Meeqqanik inuusuttunillu ikiorsiisarneq pillugu Inatsisartut peqqussutaata allanngortinneqarnera pillugu Inatsisartut peqqussutaat nr. 9, 14. november 2004-meersoq.
(Tassanngaannartumik inissiinermut tunngavissarititap erseqqissarneqarnera)

 

§ 1

Meeqqanik inuusuttunillu ikiorsiisarneq pillugu Inatsisartut peqqussutaanni makku allanngortinneqarput:

1. § 8, imm. 3, imatut oqaasertalerneqassaaq:
"Meeqqap angerlarsimaffiup avataanut inissinneqarnissaanik aalajangiisoqannginnerani suliaq kommunimi oqartussaasoqarfiit assigiinngitsunik suliallit ataatsimiititaanut oqaaseqarfigisassanngorlugu saqqummiunneqassaaq. § 10 a naapertorlugu utaqqiisaagallartumik aalajangiisoqartillugu tamanna tamatuma kingorna pissaaq".

2. § 10-p kingorna ilanngunneqarpoq:
"§ 10 a. § 6, imm. 3, § 10 aamma § 29 malillugit aalajangiinerit meeqqap inuusuttulluunniit tassanngaannartumik pisariaqartitsinera eqqarsaatigalugu suliap kommunalbestyrelsimit suliarineqarnissaa utaqqisinneqarsinnaanngippat ataatsimiititalialiap meeqqanut inuusuttunullu suliassanik inissiiffiusimasup siulittaasuanit utaqqiisaagallartumik aalajangiiffigineqarsinnaapput.
Imm. 2. Imm. 1 malillugu utaqqiisaagallartumik aalajangiineq sapinngisamik piaarnerpaamik ullullu arfineq marluk qaangiutsinnagit kommunalbestyrelsimut akuerisassanngorlugu saqqummiunneqassaaq, suliniut atorunnaareersimagaluarpalluunniit."

3. § 11 imm. 3-p kingorna imm. nutaatut ilanngunneqarpoq:
"Imm. 4. Imm. 1-imi aamma imm. 2-imi aalajangersagaq § 10 a malillugu utaqqiisaagallartumik aalajangiisoqartillugu sanioqqunneqarsinnaavoq, inissiinermi pisimasunut naleqqiullugu tamanna pisariaqartutut nalilerneqarpat."

4. § 12 imatut oqaasertalerneqassaaq:
"Akuersisiteqqaarani inissiinissamik aalajangerneq sapinngisamik nalunaaquttap akunneri 24-it qaangiutsinnagit angajoqqaatut oqartussaassuseqartumut ilisimatitsissutigineqassaaq. Nalunaarummiissapput inissiinermi tunngavigineqartut aammalu illersuisoqarsinnaatitaanermik kiisalu inissiineq pillugu oqaaseqarsinnaatitaanermik ilisimatitsissut."

5. § 14, imm. 1, imatut oqaasertalerneqassaaq:
"Kommunalbestyrelsi meeqqanik imaluunniit inuusuttunik angerlarsimaffiup avataanut inissiinissamik aalajangiitinnagu, tak. §§ 9 aamma 10, iliuusissatut pilersaarusiaq suliarineqassaaq. Iliuusissanik pilersaarusiap suliarineqarnissaa inissiinissami utaqqineqarsinnaanngippat, imaluunniit § 10 a naapertorlugu utaqqiisaagallartumik aalajangiisoqarneratigut inissiisoqarpat, inissiinermi siunertaasup naatsukullammik nalunaarutiginissaa naammappoq, tamanna § 10 a, imm. 2 imaluunniit § 12 malillugit allakkatigut ilisimatitsissuteqarnermut atatillugu pissappat. Tamatuma kingorna iliuusissanik pilersaarusiaq piaarnerpaamik kommunalbestyrelsip suliarissavaa, kingusinnerpaamik inisseereernermi ullut 14-nit qaangiutsinnagit."

6. § 18, imm. 1, imatut oqaasertalerneqarpoq:
"Ilaqutariit inuussutissarsiutigalugu paarsisartut tassaapput ilaqutariit paarsisartut, meeqqanut inuussuttunullu eqqarsartaatsimikkut annertuumik ajoquserneqarsimasunut sumiginnagaasimasunullu imaluunniit meeqqanut inuusuttunullu timimikkut eqqarsartaatsimikkulluunniit annertuumik innarluutilinnut isumaginninnissamut immikkut tunngavissiisumik isumaginninnikkut sullissinissamut ilinniakkamik tunuliaqutallit assigisaanilluunniit inuussutissarsiornermi misilittagallit."

7. § 25 imm. 1-ip kingorna immikkoortutut nutaatut ilanngunneqarpoq:
"Imm. 2. Akiliutissaq imm. 1-imi taaneqartoq pillugu, ilanngullugu kommunit akiliutissaanni aningaasartuutit suut ilaanersut pillugit aalajangersakkat, erseqqinnerusunik Naalakkersuisut aalajanersaasinnaapput."

8. § 35-imi imm. 2-p kingorna immikkoortutut nutaatut ilanngunneqarpoq:
"Imm. 3. Suliniutit imm. 1-imi taaneqartut pillugit erseqqinnerusunik Naalakkersuisut aalajangersaasinnaapput."

9. § 37-imi imm. 3 atorunnaarpoq.

10. § 39 imatut oqaasertalerneqassaaq:
"§ 39. § 6, imm. 3, §§ 9 – 10a, § 17, § 29 aamma § 38 malillugit aalajangiinerit isumaginnittoqarfiup aqunneqarnera aaqqissuussaaneralu pillugit Inatsisartut peqqussutaanni aalajangersakkat tunngavigalugit Isumaginninnermut Naammagittaalliuuteqartarfimmut naammagittaalliuutigineqarsinnaapput."

 

§ 2

Inatsisartut peqqussutaat 1. januar 2005-imi atuutilerpoq.

Namminersornerullutik Oqartussat, ulloq 14. november 2004

Hans Enoksen

/

Asii Chemnitz Narup

---

Siunnersuummut nassuiaatit

Saqqummiussissut

Isumaliutissiissut (Aappassaaneerinninneq)

Akissuteqaat (Aappassaaneerinninneq)