21. september 2004 UKA2004/29
Meeqqanik inuussuttunillu ikiorsiisarneq pillugu Inatsisartut peqqussutaata allanngortinneqarneranik Inatsisartut peqqussutissaattut nr. xx, yy 2004-meertussatut siunnersuut
Saqqummiussissut
(Ilaqutariinnermut Peqqissutsimullu Naalakkersuisoq)
Siullermeerinninneq
Aallaqqaammut maluginiaqqussavara siunnersuut nassuiaatitaalu aaqqitat 20. september 2004-imik ullulikkat agguaanneqarsimammata, siunnersuummut siusinnerusukkut agguaanneqartumut 3. august 2004-imi ullulerneqarsimasumut taartissatut.
Meeqqanik inuusuttunillu ikiorsiisarneq pillugu inatsisartut peqqussutaat maanna atuuttoq 2003-mi inatsisartut upernaakkut ataatsimiinneranni akuersissutigineqarpoq. Inatsisartut peqqussutaata kommunini atorneqarnerata takutippaa arlalialunnguanik amigaateqartoqartoq allannguutitut siunnersuutikkut matumuuna iluarsiiviginiarneqartunik.
Meeqqanik inuusuttunillu ikiorsiisarneq pillugu Inatsisartut peqqussutaata allanngortinneqarneranik siunnersuutip matuma siullertut siunertaraa meeqqap inuusuttulluunniit tassanngaannartumik misissuiffigineqarnissaanik, angerlarsimaffiup avataanut inissinneqarnissaanik inissinneqarnerataluunniit attatiinnarneqarnissaanik pisariaqartitsisoqartillugu siulittaasup aalajangiisinnaaneranut tunngavissarititanik erseqqissaanissaq.
Tassunga atatillugu tassanngaannartumik inissiisoqartillugu illersorteqarnissamik neqerooruteqartarnissap oqaaseqarsinnaatitaanerullu tassanngaannartumik inissiisoqartillugu sanioqqunneqarnissaa tulluarnerpaavoq, tamanna inissiinermi pisunut naleqqiullugu pisariaqartutut nalilerneqarpat.
Erseqqissaatigineqassaaq ulloq unnuarlu paaqqinniffiit ingerlanneqarnerat 100%-imik kommuninit suliassaammat/nammatassaammat, taamaattoq Naalakkersuisut kommunit sinnerlugit suliassaqarfimmi aqutsineq ingerlataralugu.
Ukiuni kingullerni ulloq unnuarlu paaqqinniffeqarnermi suleriaasiusimavoq ukiumut tullermut ani-ngaasaqarnermut ukiorititaasumut aningaasartuutissatut missingersuutit 50%-iat kommuninut ataatsimoortumik tapiissutit 50%-imik annikillinerisigut aammalu ukiumut tullermut aningaasaqarnermut ukiorititaasumut aningaasartuutissatut missingersuutit 50%-iat kommunit inissiisuusut akiliutissaannik akiliisitsiniaanikkut matussuserneqartarlutik..
Taamaalillutik aningaasartuutit ulloq unnuarlu paaqqinniffeqarnerup ingerlanneqarneranut tunngassuteqartut tamakkiisumik kommunit qaqugumulluunniit matussusertartussaavaat.
Naalakkersuisut naapertuunnerpaatippaat kommunit akiliutissaannut aningaasartuutit suut ilaanersut Naalakkersuisut nalunaarusiornikkut aalajangersaasinnaappata. Taamaattumik inatsisartut peqqussutaanni akiliutigineqartartoq pillugu nalunaarusiornikkut aalajangersaanissamik piginnaatitsissutip ilanngunneqarnissaa Naalakkersuisut siunnersuutigaat.
Naalakkersuisut paasilersimavaat oqaaseq "sumiginnagaasimasunut" peqqussutip kalaallisoortaani § 18, imm. 1-imi amigaataasoq, kukkunerlu matumuuna allannguuteqartitsinissamik siunnersuutikkut aaqinnneqarnissaa kissaatigalugu.
Misileraanerit aammalu meeqqanut inuusuttunullu isumaginninnikkut perorsaanermi neqeroorutit immikkut ittut Naalakkersuisut akuerisussaavaat. Ullumikkut ornittakkanik paaqqinnittarfinnillu imminnut pigisunik peqarpoq isumaginninnikkut perorsaanermi immikkut siunertaqartunik, misile-raanerilli isumaginninnikkullu peroarsaanermi neqeroorutit qanoq ittut akuerisassanngorlugit qinnutigineqarsinnaanerinut killiliinissaq pisariaqartinneqarpoq. Taamaattumik siunnersuutigineqarpoq aalajangersakkanik erseqqinnerusunik aalajangersaanissamut Naalakkersuisut piginnaatinneqassasut
Aammattaaq Naalakkersuisut siunnersuutigaat § 37, imm 3 peerneqassasoq. Siunertaasimanngisaannarpoq Naalakkersuisut paaqqqinniffinnik sanaartornermut ingerlatsinermullu tapiissuteqarnissamut oqartussaaffilerneqassasut. Oqartussaaffeqarneq taanna Inatsisartuniippoq. Taamaattoq Inatsisartut taamatut periarfissaqartuaannarput, taamaattumillu aalajangersagaq pisariaqarani.
Siunnersuut KANUKOKA-mut kommuninut tusarniaanissamut qinnuiginninnertalimmik, suliatigut peqatigiiffinnut, soqutigisaqaqatigiinnut susassaqartunut kiisalu Namminersornerullutik Oqartussat iluanni tusarniaassutigineqarsimavoq.
Tusarniaanermit akissutit inaarutaasumik peqqutissatut siunnersuummi ilanngunneqarsimapput.
Siunnersuut allaffissornikkut aningaasaqarnikkullu annertunerusumik sunniuteqassangatinneqanngiilaq.
Taamatut oqaaseqarlunga Naalakkersuisut siunnersuut Inatsisartunut oqaluuserisassanngortippaat.