3. maj 2005

UPA 2005/21
UPA 2005/117
UPA 2005/119

 

UPA 2005/21

Inissialiornermut tapersiissuteqartarneq pillugu Inatsisartut peqqussutaata allanngortinneqarneranik Inatsisartut peqqussutissaattut siunnersuut


aamma


UPA 2005/117

Inissialiornermut tapersiissuteqartarneq pillugu Inatsisartut peqqussutaat pillugu Inatsisartut inatsisaata nr. 1, 9. april 1992-imeersup allanngortinneqarnissaa pillugu Naalakkersuisut peqquneqarnissaannik Inatsisartut aalajangiiffigisassaattut siunnersuut, taamaaliortoqarneratigut qulakkeerneqaqqullugit:


aamma


UPA 2005/119

Siunnersuutigaara Naalakkersuisut peqquneqassasut, Inatsisartut Peqqussutaat nr. 1, 9. april 1992-meersoq, illuliornermi tapiissuteqartarnermut tunngasoq, taamaasilluni tapiissuteqartarnermi qummut killigititaq § 21b-mi aalajangersaavigineqarsimasoq, qaffanneqassaasoq minnerpaamik 100.000 kr.-ninngorlugu.


pillugit

Inatsisartut Attaveqaqatigiinnermut Ineqarnermullu Ataatsimiititaliaata

ISUMALIUTISSIISSUTAA

 

Siunnersuutit aappassaaneerneqarnerini saqqummiunneqartut

 

 

Inatsisartut Attaveqaqatigiinnermut Ineqarnermullu Ataatsimiititaliaat suliarinninnermini ukuninnga inuttaqarpoq:

 

Inatsisartunut ilaasortaq Agathe Fontain, Inuit Ataqatigiit, siulittaasoq
Inatsisartunut ilaasortaq Per Rosing-Petersen, Siumut, siulittaasup tullia
Inatsisartunut ilaasortaq Jørgen Wæver Johansen, Siumut
Inatsisartunut ilaasortaq Godmand Rasmussen, Atassut
Inatsisartunut ilaasortaq Palle Christiansen, Demokraatit

 

Inatsisartut Attaveqaqatigiinnermut Ineqarnermullu Ataatsimiititaliaata ulloq 19. april 2005-mi siullermeerinerup kingorna Inissialiornermut tapersiissuteqartarneq pillugu Inatsisartut peqqussutaanut allannguutissatut siunnersuutit misissorpai.


Apeqqutit

Ataatsimiititaliap siunnersuutinik suliarinninnerminut atatillugu Ineqarnermut, Attaveqaqatigiinnermut Avatangiisinullu Naalakkersuisoq apeqqutinut arlalinnut akissuteqaqqullugu qinnuigisimavaa. Naalakkersuisut UPA 2005/21-imut allannguutissatut siunnersuummik saqqummiusseqqullugit ataatsimiitaliap tassunga tapiliullugu qinnutigaa. Ataatsimiitaliap allannguutissatut siunnersuummut kissaatai isumaliutissiissup matuma naggataani saqqummiuneqassapput. Ataatsimiititaliap apeqqutai Naalakkersuisunullu ilaasortap akissutai isumaliutissiissummut matumunnga ilanngunneqarput.


Boligstøtte pillugu peqqussut

Inissialiornermut tapersiissuteqartarneq pillugu Inatsisartut peqqussutaat nr. 1, 9. april 1992-imeersoq akuersissutigineqarnermi kingorna tallimariarluni allanngortinneqarsimavoq. Allannguutissatut siunnersuut kingulleq ilanngullugu arfinileriarluni allanngortitsisoqarsimassaaq, taamaalillunilu peqqussut paasilertoruminaatsunngortinneqarluni. Tamaattumik Naalakkersuisut Inissialiornermut tapersiissuteqartarneq pillugu Inatsisartut peqqussutaannik nutaamik ataatsimoortunngortitsiniarnerat pitsaasuuvoq.

Peqqussutip kapitel 4-aani 6-ianilu BSU-mik taarsigassarsiatut taaneqartut sammineqarput, kapitel 5-imili nammineerluni illuliortunut taarsigassarsiat sammineqarlutik.

Taarsigassarsiat taarsersuutinut tapiissutitaqartut (kapitel 4 naapertorlugu taarsigassarsiat) ilaqutariinnut illunut, Naalakkersuisut taakkununnga piumasaqaataannut naammassinnittunut, sanaartornernermut atatillugu tunniunneqarsinnaapput.

Taarsigassarsiat taarsersuutinut tapiissutitaqananngitsut (kapitel 6 naapertorlugu taarsigassarsiat) ilaqutariinnut illunut, illunit kapitel 4 naapertorlugu taperserneqartartunit anginerusunut allatulluunniit ilusilikkanut, sanaartornermut atatillugu tunniunneqarsinnaapput.


