09-05-2004

FM04/23

 

Inuussutissarsiutigalugu aalisartut, inuussutissarsiutigalugu piniartut inuussutissarsiutigalugulu nunalerinermik ingerlataqartut aallarteqqinnissamut tapiiffigineqartarnerat pillugu Inatsisartut inatsisissaattut siunnersuut

 

pillugu

 

Aalisarnermut, Piniarnermut Nunalerinermullu Ataatsimiititaliap

 

ISUMALIUTISSIISSUTAA

 

Inatsisissatut sunnersuutip aappassaaneerneqarnerani saqqummiunneqartoq

 

 

Inatsisartut ataatsimiititaliaat suliarinninnermini ukuninnga inuttaqarpoq:

 

Inatsisartunut ilaasortaq Aqqalukasik Kanuthsen, Inuit Ataqatigiit, siulittaasoq
Inatsisartunut ilaasortaq Ole Dorph, Siumut, siulittaasup tullia
Inatsisartunut ilaasortaq Isak Davidsen, Siumut
Inatsisartunut ilaasortaq Finn Karlsen, Atassut
Inatsisartunut ilaasortaq Mads Peter Grønvold, Kattusseqatigiit, sinniisussaq

 

Inuussutissarsiutigalugu aalisartut, inuussutissarsiutigalugu piniartut inuussutissarsiutigalugulu nunalerinermik ingerlataqartut aallarteqqinnissamut tapiiffigineqartarnerat pillugu Inatsisartut inatsisissaattut siunnersuut UPA 2004-imi siullermeerneqareermat Aalisarnermut, Piniarnermut Nunalerinermullu Ataatsimiititaliap misissuataarpaa.

 

Tusarniaanermit akissutisiat

Siunnersuutip matuma ataatsimiititaliami suliarineqarneranut atugassatut tusarniaanermit akissutigineqartut nuutinneri ataatsimiititaliap pissarsiarisimavai. Ataatsimiititaliap paasivaa inatsisissatut siunnersuutip suliarineqarneranut atatillugu avataaneersut tallimat Naalakkersuisunit tusarniaavigineqarsimasut. Taakkununnga tunngatillugu tusarniaavigineqartut pingasut sapaatit akunnerinit sisamanit sivikinneralaarsuarmik akissuteqarnissamut piffissalerneqarsimapput. Tamanna ataatsimiititaliap ajuusaarnartutut isigaa.

 

Apeqqutit

Ataatsimiititaliap siunnersuummik suliaqarneranut atugassatut Aalisarnermut Piniarnermullu Naalakkersuisoq apeqqutinut arlalinnut akissuteqaqqullugu ataatsimiititaliamit qinnuigineqarsimavoq. Ataatsimiititaliap apeqqutaasa Naalakkersuisunullu ilaasortap akissutaasa nuutinneri isumaliutissiissummut matumunnga ilanngunneqarput.

 

Siunnersuutip ilusiligaanera

Inuussutissarsiutigalugu aalisartut, inuussutissarsiutigalugu piniartut inuussutissarsiutigalugulu nunalerinermik ingerlataqartut aallarteqqinnissamut tapiiffigineqartarnerat pillugu Inatsisartut inatsisissaattut siunnersuummut atatillugu apeqqutit paasinarsisinneqarsimanngitsut pillugit Inatsisartut Inatsisissanik Nalilersuisarfiata allakkiaanik ataatsimiititaliaq pissarsivoq. Allakkiaq isumaliutisiissummut matumunnga ilanngunneqarpoq.

 

Siunnersuutip imarisai

Inuussutissarsiutigalugu aalisartut, inuussutissarsiutigalugu piniartut inuussutissarsiutigalugu nunalerinermik ingerlataqartut aallarteqqinniarnermut tapiiffigineqarsinnaanissaannut inatsisitigut tunngavissaasa pissarsiarineqarnissaat inatsisissatut siunnersuutikkut Naalakkersuisut kissaatigaat.

Inuussutissarsiutinik ingerlatsisut taakku pinngortitap pissusii inuttulluunniit atukkat nali-nginnaanngitsut aallavigalugit aningaasanik taarsiissutinik pissarsisinnaanermut inatsimmi tunngavissaatitaasunik eqquutitsisutut Namminersornerullutik Oqartussanit naliliivigineqarsinnaanerat inatsisip siunertaraa. Aningaasaateqarfik atorlugu tapiissutinik tunniusisinnaajumalluni inatsisikkut tunngavissap pissarsiarineqarnissaanut taarsiullugu Naalakkersuisut suliaqarnissaq toqqaasimagaat ataatsimiititaliap maluginiarpaa.

 

Inatsisissatut siunnersuummut ataatsimiititaliap aallarniutitut oqaaseqaatai

Nunatsinni pinngortitaq sakkortuumik periuseqarsinnaasarpoq inuussutissarsiutinillu ingerlatsisut inatsisissatut siunnersuummi pineqartut pinngortitap pissusaanit periartarneranillu atugassaqartitaapput. Pinngortitap inuussutissarsiutinut tunngaviusumik atugassarititai annaasaqaateqartitsisinnaapput inuussutissarsiornermiluunniit atortunik aseruisinnaallutik. Inuussutissarsiutini pingaarnerni inuussutissarsiummik ingerlatsisut ilaasa aningaasaqarnikkut periarsinnaanerat annikitsuararsuummat napparsimanerup, annaasaqarnerup sakkunilluunniit atortut ajoqusernerisa kingunerisinnaavaa inuup inuussutissarsiumminik ingerlatseqqissinnaajunnaarnera, taamaalillunilu inunnik isumaginninnikkut ikiorsiivigineqartariaqalernera.

