1. april 2003

UPA 2003/33

 

Illuliortiternermut aningaasalersuineq pillugu Inatsisartut peqqussutaata

allanngortinneqarneranik Inatsisartut peqqussutissaattut siunnersuut

pillugu

Inatsisartut Attaveqaqatigiinnermut Ineqarnermullu Ataatsimiititaliaata

ISUMALIUTISSIISSUTAA

siunnersuutip aappassaaneerneqarnerani saqqummiunneqartoq

 

Inatsisartut Attaveqaqatigiinnermut Ineqarnermullu Ataatsimiititaliaat suliarinninnermini ukunin-nga inuttaqarpoq:

 

Inatsisartuni ilaasortaq Isak Davidsen, Atassut, siulittaasoq
Inatsisartuni ilaasortaq Kalistat Lund, Siumut, siulittaasup tullia
Inatsisartuni ilaasortaq Jens Napaattooq, Siumut
Inatsisartuni ilaasortaq Johan Lund Olsen, Inuit Ataqatigiit
Inatsisartuni ilaasortaq Palle Christiansen, Demokraatit

 

Inatsisartut Attaveqaqatigiinnermut Ineqarnermullu Ataatsimiititaliaata Illuliortiternermut aningaasalersuineq pillugu Inatsisartut peqqussutaata allanngortinneqarneranik Inatsisartut peqqussutissaattut siunnersuut UPA 2003-mi siullermeerneqareermat nassuiaatitai ilanngullugit misissuataarpaa.


Apeqqutit

Ataatsimiititaliaq siunnersuutip oqaluuserineqarneranut atugassanik Attaveqaqatigiinnermut, Avatangiisinut Ineqarnermullu Naalakkersuisoq apeqqutinut arlalinnut akissuteqaqqullugu qinnuigaa. Ataatsimiititaliap apeqqutaasa Naalakkersuisunilu ilaasortap akissutaasa nuutinneri isumaliutissiissummut matumunnga ilanngunneqarput.


Siunnersuutip imarisai

Siunnersuut aqqutigalugu aningaasanik taarsigassarsisitsisarfinnit attartukkat taarsersortarnerisa ukiuni 15-nit 20-nut sivitsorneqarsinnaaneri periarfissinneqarmat, Inatsisartut Attaveqaqatigiinnermut Ineqarnermullu Ataatsimiititaliap pitsaasutut isigaa. Tamatuma attartortumit qaammammut akiliutaasartup annikinnerulernera taamaalillunilu illumut taarsigassarsinerup akikinnerulernera kingunerissallugu.

Ataatsimiititaliap isumaqatigiittup Naalakkersuisunit kommunalbestyrelsinillu pisortanit taarsigassarsiarititat piffissaq ernialersorneqaratillu akilersorneqanngiffigisassaat ukiunik tallimanik sivitsorniarneqarmat pitsaasutut isigaa.

Sinerissami illoqarfinni aningaasanik attartortitsisarfiit aningaasaliiffigineq ajugaanni illuliornermi aningaasaliinissamut periarfissat ataatsimiitialiap ilanngullugit eqqartorpai.

Ataatsimiititaliami ikinnerussuteqartut Inuit Ataqatigiinneersut, Demokratineersullu piffinni aningaasanik attartortitsisarfinnut atorniarnissamik periarfissaqarfiunngitsuni taamatut assigusunik periarfissanik Naalakkersuisut ukiamut ataatsimiinnissamut atatillugu siunnersuummik saqqummiusseqqullugit kaammattorpaat, taamaaliornikkut siunissami illuutillit sumiikkaluarunilluunniit assigiimmik attartornissaminnut periarfissaqarsinnaaqqullugit.

Naalakkersuisut siunnersuutaata nassatarissavaa pisortanit taarsigassarsiat akit ineriartornerinut malinnaatinneqalernerata atuutilersinneqarnissaa.Tassani pineqarpoq sanaartornermi aningaasartuutit nalikillinnginnissaannut naleqqersuut, siunnersummut nassuiaatit naapertorlugit aningaasatigut siunissamut ungasissumut kinguneqaatissaat nalileruminaatsorsujussuit.

Pineqartumi ineriartorneq qanoq ikkumaarnersoq arlaannaataluunniit ilisimanngimmagu Inatsisartut Attaveqaqatigiinnermut Ineqarnermullu Ataatsimiititaliaata nalorninaat taanna aarleqqutissartaqaqisoq taarsigassarsisunut atugassanngortissallugu eqqarsarnartoqartippaa. Sanaartornermi aningaasartuutit nalikillinnginnissaannut naleqqersuut taarsigassartsinissamut periarfissanik atuuttunik ajorseriartitsisussaammat, taarsigassarsiat ukiuni 15-ini siullerni akilersorneqarnissaanni naleqqersuutip sunniuteqartinneqarnissaa ataatsimiitiotaliap pissusissamisoortutut isiginngilaa. Ukiut 15-ianniit 20-issaannut sunniutilimmik aaqqiinissaq aqutsinikkut tulliuutinngitsumik annertuumik nassataqartussaavoq.

