Tarnimikkut napparsimasunik nammineersinnaajunnaarsitsisarneq allatigullu pinngitsaaliissummik iliuuseqartarneq pillugit Inatsisartut inatsisaanni nr. 11-mi , 12. juni 2019-imeersumi § 48, imm. 4, naapertorlugu aalajangersarneqarput:

Kapitali 1

Tarnimikkut Nappaatillit Maalaarutaannik Aalajangiisartuni suliassani illuatungeriit

  § 1.  Tarnimikkut napparsimasunik nammineersinnaajunnaarsitsisarneq allatigullu pinngitsaaliissummik iliuuseqartarneq pillugit Inatsisartut inatsisaanni § 46 naapertorlugu Peqqinnissamut Naalakkersuisoq maalaarutinut aalajangiisartunik ima taaguutilimmik pilersitsissaaq: Tarnimikkut Nappaatillit Maalaarutaannik Aalajangiisartut.

  § 2.  Tarnimikkut Nappaatillit Maalaarutaannik Aalajangiisartuni suliassani illuatungeriit tassaapput napparsimasoq napparsimmavimmilu oqartussaasut.

  Imm. 2.  Peqqinnissaqarfimmi inuit sukumiinerusumik taaneqartut naammagittaalliuutigineqarpata peqqinnissaqarfimmi inuit pineqartut suliassami peqataasutut aamma isigineqarsinnaapput.

Kapitali 2

Suliassat piareersarneqartarnerat

  § 3.  Tarnimikkut napparsimasunik nammineersinnaajunnaarsitsisarneq allatigullu pinngitsaaliissummik iliuuseqartarneq pillugit Inatsisartut inatsisaanni § 47 naapertorlugu napparsimmavimmi oqartussaasut napparsimasumit napparsimasunulluunniit siunnersortimit noqqaassuteqartoqareerneratigut suliassaq Tarnimikkut Nappaatillit Maalaarutaannik Aalajangiisartunut tunniunneqassaaq.

  Imm. 2.  Napparsimasoq siunnersortaalu Tarnimikkut Nappaatillit Maalaarutaannik Aalajangiisartunut toqqaannartumik suliakkiisinnaapputtaaq.

  § 4. Suliap tiguneqarnerani aalajangiisartut siulittaasuata naammagittaalliuut aalajangiisartut  piginnaasaasa iluaniinnersoq aalajangiivigissavaa.

  Imm. 2.  Naammagittaalliuut aalajangiisartut piginnaaneqarfiisa avataanniittoq qularutissaanngippat, siulittaasup oqartussanut suliarinnittussanut eqqortunut ingerlateqqissavaa, illuatungeriillu tamatuminnga ilisimatillugit. Pisuni allani apeqqut Tarnimikkut Nappaatillit Maalaarutaannik Aalajangiisartunit suliarineqassaaq.

  § 5. Suliassap tiguneqarnerani Tarnimikkut Nappaatillit Maalaarutaannik Aalajangiisartut siulittaasuata paasissutissat pisariaqartinneqartut ilanngullugit nassiunneqarsimanersut nakkutigissavaa, tassunga ilanngullugit:

1)  suut naammagittaalliuutigineqarnerannik oqaatiginninneq,

2)  pinngitsaaliissummik iliuuseqarnermik nalunaarsuiffiup assilinera,

3)  nakorsaanermit katsorsaanermut akisussaasumit nalunaarut aamma

4)  katsorsaanissamut pilersaarut.

  Imm. 2.  Napparsimasup siunnersortaataluunniit naammagittaalliuut Tarnimikkut Nappaatillit Maalaarutaannik Aalajangiisartunut toqqaannartumik suliakkiutigippagu, aalajangiisartut siulittaasuata napparsimmavimmi oqartussat, Peqqinnissamut Aqutsisoqarfik ilanngullugu naammagittaalliuut pillugu nalunaarfigissavai tamatumalu peqatigisaanik Peqqinnissamut Aqutsisoqarfik imm. 1 naapertorlugu paasissutissanik pisariaqartinneqartunik nassiusseqqullugu qinnuigissallugu.

  Imm. 3.  Aalajangiisartut siulittaasuata suliap paasissutissiissutaanissaa, pisariaqarpallu nalunaarutinik assigisaannillu allanik pissarsiniarnissaq aamma aalajangiivigissavaa.

  § 6. Tarnimikkut Nappaatillit Maalaarutaannik Aalajangiisartut imaluunniit tassani ilaasortat arlaata aalajangiisartunit piginnaatinneqartup, suliamik aalajangersimasumik suliaqarnermut atatillugu Dronning Ingridip Napparsimmavissuani tarnimikkut nappaatilinnut immikkoortortaqarfik misissuiffigisinnaavaat.

Kapitali 3

Ataatsimiittarnerit

  § 7. Siulittaasuusup Tarnimikkut Nappaatillit Maalaarutaannik Aalajangiisartut ataatsimiinnissaasa qaqugu sumilu pinissaat aalajangissavaa, ataatsimiinnernilu aqutsisuussalluni.