Agathe Fontain-ip, Atassutip inatsisartuni ilaasortaatitaasa Naalakkersuisullu siunnersuutitut saqqummiussaat

UPA 2005/119

Inissialiornermut tapersiissuteqartarneq pillugu Inatsisartut peqqussutaata nr. 1, 9. april 1992-imeersumut, taamaalilluni §21b-mi tapiissutit qaffasinnerpaaffissaat minnerpaamik 100.000 kr.-inut aalajangerneqarluni, Inatsisartunut ilaasortap Agathe Fontainip siunnersuuteqarnermigut Naalakkersuisut allannguutissatut siunnersuumik saqqummiusseqqullugit peqquneqarnissaat kissaatigaa.

Naalakkersuisut taamatut kissaateqarneq eqquutikkaat ataani allassimasuni takuneqarsinnaavoq. Inatsisartuttaaq Attaveqaqatigiinnermut Ineqarnermullu Ataatsimiititaliaata siunnersuut immikkut oqaaseqarfiginagu Inatsisartunut akuersissutigeqqullugu inassutigineqartoq taperserpaa.


UPA 2005/117

Makku qulakkeerneqarnissaat siunertaralugu boligstøttemik aaqqissuusinerup allanngortinneqarnissaanik Atassutip inatsisartuni ilaasortaatitai siunnersuummik saqqummiussipput:

1) Boligstøttimit (BSU) taarsigassarsisunut erniaaliinerit appasinnerusut.
2) Boligstøttimit taarsigassarsisut qaammammut akiliisarnissaasa aalajangersagaliornissaa.
3) Taarsigassarsisut isertitavii tunngavigalugit taarsersuutit naleqqussarnissaat.

Immikkoortunut kingullernut marlunnut kapitel 4 naapertorlugu taarsigassarsianut tunngasut Naalakkersuisut siunnersuuteqarnerminni ilaatikkaat Inatsisartut Attaveqaqatigiinnermut Ineqarnermullu Ataatsimiititaliaata paasivaa. Ataatsimiititalialli immikkortoq siulleq tapersersinnaanngilaa, ernialiusammi 6 %-iusup 70 %-iinnaa, tassa 4,2 %, taarsigassarsiaqartunit taamaallaat akilerneqartussaanera piusutigalugu kapitel 4 naapertorlugu taarsiagassarsiaqartunut erniarititat naammaginartumik appasissuseqarnerannik Naalakkersuisut isumaqarnerat Ataatsimiititaliap isumaqatigimmagu. Tamatuma saniatigut meeqqamut ataatsimut 18 inorlugit ukiulimmut angerlarsimaffimmi najugaqartumut ilanngaammik allamik 7,5 %-imik pissarsisoqarsinnaavoq.

Kapitel 6 naapertorlugu ernialiussat 8%-iuput, taakkulu ilanngaatigineqarnissaat periarfissaqarani. Ernialiussaq taanna Naalakkersuisunut ilaasortap akissuteqaammini taasaatut, inissialiornermut taarsigassarsisitsisarnermi 5,5 %-imit ernialigaasumit assersuutigalugu qaffasinnerusoq paasinarpoq. Taassuma assinganik pissuteqartumik Naalakkersuisunut ilaasortaq malillugu kapitel 6 naapertorlugu taarsigassarsiat atuuttut akilersorneri annertuumik naammassineqarsimapput, nanninersullutimmi aningaasalersuisarfiit atorlugit taarsiallit iluaqutissartaqarnerusunik taarsigassarsisinnaasimammata.

Naalakkersuisut paasissutissiinerat naapertorlugu kapitali 6-imut tunngatillugu taarsigassarsianut sinneruttunut 39-iusunut akiligassat sinnerisa 30%-imik akilersuinermut tapiissuserneqarneri landskarsimut 2,5 mio.kr. miss. aningaasartuutaasussaapput.

Puiorneqartariaqanngilarli kapitali 6 naapertorlugu illut kapitali 4-imi illunut sanilliullugit atugarissaarfiunerusussatut aaqqitaagajummata, tamannalu tunngavigerpiarlugu taarsigassarsianut tapiissutitaqaratik. Tamanna tunngavigalugu Inatsisartut Attaveqaqatigiinnermut Ineqarnermullu Ataatsimiititaliaat isumaqanngilaq kapitali 6-imut tunngatillugu taarsigassarsiat akilersorneqarnerannut maleruagassat kapitali 4-imut tunngatillugu taarsigassarsianut assersuunneqarsinnaasut.

