaqataanik atuutissapput.

  Imm. 2.  Meeqqat pillugit Oqaaseqartartup saaffiginnissutit § 11, imm. 2 malillugu Meeqqat pillugit Oqaaseqartartumit tiguneqarsimasut itigartissinnaavai. Meeqqat pillugit Oqaaseqartartup taamatuttaaq suliassat Meeqqat pillugit Oqaaseqartartup suliaralugit ingerlatileruttugai unitsissinnaavai. Meeqqat pillugit Oqaaseqartartup saaffiginnissutinik itigartitsinera sulianillu Meeqqat pillugit Oqaaseqartartup nammineq piumassutsiminik suliarilersimanngisaanik unitsitsinera allakkatigut nalunaarutigineqassaaq tunngavilersorneqarsimassallunilu.

  Imm. 3.  Meeqqat pillugit Oqaaseqartartup saaffiginnissutinik itigartitsinera sulianillu unitsitsinera Naalakkersuisunut allaffissornikkulluunniit oqartussanut allanut naammagittaalliuutigineqarsinnaanngilaq. Tamanna aamma Meeqqat pillugit Oqaaseqartartup oqaaseqaataanut atuuppoq.

 

  § 19.  Meeqqat pillugit Oqaaseqartartoq, Meeqqat pillugit Siunnersuisoqatigiit allattoqarfillu pisortat ingerlatsineranni sulinermut malittarisassat atuuttut malillugit nipangiussisussaatitaapput.

 

Kapitali 4

Aningaasalersuineq

 

  § 20.  Meeqqat pisinnaatitaaffiinik sullissivik nunatta karsianit tapiissutinit aningaasalersorneqarpoq.
  Imm. 2.  Tamatuma saniatigut Meeqqat pisinnaatitaaffiinik sullissivik sulinerminut atatillugu pisortani oqartussanit allanit imaluunniit kattuffinnit, peqatigiiffinnit, suliffeqarfinnit il.il. namminersortunit aningaasaliiffigineqarnissamik qinnuteqarsinnaavoq.
  Imm. 3.  Meeqqat pisinnaatitaaffiinik sullissivik meeqqat pisinnaatitaaffiinik sullissiviup suliassaatut inatsisitigut aalajangersakkat iluanni sulianik isertitsissutaasunik ingerlatsisinnaavoq.

 

  § 21.  Meeqqat pillugit Siunnersuisoqatigiinnut ilaasortat Inatsisartunut Naalakkersuisunullu il.il.  ilaasortat aningaasarsiaqartitaanerat il.il. pillugit Inatsisartut inatsisaanni malittarisassat malillugit aningaasarsiaqarput, angalanermi ullormusiaqarput aammalu angalanermi aningaasartuutinut matussusiiffigineqassallutik. Aningaasartuutit taakkua nunatta karsiata ukiumoortumik tapiissutaannit akilerneqassapput.

 

Aningaasatigut missingersuutit aamma naatsorsuutit

 

  § 22.  Meeqqat pillugit Oqaaseqartartoq ukiut tamaasa ukiumut aningaasanut inatsiseqarfiusumut tulliuttumut missingersuutinik Naalakkersuisunut siunnersuuteqartassaaq. Siunnersuut isertitassatut aningaasartuutissatullu naatsorsuutigineqartunut missingiinernik imaqassaaq. Meeqqat pillugit Oqaaseqartartoq peqatigitillugu ukiumut aningaasanut inatsiseqarfiusumut taaneqartumut nunatta karsiata tapiissutaasa annertussusissaannut siunnersuuteqassaaq.
  Imm. 2.  Ukiumut aningaasanut inatsiseqarfiusumut tullermut missingersuutinut siunnersuutit kiisalu nunatta karsiata tapiissutaasa annertussusissaannut siunnersuutip tunniunneqarnissaannut piffissamik Naalakkersuisut aalajangersaassapput.

 

  § 23.  Meeqqat pisinnaatitaaffiinik sullissiviup ukiuata naatsorsuuteqarfiup ukioq aningaasanut inatsiseqarfiusoq malippaa. Ukiumoortumik naatsorsuutit kukkunersiuisumit naalagaaffimmit akuerisamit kukkunersiorneqassapput.

 

  § 24.  Meeqqat pillugit oqaaseqartartup, Naalakkersuisut piffissaliussaata iluani, ukiumut naatsorsuutit kukkunersiorneqarsimasut, kukkunersiuisup oqaaseqaataanik ilanngussartallit, Naalakkersuisunut akuerisassanngortillugit saqqummiutissavai.

 

Kapitali 5

Atortuulersitsineq ikaarsaariarnermilu aalajangersakkat

 

  § 25.  Inatsisartut inatsisaat manna ulloq 1. marts 2012-mi atortuulersinneqassaaq.
  Imm. 2.  Peqatigisaanik Meeqqat Inuusuttullu Pillugit Ilisimasaqarfik pillugu Inatsisartut inatsisaat nr. 26, 18. december 2003-meersoq atorunnaarsinneqarpoq.
  Imm. 3.  Meeqqat Inuusuttullu suliassaat pillugit ilisimasanik katersivik ingerlaannassaaq, soorlu tamanna Meeqqat pisinnaatitaaffiinik Sullissiviup allattoqarfiani Meeqqat Inuusuttullu Siulersuisui pillugit ilisimasanik katersivimmi aalajangerneqarsimasutut, Meeqqat pisinnaatitaaffiinik Sullissiviup ukiumoortumik qitiutillugit sammisassai aammalu suliniuteqarfissai Meeqqat pillugit Siunnersuisoqatigiinnit aalajangerneqarnissaasa tungaanut, takuuk § 14, imm. 1.”