  Imm. 2. Siulittaasumit allamik isumaqatigiissuteqartoqarsimanngippat Dronning Ingridip Napparsimmavissuani tarnimikkut nappaatilinnut immikkoortortaqarfimmi aalajangiisartut ataatsimiissapput.

  Imm. 3.  Suliat immikkut nukingiuttariallit, tarnimikkut napparsimasunik nammineersinnaajunnaarsitsisarneq allatigullu pinngitsaaliissummik iliuuseqartarneq pillugit Inatsisartut inatsisaanni § 41, imm. 3, naapertorlugu nalinginnaasumik pinngitsaaliissummik iliuuseqarnissap kinguartinneqarneranik kinguneqartartut, ilaatigut pinngitsaaliissummik katsorsartinnissaq pillugu aalajangiinernut naammagittaalliuutit, suliassanit allanit siulliullugit suliarineqarnissaat, siulittaasumit aalajangiivigineqarsinnaapput.

  Imm. 4.  Napparsimasoq, napparsimasumut siunnersorti, napparsimmavimmi oqartussat, nakorsaaneq pineqartoq peqqinnissakkullu sullissisut akuusuujunnartut allat, suliap pineqartup Tarnimikkut Nappaatillit Maalaarutaannik Aalajangiisartunit qaqugu sumilu ataatsimiissutaanissaa pillugu ilisimatinneqassapput.

  § 8. Napparsimasumut siunnersorti naammagittaalliuutip Tarnimikkut Nappaatillit Maalaarutaannik Aalajangiisartunit oqaluuserineqarnerani tarnimikkut nappaatilinnik nammineersinnaajunnaarsitsisarneq allatigullu pinngitsaaliissummik iliuuseqartarneq pillugit Inatsisartut inatsisaanni § 35, imm. 3, nr. 3 naapertorlugu sapinngisamik peqataatinneqassaaq. Tamanna aamma nakorsamut pinngitsaaliissummik iliuuseqarnermik aalajangiisumut naammagittaalliuutigineqartumut atuuppoq.

  Imm. 2.  Tarnimikkut napparsimasunik nammineersinnaajunnaarsitsisarneq allatigullu pinngitsaaliissummik iliuuseqartarneq pillugit Inatsisartut inatsisaanni § 48, imm. 2, naapertorlugu napparsimasup siunnersortaatalu oqaatsitigut imal. peqqinnissaqarfiup qarasaasiakkut attaveqaataa atorlugu, aalajangiisartunut suliamik saqqummiussinissaq pisinnaatitaaffigaat. Peqqinnissaqarfiup sinniisai, tarnimikkut nappaatilinnut nakorsaaneq pisumut attuumassuteqartoq, peqqinnissakkullu sullissisut pisumut akuusuujunnartut allat taamatulli pisinnaatitaaffeqarput.

  Imm. 3.  Immikkut ittunik pisoqartillugu napparsimasup peqqissusaanut imal. suliap aalajangiisartuni suliarineqarnissaanut pingaaruteqarpat, tarnimikkut napparsimasunik nammineersinnaajunnaarsitsisarneq allatigullu pinngitsaaliissummik iliuuseqartarneq pillugit Inatsisartut inatsisaanni § 48, imm. 2, nr. 2 naapertorlugu napparsimasup isumaqatigiinniarnermi tamakkiisumik ilaannakortumilluunniit peqataatinneqannginnissaa, aalajangiisartut aalajangiivigisinnaavaat.

  § 9. Tarnimikkut Nappaatillit Maalaarutaannik Aalajangiisartut ataatsimiinneri tamanut ammasuunngillat.

Kapitali 4

Aalajangiisarnerit il.il.

  § 10. Pinngitsaaliissummik katsorsartinneq, napparsimmavimmiillu angerlareernermi pinngitsaaliissummik malittarineqarneq pillugit naammagittaalliuutinut pinngitsaaliissummik iliuuseqarnissamik kingumoortumik sunniuteqartunut, tarnimikkut napparsimasunik nammineersinnaajunnaarsitsisarneq allatigullu pinngitsaaliissummik iliuuseqartarneq pillugit Inatsisartut inatsisaanni § 48, imm. 3, naapertorlugu, naammagittaalliuutit tiguneqarneranniit ulluinnaat arfineq-marluk qaangiutsinnagit, Tarnimikkut Nappaatillit Maalaarutaannik Aalajangiisartut aalajangiissapput.

  Imm. 2.  Suliani allani Tarnimikkut Nappaatillit Maalaarutaannik Aalajangiisartut sapinngisaq tamaat piaartumik aalajangiissapput. Naammagittaalliuutip aalajangiisartunit tiguneqarneraniit ullut 14-it qaangiunneranni naammagittaalliuut suli aalajangiivigineqarsimanngippat, aalajangiisartut napparsimasoq siunnersortaalu tamassumunnga pissutaasumik, qaqugulu aalajangiisoqarnissaata naatsorsuutigineqarsinnaaneranik ilisimatissavai.

  § 11. Tarnimikkut Nappaatillit Maalaarutaannik Aalajangiisartut oqaloqatigiinnikkut nalilersuereernermi taasinikkut amerlanerussuteqarneq tunngavigalugu aalajangiisarput.

