Avatangiisit innarlitsaaliorneqarnissaannik Inatsisartut peqqussutaata allanngortinneqarneranik Inatsisartut peqqussutaat nr. 8, 15. november 2007-imeersoq
(Igitanik maaniinnarmiititsinaveersaarneq, tassunga ilanngullugit avatangiisinut tunngassuteqartut eqqartuussisutigoortinneqartarneranni periaatsit nutaat kiisalu piginnaatitsissutit erseqqissaavigineqarnerat)
§ 1
Avatangiisit innarlitsaaliorneqarnissaannik Inatsisartut peqqussutaanni nr. 12-imi, 22. december 1988-imeersumi, Inatsisartut peqqussutaanni nr. 7-imi, 13. maj 1993-imi, Inatsisartut peqqussutaanni nr. 14-imi, 31. oktober 1996-imi aamma Inatsisartut peqqussutaanni nr. 1-imi, 21. maj 2004-mi allanguuteqartinneqartumi, imaattut allannguutigitinneqassapput:
1. § 1, imm. 1, imaattunik oqaasertalerneqassaaq:
"Inatsisartut peqqussutaata pinngortitap avatangiisillu illersorneqarnissaat ilapittuiffigissavaa, taamaalilluni inuiaqatigiit ineriartortinneqarnerat piujuartitsinermik tunngaveqartinneqarniassammat inuup inuuniarnikkut atugarisai ataqqillugit aammalu uumasoqarnermik naasoqarnermillu piujuaannartitsinissaq. Inatsisartut peqqussutaata anguniassavai:
1) Silaannaap, erngup, sikup, qaqqap nunallu mingutsinneqartarnerisa pinaveersaartinneqarnissaat mingutsitsinerullu akiorneqartarnissaa.
2) Nipiliortitsinerup pinaveersaartinneqartarnissaa akiorneqartarnissaalu.
3) Innuttaasut peqqissuunissaannik illersuineq.
4) Mingutsitsinaveersaarnissap pilersaarusiorfigineqarnissaanut iliuuseqarfigineqarnissaanut tunngavissiuinissaq.
5) Atortussiassanik kiisalu pissamaatinik allanik atuinerup maangaannartitsisarnerullu killilersimaarneqarnissaa.
6) Atueqqittarnissap siuarsaavigineqarnissaa eqqakkanillu igitsisarnermut atatillugu ajornartorsiutinik killilersimaarinninnissaq."2. § 2, imm. 1, imaattunik oqaasertalerneqassaaq:
"Inatsisartut peqqussutaanni pineqarput:
1) Ingerlatat suulluunniit, stoffinik issoqqasunik, imerpalasunik silaannarmiittunik, imaluunniit uumassusillit uumassusilinnulluunniit tunngassuteqartut, silaannarmik, imermik, sikumik, qaqqanik nunamillu mingutsitsilernermik kinguneqartitsisinnaasut.
2) Sajuppilutsitsinerit nipiliortitsinerillu.
3) Tunisassiat nioqqutissialluunniit, suliarineqarnerminnut, uninngatinneqarnerminnut, atorneqarnerminnut, assartorneqarnerminnut imaluunniit iginneqarnerminnut atatillugu mingutsitsinermik kinguneqartitsisinnaasut.
4) Assartuutit atortulluunniit nuuttakkat allat, mingutsitsinermik kinguneqartitsisinnaasut.
5) Uumasuuteqarneq, uumasupiluit pissutsillu taakkununnga assingusut, peqqinnissamut ajornartorsiutaalersinnaasut imaluunniit avatangiiserisanut annertuumik akornusersuutaalersinnaasut."3. § 4-mi imm. 4-tut ukua ilanngunneqassapput:
"Imm. 4. Suliffeqarfiup atortulersuutaasa inissitsiterneqarneranni ingerlatsinerullu pilersaarusiorneqarnerani, tassunga ilaallutik tunisassiornerup ingerlanneqarnissaata, tunisassiarineqartussat stoffillu iluaqusersuutit toqqarneqarneranni qularnaarneqassaaq, pissamaatinik atuineq, mingutsitsineq eqqagassanillu pilersoqartarnera sapinngisamik killilersimaarneqassasut."4. § 4-p kingorna kapitali 1-imi ukua ilanngunneqassapput:
"§ 4a. Pisortat oqartussaasui, sullissiveqarfii, sulifffeqarfii kiisalu umiarsualiveqarfii pisortat ingerlataanni sanaartukkat ingerlatsinerlu eqqarsaatigalugit kiisalu pisiortortarnerminni atuisarnerminnilu Inatsisartut peqqussutaata siunertarisaata eqquutsinneqarnissaa peqataaffigissavaat."5. § 7 imaattunik oqaasertalerneqassaaq:
"§ 7. § 1-imi siunertarisassatut taaneqartut isumagineqarnissaat siunertaralugu Naalakkersuisut maleruagassanik, tassunga ilanngullugit aningaasartuutinik matussusiisarnissamut aammalu aningaasartuutinik qularnaveeqqusiisarnissamut, makkununnga tunngasuni aalajangersaasinnaapput:
1) Suliffeqarfinniit, sanaartukkaniit, maskiinaniit, atortuniit, kiassaateqarfinniit angallassissutiniillu kiisalu taakkua pisatsersorneranni, ingerlanneqarneranni aserfallatsaalineqartarnerannilu mingutsitsinerit killilersimaarneqarnissaat.
