Illuliortiternermut aningaasalersuineq pillugu Inatsisartut peqqussutaata allanngortinneqarneranik Inatsisartut peqqussutaat nr. 5, 15. april 2003-meersoq
(Piffissap inuinnaat, suliffeqarfiit ingerlatseqatigiiffiillu illuliornissamut sanaartornermut taarsigassarsiaasa akilersorneqarfissaasa allanngortinnerat, kiisalu taarsigassarsisinneqarnissamik neriorsorneqarnerup piffissamut killilerneqarnera)
§ 1.
Illuliortiternermut aningaasalersuineq pillugu Inatsisartut peqqussutaanni nr. 4, 30 oktober 1998-imeersumi Inatsisartut peqqussutaatigut nr. 1, 21. maj 2002-meersukkut allanngortinneqartumi makku allannguutigitinneqassapput:
1. § 5, imm. 2 oqaasertaqassaaq imatut:
"Imm. 2. § 4, imm. 1 aamma 2 malillugit taarsigassarsiat imm. 1 naapertorlugu ulloq atorneqalernissaannut akuersissummik tunniussivik aallarnerfigalugu ukiuni 20-ni erniaqartitaanatillu taarsersugassaanngillat, tamatumali kingornagut ukiuni 15-ini erniassaat, tassa Nationalbankip erniaritittagai procentinik pingasunik ilallugit, naatsorsuutigereerlugit amerlaqatigiiaartumik akiliisarluni taarsersugassaallutik."2. § 5, imm. 3 ima oqaasertaqassaaq:
"Imm. 3. Taarsigassarsisitsisoq allatut aalajangiinngippat piginnittut nikinnerini taarsigassarsiat taarserneqartassapput, taamaattoq tak. imm. 5. Taamaattorli imaattoqaraangat taarsigassarsiat tamatigut taarserneqartassapput:
1) Taarsigassarsianut erniat taarsiissutissallu akilerneqartarsimatinnagit aammalu taarsigassarsisup akileeqqusissummik allakkatigut piumasaqarfigineqarnerminik allagarsiaminik tigusereernermigut kingusinnerpaamik ullut arfineq-marluk qaangiunnerisigut akiligassarilersimasaminik akiliisimatinnagu.
2) Taarsigassarsisup illu illulluunniit illersorneqarsinnaasumik aserfallatsaalisimanngippagit paarsinerlunnermigullu taarsigassarsisitsisup qularnaveeqqusiissutaanik nalikinnerulersitsinera paasineqarpat, tak. § 8."3. § 11-ip kingornatigut ilanngunneqassaaq:
"§ 11a. Sanatitsinissamut taarsigassarsiniarluni qinnuteqaat, tak. § 10, imaluunniit iluarsaassinissamut pitsanngorsaanissamullu taarsigassarsiat Naalakkersuisut akuerigunikkik, tak. § 11, Naalakkersuisut qinnuteqaateqartumut akuersissutitut allagaqaat suliarissavaat, tassani aningaasaliissutit atugassarititallu takuneqarsinnaassallutik.
Imm. 2. Sanaartugassanik suliat, imm. 1 naapertorlugu neriorsuutigineqartut, ukiut marluk qaangiutinnginneranni aallartinneqarsimassapput naammassineqarlutillu kiisalu neriorsuuteqaammik allakkat atulersinneqarnerannit ukiut pingasut qaangiutsinnagit atulersinneqarsimassallutik. Taamaattoqanngippat neriorsuut allatut ilisimatitseqqaarani atorunnaarsinneqassaaq.
Imm. 3. Taarsigassarsiniarluni qinnuteqartoq neriorsuuteqaammik allakkat atulersinneqarnerannit ulluliussamiit ukiut marluk qaangiutsinnagit Naalakkersuisunut nassiussissaaq sanaartorneq aallartissimanersoq aallartissimannginnersorluunniit nalunaarutigalugu. Sanatitsineq aallartissimappat tamanna pillugu nalunaarut ilanngullugu qinnuteqaateqartumit suliarineqartoq kommunimillu uppernarsarneqartoq nassiunneqassaaq.
Imm. 4. Taarsigassarsiniarluni qinnuteqartup neriorsuuteqaammik allakkat atulersinneqarnerannit ulluliussamiit ukiut pingasut qaangiutinnginneranni atulersitsinissamut akuersissutip assilinera Naalakkersuisunut nassiutissavaa.
Imm. 5. Naalakkersuisut pisuni immikkut ittuni imm. 2-mi piffissanut killiliussani taaneqartuni marlunni saneqqutsisinnaapput. Taamatut pisoqarpat imm. 3-mi 4-milu piffissaliussatut taaneqartut immikkut akuersissuteqarneq naapertorlugu ilanngunneqassapput."
§ 2.
Peqqussut atuutilerpoq 1. maj 2003 sunniuteqassallunilu taarsigassarsisitsinissamik neriorsuutinut Inatsisartut 2003-mut kingusinnerusukkulluunniit aningaasanut inatsisaat naapertorlugu nalunaarutigineqartunut, taamaattoq tak. imm. 2.
Imm. 2. § 1, nr. 2 atuuppoq taarsigassarsianut taarsigassarsisitsinissamillu neriorsuutinut 1. januar 1999 kingorna nalunaarutigineqartunut.
Namminersornerullutik Oqartussat, ulloq 15. april 2003
Hans Enoksen/
Mikael Petersen
Siullermeerinninnermut siunnersuut
Aappassaaneerinninnermut allannguutissatut siunnersuut (akuerineqartoq)