Peqqinnissaqarfiup sullissineri il.il. pillugit Inatsisartut peqqussutaat nr. 15, 6. november 1997-imeersumi § 22, imm. 2 aamma 3 naapertorlugit aalajangersarneqarpoq:

Tulleriissaarisarnermut ataatsimiititaliap suliassai

  § 1 Tunngaviliussat Naalakkersuisunit aalajangersarneqartut iluanni Tulleriissaarisarnermut ataatsimiititaliap makku suliassarai:

1)  napparsimasup najugaata avataani peqqissaaveqarfimmi napparsimasut misissortinnissaannut katsorsarneqarnissaannullu innersuussineq pillugu pissusiusunik tunngaveqarluni suliassanik aalajangersimasunik suliarinninneq.

2)  inuup najugaata avataani peqqissaaveqarfimmi misissortinnissaanut katsorsartinnissaanullu innersuussinissaq pillugu Dronning Ingridip Napparsimmavissuani nakorsaanerit innersuussisartut suliassani tamanut tunngasuunngitsuni aalajangiisinnaanissaannut piginnaatinneqassasut.

Tulleriissaarisarnermut ataatsimiititaliap katitigaanera

  § 2.  Tulleriissaarisarnermut ataatsimiititaliaq ukuninnga taasisinnaasunik ilaasortaqarpoq:

1)  Peqqinnissaqarfimmi pisortaq.

2)   Nakorsat qullersaat.

3)   Peqqissaasut qullersaat.

4)  Tullerissaarisarnermut ataatsimiititaliami ilaasortat allat Dronning Ingridip Napparsimmavissuani nakorsaanertut aqutsisut sinniisussaannik pingasunik kiisalu nunap immikkoortuini nakorsaanertut aqutsisut sinniisussaannik ataatsimik toqqaassapput.

  Imm. 2.  Tulleriissaarisarnermut ataatsimiititaliap ataaatsimiinnerini Naalakkersuisoqarfimmi peqqissutsimut tunngatillugu akisussaasunit sinniisoq peqataasassaaq. Inuk taanna taaseqataasinnaanngilaq.

  Imm. 3.  Ataatsimiititaliap ataatsimiinnerini peqataasussamik suliamik ilisimasalimmik ikiuuttussamik Tulleriissaarisarnermut ataatsimiititaliap siulittaasua aggersaasinnaavoq. Inuk taanna taaseqataasinnaanngilaq.

  § 3.  Peqqinnissaqarfimmi pisortaq Tulleriissaarisarnermut ataatsimiititaliami siulittaasuuvoq. 

  Imm. 2.  Nakorsat qullersaat Tulleriissaarisarnermut ataatsimiititaliami siulittaasup tulliattut inissisimavoq. 

  Imm. 3.  Siulittaasup peqannginnerani taassuma pisinnaatitaaffii pisussaatitaaffiilu siulittaasup tullianit isumagineqartassapput.

Tulleriissaarisarnermut ataatsimiititaliap sulinera

  § 4. Tulleriissaarisarnermut ataatsimiititaliaq nalinginnaasumik amerlanerussuteqarnikkut aalajangiisarpoq. Taasisut naligiippata siulittaasup taasinera aalajangiisuussaaq.

  Imm. 2. Suliami pingaarutillit eqqarsaatigalugit matumani peqqinnissaqarfiup missingersuutaanit akilerneqarsinnaanngitsunik suliamik aalajangiinermi aningaasaqarnikkut annertuumik kinguneqartussat eqqarsaatigalugit suliap tunngaviusumik imarisaata politikkikkut aalajangiiffigisassanngorlugu saqqummiunneqarnissaa pillugu inassuteqarnissaq anguniarlugu suliap sivikitsumik unitsikkallarneqarnissaa pillugu siulittaasoq suliamut qaqutiguuissumik aalajangiisinnaavoq. Napparsimasumut annertuumik pitsaanngitsumik kinguneqassappat suliaq unitsikkallarneqarsinnaanngilaq.

  Imm. 3.  Siulittaasoq imaluunniit siulittaasup tullia aamma Tulleriissaarisarnermut ataatsimiititaliami ilaasortaasut taasisinnaasut ikinnerpaamik sinnerisa affaat ataatsimeeqataatillugit Tulleriissaarisarnermut ataatsimiititaliaq aalajangiisinnaatitaavoq.

  § 5.  Tulleriissaarisarnermut ataatsimiititaliaq najuunnikkut ataatsimiittassaaq imaluunniit pisariaqartitsineq malillugu digitalikkut ataaatsimiittassalluni, taamaattorli ajornanngippat aamma pisariaqarpat suliat sapinngisamik sukkanerpaamik suliarineqassapput. Suliat kingusinaarluni suliarineqarneranni napparsimasup peqqissusaanik ataavartumik ajoqusiisussaasut ilimagineqarpat, suliat piaarnerpaamik suliarineqassapput aamma suliap suliarineqarnissaanut piareersarneqarnerata kingorna kingusinerpaamik ullut suliffiusut qulit ingerlaneranni suliarineqassapput.

