9. oktober 2007 UKA2007/42
Uuma allannguutissaatut siunnersuut
Avatangiisit innarlitsaaliorneqarnissaannik Inatsisartut peqqussutaata allannguutaa pillugu Inatsisartut peqqussutissaattut nr. xx-itut, xx.xx. 2007-imeersutut siunnersuut
Naalakkersuisut aappassaaniigassatut saqqummiussaat.
§ 1 pillugu
1. Nr. 11-p kingornatigut normutut nutaatut una ilanngunneqassaaq:
"01. Kapitali 8-mi § 36b-p kingornatigut una ilanngunneqassaaq:
"§ 36c. Avatangiisit pillugit ukiumoortumik nassuiaat Naalakkersuisut 1. januar 2009-mit suliarisarlugulu saqqummersissavaat.""
Oqaaseqaatit nalinginnaasut
Siunnersuutip siullermeerneqarnerani Naalakkersuisut avatangiisit pillugit nassuiaammik ukiumoortumik suliarinnittarnissaat siunnersuutigineqarpoq, tassanilu suliniutit avatangiisinik pitsaanerulersitsisut ukiumi qaangiuttumi ingerlanneqarsimasut kiisalu suliniutit Naalakkersuisut ukiumi aggersumi ingerlanniagaat pillugit nassuiaasoqartassalluni.
Allannguutissatut siunnersuummi siunnersuutip taassuma avatangiisit innarlitsaaliorneqarnissaannik Inatsisartut peqqussutaanni ilanngunneqarnissaa siunertaraa.
Allannguutissatut siunnersuut taanna Kalaallit Nunaanni Namminersornerullutik Oqartussanut sunniuteqarpoq. Avatangiisinut Pinngortitamullu Pisortaqarfimmi avatangiisit pillugit nassuiaatip tamarmiusup suliarineqarnissaanut sulisup ataatsip qaammammi ataatsimi sulisarnissaanut atugassiissutit immikkoortinneqassapput, matumani nassuiaammi paasissutissanik katersineq nassuiaatillu tamanut saqqummiunneqarnissaata piareersarneqarnera ilanngullugit eqqarsaatigalugit.
Allannguutissatut siunnersuutip aningaasaqarnikkut kingunerisassai ukiumut 200.000 kr.-iussasut naatsorsuutigineqarpoq. Aningaasat taakku avatangiisit pillugit nassuiaatip suliarineqarneranut aamma avatangiisit pillugit nassuiaatip siunnersortit avataaneersut ikiortigalugit innuttaasunut nalinginnaasutigut paasineqarsinnaasumik iluseqartillugu oqaasertaqartillugulu suliarineqarnissaanut atorneqarnissaat naatsorsuutigineqarpoq.
Aalajangersakkat ataasiakkaat pillugit oqaaseqaaatit
Nr. 1 pilluguAalajangersakkakkut tassuuna siunnersuutigineqarpoq Naalakkersuisut avatangiisit pillugit nassuiaammik ukiumoortumik suliassaqarfiit avatangiisit innarlitsaaliorneqarnissaannik pillugu Inatsisartut peqqussutaanni aalajangersaaffigineqartunik imaqartumik suliarinnittassasut saqqummersitsisassasullu. Avatangiisit pillugit nassuiaat suliniutit avatangiisinik pitsaanerulersitsisut ukiumi qaangiuttumi ingerlanneqarsimasut kiisalu suliniutit Naalakkersuisut ukiumi aggersumi aallartinniagaat pillugit allaaserinninnernik imaqartassaaq.
Avatangiisit pillugit nassuiaatip siunertaa tassaavoq innuttaasut tamaasa eqqarsaatigalugit avatangiisunut tunngasuni suliat killiffiinik pilersaarutinillu tamarmiusunik allaaserinninnermik saqqummiussineq. Avatangiisit pillugit nassuiaatip avatangiisitigut ullumikkut ajornartorsiutit saqqumisunngortissavai taakkulu aaqqiissutissaat pillugit oqallinneq pilersissallugu. Qulaajaaniarluni suliat aamma suliniutit pineqartut avatangiisinik pitsaanerulersitsisut akornanni siunertanik ingerlatitseqqinneq ataqatigiinneqarnerlu nassuiaammi qitiutinneqassapput.