2) Imermik tarajoqanngitsumik tarajulimmillu assigisaannillu imerneqartartussamik pissarsiniartarneq kiisalu erngit pissamaataasut isumannaarinniffigineqarnissaat.
3) Imikoorummik kuutsitsinermiit, ikuallaavinniit, eqqaavinniit assigisaanniillu, kiisalu sanaartukkat taamaattut pisatsersorneranni, ingerlanneqarneranni aserfallatsaalineqartarnerannilu mingutsitsinerit killilersimaarneqarnissaat.
4) Maanna siunissamilu sanaartukkat kuuffinnut attavilerneqartarnissaat.
5) Ikummatissanut, kiassarnermut imaluunniit angallassisutit maskiinallu ingerlanneqarnerannut atorneqartartunut, stoffit minguissusissaat akugisassaallu.
6) Sanaartukkat, maskiinat, atortut angallassissutillu suussusiinik akuersissuteqartarneq.
7) Suliarinninnerit ulorianaateqarsinnaasut kiisalu § 2, imm. 1-mi stoffit ulorianaatilittut taaneqartut uninngatinneqartarnerat angallanneqartarnerallu.
8) Imermik pissamaatit, imermik tarajulimmik pissamaatit, sikumik, qaqqanik, silaannarmik nunallu illersorneqarnissaat kiisalu nipiliortitsinaveersaarnissaq.
9) Stoffinik aalajangersimasunik, tunisassianik uumassusilinnilluunniit, uumassusilinnulluunniit tunngassuteqartut, stoffit taamaattut avatangiisinik akornusiisartutut nalilerneqassappata, eqqussuinissamut, annissuinissamut, tunisassiornissamut, tuniniaanissamut imaluunniit atuinissamut inerteqquteqarneq killilersuinerluunniit.
10) Sanaartukkanik, pisatsersuutinik imaluunniit atortunik, tassunga ilaallutik atortut uuttuutit, mingutserinermik atuinissamut naatsorsuussat, suussusiinik akuersissuteqartarnissaq.
11) Nunatat pissusaannik, naasuinik allanillu pitsanngorsaaneq pilersiteqqiinerlu.
12) Uumasuuteqarneq.
13) Uumasupiluit.
14) Immiaaqqanut imeruersaatinullu kulsyrelinnut puussiat, tassunga ilanngullugit puussiat aalajangersimasut atorneqarnissaannut inerteqqutit imaluunniit pisussaaffiit kiisalu utertitsisarnissamut aaqqissuussinermik pilersitsinissamut pisussaaffiit.
15) Sanaartukkat annertuut avatangiisinut sunniutaasa naliliiffigineqarnerat (VVM).
16) Avatangiisit pillugit paasissutissanik katersineq nalunaarutiginnittarnerlu.
17) Avatangiisinik artukkiinnginnissaq pillugu naatsorsuutinik suliarqarneq tamanullu saqqummiussisarnissaq.
Imm. 2. Inuit peqqissusaannut tunngassuteqartuni inuuniarnikkut atukkat pillugit § 1, imm. 1 aamma 2-mi immikkut aalajangersakkat pinerullugit Naalakkersuisut maleruagassanik aalajangersaasinnaapput, tassunga ilanngullugit ukua pillugit aningaasartuutinik matussusiisarnissat:
1) Imermik, imerneqartartussatut pissarsiariniarneqartartumik inuussutissalerinermilu suliffinni erngup atorneqartartup pitsaassusissaa nakkutigineqartarneralu.
2) Imermut imerneqartartussatut pitsaassusilimmut atortussanik pilersuinermilu atortunik ilusilersuineq toqqaanerlu.
3) Perusuersarfeqarnermut tunngasut.
4) Sissani naluffiusartuni, naluttarfinni uffariartarfinnilu erngup pitsaassusaa nakkutigineqartarneralu.
5) Ulluunerani unnuaaneranilu anartarfilerinermik aaqqissuussinerit.
6) Anartarfinniit allaniillu imikoorutit nunamut, sikumut, tatsinut, kuunnut immamullu kuutsinneqartarnerat.