 

§ 2

 

Inuit Innarluutillit illersuisuat pillugu Inatsisartut inatsisaanni nr. 1, 29. maj 2017-imeersumi ima allannguisoqarpoq:

 

1.  Inatsisartut inatsisaat imatut taaguuserneqassaaq:

” Inuit Innarluutillit Oqaaseqartartuat pillugu Inatsisartut inatsisaat”.

 

2. Inuit Innarluutillit Oqaaseqartartuat pillugu Inatsisartut inatsisaat imatut oqaasertalerneqassaaq:

 

 

”Kapitali 1
Siunertaq

 

  § 1.  Inatsisartut inatsisaanni matumani inuiaqatigiinni innarluutillit pisinnaatitaaffiisa soqutigisaasalu iluaquserneqarnissaat siunertaavoq.
  Imm. 2.   Inatsisartut inatsisaanni Inuit innarluutillit pisinnaatitaaffii pillugit Naalagaaffiit Peqatigiit Isumaqatigiissutaat tunngavigineqarpoq.

Kapitali 2
Innarluutillit Oqaaseqartartoqarfiat

 

  § 2.  Innarluutillit Oqaaseqartartoqarfiat tassaavoq Inuit Innarluutillit pillugit Oqaaseqartartoq allattoqarfialu.
  Imm. 2.  Innarluutillit Oqaaseqartartoqarfiat Namminersorlutik Oqartussat ataanni sullissiviuvoq naalakkersuinikkut pituttorsimanngitsoq. Sullissivik Inuit Innarluutillit pillugit Oqaaseqartartumit aqunneqassaaq.

Inuit Innarluutillit pillugit oqaaseqartartoq

 

  § 3.  Inuit Innarluutillit pillugit oqaaseqartartoq Naalakkersuisunit toqqarneqassaaq.

  Imm. 2.  Inuit Innarluutillit pillugit oqaaseqartartoq piffissami ukiunut 3-nut killissaleriikkamik toqqarneqassaaq. Ataasiarluni toqqarneqaqqissinnaavoq. Inuit Innarluutillit pillugit oqaaseqartartoq manna tikillugu oqaaseqartartuusimasup tunuartinneqarneranut atatillugu Inuit Innarluutillit pillugit oqaaseqartartussamik nutaamik toqqaasoqartillugu, takuuk imm. 3, ukiut 3-t iluanni piffissami sinneruttumi Inuit Innarluutillit pillugit oqaaseqartartoq nutaaq toqqarneqassaaq.
  Imm. 3.  Inuit Innarluutillit pillugit oqaaseqartartoq piffissami ukiut 3-t iluanni Naalakkersuisunit tunuartinneqarsinnaavoq, tamatumunnga pissutaasinnaasut ataaseq arlallilluunniit ataani taaneqartut naammassineqarsimappata:
1) Inatsisartut inatsisaat manna malillugu Inuit Innarluutillit pillugit oqaaseqartartup suliassaasa suliarineqarnerat Inuit Innarluutillit pillugit oqaaseqartartumit annertuumik sumiginnarneqarsimappata.
2) Inuit Innarluutillit pillugit oqaaseqartartoq iliuuseqarsimappat Inuit Innarluutillit pillugit oqaaseqartartup Inatsisartut inatsisaannut tunngatillugu suliassaasa Inuit Innarluutillit pillugit oqaaseqartartumit isumannaatsumik suliarineqarnissaannik nalornisitsilersumik.

Inuit Innarluutillit pillugit oqaaseqartartup suliassai

 

  § 4.  Inuit Innarluutillit pillugit oqaaseqartartup inuit innarluutillit pisinnaatitaaffiisa soqutigisaasalu qulakkeernissaat iluaqusernissaallu suliarissavai kiisalu inuiaqatigiinni innarluutillit atugaannik qitiutitsillunilu paasissutissiisassaaq.

  Imm. 2.  Pingaartumik Inuit Innarluutillit pillugit oqaaseqartartoq:
1) Inuit innarluutillit pisinnaatitaaffii naammagittaalliuteqarsinnaanerilu pillugit siunnersuillunilu ilitsersuisassaaq.
2) Inuit innarluutillit atugaat, pisinnaatitaaffii naammagittaalliuteqarsinnaanerilu pillugit apeqqutinut tunngassuteqartunik, pisortani oqartussanut, pisortat namminersortullu suliffiinut kiisalu kattuffinnut peqatigiiffinnullu il.il. siunnersuillunilu ilitsersuisassaaq.

