Nunalerineq pillugu Inatsisartut inatsisaat nr. 5, 2. maj 1996-imeersumi § 11 naapertorlugu aalajangersarneqarpoq:

Atuuffii

§ 1. Nalunaarummi matumani pineqarpoq nunalerinermut tunngassuteqartuni ineriartortitsinerup siuarsarneqarneranut tapiissutinik malittarisassaqartitsinikkut aqutsineq.

Nutarteraluni ineriartortitsinermut tapiissuteqartarneq

§ 2. Inuussutissarsiornermut Pisortaqarfik ukununnga tapiissuteqarsinnaavoq;
1) nunalerinermut tunngatillugu ineriartortitsinernik suliareqqiisarnernillu suliniutinut,
2) nunalerinermit tunisassianik suliareqqiisarnernut inuussutissarsiornermut tunngatillugu iluaqutigineqarnissaat siunertaralugu,
3) nunalerinermit tunisassiamik nutaamik nittarsaassinermi tunitsivissarsiornermut aningaasartuutinut imaluunniit nunalerinermit tunisassiamik ilisimaneqareersumik tuniniaavimmi nutaami nittarsaassinermut, imaluunniit nunalerinermit tunisassiat Kalaallit Nunaanni tunisassiarineqartut pillugit nalinginnaasumik tunitsivissarsiorluni suliniuteqarnernut atatillugu,
4) misissuinernut, nunalerinermut tunngassuteqartuni periarfissanik nutaanik nassaarniarluni qulaajaanernik siunertalinnut, taamatuttaaq siunissami tunisassiortoqalernissaa tamakkulu pisortanit ingerlatsivigineqarnissaat pillugit ilisimasassanik pisariaqartinneqartunik pissarsiniartarnernut,
5) maannakkut tunisassiaareersut pillugit uumassusilinnut nunalerinermullu tunngatillugu misissuinernut kiisalu nunanik misissuinernut uppernarsaasersuisarnernullu, isumalluutitigut tunngavigisat avatangiisinut aningaasaqarnermullu tunngatillugu illersorneqarsinnaasumik iluaqutigineqarnerisa qulakkeerneqarnissaannut sunniuteqaqataasussanut, aamma
6) misissuinernut, tunisassiornerup naleqarnerulersinneqarnissaanik pisariillisaavigineqarnissaanillu siunertalinnut kiisalu tamakku ingerlatsivigineqarnerisa pitsanngorsarnissaannut suliniutinut.

§ 3. Qinnuteqaateqartut suliniutissaatut pilersaarutaat tapiissuteqarfigineqarsinnaatitaasut, ¡± 2 malillugu aningaasartuutit uppernarsarneqartut akilerneqareersimasullu suliniutissatut pilersaarummut pineqartumut attuumassuteqartut annerpaamik 50 %-ii tapiissutisiarisinnaavaat, taamaattoq § 9 takuuk.
Imm. 2. Nalunaarummi matumani aningaasartuutitut paasineqassapput toqqaannartumik akissarsianut, siunnersortinik ikiorteqarnernut, pisariaqartinneqartumik angalanernut aningaasartuutinut, atortussanut, immikkut atortussanut suliniutissatullu pilersaarutip aalajangersimasup misilerarneqarneranut aningaasartuutit. Taamaattorli sanaartukkanut aningaasaliissutinut, nalikilliliinerni peqataassutinut, ininut aningaasartuutit kiisalu nalinginnaasumik ingerlatsinermut kiffartuussinernullu aningaasartuutit ilaatinneqarsinnaanngillat. Taamatuttaaq suliniutinut aningaasartuutit, ullup aningaasaliissuteqarfiup siornaniittut ilaatinneqarsinnaanngillat.
Imm. 3. Ukiut ataasiakkaarlugit tapiissuteqartoqartassaaq. Qinnuteqaateqartoqaqqisinnaavoq.

Tapiissuteqarfigineqarsinnaanermut piumasaqaatit

§ 4. § 2 malillugu tapiissuteqarfigineqarnissamik qinnuteqaatit Inuussutissarsiornermut Pisortaqarfimmut nassiunneqartassapput.
Imm. 2. Inuussutissarsiornermut Pisortaqarfiup suliniutip erseqqissarneqarnissaanut immikkut qinnuteqarnermut immersuiffissaq qinnuteqaateqartumit immersorneqartussaq suliarisinnaavaa.
Imm. 3. Taaamaallaat qinnuteqaatinut suliniummik aalajangersimasumik imalinnut tapiissuteqartoqarsinnaavoq. Qinnuteqaateqartup suliamut aalajangersimasumut tunngatillugu nassuiaateqarfigissavai suliniutigineqartoq qanoq ingerlareersimatiginersoq aamma suliniuteqarnermi suna anguniagaanersoq kiisalu anguniakkap taassuma anguneqarnissaanut suliat isumagineqartussatut naatsorsuutigineqartut.

