11. marts 2004

UPA 2004/23

 

Oqaaseqaatit nalinginnaasut.

Inatsisissatut siunnersuummut matumunnga tunngaviuvoq konto 20.11.50-imi FL 2004-mi siunertanut siunnersuummi allaaserineqartunut 3 mio. kruunit immikkoortinneqarsimammata. Siunnersuut manna akuerineqassappat aningaasat taakkua tapiissutinut immikkut kontomut nuunneqassapput.

Siusinnerusukkut atuussimagaluarpoq AImmikkut ikiorsiinermut Aningaasaateqarfik@ siulersuisoqarluni malittarisassaqarlunilu.

Kisiannili Inatsisartut Ombudsmandiata isornartorsiorsimavaa Immikkut ikiorsiinermut Aningaasaateqarfik aqqutigalugu tapiissutit aqunneqarnerat. Ombudsmandip isornartorsiorsimavaa Immikkut ikiorsiinermut Aningaasaateqarfik pisortat nalinginnaasumik aqutsinerannut ilaasussaagaluarluni taamaallaat aqunneqarmat malittarisassatigut maleruagassanik ilalikkut. Taamaattumik Ombudsmandi oqarpoq Namminersornerullutik Oqartussat eqqarsaatigisariaqaraat aningaasaateqarfiup inatsiliornivikkut aqunneqarnissaa. Tamatumani innersuussutigineqarpoq Ombudsmandip 1998-imi nalunaarutaani quppernerit 40-45.

Siunnersuutikkut matumuuna Naalakkersuisut siunertarinngilaat aningaasaateqarfiliornissaq, kisiannili uparuartuineq ilaatigut akueriumallugu ikiorsiisarnermut malittarisassiornissaq.

Inatsisissatut missingersuummut tunngatillugu aperineqarsimapput KNAPK, SPS aamma Kalaallit Forsikring. Oqaaseqaataat inatsisissatut missingersuummut ilanngunneqarsimapput.

Inatsisartut inatsisissaannut siunnersuut oqaaseqaatitaalu pisortanut makkununnga tusarniaassutigineqarsimapput. *-imik nalunaaqutsikkat tusarniaaffigineqaramik akissuteqarsimapput:

*Ilaqutariinnermut pisortaqarfik, KNAPK aamma *SPS.

SPS oqaaseqaatissaqanngilaq. Ilaqutariinnermut pisortaqarfiup aperineqarluni akissummini ilisimatitsissutigaa ikiorsiissutit siunnersuummi § 1-imi taaneqartut ilaatigut matuneqareersimammata pisortanit ikiorsiissutit pillugit inatsisartut peqqussutaanni nr. 10-mi 1. november 1982-imeersumi § 16-imi. Ikiorsiineq siuliini taaneqartoq ikiorsiinernit allanit annikinnerummat siunissami malinneqassaaq pisortanit ikiorsiisarneq pillugu inatsisartut peqqussutaanni nr. 10-mi 1. november 1982-imeersumi maleruagassaq, aallarteqqinnissamut tapiissutinik qinnuteqartarneq pisassasoq pisortanit ikiorserneqarneq pillugu inatsisartut peqqussutaanni nr. 10-mi 1. november 1982-imeersumi malittarisassat malillugit.

 

Siunnersuutip aningaasatigut allaffissornikkullu kingunissai.

Inatsisartut 2004-mut aningaasanut inatsisaanni siunertamut 3 mio. kruunit immikkoortinneqarsimapput. Naatsorsuutigisariaqarpoq inatsisartut inatsisaata allaffitsigut aqunneqarneranut kontorfuldmægtigip ukiup affaanut sulisarnissaa.

 

Inatsisissatut siunnersuummi aalajangersakkanut ataasiakkaanut oqaaseqaatit

 

§ 1-imut

Naatsorsuutigineqarpoq inatsisip siunertaa malillugu tapiissutit tunniunneqartassasut. Anguniagaasariaqarpoq qinnuteqartoq maannamut inuussutissarsiutigisimasaminik ingerlatitseqqittuartunngussasoq taamalu pisortanit ikiorsiissutinik assigisaannillu ikiorserneqassaarluni.