3) Inuiaqatigiinni inuit innarluutillit pillugit ilisimasat annertusarnissaat sulissutigissavaa, issuagaannarpalaartut, paqumigineqartut, isummat pigiliutiinnakkat kiisalu inunnut innarluutilinnut tunngatillugu akornutaasumik iliuutsit akiorniassallugit.
4) Inuit innarluutillit Pisinnaatitaaffii pillugit Naalagaaffiit Peqatigiit Isumaqatigiissutaannut tunngatillugu Kalaallit Nunaata inatsisitigut atuutsitsinikkullu pisussaaffii naapertuunnersut nalilersuiffigisassavai.
5)  Inuit innarluutillit pillugit paassissutissanik ingerlatitseqqittassalluni, tamat oqallinneranni sinnerlugit oqaaseqartassalluni kiisalu inuit innarluutillit oqallinnermi peqataanissaannut periarfissaasa pitsaanerulernissaannik sulissuteqartassalluni inuiaqatigiinnilu ineriartornermik sunniuteqartassalluni.

6) Inuit innarluutillit inatsisitigut illersugaanerannik patajaallisaataasunik, inuillu innarluutillit inuiaqatigiillu akornanni aporaaffiusunik aaqqiissuteqarnissamut pitsaaliuinissamulluunniit suliniutissanik siunnersuuteqartassaaq.
  Imm. 3.  Inuit Innarluutillit pillugit oqaaseqartartoq aamma inuit innarluutillit atugaat pillugit ilisimasanik katersissaaq, ineriartortitsilluni ingerlatitseqqittassallunilu. Matumani Inuit Innarluutillit pillugit oqaaseqartartoq:
1)  Inuit innarluutillit atugaat pillugit aamma pioreersunik misissuisimanerit, nalunaarusiornerit, ilisimatusarnikkut angusat, nalilersuilluni nalunaarusiat, kisitsisit atorlugit nassuiaasiornerit, misileraanermi inernerit aamma najoqqutassanik assingusunik katersinerit aamma paasissutissanik attuumassuteqartunik aaqqissuusseqqissaarnernik isumaginnissaaq.
2) Inuit innarluutillit atugaat pillugit paasissutissanik malinnaatitsisumik aaqqissuussineq aammalu atugaat pillugit ilisimasanik nutaanik ineriartortitsissaaq.

3) Inuit innarluutillit atugaat pillugit ilisimasanik tamanut ingerlatitseqqittassaaq, matumani ilaatigut ilinniartut, ilisimatuut, ilinniarsimallutik sulisut, politikerit aamma soqutiginnittut allat ilanngullugit.
  Imm. 4.  Inuit Innarluutillit pillugit oqaaseqartartup sulinerani inuit innarluutillit aamma innarluutilinni suliassaqarfimmi soqutigisaqaqatigiit akuliutsinneqassapput aamma suliniutit pillugit tusarniarneqassapput pisinnaasat, attuumassuteqarneq ajornanngippallu imm. 2, nr. 1-6, naapertorlugit.

 

  § 5.  Inuit innarluutillit atugaannut pisinnaatitaaffiinullu pingaaruteqartunik inatsisitigut suliniutinut allatigullu suliniutinut atatillugu Inuit Innarluutillit pillugit oqaaseqartartoq tusarniarneqartassaaq.

 

  § 6. Inuit innarluutillit atugaannut pingaaruteqartuni apeqqutini nalinginnaasuni tamani, Inatsisartut, Naalakkersuisut aamma pisortani oqartussat allat Inuit Innarluutillit pillugit oqaaseqartartoq isumasioqatigisinnaavaat.

 

  § 7.  Inuit Innarluutillit pillugit oqaaseqartartoq ukiumoortumik pisortani oqartussanik attuumassuteqartunik, pisortat namminersortullu suliffeqarfiinik, kattuffinnik peqatigiiffinnillu il.il. kiisalu innarluutilinni suliassaqarfimmi soqutigisaqaqatigiinnik allanik ataatsimiititsisassaaq.

    Imm. 2.  Inuit Innarluutillit pillugit oqaaseqartartoq nunatta karsianit ukiumoortumik tapiissutit iluanni peqatigiiffinnut namminersortunut, suliffeqarfinnut kattuffinnullu ukiumoortumik ataatsimiinnermut atatillugu angalanernut ineqarnernullu aningaasartuutinut tamakkiisumik ilaannakortumilluunniit matussutissanik tapiisassaaq.

 

  § 8.  Inuit Innarluutillit pillugit oqaaseqartartoq ukiut tamaasa suliffeqarfini pillugu ukiumoortumik allaganngorlugu nalunaarusiortassaaq. Nalunaarusiaq Inuit Innarluutillit pillugit oqaaseqartartuata nittartagaani tamanut saqqummiunneqartassaaq. Nalunaarusiaq, saqqummiussineq ilutigalugu, Naalakkersuisunut, Inatsisartunut kommuninullu nassiunneqartassaaq.

 

Inuit Innarluutillit pillugit oqaaseqartartup piginnaatitaaneri

 

  § 9.  Inuit Innarluutillit pillugit oqaaseqartartoq piginnaatitaavoq Inuit Innarluutillit pillugit oqaaseqartartup suliaqarfiinut pissutsit attuumassuteqartut pillugit killilersorneqarnani oqaaseqarsinnaanermut, taamaattorli § 14 takuuk. Oqaaseqaatit kimut sammitinneqassanersut Inuit Innarluutillit pillugit oqaaseqartartup nammineq aalajangertassavaa.
  Imm. 2.  Inuit Innarluutillit pillugit oqaaseqartartup namminerisaminik imaluunniit allat saaffiginnissuteqarnerisigut sulianik misissuisinnaallunilu qaqitsisinnaavoq. Inuit innarluutillit pingaarnersiuinermi salliusassapput.