7) Tupersimaartarfiit, kulturikkut, sunngiffikkut aamma timersornikkut aaqqissuussinerit, sumiiffiillu inuit amerlasuut katersuuffigisartagaat.
8) Sumiiffinnik imaani nunamilu miluumasut pilanneqartarfiinik pilaanissamut inerteqqutit pilaffigeqqusaanngitsulluunniit.
9) Toqusut inaat iliveqarfiillu.
10) Napparsimmaviit eqqagassaannik igitsisarneq.
11) Pissutsit inuit tamat eqqiluitsuunissaannut peqqissusaannullu pingaarutillit.
Imm. 3. Umiarsuit atorunnaartut, tassunga ilaallutik pisussaaffiit, umiarsuit passunnissaannut, ingitsernissaannut atoqqiinissamullu atuuttunik, Naalakkersuisut maleruagasssanik aalajangersaasinnaapput.
Imm. 4. Naalakkersuisut makkua pillugit maleruagassanik aalajangersaasinnaapput:
1) Sanaartukkani aalajangersimasuni mingutserisartuni inuit aqutsisut taakkununnga teknikikkut ilisimasaqarnissaat pisariaqarpallu uppernarsaateqartarnissaat.
2) Sulisorisat, sanaartukkani immikkut mingutserisartunik suliaqartartut, sanaartukkanik avatangiisinut tunngatillugu illersorneqarsinnaasumik ingerlatsinissamut uppernarsaateqartarnissaat, tassunga ilaallutik ilinniartitsissutissat imarisassaat uppernarsaatillu pissarsiarineqarnissaannut piumasaqaatinik naammassinnissimanissaq.
3) Suliffeqarfiit annertuumik mingutserisartut qanoq iliorlutik sulisorisaminnik avatangiisit pillugit sulinermut akuutitsisarnissaat."6. § 10 imaattunik oqaasertalerneqassaaq:
"§ 10. Nakkutilliisussaatitaasut pissutsinik unioqqutitsisoqarneranik pasitsaassaqarunik, taamaattut unitsinneqarnissaat isumagissavaat. Tamatumunnga tunngatillugu inerteqqutit peqqussutilluunniit pisariaqartut pinaveersaartitsinermilluunniit iliuuseqarnissat nalunaarutigissavaat.
Imm. 2. Ingerlatat peqqinnissamik tunngassuteqartunut ajornartorsiortitsilernermik mingutsitserujussuarnermilluunniit kinguneqarsinnaasut, tassunga ilanngullugit eqqagassanik pilersitsisarneq, mingutsitsinerup annikillisinneqarnissaanut peqqusinerit, tassunga ilanngullugit aalajangersimasunik iliuuseqaqqusissutit ingerlanneqalernissaat Nakkutilliisussaatitaasut suliffeqarfinnut nalunaarutigisinnaavaat. Aalajangersaanermut ilaatinneqarput inuussutissarsiutigalugu suliffeqarfiit, tassunga ilaallutik umiarsualiviit namminersortut pisortalluunniit sanaartornermik suliaat kiisalu nukissiornermut sanaartukkat aalaakkaasut, suliffeqarfiit immikkut mingutserisartutut allattorsimaffianni § 16, imm. 2-mi taaneqartunut ilaatinneqanngitsut.
Imm. 3. Ingerlatanut, annertuumik mingutsitsinermik imaluunniit peqqissutsimik akornusiisinnaasutut ulorianaatilinnut Nakkutilliisussaatitaasut peqqussuteqarsinnaapput. Akornusersuutit iliuuseqarfigineqassanngikkaluarpata, suliffeqarfimmut imaluunniit ingerlatamut Nakkutilliisussaatitaasut inerteqquteqarnissamik nalunaarutiginnissinnaapput."7. § 13-ip kingorna ilanngunneqassapput:
"§ 13a. Kinaluunniit, ingerlatseqatigiiffimmik, pigisamik suliffeqarfimmilluunniit piginnittuusoq ingerlataqartorluunniit Nakkutilliisussaatitaasumik qinnuteqarfigineqarnermi kingorna mingutsitsisinnaanermik navianaateqarsinnaasup naliliivigineqarnissaanut pingaaruteqartunik, mingutsitsisimanernilluunniit kiisalu pinaveersaartitsiniarluni ikiorsiissuteqarniarluniluunniit iliuutsit pillugit paasissutissanik tamanik tunniussaqartussaavoq.
Imm. 2. Kinaluunniit, ingerlatseqatigiiffimmik, pigisamik suliffeqarfimmilluunniit piginnittuusimasoq ingerlataqarsimasorluunniit, mingutsitsereersimanerup, mingutsitsinerulluunniit imaluunniit mingutsitserujussuarnissap pinaveersimatinneqarnissaanut naliliinissamut pingaaruteqartunik paasissutissanik tamanik Nakkutilliisussaatitaasumit qinnuigineqarnermi kingorna tunniussaqartussaavoq.
