11. marts 2004

UPA 2004/23

 

Inuussutissarsiutigalugu aalisartut, inuussutissarsiutigalugu piniartut inuussutissarsiutigalugulu nunalerinermik ingerlataqartut aallarteqqinnisamut tapiiffigineqartarnerat pillugu inatsisartut inatsisissaannut nr. xx-mut xx.xxxx 2004-meersumut siunnersuut.

 

§ 1. Inuussutissarsiutigalugu aalisartunut, inuussutissarsiutigalugu piniartunut inuussutissarsiutigalugulu nunalerinermik ingerlataqartunut pigisat ajoquserneratigut, inuussutissarsiornermi sakkugisat tammarneratigut imaluunniit napparsimanikkut imaluunniit allatut timikkut ajoquserluni sulisinnaajunnaarnikkut inuussutissarsiutiminnut tunngatillugu annaasaqarsimasunut taarsiissutitut Naalakkersuisut aallarteqqinnissamut tapiissuteqarsinnaapput.
Imm. 2. Pissutsini immikkut ittuni inunnut imm. 1-imi taaneqartunut silaannaap pissusiata kingunerisaanik, inuussutissarsiornikkut nalinginnaasumik ajornartoornikkut assigisaasigulluunniit annaasanut taarsiissutitut aamma Naalakkersuisut aallarteqqinnissamut tapiissuteqarsinnaapput.

§ 2. Aallarteqqinnissamut tapiissutit tunniunneqarnissaannut patsisissanngortinneqarsinnaavoq ajoquserneq, annaasaqarneq, napparsimaneq imaluunniit sulisinnaajunnaarneq matuneqarsinnaangereernersoq, matuneqarsinnaanersorluunniit, nammineerluni sillimmassutitigut pisortalluunniit sillimmasiinerisigut imaluunniit namminersortut pisortalluunniit tapiissutigisartagaasigut assigisaasigulluunniit.

§ 3. Aallarteqqinnissamut tapiissutinik qinnuteqaat Naalakkersuisunut tunniunneqassaaq.
Imm. 2. Imm. 1 malillugu qinnuteqarneq pissaaq Naalakkersuisunit suliarineqarsimasoq qinnuteqarnermut immersugassaq atorlugu.
Imm. 3. Imm. 1 malillugu qinnuteqaammut ilanngunneqassapput qinnuteqartup aningaasatigut inissismaneranut uppernarsaatit kiisalu inuussutissarsiornermut atasumik pigisat ajoqusernerannut, annaasaqarnermut, napparsimanermut allatulluunniit timikkut ajoqusernikkut sulisinnaajunnaarnermut uppernarsaatit.
Imm. 4. Aallarteqqinnissamut tapiissutit tunniunneqartassapput sapinngisamik soqutigisaqaqatigiit kattuffiat susassaqartoq tusarniaavigereerlugu. Pissutsini § 1, imm. 2-mi aamma § 4, imm. 2-mi taaneqartuni soqutigisaqaqatigiit kattuffiat tusarniaavigineqartassaaq.

§ 4. Aallarteqqinnissamut tapiissutit ataasiaannarluni ikiorsiissutigineqartarput minnerpaamik 2.000 kruuninik annerpaamillu 25.000 kruuninik.
Imm. 2. Pissutsini immikkut ittuni Naalakkersuisut imm. 1-imi taaneqartunit amerlanerusunik tunniussisinnaapput.
Imm. 3. Naalakkersuisut aallarteqqinnissamut tapiissutit tunniunneqarnerannut tunngavissaatissinnaavaat qinnuteqartup kingornatigut tapiissutit atorneqarnerat pillugu nassuiaateqarnissaa.

§ 5. Naalakkersuisut aallarteqqinnisamut tapiissutit utertillugit akilerneqarnissaat piumasarisinnaavaat imaattoqarpat:
1) Inuk aallarteqqinnissamut tapiiffigineqartoq kingusinnerusukkut taarsiivigineqarpat, tapiiffigineqarpat allatulluunniit inatsisartut inatsisaat manna malillugu siunertamut taamaaqataanut tapiissutinut matussutissinneqarsimappat.
2) Inatsisartut inatsisaat manna malillugu piginnaatitaaffiginngisaminut tapiiffigineqarsimappat.
Imm. 2. Inuk aallartitseqqinnissamut tapiiffigineqarsimasoq pisussaavoq Naalakkersuisunut nalunaarutigissallugit pissutsit atugarisami allanngorneri, taakkua kingunerisinnaallugu Naalakkersuisut, tak. imm. 1, aalajangersinnaallugu aallarteqqinnissamut tapiissutit utertillugit akileqqunissaat.

§ 6. Inatsisartut inatsisaat manna naapertorlugu akissaajaatit Landskassimit akilerneqassapput.

§ 7. Inatsit atortuulissaaq ulloq 1. juli 2004-mi.

Namminersornerullutik Oqartussat, ulloq xx.xxxx 2004.

Hans Enoksen

/

Simon Olsen