  Imm. 2.  Tulleriissaarisarnermut ataatsimiititaliaq ataatsimiinnerit ingerlanneqartarnissaanut suleriaasissamik suliaqassaaq. Suleriaasissaq naalakkersuisoqarfimmi peqqissutsimut tunngatillugu akisussaasunit akuerineqassaaq.

  Imm. 3.  Peqqinnissaqarfimmut Aqutsisoqarfik allattoqarfittut ikiuunnissamut Tulleriissaarisarnermut ataatsimiititaliamut atugassiissaaq.

  § 6. Tulleriissaarisarnermut ataatsimiititaliap ataatsimiinneri ammasuunngillat.

  Imm. 2.  Tulleriissaarisarnermut ataatsimiititaliap ataatsimiinnerinut peqataasut peqqinnissaqarfimmi sulisunut akuerisaasunut nipangiussisussaatitaanerup atuuttup assinganik piumasaqarfigineqarput.

Tulleriissaarinermut ataatsimiititaliap aalajangiisarnera

  § 7.  § 1, nr. 1. naapertorlugu pissusiusunik tunngaveqarluni suliassani aalajangersimasuni Tulleriissaarisarnermut ataatsimiititaliap aalajangigaani nakorsaq attuumassuteqartoq napparsimasup taassumalu ingerlaqqinneranut nalunaaruteqarnissamut isumaginnittoq sapinngisamik piaarnerpaamik allakkatigut nalunaarfigineqassaaq.

  § 8.  § 1, nr. 2 naapertorlugu piginnaatitaaneq pillugu Tulleriissaarisarnermut ataatsimiititaliap aalajangiineri Dronning Ingridip Napparsimmavissuani nakorsaanernut innersuussisartunut allaganngorlugit pissarsiarineqarsinnaasunngortinneqassapput.

  Imm. 2.  Piginnaatitsissutit annertuussusaat pillugit nalornisoqannginniassammat § 1 naapertorlugu piginnaatitsissutit nassuiarneqassapput.

  § 9.  Tulleriissaarisarnermut Ataatsimiititaliamit aalajangerneqartunut tunngatillugu suliami pingaarutilinnik paasissutissanik peqalerpat Tulleriissaarisarnermut Ataatsimiititaliami siulittaasup Tulleriissaarsarnermut Ataatsimiititami suliaq nutaamik suliareqqitassanngortissavaa.

Tulleriissaarisarnermut ataatsimiititaliap atuunneranut uppernarsaat

  § 10. Tulleriissaarisarnermut ataatsimiititaliap ataatsimeereernerini Tulleriissaarisarnermut ataatsimiititaliap allattoqarfia imaqarniliortassaaq.

  Imm. 2.  Imaqarniliaq kingusinnerpaamik ataatsimeereernermiit ullut suliffiusut 14-it qaangiutsinnagit allakkatigut ukununnga nassiunneqartassaaq:

1)  Tulleriissaarisarnermut ataatsimiititaliami ilaasortat,

2)  naalakkersuisoqarfik peqqissutsimut tunngatillugu akisussaasoq, kiisalu 

3)  Nunatsinni Nakorsaaneqarfik.

  Imm. 3.  piumasaqaatit aalajangersimasut taallugit suliani aalajangersimasuni aalajangiinerit imaqarniliami tunngavilersorlugit allanneqassapput.

  Imm. 4.  § 4, imm. 2 naapertorlugu itigartitsisinnaatitaaneq atorneqarpat tamanna imaqarniliami immikkut peqqissaarussamik tunngavilersorlugu allanneqassaaq.

  § 11.  Tulleriissaarisarnermut ataatsimiititaliaq ukiumoortumik nalunaarusiamik naalakkersuisoqarfimmut peqqissutsimut tunngatillugu akisussaasumut kiisalu Nunatsinni Nakorsaaneqarfimmut tunniussisassaaq.

  Imm. 2.  Tulleriissaarisarnermut ataatsimiititaliap ukiumi kingullermi suliai pillugit nassuiaammik imaqartussamik, kingusinnerpaamik aprilip aallaqqaataani nalunaarusiortoqareertassaaq.

  Imm. 3.  Tulleriissaarisarnermut ataatsimiititaliap ukiumoortumik nalunaarusiaanut piumasaqaatit, tassunga ilanngullugit ilusilersornera annikitsualuttortaallu Tulleriissaarisarnermut ataatsimiititaliap suleriaasiani nassuiarneqassapput.

Atuutilersitsinermi, ikaarsaariarnermi atorunnaarsitsinermilu aalajangersakkat

  § 12 Nalunaarut atuutilissaaq 24. februar 2024.

  Imm. 2. Peqatigitillugu Peqqinnissaqarfiup Tulleriissaarisarnermut ataatsimiititaliaa pillugu Namminersornerullutik Oqartussat nalunaarutaat nr. 31, 1. december 2006-imeersoq atorunnaarsinneqarpoq.

  Imm. 3. § 11, imm. 2 naapertorlugu 1 april 2025-mi nassuiaasiortoqariissaaq.

Namminersorlutik Oqartussat, ulloq 16. februar 2024

Agathe Fontain (atsior.)

Peqqissutsimut Naalakkersuisoq

/ Nike Berthelsen (atsior.)