Imm. 3. Piginnittoq ingerlatsisorluunniit akisussaasoq Nakkutilliisussaatitaasumik peqquneqarsinnaavoq, imm. 1 naapertorlugu nammineq akiligassaminik makkuninnga suliaqaqqullugu:
1) Stoffinik avatangiisinut aniatinneqartartunik kiisalu nipiliortitsinermik sajuppilutsitsinermillu misiligutissanik pissarsiniarneq, misissueqqissaarneq uuttortaanerlu.
2) Atortunik tunisassianillu, atorneqartunik suliarineqartunilluunniit, kiisalu stoffinik eqqagassaqassappat, misiligutissanik tigusineq misissueqqissaarnerlu.
3) Mingutsitsinerup paasineqartup sunniutaasa peqqutaasut qulaarinniffigissallugit.
4) Mingutsitsinerup kingunerisassaata qanoq iliuuseqarfigineqarnissaa pinaveersaartinneqarnissaalluunniit qulaarinniffisissallugit."8. § 15-imi imm. 2 ilanngunneqassapput:
"Imm. 2. Kommunalbestyrelsit nunap assiliornertik nakkutilliinermillu ingerlatsinertik pillugu, tassunga ilanngullugit uuttortaanermi misissuinermilu inernernik, kiisalu nalunaaruteqariaasissat pillugit maleruagassanik aalajangersaanermik, nalunaarutinik nassiussaqartarnissaat pillugit Naalakkersuisut maleruagassanik aalajangersaasinnaapput."9. § 23 imaattunik oqaasertalerneqassaaq:
"§ 23. Paragraffit 16-20-mi pineqartut naapertorlugit pisut taakkununnga tunngaviliisut, tassunga ilanngullugit suliffeqarfiup inissisimarnga, mingutsitsinerup suussusia annertussusialu iliuutsillu suliffeqarfiup mingutsitsinaveersaarnissap pinngitsoortinneqarnissaanut iliuuseriniakkamisut ilisimatitsissutigisai Naalakkersuisut akuersissummi nalunaassavaat.
Imm. 2. Suliffeqarfiup tungaaniiit akuersissut Naalakkersuisunut nalunaaruteqartussaatitaanermik piumasaqaatitalerneqarsinnaavoq, soorluttaaq suliffeqarfiup ingerlaavartumik avatangiisinik misissuisarnissamik ingerlatsisarnissaanut akiliisarnissaanulluunniit piumasaqaatinik aalajangersaasoqarsinnaalluni.
Imm. 3. Suliffeqarfiup pilersinneqarneranut ingerlanneqarneranullu piumasaqaatinut tunngatillugu akuersissummi piumasaqaatit aalajangersakkat allanneqassapput. Sanaartukkani eqqakkanik uninngatitsivinni atorunnaarsitsineq suliareqqiinerlu pillugit piumasaqaatinik aalajangersaasoqassaaq.
Imm. 4. § 18 naapertorlugu piumasaqaatit nalunaarutigineqartut malinneqartussaapput.
Imm. 5. Akuersissut aalajangersimasumik piffissalerneqarsinnaavoq.
Imm. 6. Kinaluunniit sanaartukkani eqqakkanik uninngatitsivimmik ingerlataqartoq, uninngatitsinissaq siunertaralugu eqqakkanik pissarsisoqartarunnaaraangat, atorunnaarsitsisassaaq suliareqqiisassallunilu. Taamatut atorunnaarsitsilinnginnermi, paasissutissat tamatumunnga tunngasut Naalakkersuisunut nassiunneqassapput.
Imm. 7. Naalakkersuisut akuersisussaatitaasutut nakkutilliisussaatitaasutullu suliffeqarfinnut immikkut mingutserisartunut imaattunik ingerlataqartunut qularnaveeqquusiinissamik piumasaqaateqarsinnaapput:
1) Ingitserinermik ingerlatalinnut, tassunga ilanngullugit biilinik umiarsuarnillu ingitserisarnernik.
2) Atoqqiinissaq siunertaralugu assersuutigalugu atortuniit, maskiinaniit, motoriniit atortuniillu peersisartut.
3) Maskiinat atorlugit saviminikunik aserorterisartut.
4) Eqqakkanik uninngatitsivinnik ingerlataqartut.
Imm. 8. § 11 naapertorlugu qularnaveeqqusiissutit akuersisussaatitaasut nakkutilliisussaatitaasullu iliuuseqartarnissaannut matussutaasassapput. Naalakkersuisut qularnaveeqqusiissutit annertussusissaat iluarsiivigisinnaavaat, naatsorsuisarnermi tunngaviusut annertussusaat allannguuteqarujussuassagaluarpat.
