Inuussutissarsiutigalugu aalisartut, inuussutissarsiutigalugu piniartut inuussutissarsiutigalugulu nunalerinermik ingerlataqartut aallarteqqinnissamut tapiiffigineqartarnerat pillugu inatsisartut inatsisaat nr. 3, 21.maj 2004-meersoq.
Atuuffia
§ 1. Inuussutissarsiutigalugu aalisartunut, inuussutissarsiutigalugu piniartunut inuussutissarsiutigalugulu nunalerinermik ingerlataqartunut pigisat ajoquserneratigut, inuussutissarsiornermi sakkugisat tammarneratigut imaluunniit napparsimanikkut imaluunniit allatut timikkut ajoquserluni sulisinnaajunnaarnikkut inuussutissarsiutiminnut tunngatillugu annaasaqarsimasunut Naalakkersuisut aallarteqqinnissamut tapiissuteqarsinnaapput.
Imm. 2. Pissutsini immikkut ittuni inunnut imm. 1-imi taaneqartunut silaannaap pissusiata kingunerisaanik, inuussutissarsiornikkut nalinginnaasumik ajornartoornikkut assigisaasigulluunniit annaasanut aamma Naalakkersuisut aallarteqqinnissamut tapiissuteqarsinnaapput.
Immikkut piumasaqaatit
§ 2. Aallarteqqinnissamut tapiissutit tunniunneqarnissaannut patsisissanngortinneqarsinnaavoq ajoquserneq, annaasaqarneq, napparsimaneq imaluunniit sulisinnaajunnaarneq matuneqarsinnaanngereernersoq, matuneqarsinnaanersorluunniit, nammineerluni sillimassutitigut pisortalluunniit sillimmasiinerisigut imaluunniit namminersortut pisortalluunniit tapiissutigisartagaasigut assigisaasigulluunniit.
Aallarteqqinnissamut tapiissutinik qinnuteqaat
§ 3. Aallarteqqinnissamut tapiissutinik qinnuteqaat Naalakkersuisunut tunniunneqassaaq.
Imm. 2. Imm. 1 malillugu qinnuteqaateqarneq pissaaq Naalakkersuisunit suliarineqarsimasoq qinnuteqaateqarnermut immersugassaq atorlugu.
Imm. 3. Imm. 1 malillugu qinnuteqaammut ilanngunneqassapput qinnuteqaateqartup aningaasatigut inissisimaneranut uppernarsaatit kiisalu inuussutissarsiornermut atasumik pigisat ajoqusernerannut, annaasaqarnermut, napparsimanermut allatulluunniit timikkut ajoqusernikkut sulisinnaajunnaarnermut uppernarsaatit.
Imm. 4. Aallarteqqinnissamut tapiissutit tunniunneqartassapput sapinngisamik soqutigisaqaqatigiit kattuffiat susassaqartoq tusarniaavigereerlugu. Pissutsini § 1, imm. 2-mi aamma § 4, imm. 2-mi taaneqartuni soqutigisaqaqatigiit kattuffiat tusarniaavigineqartassaaq.
Aallarteqqinnissamut tapiissutit tunniunneqarnerat
§ 4. Aallarteqqinnissamut tapiissutit ataasiaannarluni ikiorsiissutigineqartarput minnerpaamik 2.000 kruuninik annerpaamillu 25.000 kruuninik.
Imm. 2. Pissutsini immikkut ittuni Naalakkersuisut imm. 1-imi taaneqartunit amerlanerusunik tunniussisinnaapput.
Imm. 3. Naalakkersuisut aallarteqqinnissamut tapiissutit tunniunneqarnerannut tunngavissaatissinnaavaat qinnuteqaateqartup kingornatigut tapiissutit atorneqarnerat pillugu nassuiaateqarnissaa.
Aallarteqqinnissamut tapiissutit utertinneqarnerat
§ 5. Naalakkersuisut aallarteqqinnisamut tapiissutit utertillugit akilerneqarnissaat piumasarisinnaavaat imaattoqarpat:
1) Inuk aallarteqqinnissamut tapiiffigineqartoq kingusinnerusukkut taarsiivigineqarpat, tapiiffigineqarpat allatulluunniit inatsisartut inatsisaat manna malillugu siunertamut taamaaqataanut tapiissutinut matussutissinneqarsimappat.
2) Inatsisartut inatsisaat manna malillugu piginnaatitaaffiginngisaminut tapiiffigineqarsimappat.
Imm. 2. Inuk aallarteqqinnissamut tapiiffigineqarsimasoq pisussaavoq Naalakkersuisunut nalunaarutigissallugit pissutsit atugarisami allanngorneri, taakkua kingunerisinnaallugu Naalakkersuisut, tak. imm. 1, aalajangersinnaallugu aallarteqqinnissamut tapiissutit utertillugit akileqqunissaat.
Inatsiseqartitsinernut allanut tunngassuteqartut
§ 6. Inuussutissarsiutigalugu aalisartut, inuussutissarsiutigalugu piniartut inuussutissarsiutigalugulu nunalerinermik ingerlataqartut aallarteqqinnissamut tapiiffigineqartarnerat pillugu inatsisartut inatsisaat manna pisortat ikiorsiisarnerannut imaluunniit tapiisarnerat pillugu inatsiseqartitsinernut allanut taarsiulluni atuuttuunngilaq.
Inatsimmi aningaasartuutit akilersorneqarnerat
§ 7. Inatsisartut inatsisaat manna naapertorlugu akissaajaatit Nunatta karsianit akilerneqassapput. Inatsisartut inatsisaannut aningaasaliissutinut killiliussat ukiumoortumik aningaasanut inatsisini aalajangersarneqartassapput.
Atuutilerfia
§ 8. Inatsisartut inatsisaat atuutilissaaq ulloq 1. juli 2004-mi.
Imm. 2. Tapiiffigineqartussaatitaasunut 1. juli 2004 aallarnerfigalugu pisunut Inatsisartut inatsisaat atuutsinneqarsinnaavoq.
Namminersornerullutik Oqartussat, ulloq 21. maj 2004.
Hans Enoksen/
Simon Olsen
Siullermeerinninnermut siunnersuut
Isumaliutissiissut (Aappassaaneerinninneq)