18. oktober 2004 UKA 2004/29
Meeqqanik inuusuttunillu ikiorsiisarneq pillugu Inatsisartut peqqussutaata allanngortinneqarneranik Inatsisartut peqqussutissaattut siunnersuut
(Ilaqutariinnermut Peqqissutsimullu Naalakkersuisoq)
Akissuteqaat
Aappassaanneerinninneq
Inatsisartut Ilaqutariinnermut Peqqissutsimullu Ataatsimiititaliaata meeqqanik inuusuttunillu ikiorsiisarneq pillugu Inatsisartut peqqussutaata allanngortinneqarneranik Inatsisartut peqqussutissaattut siunnersuut suliarisimavaa siunnersuutillu aappassaanneerneqarnissaanut isumaliutissiissuteqarluni.
Ataatsimiititaliaq isumaqatigiittoq siunnersuutip saqqummiunneqarneranut iluarisimaarinnilluni oqaaseqarpoq peqqussutissatullu siunnersuut maanna ilusimisut iluseqartillugu akuersissutigineqassasoq ataatsimiititaliami amerlanerussuteqartut inassutigaat.
Ataatsimiititaliami ikinnerussuteqartoq Demokraatineersoq § 18, imm. 1-imi oqaaseq "annertuumik" pillugu oqaaseqaateqarpoq Naalakkersuisullu § 18, imm. 1-imut, meeqqat sorliit ilaqutariinni inuussutissarsiutigalugu paarsisartuni paaqqutarineqartarnissaannik erseqqissaasumik allannguutissamik siunnersuuteqarnissaat kaammattuutigalugu.
Naalakkersuisut isumaqarput aalajangersagaq meeqqat inuusuttullu eqqarsartaatsimikkut ajoquserneqarsimasut sumiginnagaasimasullu inissinneqarnissaannik periarfissiissasoq. Meeqqat inuusuttullu inunni ikittunnguani qanilaartunilu avatangiiseqarlutik iluaquserneqarsinnaanerusunut periarfissatut tamanna eqqarsaatigineqarpoq. Taamaattumik aalajangersagaq paasineqassaaq meeqqat inuusuttullu eqqarsartaatsimikkut ajoquserneqarsimasut sumiginnagaasimasullu ataasiakkaatigut naliliinermi aalajangersimasumik toqqissisimanartumillu avatangiiseqarnissamik pisariaqartitsisut ilaqutariinni inuussutissarsiutigalugu paarsisartuni perorsaanermik ilisimasaqartuni inissinneqarnissaannik periarfissatut.
Naalakkersuisunit siunertarineqanngilaq meeqqat inuusuttullu katsorsarneqarnissamik pisariaqartitsinerpaat ilaqutariinni inuussutissarsiutigalugu paarsisartuni inissinneqartassasut. Suliassap taassuma ulloq unnuarlu paaqqinniffinni inissisimaannarnissaa Naalakkersuisut kissaatigaat.
Ilaqutariit inuussutissarsiutigalugu paarsisartut isumaginninnikkut sullissinissamut ilinniakkamik tunuliaqutaqarnissaat imaluunniit assigusumik misilittagaqarsimanissaat piumasaqaataasussaavoq, siunertaralugu meeqqat inuusuttullu meeqqanit naliginnaasumik ilaqutariinni paarsisartuni inissinneqartartunit katsorsarneqarnissamik annertunerusumik pisariaqartitsisut kisiannili meeqqanit inuusuttunillu ulloq unnuarlu paaqqinniffimmut inissinneqartartunit katsorsarneqarnissamik annikinnerusumik pisariaqartitsisut sullissinnaasussaammasigit.
§ 18 imm. 1-imi pineqarpoq ilaqutariit inuussutissarsiutigalugu paarsisartut ilinniarsimasuussasut imaluunniit meeqqanik inuusuttunillu eqqarsartaatsimikkut annertuumik ajoqusersimasunik sumiginnagaasimasunilluunniit sullissinermik misilittagaqassasut, imaanngitsoq Naalakkersuisut siunertarigaat meeqqat inuusuttullu taamaattut ilaqutariinni inuussutissarsiutigalugu paarsisartuni inissinneqassasut.
Taamaattumik ikinnerussuteqartut § 18, imm. 1-imi allannguuteqartitsinissamik kaammattuuteqarnerat maannakkuugallartoq Naalakkersuisut akuererusunngilaat.
Taamatut oqaaseqarluta siunnersuut Inatsisartunut oqaluuserisassanngortinneqarpoq inassutigineqarluni siunnersuut pingajussaanneerneqarnissaminut ingerlaqqissasoq.