  Imm. 3.  Inuit Innarluutillit pillugit oqaaseqartartoq taamaallaat pissutsit, inuit innarluutillit pillugit nalinginnaasumik imaqartunik oqaaseqarsinnaavoq, imaanngitsoq, inummut innarluutilimmut ataatsimut pissutsinik imaqartunik.

  Imm. 4.  Pisup suliarineqarnissaanut naammattumik pissutissaqarnersoq Inuit Innarluutillit pillugit oqaaseqartartup nammineq aalajangissavaa.

  Imm. 5.  Inuit Innarluutillit pillugit oqaaseqartartoq taamaallaat oqaaseqaateqarsinnaatitaavoq. Inuit Innarluutillit pillugit oqaaseqartartoq aalajangiisinnaatitaanngilaq.

 

  § 10.  Inuit Innarluutillit pillugit oqaaseqartartoq kinaassutsimik uppernarsaatinik takutitsinermigut aamma eqqartuussivimmit akuersiffigineqarnanilu killilersorneqarnani, inuit innarluutillit najugaanut imaluunniit uninngaarfiinut, sungiusarfiinut, suliffiinut assigisaannullu isersinnaatitaavoq.

  Imm. 2.  Pisortani oqartussat, inuit innarluutillit atugaannik suliaqartut, aamma pisortat suliffeqarfiutaat, inunnit innarluutilinnit najugaqarfigineqartut uninngaffigineqartulluunniit imaluunniit sungiusarfigineqartartut, suliffigineqartut assigisaalluunniit, nipangiussisimasussaatitaagaluartut inatsit manna naapertorlugu paasissutissanik Inuit Innarluutillit pillugit oqaaseqartartumut ingerlatseqqittussaapput, Inuit Innarluutillit pillugit oqaaseqartartup sulianik suliarinninnissaanut pisariaqartinneqartunik, inatsimmut allamut akerliunngippat.

  Imm. 3.  Inuit Innarluutillit pillugit oqaaseqartartoq pisortani oqartussanut aamma pisortat suliffeqarfiinut inuit innarluutillit atugaat pillugit suliaqartunut qinnuteqarsinnaavoq, § 4, imm. 2, nr. 1-6-imut, taaneqartut iluanni aalajangiinerit, aalajangernerit aamma suliassaqarfinni suleriaatsit pillugit nalunaajaaqqullugit.

  Imm. 4.  Inuit Innarluutillit pillugit oqaaseqartartoq imm. 1 naapertorlugu piginnaatitaanini allanut tunniussinnaanngilaa, taamaattoq § 11 takuuk.

 

  § 11.  Inuit Innarluutillit pillugit oqaaseqartartoq allattoqarfimmi sulisup Inuit Innarluutillit pillugit oqaaseqartartup suliaanik suliaqarallarnissaa aalajangersinnaavaa.

  Imm. 2.  Allattoqarfimmi sulisoq, Inuit Innarluutillit pillugit oqaaseqartartup suliaanik suliaqarallartoq, suliassinneqarnermi kinguneranik § 10 naapertorlugu suliassanik aamma tigusisinnaavoq.

Allattoqarfik

 

  § 12.  Inuit Innarluutillit pillugit oqaaseqartartumut allattoqarfimmik pilersitsisoqassaaq.

  Imm. 2.  Allattoqarfiup suliassarai Inuit Innarluutillit pillugit oqaaseqartartumut allaffissorneq sullissinerlu.

  Imm. 3.  Inuit Innarluutillit pillugit oqaaseqartartoq allattoqarfimmi suleqatinik atorfinitsitsissaaq ulluinnarnilu pisortamik toqqaassalluni. Ulluinnarni Inuit Innarluutillit pillugit oqaaseqartartoq pisortap qullersaraa.

  Imm. 4.  Allattoqarfimmi atorfillit atorfinitsitsinerni atugassarititaasuni aammalu suliffeqartitaanermi soraarnermilu pissutsinut tunngatillugu Kalaallit Nunaanni Namminersorlutik Oqartussat qitiusumik allattoqarfianni aalajangersakkat sukkulluunniit atuuttut ataaniipput.

  Imm. 5.  Suliamik paasisimasalinnik killilimmik piffissalikkamik atugassaqartitaasumik imm. 2 naapertorlugu sulianut aalajangersimasunut suliarinnittussanik atorfinitsitsisoqarsinnaavoq.

