Inissialiornermut tapersiissuteqartarneq pillugu Inatsisartut peqqussutaata allanngortinneqarneranik Inatsisartut peqqussutaat nr. 3, 12. maj 2005-imeersoq
(Akilersuutit akiligassanngortut aamma akiitsut sinnerinik taarsigassarsianut akilersuutitaqanngitsunut erniaqanngitsunullu allannguinissamik periarfissaq kiisalu nutaamik akilersueriaaseqalernikkut taarsigassarsianik allannguisinnaanermut periarfissaq pillugu maleruagassanik allannguineq)
§ 1
Inissialiornermut tapersiissuteqartarneq pillugu Inatsisartut peqqussutaat nr. 1, 9. april 1992-imeersoq, ilaatigut Inatsisartut peqqussutaatigut nr. 3-kkut, 30. oktober 1998-imeersukkut kingullermillu Inatsisartut peqqussutaatigut nr. 4-kkut, 15. april 2003-meersukkut allannguuteqartinneqartoq imatut allannguuteqartinneqassaaq:
1. § 10, imm. 3, imatut oqaasertalerneqassaaq:
"Imm. 3. Aammattaaq imm. 1 aamma 2 naapertorlugit taarsigassarsianik allannguinissamut taarsigassarsititsisoqarsinnaavoq, tak. imm. 3. Allannguinissamut taarsigassarsiassat annertussusilerneqarnerinut imm. 1 aamma 2 naapertorlugit siusinnerusukkut taarsigassarsiarititanut akiitsut sinneri aamma naafferartumik akilersuutit akilerneqanngitsut, ilanngullugittaaq pillaammik ernialiussat, sullissinermut akiliutit il.il. naatsorsorneqassapput. Allannguinissamut taarsigassarsiat qaammatikkaartumik akilersorneqassapput."2. § 10-mi imm. 4-6-itut ikkunneqassapput:
"Imm. 4. Taarsigassarsiallit, BSU-mit illullit, iluminnut akilersuutinit akiligassallit aamma sinneruttunik akiitsullit taarsigassarsianik allannguinissamik qinnuteqarsinnaapput, tak. imm. 3. Taarsigassarsititsinissamut piumasaqaataavoq tamatuma peqatigisaanik taarsigassarsiallit ataasiakkaat akiitsut akilersuinissaannut pilersaarusiornissaat.
Imm. 5. Imm. 4 naapertorlugu allannguinissamut taarsigassarsiniarluni qinnuteqaatit Naalakkersuisunut nassiunneqassapput. Allannguinissamut taarsigassarsititsinissaq taamaallaat akuerineqarsinnaavoq, taarsigassarsisup taarsigassarsiaminik akilersuisinnaanera ilimanaateqartutut nalilerneqarpat. Qinnuteqaammik nalilersuinermi pingaartumik taarsigassarsianut akiitsut sinnerutut, qinnuteqartup maannamut akiliisinnaassusia akiliinissamullu piumassuseqarnera, qinnuteqartup nalilinnik pigisaqarnera aamma ilimagisatut inuussutissarsiorsinnaassusia kiisalu illup pisoqaassusia niuernikkullu nalinga isiginiarneqassapput.
Imm. 6. Naalakkersuisut taarsigassarsianik allannguinissamik qinnuteqaatit allaffissornikkut aqunneqartarnerat pillugu maleruagassiorsinnaapput.".3. § 10-p kingornanut ikkunneqassaaq:
"§ 10a. Taarsigassarsiallit, ukiuni marlunni kingullerni isertitanik akileraarusigassanik misissuinermi inoqutigiinni ukiumut akileraaruteqaataasussanik 180.000 kr.-it inorlugit isertitallit, akilersuutit akiligassanngortut aamma akiitsut sinneruttut allanngortiternissaannut erniaqanngitsunut akilersuutitaqanngitsunullu taarsigassarsianngorlugit, piffissap taaarsigassarsiat akilersorneqarnissaasa sinnerani qaammatikkaartumik amerlaqatigiinnik annertussusilerneqartunik nalikilliartortussanik allannguinissamut taarsigassarsinissamik qinnuteqarsinnaapput, taamaattorli takuuk imm. 3.