Inuussutissarsiutinik ingerlatsisut ajutoornermit eqqugaasimasut pisunit siumut naatsorsuutigineqareersinnaasimanngitsunit ajutoornermilluunniit nalaanneqartut tapiissutinik qinnuteqaa

teqarnissamut periarfissinneqaqqullugit Inatsisartut inatsisissaannik taassuminnga Naalakkersuisut suliniuteqalersimammata ataatsimiititaliap pitsaasutut isigaa. Aningaasaqarnikkummi tapersiivigineqarnermikkut inuussutissarsiumminnut taamaalillutik uteqqissinnaalissammata.

Taamaammat Naalakkersuisunit siunnersuut, annaasaqaatimik sillimmasiissutitigut pisortanilluunniit allatigut tapersiivigineqarnikkut matussusiivigineqarsinnaanngitsut matussusiivigineqanngitsulluunniit, inunnut ikorfartuiniarnertut ataatsimiititaliap isigai.

Inatsisissatut siunnersuut pitsaasunik ajunngitsunillu amerlasuunik siunertaqartoq ataatsimiititaliap takusinnaagaluarpaguluunniit aalajangiisuusoq tassaavoq, ajornanngikkaangat inuussutissarsiutinik ingerlatsisut namminneq inuunerisaminnut pigisaminnullu sillimmasernissamut nammineerlutik akisussaasuugamik eqqaamasariaqaraat. Aaqqissuussineq sinnassaatitut atorneqarsinnaasuusariaqanngilaq. Taamaammat tassunga tunngatillugu inuiaqatigiinni apeqqutip pingaarutillip taassuma erseqqissaatiginissaa erseqqissaqqullugu Naalakkersuisunut ataatsimiititaliap kaammattuutigissavaa.

Aaqqiivigisassap taassuma, sammisap Tusagassiivik sillimmasiisarfiillu immaqa suleqatigineqarnerisigut, innuttaasunit paasineqarnissaata anguniarnissaa iluaqutaassaasoq ataatsimiititaliaq naliliivoq.

 

Inatsisip aqutsivigineqarnissaa

Inatsisissatut siunnersuut assigiinngitsorpassuarnik paasineqarsinnaavoq. Ataatsimiititaliap taakku oqaaseqarfigissanngilai, aalajangersakkalli ataasiakkaat tunngaviusumik taamaallaat isummerfigissallugit.

Qinnuteqaateqartutut pineqartoq sillimmasiissuteqanngippat sillimasernissamulluunniit killilimmik periarfissaqarpat ajutoornermik il.il. pisoqartillugu tapiissutinik tunineqartariaqarnersoq Naalakkersuisut naliliisinnaassasut inatsisissatut siunnersuummi § 2 periarfissaqartitsivoq.

Maleruagassaq taanna qinnuteqaatinik naliliinermi ilaatinneqassappat siunnersuummi § 2 naa-pertorlugu pisuni qanoq ittuni sillimmasiinissamut periarfissamik atuinissamik piumasaqaateqartoqartarnissaanik nammineq atugassanik maleruagassiorneq aqutsinermit isigalugu Naalakkersuisunut pitsaasuussaaq. Taanna atorlugu aqutsinikkut naliliinermi assigiimmik pinninnissamik aallaaviup isiginiarneqanngitsoorsinnaanera annikillisinneqarsinnaavoq.

 

Siunnersuutip aqutsinikkut aningaasatigullu kingunerisassai

Inatsisip taassuma aqutsivigineranut aningaasartuutigisassat killeqartussaanerannik naliliineq, taamaammallu taakkua pisortaqarfimmut aningaasaliissutigineqartunit akilerneqarsinnaassa

sut ataatsimiititaliap pitsaalluinnartuusutut isigaa. Inatsit taanna naapertorlugu qinnuteqaatinik suliaqarnermi sulianik suliarinnittarnermut inatsimmut tunngaviusut aammattaaq malinneqartussaammata suliassap suliarinissaanut inatsisilerinikkut sulisorineqartussat pisariaqartut pissarsiarineqartariaqarput.

 

Ataatsimiititaliap inassuteqaataa

 

Ataatsimiititaliap isumaqatigiittup siunnersuut isumaqatigaa nuannaarutigalugulu immikkut ikiorsiisarnermut aningaasaateqarfimmut taartaassussamik inatsisiliortoqarnissaanik Naalakkersuisut suliniuteqalersimammata. Inatsisartut inatsisaata tamatigoortumik atorneqarsinnaasuunera inatsisip Naalakkersuisunit aqutsivigineqarnissaanut akornutaanavianngitsoq ataatsimiititaliamit qularutigineqanngilaq. Taamaalilluni inatsit taanna naapertorlugu tapiiffigineqarnissamik qinnuteqaatit assigiimmik suliarineqarsinnaallutillu assigiimmik pinnittussaatitaanermut tunngaviit malinneqarsinnaassapput.

Inatsisartut Aalisarnermut, Piniarnermut Nunalerinermullu Ataatsimiititaliaat taama oqaaseqarluni Inuussutissarsiutigalugu aalisartut, inuussutissarsiutigalugu piniartut inuussutissarsiutigalugulu nunalerinermik ingerlataqartut aallarteqqinnissamut tapiiffigineqartarnerat pillugu Inatsisartut inatsisissaattut siunnersuut aappassaanigassanngortippaa.

 

	Aqqalukasik Kanuthsen, Inuit Ataqatigiit siulittaasoq
Ole Dorph SiumutSiulittaasup tullia		Isak Davidsen Siumut
Finn Karlsen Atassut		Mads Peter Grønvold Kattusseqatigiit