Kapitali 3
Suliamik suliarinninnermi malittarisassat

 

  § 13.  Pisortat ingerlatsineranni suliassat suliarineqartarnerat pillugu Inatsisartut inatsisaat toqqaannartumik Inuit Innarluutillit pillugit Oqaaseqartartup sulianik suliarinninneranut atuutinngippat, inatsisartut inatsisaanni tunngaviit, taakkununnga ilanngullugit ingerlatsineq pillugu inatsiseqartitsinermi tunngaviit inatsisitigut aalajangersarneqarsimanngitsut, taamaaqataanik atuutissapput.
  Imm. 2.  Inuit Innarluutillit pillugit Oqaaseqartartup suliassat Innarluutillit pillugit Oqaaseqartartup suliaralugit ingerlatileruttugai unitsissinnaavai. Inuit Innarluutillit pillugit Oqaaseqartartup saaffiginnissutinik itigartitsinera sulianillu Inuit Innarluutillit pillugit Oqaaseqartartup nammineq piumassutsiminik suliarilersimanngisaanik unitsitsinera allakkatigut nalunaarutigineqassaaq tunngavilersorneqarsimassallunilu.
  Imm. 3.  Inuit Innarluutillit pillugit Oqaaseqartartup saaffiginnissutinik itigartitsinera sulianillu unitsitsinera Naalakkersuisunut allaffissornikkulluunniit oqartussanut allanut naammagittaalliuutigineqarsinnaanngilaq. Tamanna aamma Innarluutillit pillugit Oqaaseqartartup oqaaseqaataanut atuuppoq.

 

  § 14.  Inuit Innarluutillit pillugit Oqaaseqartartoq allattoqarfillu pisortat ingerlatsineranni sulinermut malittarisassat atuuttut malillugit nipangiussisussaatitaapput.

Kapitali 4
Aningaasalersuineq

 

  § 15.  Innarluutillit Oqaaseqartartoqarfiat nunatta karsianit tapiissutinit aningaasalersorneqarpoq.
  Imm. 2.  Tamatuma saniatigut Innarluutillit Oqaaseqartartoqarfiat sulinerminut atatillugu pisortani oqartussanit allanit imaluunniit kattuffinnit, peqatigiiffinnit, suliffeqarfinnit il.il. namminersortunit aningaasaliiffigineqarnissamik qinnuteqarsinnaavoq.
  Imm. 3.  Innarluutillit Oqaaseqartartoqarfiat suliassat inatsisitigut aalajangersakkat iluanni sulianik isertitsissutaasunik ingerlatsisinnaavoq. Isertitat Innarluutillit Oqaaseqartartoqarfiata suliassaatut inatsisitigut aalajangersarneqarsimasut naammassinninnissaannut ilaassapput.

Missingersuutit naatsorsuutillu

 

  § 16.  Inuit Innarluutillit pillugit Oqaaseqartartoq ukiut tamaasa ukiumut aningaasanut inatsiseqarfiusumut tulliuttumut missingersuutinik Naalakkersuisunut siunnersuuteqartassaaq. Siunnersuut isertitassatut aningaasartuutissatullu naatsorsuutigineqartunut missingiinernik imaqassaaq. Inuit Innarluutillit pillugit Oqaaseqartartoq peqatigitillugu ukiumut aningaasanut inatsiseqarfiusumut taaneqartumut nunatta karsiata tapiissutaasa annertussusissaannut siunnersuuteqassaaq.
  Imm. 2.  Ukiumut aningaasanut inatsiseqarfiusumut tullermut missingersuutinut siunnersuutit kiisalu nunatta karsiata tapiissutaasa annertussusissaannut siunnersuutip tunniunneqarnissaannut piffissamik Naalakkersuisut aalajangersaassapput.

 

  § 17.  Inuit Innarluutillit pillugu Oqaaseqartartup ukiuata naatsorsuuteqarfiup ukioq aningaasanut inatsiseqarfiusoq malippaa. Ukiumoortumik naatsorsuutit kukkunersiuisumit nunatta karsiata naatsorsuutaanik kukkunersiuisumit kukkunersiorneqassapput.

 

  § 18.  Inuit Innarluutillit pillugit oqaaseqartartup, Naalakkersuisut piffissaliussaata iluani, ukiumut naatsorsuutit kukkunersiorneqarsimasut, kukkunersiuisup oqaaseqaataanik ilanngussartallit, Naalakkersuisunut akuerisassanngortillugit saqqummiutissavai.

Kapitali 5
Atortuulersitsineq

 

  § 19.  Inatsisartut inatsisaat manna ulloq 1. juni 2017 atortuulersinneqassaaq.”

 

§ 3

 

Utoqqaat illersuisuat pillugu Inatsisartut inatsisaanni nr. 37, 28. november 2019-imeersumi Utoqqaat illersuisuat pillugu Inatsisartut inatsisaata allanngortinnissaa pillugu Inatsisartut inatsisaannit nr. 14, 1. december 2021-meersumit allanngortinneqartumi ima allannguisoqarpoq:

 

1.  Inatsisartut inatsisaat imatut taaguuserneqassaaq:

” Utoqqaat Oqaaseqartartuat pillugu Inatsisartut inatsisaat”.

 

2.  Utoqqaat Oqaaseqartartuat pillugu Inatsisartut inatsisaat imatut oqaasertalerneqassaaq:

 

 

”Kapitali 1

Siunertaq

 

  § 1.  Inatsisartut inatsisaanni matumani inuiaqatigiinni utoqqarnut atugassarititaasut soqutigisaasalu iluaquserneqarnissaat siunertaavoq.

