Peqqussutissatut siunnersuummut nassuiaatit
Nalinginnaasumik nassuiaatit
Peqqussutissatut siunnersuutip saqqummiunneqarnera Kalaallit Nunaanni inissiatigut nalinginnaasumik aaqqissuusseqqinnerup ilaatut kiisalu aningaasanik taarsigassarsisitsisarfinni allannguuteqartitsinerit kingunerisaannik pivoq. Manna tikillugu aningaasanik taarsigassarsisitsisarfitsigut taarsigassarsiat ukiuni 15-ini akilersorneqarsinnaanerat anguneqarsinnaasimavoq. Taakkua maanna aningaasanik taarsigassarsiniartarfinnit taarsigassarsianit ukiuni 20-ni akilersorneqartussanit taarserneqarput.
Peqqussutissatut siunnersuut inissianut nutaanut ukiut 35-t angullugit aningaasalersuinissatut piffissamik aammaassivoq, tassami ukiut siulliit 20-t tassaammata pigisanik aalaakkaasunik qularnaveeqqusiussilluni taarsigassarsiniartarfitsigut 50 %-imik taarsigassarsiat, ukiullu kingulliit 15-it pisortanit 40 %-imik taarsigassarsiaallutik. Tamatumuuna amerlaneroqisut namminneq inigisaminnik aningaasalersuinissaannut periarfissiisoqarpoq, pissutigalugu qaammammut 0,6 mio. kr.-inik ilanngaateqanngitsunik taarsigassarsiaqarnermi tamakkiisumik akilersuinerup 4.780 kr.-it missaanniit 4.180 kr.-inut appartinneqarmata.
Nutaatut pisortanit taarsigassarsiani piffissaq ernialersuiffiunngitsoq akilersuiffiunngitsorlu sanaartortitsinermut suliassanut aningaasartuutit nalingat najoqqutaralugu siumut naatsorsuusiorneqarpoq. Tamatumani taarsigassarsiat nalingisa pigiinnarneqarnissaat qulakkeerniarneqarpoq.
Sanaartortitsinermut suliassanut aningaasartuutini najoqqutassiaq (naleqqersuut) ilaqutariinnut ataatsinut illuliat aamma illunut affarleriinnut kiisalu ilaqutariinnut arlalinnut illuliat nalinginut agguataarneqarpoq. Najoqqutassiat akit allannguutaannik atortussanut ataasiakkaanut 600-t sinneqartunut kiisalu sanaartortitsinermi akissarsianut aningaasartuutissatut eqqarsaataannaasunik imaqarput. Atortussanut ataasiakkaanut akigitinneqartut ingerlaavartumik pissarsiarineqassapput, taamatullu sulisut assigiinngitsunik sulialllit sanaartornermi peqataatinneqartut akissarsiaat pillugit paasissutissat pissarsiarineqassallutik.
Ukiumut marloriarluni, 1. januarimi aamma 1. julimi, akinut najoqqutassiat tamanut saqqummiunneqartassapput. 1990-imiilli najoqqutassiaq 100-miitoq 2002-mi julimi 121-mut qaffariarpoq. Tamanna allatut oqaatigalugu kinguneqarpoq 1990-iminngarnit 2002-mi illuliorneq 21%-imik akisunerulersimaneranik. Piffissat ilaanni najoqqutassiaq nikinneq ajorpoq marlussoriarlunilu appartarluni.
Taarsigassarsinissamik neriorsuutip atulersinnissaa atorunnaarsilluguluunniit Sanaartugassanut Iluarsagassanullu Aningaasaateqarfimmiit peerneqarnissaa qulakkeerniarlugu neriorsuutini atulersinneqartuni piffissap akilersuiffiusussap killeqarnera pillugu aalajangersagaq ilanngunneqarpoq.
Kiisalu peqqussutissatut siunnersuutip imaraa pisortanit taarsigassarsiaat akilerneqarnissaat pillugu aalajangersakkap teknikikkut iluarsiivigineqarnera.
Peqqussutissatut siunnersuut KANUKOKA-mut aammalu Aningaasaqarnermut Pisortaqarfimmut tusarniaassutigineqarpoq kiisalu Namminersornerullutik Oqartussat Inatsisileriffianni misissuataarneqarluni. Sionnersuut pineqartunit akissutit tunngavigalugit iluarsaanneqarpoq.
Peqqussutissatut siunnersuutip allaffissornikkut kingunerisassaiPeqqussutissatut siunnersuut kommunini imaluunniit Namminersornerullutik Oqartussani suliaqarnerulernermik kinguneqassanngilaq.
Peqqussutissatut siunnersuutip aningaasaqarnikkut kingunerisassaiPeqqussutissatut siunnersuutip pisortanit taarsigassarsiani piffissap erniaqartitsiviunngitsup akilersuiffiunngitsullu ukiunit 15-iniit 20-nut sivitsorneqarnera kingunerissavaa, taannalu 1/3-imut naapertuuppoq. Taamaattorli siunnersuutigineqassaaq piffissami erniaqartitsiviunngitsumi akilersuiffiunngitsumilu taarsigassarsiat sanaartortitsinermut suliassanut aningaasartuutini najoqqutassiaq malillugu siumut naatsorsorneqassasut.