§ 5. Qinnuteqaateqartup suliniutip naammassinissaanut suliamut tunngatillugu pisariaqartinneqartumik tunuliaqutarisani uppernarsarsinnaassavai. Piumasaqaatit tamakku naammassisinnaajumallugit qinnuteqaateqartoq ineriartortitsinermik sulinerup taassumaluunniit ilaata naammassineqarnissaa pillugit suliffeqarfinnut sullissivinnulluunniit allanut isumaqatigiissuteqarsinnaavoq.
Imm. 2. § 2, imm. 1, nr. 1-3 naapertorlugit suliniutinut tapiissuteqartoqarnissaanik qinnuteqaatini suliniutip aningaasanik iluanaaruteqarnissaq siunertaralugu niuernermut tunngatillugu imminut akilersinnaassuseqarnerata ilimanassuseqarnera uppernarsaaserneqassaaq. Piumasaqaatit tamakku naammassisinnaajumallugit qinnuteqaateqartoq aningaasaleeqataasoqarsinnaaneranik suliffeqarfinnut allanut imaluunniit sullissivinnut allanut isumaqatigiissuteqarsinnaavoq.

Nalunaaruteqartarneq

§ 6. Suliniut piumasaqaatit piffissaliussallu, qinnuteqaateqartup aamma Inuussutissarsiornermut Pisortaqarfiup akornanni tapiissuteqarnissamik isumaqatigiissummi aalajangersimasumi aalajangersarneqartut tunngavigalugit taakkulu iluanni naammassineqassaaq.

§ 7. Naammassinninnissamik piffissaliussap isumaqatigiissutigineqartup kingornatigut kingusinnerpaamik qaammatit pingasut qaangiunneranni suliniummut naatsorsuutit aamma suliniummut suliamik ilisimasallit nalunaarusiaat Inuussutissarsiornermut Pisortaqarfimmut nassiunneqassapput, taannali pisinnaatitaavoq piffissaliussaq sivikillillugu aalajangersaasinnaanissaminut. Inuussutissarsiornermut Pisortaqarfiup suliamik ilisimasallit nalunaarusiaat apeqqutinik akisilluni immersuiffissamik immersuinikkut akineqaqqusinnaavaa. Akissuteqarluni nalunaaruteqannginnerup kingunerisinnaavaa tapersiissutit akiliutigineqareersut utertillugit akileqquneqarnerannik piumasaqaateqarneq.
Imm. 2. Aallaqqaammut ineriartortitsinissamik pilersaarummut naleqqiullugu annertuunik allanngortoqarpat Inuussutissarsiornermut Pisortaqarfimmut akissuteqarluni nalunaaruteqartoqassaaq, taamatuttaaq suliniut naammassineqarsinnaajunnaartutut nalilerneqarpat. Akissuteqarluni nalungaaruteqanngitsoornerup kingunerisinnaavaa aningaasat tapiissutigineqartussat suli akiliutigineqanngitsut unitsinneqarnerat.

Tapersiissutissanik akuersissutigineqareersunik unitsitsineq

§ 8. Tapersiissutissanik akuersissutigineqareersunik akiliuteqarnissaaq § 7-imi taaneqartut saniatigut unitsinneqarsinnaavoq imatut pisoqarpat;
1) Inuussutissarsiornermut Pisortaqarfiup suliniut naammassineqarsinnaajunnaartutut nalilerpagu,
2) tapiissutinik tigusisussaq eqqunngitsunik paatsoortitsisinnaasunilluunniit paasissutissiisimappat,
3) tapissutinik tigusisussap tapiissutit tunniunneqarnissaannut paasissutissat pingaarutillit nipangiussimappagit imaluunniit
4) tapissutinik tigusisussap piffissaliussat isumaqatigiissutigineqartut eqqortissimanngippagit, § 6 takuuk.

Immikkut akuersissuteqarsinnaaneq

§ 9. Inuussutissarsiornermut Pisortaqarfiup suliniutip naammassineqarnissaanut pisariaqartinneqartutut isumaqarfigineqarpat § 3, imm. 1-imi procentiliussanik taaneqartoq aalajangersimasumik nalilersuereerluni saneqqussinnaavaa.

Atuutilersitsineq

§ 10. Nalunaarut manna 10. juli 2001-imi atuutilerpoq.

Namminersornerullutik Oqartussat, 22. juni 2001.

Simon Olsen

/

Amalie Jessen