Imm. 9. Sanaartornernik suliaqartoqalissagaluarpat, naammagittaalliuuteqarnissamut killissarititap naannginnerani akuersissut atuutsinneqarsinnaassanngilaq, akuersissuteqartussaatitaasut tamanna pillugu akuersissummik nalunaaruteqarsimanngippata.
Imm. 10. Qinnuteqaatit akuersissutillu ilusissaat imarisassaallu pillugit Naalakkersuisut maleruagassanik aalajangersaasinnaapput."10. § 35-ip kingorna ilanngunneqassapput:
"Kapitali 7a
Eqqakkanik suujunnaarsitsisarneq§ 35a. Kialuunniit eqqagassanik pilersitsisup, uninngatitsisup, assartuisup, passussaqartup igitsisartulluunniit akisussaaffigaa, silaannarmik, imermik, sikumik, qaqqamiit, nunamilluunniit mingutsitsinermik peqqinnissamut tunngassuteqartunik ajornartorsiulersitsinnginnissaq.
Imm. 2. Eqqakkat nassuiaaserneqarnissaat pillugit Naalakkersuisut maleruagassanik aalajangersaassapput.
Imm. 3. Kialuunniit eqqagassanik pilersitsisup, katersuisartup, suliarinnittartup, ikuallaasartup allatulluunniit eqqagassanik, puukunik imaluunniit atortut sinnikuinik igitsisartup, Naalakkersuisut piumasaqarnerisigut eqqakkat aqutsivineqarnerannut paasissutissat pingaarutillit suugaluartunilluunniit nalunaarutigisassavai.§ 35b. Naalakkersuisut makkua pillugit maleruagassanik aalajangersaassapput:
1) Eqqagassat pillugit ileqqoreqqusanut aalajangersakkat ilusilersorneqarnerat.
2) Katersuivissanut eqqaavigisassanullu aaqqissuussinerit.
3) Eqqakkat igitsivissaannut periarfissanik innersuussinissamut kommunalbestyrelsip pisussaaffii.
4) Eqqakkat katersorneqartarnissaannut iginneqartarnissaannullu, tassunga ilanngullugu atortut nioqqutissiallu atoqqinneqartarnissaannut, kommunalbestyrelsip isumaginninnissaanut pisussaaffii.
5) Innuttaasut, illuutillit, suliffeqarfiit, sullissiviit umiarsualiviillu katersuivissatut aaqqissuussinerit igitsivissatullu periarfissat innersuunneqartut imaluunniit asimi, illoqarfinni nunaqarfinnilu eqqaanissamut aaqqissuussinerit atorneqartarnissaannut pisussaaffii.
6) Innuttaasut, illuutillit, suliffeqarfiit, sullissiviit umiarsualiviillu eqqakkat pillugit nalunaaruteqartarnissamut paasissutissiisarnissamullu kiisalu eqqakkat misissuiffigineqartarnissaannut, tassunga ilanngullugit Naalakkersuisut kommunillu ileqqoreqqusaanni allassimasutut nalunaaruteqartarnissat ilusissaat pillugit pisussaaffiit.
Imm. 2. Eqqakkat iginneqartarnissaat pillugu Naalakkersuisut maleruagassanik aalajangersaasinnaapput, tassunga ilanngullugit
1) Eqqakkat suussusersinerat, nalunaarutigineqarnerat, immikkoortiterneqarnerat, suussutsinut immikkoortiterneqarnerat, uninngatinneqarnerat, katersorneqarnerat, assartorneqarnerat, suliarineqarnerat passunneqarnerallu.
2) Eqqakkat immikkut ittut eqqakkallu aalajangersimasut.
3) Suliffeqarfiit eqqakkanik immikkut ittunik aalajangersimasunillu immikkoortiterisartut passussisartullu.
4) Aningaasartuutit qularnaveeqqusiinerillu aningaasartuutaannik matussusiinissaq suliffeqarfiillu namminneq matussusigassaannik avatangiisit pitsaassutsillu aqutseriaasissaannik pilersitsinissaannut pisussaaffiit.
Imm. 3. Eqqakkanik ajornartorsiutigineqarnerisa annikillisinneqarnissaat imaluunniit atoqqiisarnissap siuarsarneqarnissaa siunertaralugu Naalakkersuisut maleruagassanik imaattunik aalajangersaasinnaapput:
1) Suliareqqitassat, stoffit akuutissat iluaqutigineqartartullu immikkut ittut eqquteqqusaannginnissaat imaluunniit killilimmik eqqunneqarsinnaasarnissaat.