Aningaasat ikiorsiissutitut/tapiissutitut qinnutigineqartorpiaat tunniunneqarnerata kingunerissavaa qinnuteqartup inuussutissarsiumminik ingerlatitseqqissinnaanera. Inatsisartut inatsisissaanni periarfissinniarneqarpoq annaasanut allatut matuneqarsinnaanngitsunut matussusiisarnissaq.

Inuussutissarsiutigalugu aalisartut, inuussutissarsiutigalugu piniartut inuussutissarsiutigalugulu nunalerinermik ingerlatsisut kikkorpiaanerannut tunngatillugu taakkua inatsisitigut qanoq paasineqartarnerat sukkulluunniit atuuttoq innersuussutigineqarpoq.

Oqaatigineqassaaq naatsorsuutigineqarmat § 1, imm. 1 oqaasertai malillugit sakkortungaatsiartumik paasineqassasoq. Pissutsit allat inatsisip siunertaata ataaniittut § 1, imm. 2 malillugu suliarineqassapput.

 

§ 1, imm. 1-mut.

Pigisat ajoquserneranni pineqarpoq pigisat aalaakkaasut pigisallu allat ajoqusernerat, uumasuutit ilanngullugit. Atortut Ainuussutissarsiornermut tunngasuunerat@-nnut aalajangiisussaavoq inuussutissarsiutip ingerlannissaanut atanersut pisariaqarnersullu.

Napparsimanerup qanoq paasineqarnissaanut apeqqutaavoq nakorsat napparsimaneq qanoq paasisarneraat. Pingaarneruvoq inuup sulisinnaajunnaarsimanera. Taamaattumik tapiissutinik qinnuteqarnermi nakorsap uppernarsaataa ilanngunneqassaaq. Piumasarineqanngilaq napparsimanerup qanoq sivisutiginera ilanngunneqassasoq. Pingaarnerusoq tassaavoq napparsimanerup nalaani inuussutissarsiummut tunngatillugu annaasaqarsimaneq napparsimanerup kingunerisaanik inuutissarsiummut uteqqinnissamut ajornarnerulersitsisoq. Assersuutit ilagaat napparsimalluni uninnganerup nalaani inuussutissarsiummi atortut aserfallatsaalineqarsinnaasimannginnerat.

 

§ 1, iimm. 2-mut.

Aalajangersakkami tassani siunertaavoq inatsisartut inatsisaanni aamma ilaassasut pissutsit oqaatsit isumalersorneqarneratigut § 1, imm. 1-miissinnaanngitsut, kisiannili pisut pissuseqataat inatsisip siunertaa malillugu tapiiffigineqarsinnaasut.

Aalajangersakkami tassani pingaarnerutillugit sammineqarput pisut assigiinngitsunut tamanut tunnganerusut. Pisut tamakkua tassaasinnaapput silaannaap allanngorneri soorlu silaannaap kiannerulerneri assigisaalluunniit aamma ajutoorujussuarfiit soorlu anorersuarneri assigisaalluunniit. Aamma tassaasinnaapput niuernermik tunngaveqarnerusut soorlu aalisakkanit nioqqutissiat, piniakkanit nioqqutissiat nunalerinermillu nioqqutissiat akikillineri.

Tamatuma saniatigut pisut aalajangersimasut imaaliinnaq § 1, imm. 1-imut atanngitsut aalajangersakkamiissinnaapput, takuulli inatsimmi anguniagaq.

§ 1, imm. 2-p atorneqarnera immikkut ittunut tunngatittariaqarpoq, tak. Apissutsit immikkut ittut@. § 1, imm. 2-mi pisartut nalunaarsornerat tamakkiisuunngilaq.

Soqutigisaqaqatigiit kattuffiat susassaqartoq tusarniaavigineqassaaq, tak. § 3, imm. 4.

 

§ 2-mut

Tapiissutit agguaannerat naliliinikkut pisassaaq. Pissutsit siunnersuummi § 2, imm. 1-imi taaneqartut tapiissutinik tunniussinermi immikkut pingaartinneqassapput.

 

§ 2, imm. 1.

Oqaaseq Amatusineq@ imatut paasineqassaaq pisoq patsisigalugu aningaasanik tunniussineq.