Taamaammat ataatsimiititaliap isumaqatigiittup aningaasartuutit nalikillinnginnissaannut naleqqersuutip peqqussutissatut siunnersuummik peerneqarneranik kinguneqartussamik Naalakkersuisut allannguutissatut siunnersuummik saqqummiussissasut siunnersuutigissavaa.

Naalakkersuisut qulaani taaneqartutut allannguutissatut siunnersuummik saqqummiussissasut naatsorsuutigalugu Attaveqaqatigiinnermut Ineqarnermullu Ataatsimiititaliap isumaqatigiittup Illuliortiternermut aningaasalersuineq pillugu Inatsisartut peqqussutaata allanngortinneqarneranik Inatsisartut peqqussutissaattut Naalakkersuisut siunnersuutaat akuersissutigineqassasoq inassutigaa.

Taama oqaaseqarluni Inatsisartut siunnersuut aappassaanigassanngortinneqarpoq.

 

 

Isak Davidsen
Siulittaasoq
 

Kalistat Lund
Siulittaasup tullia

  

Jens Napaattooq
 

Johan Lund Olsen

  

Palle Christiansen

Ilanngussaq:

 

1. Tassunga atatillugu ataatsimiititaliap taarsersuinermut massakkumut atuuttumut ajorseriartitsinnginnissaq anguniarlugu Naalakkersuisuni ilaasortaq siumut naatsorsuisarnerup ukiut 15.-issaannit 20.-ssaata tungaanut atuutitinneqarsin-naanerata periarfissaqarnera pillugu aperinissaanik periarfissaqarpoq. Taamatut aaqqiineq allaffissornerup tungaanit isigalugu ajornakusoortussaammat immaqa aningaasartuutinut najoqqutassiaq peqqussutissamut siunnersuummit peerneqarsin-naanera naliliivigineqarsinnaavoq?

Peqqussutissatut siunnersuutip Inatsisartunit siullermeerneqarnerani oqallinneq tunuliaqutaralugu taarsigassarsiat nalingat nikisinnagu inaarutissaanik taarsigassarsisup ilisimannittariaqarnerata pitsaasuusinnaanera Naalakkersuisut isumaliutersuutigisimavaat. Taarsigassarsiat naligilerumaagaa taarsigassarsisut ilisimanngikkunikku tunuarsimaarutigisinnaavaat, tamannalu sanaartornermik i-ngerlatsinermut kigaalaqutaaqataalersinnaavoq.

Taamaattumik peqqussutissatut siunnersuutip aappassaaneerneqarnerani allannguutissatut siunnersuummik Naalakkersuisut saqqummiussilersaarput naligilerumaakkat eqqarsaatigalugit inatsimmiittut allanngortinnagit. Tamanna isumaqarpoq taarsigassarsiat piffissami ernialersuiffiunanilu taarsersuiffiunngitsumi naligilerumaagaat taaneqassanani.

Sanaartornermi akissaajaatinut uuttuutip kisitsisitaasa siunissami naligiumaagaasa ilisimaneqan-nginnerat pissutigalugu peqqussutissatut siunnersuutip aningaasatigut kingunerisassai naatsorsoruminaapput. Taamaattoq oqaatigineqarsinnaavoq ukiut 15-issaanniit 20-ssaannut ukiunut tallimanut uuttuutip kisitsisitai 7 pointinik qaffassappat, assersuutigalugu 131-imiit 128-mut, taassuma nassatarissavaa taarsigassarsiat 283.500 kr.-iusut 15.149 kr.-inik nalitunerulerlutik 298.649 kr.-inngorsimanissaat.


2. Tassunga ilanngullugu illoqarfinni aningaasanik taarsigassarsisitsisarfinnit (realkreditinit) attartorfiusinnaanngitsuni taamatut attartorsinnaanermik periarfissiisoqarsinnaanera paasiniarneqarsinnaavoq.

Nalunaarutigineqarsinnaavoq nunatsinni illoqarfinni amerlanerpaani taarsigassarsiniartarfinnit qanoq ilusilimmilluunniit taarsiisoqarsinnaasoq. Taamaattumik aningaasalersuineq imaluunniit aningaasalersuinnginneq sumiiffimmut aalajangersimasumut attuumassuteqanngilaq, taamaallaat taarsigassarsinerup siunertaa, taarsigassarsiat piffissaq akilersorneqarfissaat tamarmiusoq, taarsigassasiniartup nammineq ileqqaagai aningaasaqarneranullu tunngasut allat kisimik apeqqutaapput. Taakkununnga ilanngunneqassapput sanaartugassatut aningaasalersuif-figilersaakkamut sumiiffimmi akiliisinnaassuseqarneq tamarmiusoq, matumanittaaq soorunami sanaartulersaakkap kingusinnerusukkut tunineqarsinnaaneranut qanoq periarfissaqartiginera.


Ilassutitut apeqqut.

