15. oktober 2004

UKA 2004/29

 

Meeqqanik inuusuttunillu ikiorsiisarneq pillugu Inatsisartut peqqutaata allanngortinneqarneranik Inatsisartut peqqussutissaattut siunnersuut
(Tassanngaannartumik inissiinermut tunngavissarititap erseqqissarneqarnera)

pillugu

Inatsisartut Ilaqutariinnermut Peqqissutsimullu Ataatsimiititaliaata

ISUMALIUTISSIISSUTAA

Siunnersuutip aappassaaneerneqarnerani saqqummiunneqartoq

 

Inatsisartut ataatsimiititaliaat suliarinninnermini ukuninnga inuttaqarpoq:

Inatsisartunut ilaasortaq Enos Lyberth, Siumut, siulittaasoq
Inatsisartunut ilaasortaq Agathe Fontain, Inuit Ataqatigiit, siulittaasup tullia
Inatsisartunut ilaasortaq Doris Jacobsen, Siumut
Inatsisartunut ilaasortaq Godmand Rasmussen, Atassut
Inatsisartunut ilaasortaq Astrid Fleischer Rex, Demokraatit

Inatsisartut Ilaqutariinnermut Peqqissutsimullu Ataatsimiititaliaata UKA 2004-mi siullermeerinerup kingorna siunnersuut nassuiaatitai ilanngullugit misissorpaa.

 

Ataatsimiititaliap aallarniutitut oqaaseqaatai:
Tassanngaannartumik inissiissarnermut tunngatillugu apeqqutit Naalakkersuisunit qaqinneqarnerat Inatsisartut Ilaqutariinnermut Peqqissutsimullu Ataatsimiititaliaannit assorsuaq iluarisimaaneqarpoq, inatsimmimi pineqartumut tunngasut erseqqissaavigineqarsimanngitsut paasinarsisimammat. Tassanngaannartumik inissiisariaqalernerup qanoq ingerlanneqartarnissaa pillugu erseqqissunik maleruagassaqarnissaq pingaaruteqartutut ataatsimiititaliamit isigineqarpoq.

Sumiginnaaneq pillugu ajornartorsiutit nunatsinni innuttaasunit eqqumaffigineqarput. Meeqqat inuusuttullu piginnaatitaaffiisa isumagineqarnissaat Kalaallit Nunaata akisussaaffigai. Angajoqqaatut oqartussaassusilinnit sumiginnarneqarpata inuiaqatigiit ikiuuttussaatitaapput, taamaaliussappullu meeqqamut pitsaanerusussaq aallaavigalugu.

Siunnersuummik suliarinninnermut atatillugu oqaaseq "annertuumik" § 18, imm. 1-imi ilaatineqartariaqarnersoq ataatsimiititaliap oqaluuseraa.

Siunnersuut ataatsimut isigalugu ataatsimiititaliamit amerlanerussuteqartumit tapersersorneqarpoq, ikinnerussuteqartorli Demokraatineersoq isumaqarpoq § 18, imm. 1-imi oqaaseq "annertuumik" peerneqartariaqartoq.

Kiisalu siuliani taaneqartut tunngavigalugit Ilaqutariinnermut Peqqissutsimullu Naalakkersuisoq Asii C. Narup siunnersuummik ataatsimiititaliap suliaqarneranut atatillugu ataatsimiititaliami isumasioqatigalugu ataatsimeeqatigineqarpoq.

Isumasioqatigiilluni ataatsimiinnissamut aggersaassut Naalakkersuisunilu ilaasortap oqaasissaasa allattorsimaffiat isumaliutissiissummut matumunnga ilanngussatut ilanngunneqarput.

Ataatsimiititaliami amerlanerussuteqartut Siumut, Inuit Ataqatigiit og Atassullu siunnersut pillugu ima oqaaseqaateqarumapput:

Oqaaseq "annertuumik" siunnersuummi ilaatinneqassanersoq paasinarsitikkumalluni isumasioqatigiilluni ataatsimiinnissaq pisariaqarsinnaasoq siunnersuummik siullermeerinermi oqaatigineqarpoq.

Siunnersuutip § 18-iani oqaasertaliussat allanngortinneqarnissaannut tunngavissaqanngitsoq amerlanerussuteqartut isumaqarput.

Tamanna tunngavigalugu siunnersuut maanna ilusimisut iluseqartillugu akuersissutigineqassasoq ataatsimiititaliami amerlanerussuteqartut siuliani taaneqartut inassutigaat.

Ataatsimiititaliami ikinnerussuteqartoq Demokraatineersoq siunnersuut pillugu ima oqaaseqaateqarumavoq:

Oqaaseq "annertuumik" siunnersuutip § 18, imm. 1-ianit peerneqartariaqartoq Demokraatit isumaqarput. Pineqartut annertusinerisigut ilaqutariinnut inuussutissarsiutigalugu paarsisartunut, meeqqap inuusuttulluunniit piumasaqaataanik pisariaqartitaanillu naammassinnissinnaanngitsunut, meeqqamik inuusuttumilluunniit inissiisoqarsinnaanerata aarleqqutigineqarsinnaanera tamatumunnga tunngavilersuutigineqarpoq.

Annertuumilli sumiginnakkat piumasaqaataannik pisariaqartitaannillu isumaginninnissamut paaqqinniffik atortorissaaruteqarlunilu tamakkiisumik piginnaanilinnik sulisulik naleqqunneruvoq. Taamaattumik meeqqat annertuumik sumiginnakkat ilaqutariinni inuussutissarsiutigalugu paarsisartuniinnatik ulloq unnuarlu paaqqinniffinniittariaqartut Demokraatit isumaqarput.

Tamanna tunngavigalugu allannguutissatut siunnersuummik tamatumunnga naapertuuttumik Naalakkersuisut saqqumiussinisaat ataatsimiititaliami ikinnerussuteqartup siuliani taaneqartup kaammattuutigaa.

Taama oqaaseqarluni Inatsisartut Ilaqutariinnermut Peqqissutsimullu Ataatsimiititaliaata siunnersuut aappassaaniigassanngortippaa.

 

	Enos Lyberth, Siulittaasoq
Agathe Fontain, siulittaasup tullia		Astrid Fleischer Rex
Godmand Rasmussen		Doris Jacobsen

 

Ilanngussaq 1

Ilanngussaq 2 (Qarasaasiatigut pigineqanngilaq)