Imm. 2. Meeqqamut 18 inorlugit ukiulimmut, najukkami angerlarsimaffeqartutut inuit nalunaarsorsimaffiani nalunaarsorsimasumut ataatsimut, taamaattorli amerlanerpaamik meeqqanut arfinilinnut, isertitat killingat, tak. imm. 1, meeqqamut ataatsimut 4.000 kr.-inik qaffanneqartassaaq.
Imm. 3. Piffissaq taarsigassarsianut akilersuiffiusoq naasimappat, taarsigassarsiallu tamarmik akiligassanngortinneqarsimappata, akiitsut akilinngitsuukkat amerlaqatigiinnik annertussusilerlugit qaammatinut 60-inut nalikillineqartassapput.
Imm. 4. Akilersuutinik akilerneqartussanik aamma akiitsut sinnerinik, allannguinissamik qinnuteqaatit, tak. imm. 1, Naalakkersuisunut nassiunneqassapput. Qinnuteqaatinik nalilersuinermi qinnuteqartup nalilinnik pigisaqarnera, ilimagisatut inuussutissarsiorsinnaassusia, kiisalu illup pisoqaassusia niuernikkullu nalinga isiginiarneqassapput.
Imm. 5. Naalakkersuisut allamik aalajangigaqanngippata, erniaqanngitsutut akilersugassaanngitsutullu taarsigassarsiat taarsigassarsisup akiliisinnaajunnaarnerani, akilersuinermik unitsitsinerani, akiligassaqarfinnut isumaqatigiissuteqarnermi akiitsut ilaannik isumakkeerfigineqarnermi, pigisaaniit akiitsut amerlanerulernerat pissutigalugu akiliisinnaajunnaavittoqarnerani, taarsigassarsisup toqunerani, tammarnerani assigisaanilluunniit pisoqarnerani kiisalu piginnittut nikinnerini akiligassanngortinneqassapput. Piginnittut nikinnerat tassaavoq akiligassallit arlaannaalluunniit nikinnerat, tassunga ilaallutik niuernikkut akiliuteqartitsiviunngitsumillu tunniussineq, taamatullu piginneqataasumut, aappaasumut, aappaasutut nalunaarsorsimasumut, pinngitsoorani kingornussisussanut imaluunniit inooqataasumut tunniussineq ikaarsaarnerluunniit.
Imm. 6. Naalakkersuisut erniaqanngitsunik akilersuutitaqanngitsunillu taarsigassarsinissamut qinnuteqaatit allaffissornikkut aqunneqartarnerat pillugu maleruagassiorsinnaapput.".4. § 21b, imm. 1, imatut oqaasertalerneqassaaq:
"§ 21b. Qinnuteqartoqarneratigut illunik, ukiuni marlunni kingullerni isertitanik akileraarusigassanik misissuinermi inoqutigiinni ukiumut akileraaruteqaataasussanik 180.000 kr.-it inorlugit isertitallinnit pigineqartunik iluarsaassinissamut, alliliinissamut nutarterinissamullu annerpaamik 100.000 kr.-inik tapiissuteqartoqarsinnaavoq. Qinnuteqartoq ukiut taliimat kingulliit iluanni tapiissuteqarfigineqarsimappat tapiissuteqartoqarsinnaanngilaq."
5. § 25-mi imm. 3-p kingorna immikkoortutut nutaatut ikkunneqassaaq:
"Imm. 4. Naalakkersuisut atugassiissutaasunut killissatut imm. 3-mi taaneqartut sanioqqunnissaannut maleruagassiorsinnaapput, illuliortiternernut aningaasalersuineq pillugu Inatsisartut peqqussutaanni nr. 4-mi, 30. oktober 1998-imeersumi kingusinnerusukkut allannguuteqartinneqartumi kapitali 3 naapertorlugu aningaasalersuisinnaanerup akuerineqarnissaa siunertaralugu."
§ 2
Peqqussut 1. juli 2005-imi atuutilerpoq.
Namminersornerullutik Oqartussat, ulloq 12. maj 2005
Hans Enoksen/
Jens NapãtôK
Siullermeerinninnermut siunnersuut
Isumaliutissiissut (Aappassaaneerinninneq)
Ændringsforslag til 2. behandling (vedtaget)