Ataatsimiititaliaq erseqqissumik isumaqarpoq Ilulissani, Qaqortumi, Sisimiuni, Aasianni Nuummiluunniit najugaqaraanni ullumikkut illuliornermut aningaasaliinissamut illu-liornermi taarsigassarsinissamut taamaallaat periarfissaqartoqartoq. Taamaammat Naalakkersuisut ilisimatitsissutaata uuma itisilerneqarnissaa ataatsimiititaliap kissaatigaa, "illoqarfinni amerlanerpaani"-mik oqarnerup aamma "qanoq ilusi-limmilluunniit"-mik oqarnerup nassuiaatissai eqqarsaatigalugit oqaatigineqarmat, "nalunaarutigineqarsinnaavoq nunatsinni illoqarfinni amerlanerpaani taarsigassarsiniartarfinnit qanoq ilusilimmilluunniit aningaasaliisoqarsinnaasut."

Aallarniutigalugu oqaatigineqassaaq pigisanik aalaakkaasunik qularnaveeqqusiussilluni taarsigassarsiniartarfiit nunatsinni ingerlatsisut nalinginnaasumik taarsigassarsisitsisarnermik ingerlatsinerminni maleruagassanik killiliissutinillu arlalinnik atugassaqartut. Pissutsit tamakku Naalakkersuisut sunniuteqarfigisinnaasaasa avataanniipput.

Pigisanik aalaakkaasunik qularnaveeqqusiussilluni taarsigassarsiniartarfiit naliliisarnera taarsigassarsiassanillu amerlassusiliisarnera pillugit nalunaarutip nr. 647, 5. august 1999-imeersup § 2-ani atuarneqarsinnaavoq qularnaveeqqusiussat nalingisa amerlassusilerneqarnerini illup niuerutigineqarnerani aningaasanngorlugu nalinga naapertuuttoq piffissap qaammatit arfinillit iluanni tunineqarnerani anguneqarsinnaasoq sinnersimassanngikkaa, illup amerlanerusunik aningaasartaqartumik niuerutigineqarsimanera apeqqutaatinnagu. Illup niuerutigineqarnerani aningaasanngorlugu nalinga naapertuuttoq tassaatinneqarpoq illup pineqartup, taamatut angissusillip, pitsaassusillip atortullillu, sumiiffimmi akinik niuernermilu periarfissanik ilisimannittut arlallit aningaasanngorlugu illumut akiliutigiumasinnaasaattut missingerneqartoq. Sumiiffimmi periarfissakinneq pissutigalugu immikkut akisunaarussisoqarsinnaanera ilimanarpat naliliinermi tamakku eqqarsaatigineqassanngillat. Naliliinermi eqqarsaatigineqassapput niuernermi periarfissat allannguuteqaratarsinnaanerat imaluunniit ilutsit allanngoratarsinnaanerat.

Pigisanik aalaakkaasunik qularnaveeqqusiussilluni taarsigassarsiniartarfiit aningaasaataasa obligationinik nioqquteqarnikkut pissarsiarineqartarnerat eqqaamassallugu pingaarpoq. Taamaammat pigisanik aalaakkaasunik qularnaveeqqusiussilluni taarsigassarsiniartarfiit taarsigassarsisitsisarnermik ingerlatsinerannut tunngavissaatitaavoq taarsigassarsiarititat utertillugit akilerneqarsinnaanerisa tatigineqarsinnaanera. Tamanna tunngavissaalluinnarpoq, taamaanngippat pigisanik aalaakkaasunik qularnaveeqqusiussilluni taarsigassarsiniartarfiit akiliisinnaajunnaassapput.

Tamakku soorunami nunatsinni niuerfinni aamma atuupput. Illoqarfik pissutigiinnarlugu pigisanik aalaakkaasunik qularnaveeqqusiussilluni taarsigassarsiniartarfimmiit illoqarfiit ilaanneersut taarsigassarsinissamut mattunneqarsimannginnerannik Naalakkersuisut paasitinneqarsimanerat erseqqissassallugu pingaarpoq.

Pigisanik aalaakkaasunik qularnaveeqqusiussilluni taarsigassarsiat taarsigassarsiaritinneqartarput taarsigassarsiumalluni qinnuteqartoq tunngavigalugu. Taarsigassarsiumasumut taarsigassarsisitsinissap naliliivigineqarneranut sunniuteqarsinnaasut arlaqarput. Uani ikittuinnaat taaneqassapput:

Qulaani takuneqarsinnaasutut pissutsit arlalissuit akiliisinnaassutsimik naliliinermi taarsigassarsisitsinermilu tunngavigineqartarput.

Taamaattumik Naalakkersuisut aalajangiusimavaat pissutissaatitaasut qulaani taagorneqartut eqquutsinneqarsimappata Nunatsinni illoqarfinni amerlanerpaani pigisanik aalaakkaasunik qularnaveeqqusiussilluni qanoq ilusilimmilluunniit taarsigassarsisoqarsinnaanera.

Pingaaruteqarpoq paasissallugu,