Taamatut isumaliutersuuteqarlutik Inatsisartut Attaveqaqatigiinnermut Ineqarnermullu Ataatsimiititaliaanni amerlanerussuteqartut Siumumeersut, Inuit Ataqatigiinneersut Demokraatineersullu Atassutip Inatsisartunut ilaasortaatitaasa siunnersuutaat iluserisamisut isikkoqarluni itigartitsissutigineqarnissaa inassutigissavaat.

Ikinnersuuteqartut Atassutikkut siunnersuut akuersissutigineqassasoq inassutigaat.


UPA 2005/21

BSU-mit taarsigassarsiallit akiligassanik kinguaattoorutaasa tamarmiusut 130 mio. kr. qaangerlugit annertussuseqarnerisa kingunerisaatut Naalakkersuisut siunnersuutaat saqqummiunneqarsimavoq. Siunnersuutip pingaarnertut sammivaa peqqussummi kapitali 4, taarsigassarsiat amerlanersaasa tunniunneqarnerannut atorneqartoq. Taamaalilluni 2005-imut Aningaasanut Inatsit naapertorlugu illut 80 miss. amerlassusillit kapitali 6 naapertorlugu akilersorneqarput illullu 2.900 miss. kapitali 4 naapertorlugu akilersuiffigineqarlutik.

Taarsigassarsianik allannguinerit qaammammut akilersugassartallit

Taarsigassarsialinnut akilersuutinik akiligassanngorsimasunik akiligassalinnut taarsersugassanillu sinnerussalinnut allannguinissamut taarsigassarsianik qinnuteqarnissaq siunnersuut malillugu ajornarunnaassaaq, taamaalillunilu taarsersuinerup taarsigassarsisup akiliisinnaassuseqarneranut naleqqussarnissaa ajornarunnaarluni. Taarsigassarsianik allannguinerit qaammammoortumik akilersorneqassapput.

Taarsigassarsisimasunut ulloq 1. november 1998-ip kingornagut kinguaattooruteqalersimasunut taarsigassarsiaminnik allannguisinnaanngorlugit siunnersuutikkut tassuuna Naalakkersuisut periarfissiisimammata Inatsisartut Attaveqaqatigiinnermut Ineqarnermullu Ataatsimiititaliaata pitsaasutut isigaa. Allannguinermi taarsigassarsiallip akiliisinnaassuseqavinnera sammineqarmat ataatsimiititaliap isumatusaarnertut isigaa, soorluttaaq qaammatikkaartumik akiliuteqartarnissaq isumatusaarnerulluinnartoq. Amerlanerpaanut paasiuminarneruvoq akilersuutit akilerneqarnissaat isertitat pinerinut naapertuutikkanersumik pisarpata.

Isumakkeerinnittarnermik aaqqissussineq

Taarsigassarsiallinnut inoqutigiittut 180.000 kr. ataallugit isertitaqartartunut isummakkeerinnittarnermik aaqqissussinissaq ajornarunnaassaaq, taamaalillunilu taarsigassarsiat taarsigassatut ernialigaanngitsutut taarsersugassaanngitsutullu nuunneqarsinnaanngussallutik.

Taarsigassarsiallimmi 128.000 kr. ataallugit isertitallit akiligassaminnik isumakkeerinniffigineqarsinnaareerput. 2002-mi taamatut periarfissaqarneq taarsigassarsiallit 23%-iinut atuuppoq. Isumakkeerinninnissamik aaqqissuussineq nutaaq atorlugu taarsigassarsialinnut 15%-init suli amerlanerusunut akiitsut isumakkeerinniffigineqarsinnaanerat periarfissanngussaaq, maannali taarsigassarsiat piffissap akilersuiffiup sinnerani aningaasat qaammammut angeqatigiinnik aningaasartalittut taarsigassarsiat isumakkeerinniffigalugit akilersuinermut aaqqissuussinertalerlugit.

Taasunga atatillugu piffisssap isummakkeerinniffiusup ingerlanerani taarsigassap akilerneqarnissaanik kinguneqartinnagu illorisap taarsigassarsisuusumit tunniunneqarsinnaannginnissaa Inatsisartut Attaveqaqatigiinnermut Ineqarnermullu Ataatsimiititaliaata pitsaasutut isigaa. Tamatumunngali taarsiullugu taarsigassarsianik isumakkeerinnittarnerittaaq § 21a, imm. 2 atuuttoq malillugu piffissamik taamatut tunniusseqqusaanngiffimmik pilersitsisoqassasoq ataatsimiititaliap kissaatigaa. Taarsigassarsisup illuminut taarsigassarsiaminik isumakkeerinniffigineqarsinnaanera, tamatumalu kinguninngua illumik allamut tunisisinnaanera Ataatsimiititaliap kukkunertut isigissavaa.