2) Suliareqqitassat, stoffit akuutissat iluaqutigineqartartullu immikkut ittut atortuni nioqqutissianiluunniit, Kalaallit Nunaanni sanaartorneqartunik atorneqartunilluunniit, ilaanngunneqartannginnissaat aalajangersimasumilluunniit annertussusilerlugit atorneqarsinnaasarnissaat.
3) Nioqqutissianik tunisassianilluunniit aalajangersimasunut siunertalinnik eqqussuinerit nioqqutissiornerilluunniit, tassunga ilanngullugit poortuutissiat, Naalakkersuisunit akuersissutigineqassapput.
4) Nioqqutissianik tunisassianilluunniit aalajangersimasunut siunertalinnik eqqussuinerit nioqqutissiornerilluunniit, tassunga ilanngullugit poortuutissiat, aalajangersimalluinnartumik nalunaaqutserneqartassapput, kiisalu allatut nalunaaqutsiineq killilersimaarneqassaaq inerteqqutaatinneqassalluniluunniit.§ 35c. Kommunalbestyrelsip eqqakkanik igitsisarnissaq isumagisaraa aalajangiiffigissallugulu, stoffip suussutsilluunnit eqqagassatut naliliiffigineqartarnissaat. Biilinik, umiatsiaanik, umiarsuarnik, qamuteralannik suussutsinillu angisuunik assigisaannillu igitsinissaq aatsaat pisinnaasassaaq, taakkua sivikinnerpaamik qaammatini pingasuni inuttassarsiuunneqareeraangata.
Imm. 2. Kommunalbestyrelse ileqqoreqqusami eqqakkanut aaqqissuussinerup annertussusia, aaqqissuussivigineqarnera allallu pillugit maleruagassanik aalajangersagaliussaaq. Ileqqoreqqusaq Naalakkersuisunit akuersissutigineqassaaq.
Imm. 3. Eqqakkat uninngatinneqarnerisa, passunneqarnerisa iginneqartarnerisalu illersorneqarsinnaasumik pisarnissaat qularnaarniarlugit peqqussutinik inerteqqutinilluunniit kommunalbestyrelse nalunaaruteqarsinnaavoq.
Imm. 4. Kommunalbestyrelse eqqakkat pillugit pilersaarusiussaaq sumiissusersiissallunilu, kommunip eqqakkat pillugit pilersaarutaani eqikkarneqartussanik. Kommunip eqqakkat pillugit pilersaarutaa Naalakkersuisut eqqakkat pillugit iliuusissatut pilersaarut tamanut atuuttoq naapertorlugu aammalu § 36b, imm. 2, kiisalu Nunaminertat atorneqarnerat pilersaarusiornerlu pillugit Inatsisartut peqqussutaat naapertorlugit suliarineqassaaq.§ 35d. Makkununnga aningaasartuutinut matussutissatut akiliutissanik kommunalbestyrelse aalajangersaasinnaavoq:
1) Eqqakkat pillugit aaqqissuussinerit pilersaarusiorneqarnerannut, pilersinneqarnerannut, ingerlanneqarnerannut aqunneqarnerannullu, tassunga ilanngullugit innuttaasunut innersuussissutinut ilitsersuutinullu.
2) Eqqakkanik allanillu immikkoortiterineq, katersuineq assartuinerlu.
3) Eqqakkanik atoqqitassanik, eqqakkanik ikuallagassanik eqqakkanillu igitassanik suliarinninnermut suliffeqarfiit sanaartukkallu pilersinneqarnerat ingerlanneqarnerallu.
4) Paasissutissanik katersuineq nalunaarsuinerlu.
Imm. 2. Imm. 1 naapertorlugu illuutillit, suliffeqarfiit, sullissiviit umiarsualiviulluunniit, nunaminertani atugassanngortinneqartuni imaluunniit nunaminertani atuisussanngortinneqartuni, eqqakkat pilerfianniittut pisussaafittut akiliutit isumagisassaraat.§ 35e. Stoffit, nioqqutissiat atortullu, silaannarmik, imermik, sikumik qaqqanillu aamma nunap qaaniittumik, mingutserisinnaasut imaaliorneqassanngillat:
1) Nunamut sikumulluunniit matoorunneqassanatik.
2) Nunamut sikumulluunniit kuutsinneqassanatik uninngasuutigineqassanatillu.
3) Nunap iluanut kiviorartinneqassanatik.§ 35f. Kalaallit Nunaannut eqqakkanik eqqussuisoqarnissaa inerteqqutaavoq, tamatumani atoqqiinissaq siunertaralugu eqqakkat ulorianaateqanngitsut pineqassanngippata.
Imm. 2. Eqqakkanik eqqussuisarnissaq Naalakkersuisunit akuersissutigineqassaaq.