 

Kapitali 2
Utoqqaat Oqaaseqartartoqarfiat

 

  § 2.  Utoqqaat Oqaaseqartartoqarfiat tassaavoq Utoqqaat pillugit Oqaaseqartartoq allattoqarfialu. Sullissivik Inuit Innarluutillit pillugit Oqaaseqartartumit aqunneqassaaq.
  Imm. 2.  Utoqqaat pillugit Oqaaseqartartoq sulinermini naalakkersuinikkut pituttorsimanngilaq.

 

Utoqqaat pillugit oqaaseqartartoq

 

  § 3.  Utoqqaat pillugit oqaaseqartartoq Naalakkersuisunit toqqarneqassaaq.

  Imm. 2.  Utoqqaat pillugit oqaaseqartartoq piffissami ukiunut 3-nut killissaleriikkamik toqqarneqassaaq. Toqqaaqqittoqarsinnaavoq.

  Imm. 3.  Utoqqaat pillugit oqaaseqartartoq piffissami ukiut 3-t iluanni Naalakkersuisunit tunuartinneqarsinnaavoq, tamatumunnga pissutaasinnaasut ataaseq arlallilluunniit ataani taaneqartut naammassineqarsimappata:

1)  Inatsisartut inatsisaat manna malillugu Utoqqaat pillugit oqaaseqartartup suliassaasa suliarineqarnerat Utoqqaat pillugit oqaaseqartartumit annertuumik sumiginnarneqarsimappata.

2)  Utoqqaat pillugit oqaaseqartartoq iliuuseqarsimappat Utoqqaat pillugit oqaaseqartartup Inatsisartut inatsisaannut tunngatillugu suliassaasa Utoqqaat pillugit oqaaseqartartumit isumannaatsumik suliarineqarnissaannik nalornisitsilersumik.

  Imm. 4.  Utoqqaat pillugit oqaaseqartartup manna tikillugu oqaaseqartartuusimasup tunuartinneqarneranut atatillugu Utoqqaat pillugit oqaaseqartartumik nutaamik toqqaasoqartillugu, takuuk imm. 3, ukiut 3-t iluanni piffissami sinneruttumi Utoqqaat pillugit oqaaseqartartoq nutaaq toqqarneqassaaq.

Utoqqaat pillugit oqaaseqartartup suliassai

 

  § 4.  Utoqqaat pillugit oqaaseqartartup utoqqaat periarfissaasa soqutigisaasalu qulakkeernissaat iluaqusernissaallu suliarissavai kiisalu utoqqaat atugaannik qitiutitsillunilu paasissutissiisassaaq.

  Imm. 2.  Pingaartumik Utoqqaat pillugit oqaaseqartartoq:

1)  Utoqqaat atugaat periarfissaallu pillugit utoqqarnut siunnersuillunilu ilitsersuisassaaq.

2)  Utoqqaat atugaat pillugit apeqqutinut tunngassuteqartunik, pisortani oqartussanut, pisortat namminersortullu suliffiinut kiisalu kattuffinnut peqatigiiffinnullu il.il. siunnersuillunilu ilitsersuisassaaq.
3)  Inuiaqatigiinni utoqqaat, atugaallu pillugit inuiaqatigiinni ilisimasat annertusarnissaat pillugit sulissuteqassaaq.

4)  Utoqqaat pillugit paasissutissanik ingerlatitseqqittassaaq, tamat oqallinneranni sinnerlugit oqaaseqartassalluni kiisalu utoqqaat oqallinnermi peqataanissaannut periarfissaasa pitsaanerulernissaannik sulissuteqartassalluni inuiaqatigiinnilu ineriartornermik sunniuteqartassaaq.

5)  Utoqqaat atugaannik periarfissaannillu patajaallisaataasunik suliniutissanik siunnersuuteqartassaaq.

  Imm. 3.  Kommuninit kattuffinniillu utoqqaat sinniisui utoqqarnik sullissisut, Utoqqaat pillugit oqaaseqartartup sulineranut naleqquttumik periarfissaqarnerlu aallaavigalugit imm. 2, nr. 1-5, malillugit peqataatinneqartassapput.

 

  § 5.  Utoqqaat atugaannut pingaaruteqartunik inatsisitigut suliniutinut allatigullu suliniutinut atatillugu Utoqqaat pillugit oqaaseqartartoq tusarniarneqartassaaq.

 

  § 6.  Utoqqaat atugaannut pingaaruteqartuni apeqqutini nalinginnaasuni Inatsisartut, Naalakkersuisut aamma pisortani oqartussat allat Utoqqaat pillugit oqaaseqartartoq peqatigalugu isumasiuisinnaapput.

 

  § 7.  Utoqqaat pillugit oqaaseqartartoq ukiut tamaasa suliffeqarfini pillugu ukiumoortumik allaganngorlugu nalunaarusiortassaaq.

  Imm. 2.  Nalunaarusiaq Utoqqaat pillugit oqaaseqartartup nittartagaani tamanut saqqummiunneqartassaaq.

  Imm. 3.  Nalunaarusiaq, saqqummiussineq ilutigalugu, Naalakkersuisunut, Inatsisartunut kommuninullu nassiunneqartassaaq.

