Peqqinnissaqarfiup sullissineri il.il. pillugit Inatsisartut peqqussutaanni nr. 15-imi, 6. november 1997-imeersumi § 22, imm. 3 naapertorlugu aalajangersarneqarput:

§ 1. Sinaakkusiussat Naalakkersuisunit aalajangersarneqartut iluanni Tulleriissaarisarnermut ataatsimiititaliap makku suliassarai:
1) Naalakkersuinikkut aalajangikkat innimigalugit napparsimasunik katsorsaanermi tulleriissaarinissaq salliutinneqassasoq.
2) Kalaallit Nunaanni aamma Kalaallit Nunaannit innersuussinerit pillugit tunaartarisassaliornissaq, taakkuninngalu nakkutiginninnissaq.
3) Katsorsaasarfinnik Kalaallit Nunaata avataaniittunik atuineq malinnaaffigissallugu.
4) Nakorsanit immikkut ilisimasalinnit sullinneqarnerup pingaarnerutillugu pilersaarusiorneqarneranik aammalu ingerlanneqarneranik nakkutilliinissaq.
5) Suliassat inuup najugaqarfiata avataani peqqinnissaqarfimmi misissortinnissamut aamma katsorsarneqarnissamut innersuussinerit inunnut ataasiakkaanut tunngasut tunngaviusumik aalajangiiffigisassat suliarissallugit.

§ 2. Tulleriissaarisarnermut ataatsimiititaliami ilaasortaapput Peqqissaaveqarfinnik Aqutsivimmi nakorsat qullersaat, Dronning Ingridip Napparsimmavissuani nakorsat qullersaat, Dronning Ingridip Napparsimmavissuata pisortaa, Dronning Ingridip Napparsimmavissuani kigutit nakorsaat, Dronning Ingridip Napparsimmavissuani immikkut ilisimasaqarfinni makkunani: tarnikkut nappaatinik katsorsaanermi, pilatsittussaanngitsunik katsorsaanermi, meeqqat nappaataannik katsorsaanermi, saarngit nappaataannik pilaanermi, inuup timaata iluanik pilaanermi, arnat iluinik katsorsaanermi aamma naartusulerinermi ernisuttulerinermilu, siutit-qinngap-toqqusaallu nappaataannik katsorsaanermi, sinitsitsisarnermi, isit nappaataannik katsorsaanermi aamma ammip nappaataanik katsorsaanermi nakorsaanerit akisussaasut, Dronning Ingridip Napparsimmavissuani peqqissaasut qullersaat, Peqqissaaveqarfinnik Aqutsivimmi peqqissaasut qullersaat kiisalu Peqqissutsimut Pisortaqarfimmi pisortaq.
Imm. 2. Ilaasortat allanit sinniisuuffigineqarsinnaanngillat.
Imm. 3. Dronning Ingridip Napparsimmavissuani nakorsat qullersaat ataatsimiititaliami siulittaasuuvoq. Dronning Ingridip Napparsimmavissuata pisortaa siulittaasup tulleraa. Siulittaasup peqannginnerani taassuma pisinnaatitaaffii pisussaatitaaffiilu siulittaasup tullianit isumagineqartassapput.

§ 3. Tulleriissaarisarnermut ataatsimiititaliaq nalinginnaasumik amerlanerussuteqarnikkut aalajangiisarpoq. Amerlaqatigiinnik taasisoqartillugu siulittaasup taasinera aalajangiisuusassaaq.
Imm. 2. Tulleriissaarisarnermut ataatsimiititaliaq aalajangiisinnaassuseqarpoq siulittaasoq imaluunniit siulittaasup tullia aamma Tulleriissaarisarnermut ataatsimiititaliami ilaasortaasut Kalaallit Nunaanni atorfeqartut ikinnerpaamik affaat najuutsillugit.
Imm. 3. Tulleriissaarisarnermut ataatsimiititaliap Dronning Ingridip Napparsimmavissuani nakorsaanerit tulleriissaarisartut suliassani nappaatinut nalinginnaasunut tunngasuni aalajangiinissamut piginnaatissinnaavai.