Oqaatigineqarsinnaavoq piffissaq ungasinnerusoq eqqarsaatigalugu tamatuma aningaasaqarnikkut kingunerisassai nalileruminaatsorujussuussasut, pissutigalugu suliassap qanoq pissuseqarneratigut sanaartornermi suliassanut erniat sanaartugassanullu aningaasartuutinut najoqqutassiap qanoq piartuaarnissaat ilisimaneqanngimmata.
Aalajangersakkanut ataasiakkaanut nassuiaatit
§ 1-imut, nr. 1-imut
Aalajangersakkap kingunerissavaa, pisortanit taarsigassarsiat piffissamit atulersitsinissamut akuersissuteqarfiusumiit ukiuni 20-ni erniaqaratillu akilersugassaassanngitsunnerat. Piffissami tassani taarsigassarsiat sanaartornermi suliassanut aningaasartuutinut najoqqutassiaq malillugu ukiumut marloriarluni tamanut saqqummiunneqartartumik siumut naatsorsorneqassapput. Ilaqutariinnut ataatsinut illuliat illullu affarleriit ilaqutarinnut ataasiakkaanut illulianut najoqqutassiaq malillugu siumut naatsorsorneqassapput. Illunik uiguleriiaanik aammalu quleriiaanik sanaartorneq ilaqutarinnut arlalinnut illulianut najoqqutassiaq malillugu siumut naatsorsorneqassaaq.
Oqariartaaseq siumut naatsorsuineq iluarsiissutaanngitsoq atorneqarpoq, pissutigalugu sanaartornermi suliassanut aningaasartuutinut najoqqutassiami qaffariaatit kisimik taarsigassarsiat siumut naatsorsorneranni atorneqartussaammata. Sanaartornermi suliassanut aningaasartuutinut najoqqutassiaq appariarfiuppat, allannguutit taamaattut eqqarsaatigineqassanngillat.
Assersuut: Taarsigassarsiat sanaartornermi suliassanut aningaasartuutinut najoqqutassiaq imaalillugu siumut naatsorsorneqarpoq, taanna 121-nngorlugu taarsigassarsiat atsiorneqarnerminni amerlassusiat 343.035 kr.–iusoq siumut naatsorsuutigalugu. Sanaartornermi suliassanut aningaasartuutinut najoqqutassiaq 121-miit 119-imut appariaateqarpat, taarsigassarsiat atsiorneqarnerminni amerlassusiat 343.035 kr.-iuinnassaaq, najoqqutassiarli 119-imut appartinneqassalluni.
§ 1-imut, nr. 2-mut
Aalajangersagaq taamaallaat teknikikkut iluarsiissutaavoq, tassa aalajangersakkap oqaasertaasa ilai inatsisartut peqqussutaanni nr. 1, 21. maj 2002-meersumi mininneqarsimammata (katanneqarsimammata). Taarsigassarsiat qanoq pisoqarneratigut akiligassanngortussaanerat aalajangersakkakkut maleruagassiorneqarpoq.
§ 1, nr. 3-mut
Aalajangersakkami neriorsuuteqarnerup atulersinnissaa atorneqarnissaalu imaluunniit atorunnaarsinnissaa qulakkeerniarneqarpoq. Neriorsuuteqarnerup atulersinnerani aningaasaliissutit Sanaartugassanut Iluarsagassanullu Aningaasaateqarfimmut nuunneqassapput. Aningaasaliissutit tamatuma kingornatigut sanaartorneq naammassippat aningaasaateqarfimmit akilerneqassapput. Sanaartorneq ingerlanneqassanngippat pingaartuuvoq aningaasaliissutit aningaasaateqarfimmiit peerneqarnissaat siunertanullu allanut tulleriinnilersorsinnaanissaat.
Aalajangersakkap kingunerissavaa Naalakkersuisut pisuni immikkut ittuni piffissanut killiliussanik saneqqutsisinnaanerat. Tamatumani pingaarnerutillugu pineqarpoq sanaartorneq aallartilluarpat kiisalu imatut pisoqarpat, atulersitsinissamut akuersissut taamaallaat utaqqineqarluni.
Saneqqutsisinnaanermut aalajangersakkami pingaarnertut eqqarsaatigineqarpoq siullermik aningaasat Sanaartugassanut Iluarsagassanullu Aningaasaateqarfimmut nuunneqartut sulisinneqalissammata aappaattullu, sanaartornerit piffissatut pilersaarummit nikingasoorutaasut ingerlanneqarsinnaanerat.
Siunertaq tassaajuarpoq namminerisamik illuliat amerlanerusut sanaartorneqarnissaat. Taamaallaalli qulakkeerneqartariaqarluni neriorsuuteqaammik allakkat Sanaartugassanut Iluarsagassanullu Aningaasaateqarfimmi pisoqalisuunnginnissaat.
§ 2-mut
Aalajangersakkami siunnersuutigineqarpoq peqqussutissatut siunnersuut 1. juni 2003-mi atuutilissasoq. Peqqussutissatut siunnersuut taarsigassarsiniarnermik neriorsuutip ullup taassuma kingornagut nalunaarutigineqarneranit atuutilerpoq.