§ 2, imm. 1 malillugu aamma pisoq pisortanit nammineerluniluunniit sillimmaserneqarsinnaassanngilaq. Tapiissutit sillimmasiisarnermi unammilleqatigiinnermik equtitsisuussanngillat, tak. unammilleqatigiinneq pillugu inatsisartut inatsisaat nr. 28 30. oktober 1992-imeersoq. Tamanna imatut paasineqassaaq aallarteqqinnissamut tapiissutit namminersortut sillimmaseeriaasiinut aalajangersimasunut taartaasussatut issanngitsut.

Suulluunniit sillimmasernissaanut apeqqutaavoq annaasaq sillimmaserneqarsinnaanersoq namminersortut pisortalluunniit sillimmasiutinik tunniussineratigut.

APisortat sillimmasiinerat@ tassaaneruvoq sulilluni ajoqusernerup kingunerinut sillimmasiisarneq pillugu inatsisip Kalaallit Nunaannut atortuulernera pillugu peqqussut aaqqissuussinerilluunnit taamaaqatai malillugit aningaasanik tunniussineq.

"Namminersortut sillimmasiinerat" tassaavoq namminersortunit sillimmasiinermik neqeroortuniit assigisaannilluunniit sillimmasiinikkut sullinneqarnerit.

Taamaalilluni inatsisartut inatsisaat tapiissutinut allanut sanilliullugu tulliuvoq. Tamannali atuutinngilaq pisortaniit ikiorsiissutit pillugit peqqussut sukkulluunnit atuuttoq malillugu inuussutissarsiornermi sakkussanik pisinermut tapiissutit.

Qinnuteqartoq kingusinnerusukkut soqutigisamut tassungarpiaq matussutissanik tapiiffigineqarpat tapiissutaasimasut uterteqquneqarsinnaapput § 5 malillugu.

Tapiissutit tunniunneqartassapput naliliineq malillugu aalajangersakkami tunngavissat pingaarnerutillugit. Naatsorsuutigisassat allat tassaasinnaapput inuit atugarisaannut tunngasut, takuulli inatsisip siunertaa. Assersuutaasinnaavoq ajoquserneq sillimmasernikkut matuneqarsinnaasimassagaluartoq, kisiannili sillimmasernissamut akiliutissap qaffasippallaarnera patsisigalugu qinnuteqartumut ajornarsimasoq isertitakippallaarneq patsisaalluni. Taamatut pisoqartillugu aallarteqqinnissamut tapiissuteqartoqarsinnaavoq.

 

§ 3-mut

 

§ 3, imm. 2-mut.

Naalakkersuisut kingusinnerpaamik inatsisip atulernerani suliarissavaat qinnuteqarnissamut immersugassaq inatsimmi matumani suliassat isumannaatsumik suliarisarnissaat pillugu piumasaasunik eqqortitsisoq. Qinnuteqarnermut immersuassami tassani piumasarineqassaaq pissutsit pisariaqartut tamarmik ilisimatitsissutigineqarnissaat. Tamatuma saniatigut piumasarineqartariaqarpoq qinnuteqartup aningaasatigut missingersuusiornermigut assigisaasigullu qularnarunnaarsissagaa tapiissutit inatsisartut inatsisaanni anguniakkami piumasaasunik naammassinnissasut. Qinnuteqarnermi immersugassaq suliat suliarineqarnerannut naleqqussartuarneqarsinnaavoq.

Pissutsinut § 1, imm. 2-mi eqqartorneqartunut immikkut qinnuteqariaasiliortoqarsinnaavoq. § 5 malillugu atorsinnaanissamut piumasaanngilaq innuttaasup utertillugit akileeqqusaasinnaanermik ilisimatinneqarnissaa. Aqutsinermili pissuserissaarnerup ilagaa utertillugit akileeqqusaasinnaanerup ilisimatitsissutigineqarnissaa. Qinnuteqarnermi immersugassaq § 3, imm. 2-mi taaneqartoq aqqutigalugu tamanna pisinnaavoq. § 5, imm. 2, oqaaseqatigiit aappaat malillugu allannguutinik ilisimatitsisussaatitaaneq qinnuteqartumut ilisimatitsissutigineqassaaq. Tamanna pisinnaavoq qinnuteqarnermi immersugassaq aqqutigalugu.

 

§ 3, imm. 3-mut.