§ 4. Tulleriissaarisarnermut ataatsimiititaliaq qaammatikkaartumik ataatsimiittarpoq. Siulittaasoq immikkut ittumik ataatsimiinnissanut ataatsimiigiaqqusisinnaavoq, suliassaqarpat tunngaviusumik aalajangiiffiusussamik nukinginnartuusumillu.
Imm. 2. Tulleriissaarisarnermut ataatsimiititaliamut ataatsimiigiaqqusinerit sivikinnerpaamik ullunik 7-inik siumoortumik nalunaarutigineqartassapput, ataatsimiinnermullu ullormut oqaluuserisassanik imaqartassallutik annikinnerpaamik makkuninnga imaqartartussamik:
1) Kingullermik ataatsimiinnermit imaqarniliap akuersissutiginera.
2) Ullormut oqaluuserisassat akuersissutiginerat.
3) Kalaallit Nunaata avataani katsorsaasarfinnik atuineq pillugu paasissutissiineq.
4) Utaqqisut allattorsimaffiat pillugu paasissutissiineq.
5) Angallassigasuarnerit pillugit paasissutissiineq.
6) Dronning Ingridip Napparsimmavissuanit nunanut allanut innersuussinerit pingaaruteqartut pillugit paasissutissiineq.
7) Najukkani peqqissaaveqarfinnit innersuussinerit pingaaruteqartut pillugit paasissutissiineq.
8) Suliassat inunnut ataasiakkaanut tunngasut suliarineqarnerat.
9) Tamalaat.
Imm. 3. Dronning Ingridip Napparsimmavissua Tulleriissaarisarnermut ataatsimiititaliamut allattoqarfeqartitsisuussaaq.

§ 5. Tulleriissaarisarnermut ataatsimiititaliap ataatsimiinneri tamanut ammasuunngillat. Pissutsit immikkut ittut atuuppata Tulleriissaarisarnermut ataatsimiititaliap siulittaasua suliamut ilisimasalimmik Tulleriissaarisarnermut ataatsimiititaliap suliamik suliarinninnerani ikiuuttussamik aggersaasinnaavoq.
Imm. 2. Tulleriissaarisarnermut ataatsimiititaliaq tunngavissaqartillugu inatsisilerituumik Peqqissutsimut Pisortaqarfimmeersumik ataatsimiinnermini peqataatitsisinnaavoq. Ataatsimiigiaqqusissutit ataatsimiinnermilu imaqarniliat tamaasa ilisimatitsissutitut Peqqissutsimut Pisortaqarfimmut nassiunneqartassapput.

§ 6. Tulleriissaarisarnermut ataatsimiititaliap ataatsimeereernerini imaqarniliortoqartassaaq Tulleriissaarisarnermut ataatsimiititaliap suliai ullormut oqaluuserisassani ataasiakkaarlugit oqaluuserineqartut issuarlugit. Suliassat inunnut ataasiakkaanut tunngasut ilisarineqarsinnaajunnaarsillugit allaaserineqartassapput. Imaqarniliaq Tulleriissaarisarnermut ataatsimiititaliap ilaasortaanut, Peqqissutsimut Naalakkersuisumut, Peqqissutsimut Pisortaqarfimmut, Dronning Ingridip Napparsimmavissuata pisortaanut, Peqqissaaveqarfinnik Aqutsivimmut, najukkani peqqissaaveqarfinni nakorsat qullersaanut, Peqqinnissakkut Nakkutilliisoqarfimmut kiisalu Kalaallit peqqissartut Illuannut nassiunneqartassaaq.
Imm. 2. Tulleriissaarisarnermut ataatsimiititaliaq suliani pillugit Peqqissutsimut Naalakkersuisumut ukiumoortumik nalunaarusiortassaaq. Kingusinnerpaamik aprilip aallaqqaataanut nalunaarusiortoqareertassaaq, Tulleriissaarisarnermullu ataatsimiititaliap suliai pillugit nassuiaatinik imaqartussaalluni, tassunga ilanngullugit § 3, imm. 3 naapertorlugu aalajangiinerit.

§ 7. Tulleriissaarisarnermut ataatsimiititaliap suliassani aalajangersimasuni inunnut ataasiakkaanut tunngasuni aalajangiineri nakorsamut innersuussisimasumut allakkatigut nalunaarutigineqartassapput, taassumalu napparsimasumik ilisimatitsinissaq isumagissavaa.
Imm. 2. Suliassami Tulleriissaarisarnermut ataatsimiititaliap aalajangiivigisimasaani paasissutissat nutaat pingaaruteqartullu saqqummerpata, suliaq Tulleriissaarisarnermut ataatsimiititaliamit suliareqqinneqassaaq.
Imm. 3. Tulleriissaarisarnermut ataatsimiititaliap § 1, nr. 5 naapertorlugu aalajangiineri allaffissornikkut oqartussanut allanut suliassanngorteqqinneqarsinnaanngillat.

§ 8. Nalunaarut atuutilerpoq 1. januar 2007.
Imm. 2. Tamatumunnga peqatigitillugu Peqqinnissaqarfiup Tulleriissaarisarnermut ataatsimiititaliaa pillugu Namminersornerullutik Oqartussat nalunaarutaat nr. 2, 5. februar 2003-meersoq atorunnaarsinneqarpoq.

Agathe Fontain

/

Søren Rendal