 

Utoqqaat pillugit oqaaseqartartup piginnaatitaaneri

 

  § 8.  Utoqqaat pillugit oqaaseqartartoq piginnaatitaavoq Utoqqaat pillugit oqaaseqartartup suliaqarfiinut pissutsit attuumassuteqartut pillugit killilersorneqarnani oqaaseqarsinnaanermut, taamaattorli takuuk § 11. Oqaaseqaatit kimut sammitinneqassanersut Utoqqaat pillugit oqaaseqartartup nammineq aalajangertassavaa.

  Imm. 2.  Utoqqaat pillugit oqaaseqartartup pissutsit utoqqarnut ataasiakkaanut tunngassuteqartut pinnagit, pissutsit utoqqarnut nalinginnaasumik tunngassuteqartut kisiisa oqaaseqarfigisinnaavai.

  Imm. 3.  Utoqqaat pillugit oqaaseqartartoq taamaallaat oqaaseqaateqarsinnaatitaavoq. Utoqqaat pillugit oqaaseqartartoq aalajangiisinnaatitaanngilaq.

 

Allattoqarfik

 

  § 9.  Utoqqaat pillugit oqaaseqartartumut allattoqarfimmik pilersitsisoqassaaq.

  Imm. 2.  Allattoqarfik aqutsinermi allaffissornikkut suliaqassaaq aamma suliamut tunngasunik Utoqqaat pillugit oqaaseqartartumut ikiuuttassalluni.
  Imm. 3.  Utoqqaat pillugit oqaaseqartartoq allattoqarfimmi suleqatissamik atorfinitsitsissaaq ulluinnarni allattoqarfiup atuunnera isumagisassaralugu.

  Imm. 4.  Suliamik paasisimasalinnik killimmik piffissalikkamik atugassaqartitaasumik sulianut aalajangersimasunut suliarinnittussanik atorfinitsitsisoqarsinnaavoq.

  Imm. 5.  Allattoqarfimmi atorfillit atorfinitsitsinerni atugassarititaasuni aammalu suliffeqartitaanermi soraarnermilu pissutsinut tunngatillugu Kalaallit Nunaanni Namminersorlutik Oqartussat qitiusumik allattoqarfianni aalajangersakkat sukkulluunniit atuuttut ataaniipput.

Kapitali 3
Suliamik suliarinninnermi malittarisassat

 

 § 10.  Pisortat ingerlatsineranni suliassat suliarineqartarnerat pillugu Inatsisartut inatsisaat toqqaannartumik Utoqqaat pillugit Oqaaseqartartup sulianik suliarinninneranut atuutinngippat, inatsisartut inatsisaanni tunngaviit, ingerlatsinerlu pillugit inatsiseqartitsinermi tunngaviit inatsisitigut aalajangersarneqarsimanngitsut, taamaaqataanik atuutissapput.
  Imm. 2.  Utoqqaat pillugit Oqaaseqartartup saaffiginnissutit itigartissinnaavai suliassallu Utoqqaat pillugit Oqaaseqartartup suliaralugit ingerlatileruttugai unitsissinnaallugit.
  Imm. 3.  Utoqqaat pillugit Oqaaseqartartup saaffiginnissutinik itigartitsinera sulianillu, Utoqqaat pillugit Oqaaseqartartup nammineq piumassutsiminik suliarilersimanngisaanik, unitsitsinera allakkatigut nalunaarutigineqartassaaq tunngavilersorneqarsimassallunilu.
  Imm. 4.  Utoqqaat pillugit Oqaaseqartartup saaffiginnissutinik itigartitsinera sulianillu unitsitsinera Naalakkersuisunut allaffissornikkulluunniit oqartussanut allanut naammagittaalliuutigineqarsinnaanngilaq. Tamanna aamma Utoqqaat pillugit Oqaaseqartartup oqaaseqaataanut atuuppoq.

 

  § 11.  Utoqqaat pillugit Oqaaseqartartoq allattoqarfillu, takuuk § 9, pisortat ingerlatsineranni sulinermut malittarisassat atuuttut malillugit nipangiussisussaatitaapput.

Kapitali 4
Aningaasalersuineq

 

 § 12.  Utoqqaat Oqaaseqartartoqarfiat nunatta karsianit tapiissutinit aningaasalersorneqarpoq.
  Imm. 2.  Utoqqaat pillugit Oqaaseqartartoq sulinerminut atatillugu pisortani oqartussanit allanit imaluunniit kattuffinnit, peqatigiiffinnit, suliffeqarfinnit il.il. namminersortunit aningaasaliiffigineqarnissamik qinnuteqarsinnaavoq.
  Imm. 3.  Utoqqaat pillugit Oqaaseqartartoq suliassat inatsisit aalajangersakkat iluanni sulianik isertitsissutaasunik ingerlatsisinnaavoq. Isertitat Utoqqaat pillugit Oqaaseqartartup suliassaatut inatsisitigut aalajangersarneqarsimasut naammassinninnissaanut ilaassapput.