BSU-mi akiligassanik kinguaattoorutit akilersinneqarsinnaanngitsut 130 mio. kr.-itut amerlassuseqalersimapput, tamannalu taarsigassarsianik akilersuisitsiniarnerup pitsaanngitsup taarsigassarsiallu isummakkeerneqarnissaannut periarfissaqartoqarneranik pitsaanngitsumik paasissutissiisarnerup ataqatigiissinneqarneranik pissuteqarluni. Inatsisartulli Attaveqaqatigiinnermut Ineqarnermullu Ataatsimiititaliaata ilanngullugu paasivaa 2002-mut Naalakkersuisut kisitsisaataat naapertorlugit taarsigassarsiallit 180.000 kr. ataallugit ukiumut isertitaqartartartut 1.560-iusut. Taarsigassarsiallit taakku akiitsut sinnerinik 300 mio. kr.-init amerlanerusunik katillugit akiligassaqarput.

Taarsigassarsiat 300 mio. kr.-inik aningaasartallit isumakkeeriffiginagit taarsigassarsiallu erniaqanngitsutut akilersugassaanngitsutullu isumakkeeriffiginagit periutsimik pitsaanerusumik Naalakkersuisut nassaarsinnaasimannginnerat Ataatsimiititaliami ikinnerussuteqartut Atassummeersup Demokraatineersullu ajuusaarnartuutippaat.

100.000 kr.-inik pitsanngoriaatissat

Taamatuttaaq inoqutigiit 180.000 kr.-it ataallugit isertitaqartutut taarsigassarsiallit siunissami illumik iluarsartuunneqarnissaanut, allilernisaanut nutarterneqarnisaanulluunniit 100.000 kr. tikillugit siunissami tapiissutinik qinnuteqarsinnaanerat § 21b, imm. 1-imi tapiissutit anginerpaaffissata marloriaatinngornissaa Naalakkersuisut siunnersuutaata kingunerissavaa.

Nutarsaanissaq akisoqaaq, taamatullu maannamut aaqqissuussisimaneq kialuunniit atorsimanngilaa. Tamanna tunuliaqutaralugu tapiissutit qaffasinnerpaaffissaat aningerusoq Inatsisartut Attaveqaqatigiinnermut Ineqarnermullu Ataatsimiititaliaata taperserluinnarpaa.


UPA 2005/21-imut allannguutissatut siunnersuut

Siunnersuutip aappassaaneerneqarneranut atatillugu allannguutissat siunnersuut manna piviusunngortinneqassasut Inatsisartut Attaveqaqatigiinnermut Ineqarnermullu Ataatsimiititaliaata kissaatigaa:


§ 25, imm. 4-mut nutaamut atatillugu

"Imm. 4. Naalakkersuisut allamik aalajangigaqanngippata imm. 3 atorneqassaaq."


Inatsisartut peqqussutaata sanioqqunneqarnissaanut Naalakkersuisut qaqugukkut piginnaatitaassanersut pillugit aalajangersagaq piumasaqaasiisuunngilaq. Naalakkersuisulli ataatsimiititaliamut paasissutissiissutigaa nammineerluni illulianut 10/40/50-imik taarsigassarsiat maleruagassiorneqarnissaat siunertaralugu § 25, imm. 3-mik sanioqqutsinissaq taamaallaat eqqarsaatigineqartoq. Tamanna tunngavigalugu Naalakkersuisoq qinnuigineqarpoq § 25, imm. 4-tut siunnersuutigineqartumut allannguutissatut siunnersuummik saqqummiusseqqullugu, taamaalillunilu taanna ima oqaasertalerneqassalluni:

"Imm. 4. Illuliortiternernut aningaasalersuineq pillugu Inatsisartut peqqussutaat nr. 4, 30. oktober 1998-imeersumi kingusinnersukkut allangortinneqartumi kapitali 3 malillugu aningaasalersuinerup pitinnissaa siunertaralugu atuisinnaanermut tunngatillugu killissarititatut imm. 3-mi taaneqartut sanioqqunneqarsinnaanerat pillugu Naalakkersuisut maleruagassanik aalajangersaasinnaapput."

Ataatsimiititaliamit piumasaqaatigineqartutut allannguutissatut siunnersuuinik Naalakkersuisut saqqummiussereerpata Illuliornermut tapiisarneq pillugu inatsisartut peqqussutaata allanngortinnissaanut Inatsisartut peqqussutissaattut siunnersuut tamanna tunngavigalugu akuersissutigineqassasoq inassutigineqarpoq.

Taama oqaaseqarluni Inatsisartut Attaveqaqatigiinnermut Ataatsimiititaliaata siunnersuutit aappassaanigassanngortippai.

 

Agathe Fontain,
siulittaasoq
Per Rosing-Petersen,
siulittaasup tullia		 Jørgen Wæver Johansen
Godmand Rasmussen Palle Christiansen

 

Ilanngussaq (pdf-format)