1. april 2003

UPA 2003/33

 

A l l a n n g u u t i s s a t u t s i u n n e r s u u t

uunga

Illuliortiternernut aningaasalersuineq pillugu Inatsisartut peqqussutaata allanngortinneqarneranik Inatsisartut peqqussutaat nr. xx, uu. qqqq 2003-meersoq.
(Piffissap inuinnaat, suliffeqarfiit ingerlatseqatigiiffiillu illuliornissamut sanaartornermut taarsigassarsiaasa akilersorneqarfissaasa allanngortinnerat, kiisalu taarsigassarsisinneqarnissamik neriorsorneqarnerup piffissamut killilerneqarnera)

 

Aappassaaneerinninnermut Naalakkersuisunit saqqummiunneqartoq.

 

§ 1-imut

 

1. § 1 nr. 1 ima oqaasertaqassaaq:

"1. § 5, imm. 2 oqaasertaqassaaq imatut:
"Imm. 2. § 4, imm. 1 aamma 2 malillugit taarsigassarsiat imm. 1 naapertorlugu ulloq atorneqalernissaannut akuersissummik tunniussivik aallarnerfigalugu ukiuni 20-ni erniaqartitaanatillu taarsersugassaanngillat, tamatumali kingornagut ukiuni 15-ini erniassaat, tassa Nationalbankip erniaritittagai procentinik pingasunik ilallugit, naatsorsuutigereerlugit amerlaqatigiiaartumik akiliisarluni taarsersugassaallutik."

 

2. § 1 nr. 2 ima oqaasertaqassaaq:

"2. § 5, imm. 3 ima oqaasertaqassaaq:
"Imm. 3. Taarsigassarsisitsisoq allatut aalajangiinngippat piginnittut nikinnerini taarsigassarsiat taarserneqartassapput, taamaattoq tak. imm. 5. Taamaattorli imaattoqaraangat taarsigassarsiat tamatigut taarserneqartassapput:
1) Taarsigassarsianut erniat taarsiissutissallu akilerneqartarsimatinnagit aammalu taarsigassarsisup akileeqqusissummik allakkatigut piumasaqarfigineqarnerminik allagarsiaminik tigusereernermigut kingusinnerpaamik ullut arfineq-marluk qaangiunnerisigut akiligassarilersimasaminik akiliisimatinnagu.
2) Taarsigassarsisup illu illulluunniit illersorneqarsinnaasumik aserfallatsaalisimanngippagit paarsinerlunnermigullu taarsigassarsisitsisup qularnaveeqqusiissutaanik nalikinnerulersitsinera paasineqarpat, tak. § 8."

 

§ 2-mut

 

3. § 2 ima oqaasertaqassaaq:

"§ 2.

Peqqussut atuutilerpoq 1. maj 2003 sunniuteqassallunilu taarsigassarsisitsinissamik neriorsuutinut Inatsisartut 2003-mut kingusinnerusukkulluunniit aningaasanut inatsisaat naapertorlugu nalunaarutigineqartunut, taamaattoq tak. imm. 2.
Imm. 2. § 1, nr. 2 atuuppoq taarsigassarsianut taarsigassarsisitsinissamillu neriorsuutinut 1. januar 1999 kingorna nalunaarutigineqartunut."

Namminersornerullutik Oqartussat, ulloq uu. qqqq 2002.

Hans Enoksen

/

Mikael Petersen

 

 

Peqqussutissatut siunnersuummut nassuiaatit

 

Nalinginnaasumik nassuiaatit

Peqqussutissatut siunnersuummut allannguutissatut siunnersuut saqqummiunneqarpoq peqqussutissatut siunnersuutip siullermeerneqarnerani Inatsisartut oqallinnerat tunuliaqutaralugu. Tamanna tunuliaqutaralugu Naalakkersuisut isumaqarput pisortat taarsigassarsiarititaat ukiuni 20-ni erniaqaratillu taarsersugassaanngiffimminni naligiumaakkaminnut nalilerneqartassan-ngitsut.

Peqatigitillugu oqaasertaliinertigut teknikikkullu kukkussutit iluarsineqarput.

Allannguutissatut siunnersuut KANUKOKA-mut, Aningasaaqarnermut Pisortaqarfimmut isummerfigeqqusissutigineqarsimavoq (tusarniaatigineqarsimavoq) kiisalu Inatsisileriffimmi misissuataartinneqarsimalluni.

Peqqussutissatut siunnersuutip allaffissornikkut kingunerisassai

Allannguutissatut siunnersuut kommunini imaluunniit Namminersornerullutik Oqartussani suliaqarnerulernermik kinguneqassanngilaq.

Peqqussutissatut siunnersuutip aningaasatigut kingunerisassai

Allannguutissatut siunnersuutip nassatarissavaa taarsigassarsiat piffissami erniaqaratillu taarsersugassaanngiffimminni sanaartornermi aningaasartuutinut naleqqersuut tunngavigalugu naligiumaakkaminnut nalilerneqartannginnissaat. Taamaattumik peqqussummut atuuttumut naleqqiullugu taamaallaat piffissaq uuttummik atuiffiunngitsoq ukiut 15-iniit 20-nut sivitsuiffiuvoq, tassa peqqussut atuuttoq naapertorlugu taarsigassarsiat naligiumaakkaminnut nalilerneqartanngimmata.

Taamaattumik peqqussummut atuuttumut naleqqiullugu aningaasatigut kingunerisassai imatut oqaatigineqarsinnaapput, erniatigut annaasat, t.i. piffissaq ernialersuiffiunanilu taarsersuiffi-unngitsoq ukiunik tallimanik sivitsorneqarpoq ukiut 15-iniit 20-nut.

 

Aalajangersakkanut ataasiakkaanut nassuiaatit

 

§ 1, nr. 1-imut

Aalajangersakkap nassataraa pisortat taarsigassarsiarititaasa ulloq atorneqalerfissaannut akuersissummik tunniussivik aallarnerfigalugu ukiuni 20-ni ernialersugaanatillu taarsersugassaannginnerat. Ukiut 20 taakku qaangiutereerpata taarsigassarsiat akilersugassanngussapput ukiunilu 15-ini amerlaqatigiiaartumik akiliisarluni taarsersugassaallutik.

 

§ 1, nr. 2-mut

Aalajangersakkami ilaavoq iluarsiissut, tassa aalajangersakkap oqaasertaasa ilaat inatsisartut peqqussutaatigut nr. 1, 21. maj 2002-meersumi mininneqarsimammata. Aalajangersakkakkut taarsigassarsiat qaqugukkut akiligassanngorsinnaanerat maleruagassiorneqarpoq.

 

§ 1, nr. 3-mut

Aalajangersakkakkut taaneqarpoq peqqussutissatut siunnersuut qaqugu atuutilissanersoq. Aalajangersakkap oqaasertaasa ilaasa, tassalu piginnittup allanngorneratigut taarsigassarsiat akiligassanngussanngitsut taarsigassarsisitsisup aalajangiiffigisinnaagaa, inatsisartut peqqussutaatigut nr. 1, 21. maj 2002-meersumi mininneqarsimanerat, kingunerisaanik matumani iluarsiissutit 1. januar 1999-imiit sunniutilimmik atuutilersinneqassapput. Tamatumuuna pffissami 1. januar 1999-imiit maannamullu taarsigassarsisimasut inatsimmi allannguinikkut pineqartunut ilaassanngillat.