Missingersuutit naatsorsuutillu

 

  § 13.  Utoqqaat pillugit Oqaaseqartartoq ukiut tamaasa ukiumut aningaasanut inatsiseqarfiusumut tulliuttumut missingersuutinik Naalakkersuisunut siunnersuuteqartassaaq. Siunnersuut isertitassatut aningaasartuutissatullu naatsorsuutigineqartunut missingiinernik imaqassaaq. Utoqqaat pillugit Oqaaseqartartoq peqatigitillugu ukiumut aningaasanut inatsiseqarfiusumut taaneqartumut nunatta karsiata tapiissutaasa annertussusissaannut siunnersuuteqassaaq.
  Imm. 2.  Ukiumut aningaasanut inatsiseqarfiusumut tullermut missingersuutinut siunnersuutit kiisalu nunatta karsiata tapiissutaasa annertussusissaannut siunnersuutip tunniunneqarnissaannut piffissamik Naalakkersuisut aalajangersaassapput.

 

  § 14.  Utoqqaat pillugit Oqaaseqartartup ukiuata naatsorsuuteqarfiup ukioq aningaasanut inatsiseqarfiusoq malippaa.
  Imm. 2.  Ukiumoortumik naatsorsuutit kukkunersiuisumit nunatta karsiata naatsorsuutaanik kukkunersiuisumit kukkunersiorneqassapput.

 

  § 15.  Utoqqaat pillugit oqaaseqartartup ukiumut naatsorsuutit kukkunersiorneqarsimasut, kukkunersiuisup oqaaseqaataanik ilanngussartallit, Naalakkersuisunut akuerisassanngortillugit saqqummiutissavai.

  Imm. 2.  Naalakkersuisut saqqummiussinissamut piffissaliissapput, takuuk imm. 1.

 

Kapitali 5
Atortuulersitsineq

 

  § 16.  Inatsisartut inatsisaat manna ulloq 1. januar 2020-mi atortuulersinneqassaaq.”

 

§ 4

 

Isumaginninnermik suliassaqarfimmi pissaanermik atuineq pillugu Inatsisartut inatsisaanni nr. 8, 20. juuni 2022-meersumi ima allannguisoqarpoq:

 

1. § 26, imm. 2, imatut oqaasertalerneqassaaq:

” Imm. 2.  Ukunannga nakkutigisaanngitsumik allaffigeqattaannerit pulaarneqarnerillu meeqqap pisinnaatitaaffigaa:

1)  inissinneqarsimasup kommunimi najugaqarfigisaani aamma kommunimi angerlarsimaffigisaani kommunalbestyrelsini ilaasortanit,

2)  Naalakkersuisuni ilaasortanit,
3)  Inatsisartuni ilaasortanit,
4)  pisortani oqartussanit allanit
5)  eqqartuussivimmit, 
6)  unnerluussisussaatitaasunit, 
7)  politiinit,
8)  meeqqap illersuisuanit, 
9)  meeqqap meeqqatut illersuisuanit,
10)  Inatsisartut Ombudsmandianit, 
11)  Folketingip Ombudsmandianit, 
12)  Europami Inuit pisinnaatitaaffii pillugit eqqartuussivianit, 
13)  Europami Naalliutsitsisarneq pillugu ataatsimiititaliamit, 
14)  Meeqqat pillugit oqaaseqartartumit, aamma
15)  Inuit Innarluutillit pillugit oqaaseqartartumit.”

2. § 60, imm. 2, imatut oqaasertalerneqassaaq:
”  Imm. 2.  Ukunannga nakkutigisaanngitsumik allaffigeqattaannerit pulaarneqarnerillu tigummigallagaasup pisinnaatitaaffigaa:

1)  inissinneqarsimasup kommunimi najugaqarfigisaani aamma kommunimi angerlarsimaffigisaani kommunalbestyrelsini ilaasortanit,

2)  Naalakkersuisuni ilaasortanit,
3)  Inatsisartuni ilaasortanit,
4)  eqqartuussivimmit, 
5)  unnerluussisussaatitaasunit, 
6)  politiinit,
7)  tigummigallarneqartup illersuisuanit, 
8)  tigummigallarneqartup meeqqatut illersuisuanit,
9)  Inatsisartut Ombudsmandianit, 
10)  Folketingip Ombudsmandianit, 
11)  Europami Inuit pisinnaatitaaffii pillugit eqqartuussivianit, 
12)  Europami Naalliutsitsisarneq pillugu ataatsimiititaliamit, 
13)  Utoqqaat pillugit oqaaseqartartumit, aamma
14)  Inuit Innarluutillit pillugit oqaaseqartartumit.”

 

§ 5

 

Inuit Pisinnaatitaaffii pillugit Siunnersuisoqatigiit pillugit Inatsisartut inatsisaanni nr. 20, 27. november 2018-imeersumi ima allannguisoqarpoq:

 

1. § 3, imm. 2, imatut oqaasertalerneqassaaq:

”  Imm. 2.  Tulliullugit taaneqartut Inuit Pisinnaatitaaffii pillugit Siunnersuisoqatigiinni aalajangersimasumik ilaasortaapput:

1)  Meeqqat pillugit oqaaseqartartoq,

2)  Inuit Innarluutillit pillugit oqaaseqartartoq, aamma

3)  Naligiissitaanissamut Siunnersuisoqatigiit siulittaasuat.”

 

§ 6

 

Inatsisartut inatsisaata nalunaarutigineqareernerata aqaguani inatsit atortuulersinneqassaaq.

 

 

Namminersorlutik Oqartussat, ulloq 13. juuni 2023

 

 

 

Múte Bourup Egede (atsior.)

Naalakkersuisut Siulittaasuat