Imm. 3. Eqqakkanik nunanut allanut taamaallaat aallarussuisoqarsinnaavoq nunat akornanni eqqakkanik ulorianaatilinnik assartuisarnissami taakkualu iginneqartarnissaanni nakkutilliisarnissaq pillugu nunanut Baselimi isumaqatigiissummut ilaatinneqartunut."11. § 36a-p kingorna kapitali 8-imi ukua ilanngunneqassapput:
"§ 36b. Naalakkersuisut tamanut atuuttussamik eqqakkat pillugit iliuusissatut pilersaarummik suliaqassapput. Pilersaarut ukiut sisamakkuutaarlugit suliarineqartassaaq, ukiuni aqqaneq-marlunni tulliuttuni Kalaallit Nunaanni eqqagassalerineq pillugu imaqartartussamik.
Imm. 2. Kommunit eqqakkat pillugit iliuusissatut pilersaarutaasa imassaannik, suliaqarnermullu tunngatillugu kiisalu pilersaarutit iluarsiivigineqartarnissaannut piffissanik killiliinernik periaatsinillu Naalakkersuisut maleruagassanik aalajangersaasassapput. Eqqakkat pillugit pilersaarusiornermut piumasaqaatit suut tunngaviutinneqarnissaat pillugit Naalakkersuisut maleruagassanik aalajangersaassapput. Eqqakkat sumiiffissiorneqarnerannut pilersaarusiorneqarnerannullu ilaasumik kommunit paasissutissanik Naalakkersuisunut qanoq ittunik katersuinissaannut nassiussuinissaannullu Naalakkersuisut maleruagassanik aalajangersaassapput."12. Kapitali 8-mi § 36b-p kingornatigut una ilanngunneqassaaq:
"§ 36c. Avatangiisit pillugit ukiumoortumik nassuiaat Naalakkersuisut 1. januar 2009-mit suliarisarlugulu saqqummersissavaat."13. § 40 imaattunik oqaasertalerneqassaaq:
"§ 40. Naalakkersuisut avatangiisitigut naammagittaalliuuteqartarfimmik ataatsimiititaliamik pilersitsissapput pingasunik ilaasortalimmik. Naalakersuisut Kalaallit Nunaanni Inatsisartunit inassuteqartoqareerneratigut siulittaasussamik toqqaassapput, kiisalu suli ilaasortanik marlunnik, taakkunannga aappaa Kalaallit Nunaanni Kommuneqarfiit Kattuffiannit inassutigineqarsimasussaq. Ilaasortanut tamanut aammattaaq sinniisussanik toqqaasoqartassaaq.
Imm. 2. Avatangiisitigut naammagittaalliuuteqartarfittut ataatsimiititaliami ilaasortat Naalakkersuisunut ilaasortaajutigissanngillat.
Imm. 3. Avatangiisitigut naammagittaalliuuteqartarfittut ataatsimiititaliap qinigaaffia Inatsisartunut qinigaaffik assingaa. Ataatsimiititaliaq ingerlatsissaaq, nutaamik Inatsisartutut toqqakkat katersuussimalernissaasa tungaanut ataatsimiititaliamullu siulittaasussussamik toqqaasimalernissaasa tungaanut.
Imm. 4. Avatangiisitigut naammagittaalliuuteqartarfittut ataatsimititaliamut ataatsimeeqataasartut immikkut ilisimasallit ilaatinneqarsinnaapput.
Imm. 5. Avatangiisitigut naammagittaalliuuteqartarfittut ataatsimiititaliap suleriaasissani nammineq aalajangersartarpaa maleruagassat matuma kinguliiniittut eqqarsaatigalugit:"14. § 41 imaattunik oqaasertalerneqassaaq:
"§ 41. Inatsisartut peqqussutaat manna naapertorlugu imaluunniit tamatumunnga inatsisitigut toqqammaveqarluni malittarisassiarineqarsimasut pillugit aalajangiinerit tamarmik Naammagittaalliuuteqartarfittut ataatsimititaliamut suliassanngortinneqarsinnaapput.
Imm. 2. Naammagittaalliuuteqarsinnaatitaasut tassaapput:
1) Akuersissuteqarfigineqartut.
2) Peqqinnissakkut Nakkutilliisoqarfik.
3) Kimilluunniit suliap qanoq naammassineqarnissaanut immikkut annertuumillu soqutigisaqartut.
4) Peqatigiiffinnit soqutigisaqaqatigiinnilluunniit, ileqqoreqqusatik naapertorlugit sukisaarsarfiusartut pingaarutillit isumagineqartarnissaannik siunertaqartut."15. § 44 imaattunik oqaasertalerneqassaaq:
"§ 44. Naammagittaalliuut peqqussuteqarnissamut inerteqquteqarnissamulluunniit tunngatillugu kinguartinneqarallassaaq avatangiisitigut naammagittaalliuuteqartarfittut ataatsimiititaliap aalajangiinissaata tungaanut imaluunniit avatangiisitigut naammagittaalliuuteqartarfittut ataatsimiititaliap allatut aalajangiinissaata tungaanut.