Paasissutissat inatsisip siunertaa pissutigalugu tassaassapput paasissutissat suliap suliarinissaanut pisariaqartut. Paasissutissat taakkua tassaasinnaapput tammaasamut uppernarsaat soorlu politiinut nalunaarutiginninnikkut. Tassaasinnaapput napparsimanermut uppernarsaatit nakorsap atsiugai il.il. Naalakkersuisut piumasaasut tamakkua aalajangersassavaat.

 

§ 3, imm. 4-mut.

Soqutigisaqaqatigiit kattuffiata susassaqartup tusarniaaffigineqarnissaanut siunertaavoq qinnuteqaatit suliarineqarneranni suliassamut tunngasutigut siunnersorneqarnissaq, aqutsisut pisariartissimappassuk. Tusarniaaneq allaffitsigut aqutsisunit pissarsiariniarnera ajornakusoorluinnaraluarpalluunniit tapiissuteqartoqarsinnaavoq. Pissutsinut siunnersuummi § 1, imm. 2-mi § 4, imm. 2-milu taaneqartunut tunngatillugu soqutigisaqaqatigiit kattuffiat tusarniaavigineqassaaq. Maannarpiaq KNAPK inuussutissarsiutigalugu aalisartunut inuussutissarsiutigalugulu piniatunut soqutigisaqaqatigiiffittut kattuffiuvoq. SPS nunalerisunut soqutigisaqaqatigiiffittut kattuffiuvoq. Soqutigisaqaqatigiiffiit kattuffii marluusut tusarniaanermi peqataajumasimapput. Taakkunannga tusarnianermut akissutit pisussaaffiliisuunngillat, tassa tusarniaanermut akissut allaffitsigut aqutsisunut inatsisitigut pituttuisuunngilaq.

 

§ 4-mut

 

§ 4, imm. 1-imut.

Inatsisartut inatsisaanni siunertamut tunngatillugu aalajangersakkami anguniagaavoq inuussutissarsiutip ingerlanneranut pisariaqarluinnartumik pisoqartillugu tapiissutit tunniunneqartarnissaat. Taamaattumik annaasanut tapiiffigeqqusanut tapiissutissat minnerpaaffilerneqarsimapput. Tapiissutissat annerpaaffilerneqarnerannut patsisaavoq tapiissutit innuttaasunut sapinngisamik amerlasuunut iluaqutaaniassammata. Aningaasat rekvisitioni atorlugu tunniunneqartassapput.

 

§ 4, imm. 2.

Taamaakkaluartoq Apissutsini immikkut ittuni@ annerusumik tapiisoqarsinnaavoq. Pissutsit tamakkua immikkut ittuussapput. Pissutsinut immikkut ittunut assersuutaasinnaapput pissutsit § 1, imm. 2-mi ilaasut. Naalakkersuisut aalajangissavaat pissutsit immikkut ittut suussanersut. Soqutigisaqaqatigiit kattuffiat tusarniaavigineqassaaq, tak. § 3, imm. 4.

 

§ 4, imm. 3.

Aalajangersakkami siunertaavoq inatsisip siunertaanut tunngatillugu tapiissutit tunniunneqartut pitsaanerpaamik iluaqutigineqarnissaata qulakkeernissaa. Tassalu nassuiaatikkut qulakkeerneqassaaq tapiissutit siunertamut atorneqarnerat. Tapiissutinik tunniussinermi erseqqissarneqassaaq nassuiaammut suut piumasarineqarnersut. Naalakkersuisut nassuiaatit tunniunneqarnissaannut piumasaasut piffissarititaasullu aalajangersassavaat. Nalunaartartussaatitaanerup malinneqarnissaa qulakkeerumallugu Naalakkersuisut ilaatigut aalajangersinnaavaat § 5, imm. 1, nr. 2 malillugu utertillugit akiliisoqassasoq nalunaartussaatitaaneq malinneqanngippat.

 

§ 5-imut

§ 5, imm. 1.

§ 5, imm. 1, nr. 1 malillugu Naalakkersuisut utertillugit akiliinissaq aalajangersinnaavaat tapiissutit tunngavissaqanngitsumik tiguneqarsimappata. Aalajangersagaq taanna atorneqarsinnaavoq nalunaartussaatitaaneq § 4, imm. 3-mi peqqussutasoq inuup eqqortinngippagu.