Imm. 2. Oqartussaasulli, pissutsinik immikkut ittunik pisoqartillugu, peqqussutinik inerteqqutinilluunniit aalajangiisup, peqqussuteqarnerminut inerteqquteqarnerminulluunniit peqatigitillugu, qanorluunniit naammagittaalliuuteqartoqarsimagaluarpat tamatuma malinneqarnissaa aalajangiiffigisinnaavaa. Aalajangiinerluunniit tamanna naammagittaalliuutigineqarpat, peqqussut inerteqquteqarnerluunniit malinneqartussaavoq avatangiisitigut naammagittaalliuuteqartarfittut ataatsimiititaliap allatut aalajangiissaatat tungaanut.§ 44a. Akuersissummut, akuersinermut imaluunniit immikkut akuersissummut naammagittaalliuutit kinguartitsiffiunngillat, tamatumani Naalakkersuisut allatut aalajangiinngippata. Akuersinerit akuersissutillu ilaasa naammagittaalliuuteqarnissap qaangiutinnginnerani atuutsinneqannginnissaat, naammagittaalliuutillu kinguartinneqarnissaat, pillugit Naalakkersuisut maleruagassanik aalajangersaasinnaapput.
Imm. 2. Imm. 1-imi aalajangersagaq naammagittaalliuuteqarfittut ataatsimiititaliap akuersissummik, akuersissuteqarnermik imaluunniit immikkut akuersissummik allannguuteqartitsinissaannut atuukkunnaarsitsinissaannullu periarfissaanik killiliinngilaq."16. § 46 imaattunik oqaasertalerneqassaaq:
"§ 46. Akiliisitaasussanngortitsilluni pineqaatissiisoqarsinnaavoq:
1) § 12, § 13a, imm. 1, aamma § 35a, imm. 3 naapertorlugit noqqaassutigineqartunik sumiginnaasoqartillugu.
2) § 13 naapertorlugu nalunaaruteqartoqanngippat.
3) § 16 aamma § 19, tak. § 23, imm. 9 naapertorlugit akuersissutitaqanngitsumik suliffeqarfimmik sanaartulerneq, aallartitsineq ingerlatseqatigiiffimmilluunniit ingerlatsilerneq.
4) § 17, § 20 aamma § 35f, imm. 2 naapertorlugit akuersissuteqarfigineqarnissamik piniarsimanginneq.
5) § 10, § 13a, § 23, imm. 2-4, §§ 24-26, § 32, § 35c, imm. 3, aamma § 38 naapertorlugit peqqussutinik, inerteqqutinik piumasaqaatinilluunniit unioqqutitsisoqartillugu.
6) § 30, imm. 2, § 34, imm. 1, § 35e, 35f, imm. 1-imik unioqqutitsinerit, imaluunniit § 35, imm. 2 naapertorlugu immikkut akuersissuteqarfigineqarnissamut piumasaqaatit eqquutitinngikkaanni.
7) § 45 unioqqutikkaanni.
Imm. 2. Maleruagassat, § 7, § 7a, § 7b, § 30a, § 35, imm.1, § 35b, § 35c, imm. 2, aamma § 36b, imm. 2-mi nalunaarutigineqartut naapertorlugit aalajangersaasoqarsinnaavoq, maleruagassanik unioqqutitsinernik akiliisussanngortitsisoqarsinnaaneranik."17. § 47-mi imm. 2-tut ilanngunneqassaaq:
"Imm. 2. Maleruaqqusani, inatsisartut peqqussutaat manna naapertorlugu saqqummiunneqartuni, unioqqutitsinernik suliffeqarfinnit tamakkiisumik ilaannakortumilluunniit naalagaaffimmit, Namminersornerullutik Oqartussanit, kommunimit imaluunniit kommunit piginneqatigiiffiinit kommunalbestyrelsip nunaqarfinnilu aqutsisut allallu pillugit inatsisartut inatsisaannut ilaatinneqartunik, aktiaatileqatigiinnit, anpartselskabinit, andelsselskabinit assigisaannilluunniit unioqqutitsinerit pillugit akiliisussanngortitsilluni pineqaatissiinissamut maleruagassanik aalajangersaasoqarsinnaavoq."
§ 2
Inatsisartut peqqussutaat 1. januar 2008-imi atuutilissaaq.
Namminersornerullutik Oqartussat, ulloq 15. november 2007
Hans Enoksen/
Arkalo Abelsen
Siullermeerinninnermut siunnersuut
Isumaliutissiissut (Aappassaaneerinninneq)
Aappassaaneerinninnermut allannguutissatut siunnersuut (akuerineqartoq)