  Imm. 2.  Aalajangiineq aalajangiinernut nalunaarsuiffimmut allanneqassaaq. Aalajangiisartuni ilaasortaq isummaminut tunngavilersuutiminik nalunaarsuiffimmut naatsumik ilanngussisoqarnissaanik piumasaqarsinnaavoq.

  Imm. 3.  Tarnimikkut Nappaatillit Maalaarutaannik Aalajangiisartut aalajangigaat tunngavilersukkat, aalajangiisartut tamakkerlutik imaluunniit amerlanerussuteqartut isumaqatigiissutigineraat, allaganngorlugit suliarineqassapput. Aalajangiisartut aalajangigaat siulittaasumit imaluunniit tassannga piginnaatinneqartumit atsiorneqassapput.

  § 12. Tarnimikkut Nappaatillit Maalaarutaannik Aalajangiisartut aalajangigaat illuatungeriinnut nassiunneqassapput.

  Imm. 2.  Napparsimasunut siunnersorti pisariaqartitsineq naapertorlugu Tarnimikkut Nappaatillit Maalaarutaannik Aalajangiisartunit aalajangiinerup paasissutissiissutigineqarneranut ikiuutissaaq.

  § 13. Tarnimikkut Nappaatillit Maalaarutaannik Aalajangiisartut aalajangigaat tassaasinnaapput pinngitsaaliissummik iliuuseqarnermik akuersineq imaluunniit iliuuseqarnerup eqqunnginneranik naliliineq.

  Imm. 2.  Pinngitsaaliissummik katsorsaanissamik aalajangiinermik naammagittaalliuuteqarnermi, aalajangiisartut aalajangiineq akuerisinnaavaat itigartissinnaalluguluunniit. Nakorsaasiinermut annertussusiliinermullu aalajangersimasumut naammagittaalliuuteqarnermut tunngassuteqarpat, tamatumunngattaaq aamma atuuppoq. Taamaattoq Tarnimikkut Nappaatillit Maalaarutaannik Aalajangiisartut nakorsaammik allamik imaluunniit annertussutsimik allamik innersuussisinnaanngillat.

  Imm. 3.  Naammagittaalliuut peqqinnissakkut sullissisumuttaaq/sullissisunuttaaq pinngitsaaliissummut naammagittaalliuutigineqartumut akuusimasumut tunngassuteqarpat, pineqartut isornartorsiorneqarnissaannut tunngavissaqarnersoq, Tarnimikkut Nappaatillit Maalaarutaannik Aalajangiisartut naliliivigissavaat.

  § 14. Tarnimikkut Nappaatillit Maalaarutaannik Aalajangiisartut suliatik pillugit nalunaarummik ukiut tamaasa tamanut saqqummiussissapput.

  Imm. 2.  Ukiumoortumik nalunaarut Dronning Ingridip Napparsimmavissuani tarnimikkut nappaatilinnut immikkoortortaqarfik suleqatigalugu suliarineqassaaq.

  Imm. 3.  Imm. 2 naapertorlugu ukiumoortumik nalunaarut kingusinnerpaamik tamanut saqqummiunneqarnerani Peqqinnissamut Naalakkersuisoqarfimmut nassiunneqassaaq.

Kapitali 5

Naammagittaalliuuteqarsinnaaneq, naammagittaalliornissamut ilitsersuut eqqartuussivimmullu saqqummiussineq

  § 15. Tarnimikkut Nappaatillit Maalaarutaannik Aalajangiisartut napparsimasoq siunnersortaalu Kalaallit Nunaanni eqqartuussisarneq pillugu inatsimmi kapitali 28 naapertorlugu, eqqartuussivimmi aalajangiivigineqarsinnaanera pillugu ilitsersussavaat.

  Imm. 2.  Tarnimikkut Nappaatillit Maalaarutaannik Aalajangiisartut napparsimasoq napparsimasumullu siunnersorti aamma ilisimatissavaat suliap aalajangiisartunit eqqartuussivimmut tunniunneqarnissaa, napparsimasoq eqqartuussissuserisumik eqqartuussivimmit illersuisulerneqassasoq pineqartoq nammineerluni eqqartuussissuserisussarsisimanngippat.

  § 16. Aalajangiinernik eqqartuussivimmut saqqummiussineq noqqaassuteqarnerup saqqummiunneqarneranit ulluinnaat tallimat qaangiutsinnagit pissaaq.

Kapitali 6

Nipangiussimasussaatitaaneq

  § 17.  Tarnimikkut Nappaatillit Maalaarutaannik Aalajangiisartut nipangiussisussaatitaapput.

Kapitali 7

Atuutilersitsinermut atorunnaarsitsinermullu aalajangersakkat

  § 18.  Nalunaarut 26. april 2024-mi atuutilerpoq.

  Imm. 2.  Tamanna ilutigalugu Tarnimikkut Nappaatillit Maalaarutaannik Aalajangiisartut suleriaasiat pillugu Namminersorlutik Oqartussat nalunaarutaat nr. 15, 2. december 2013-meersoq atorunnaarsinneqarpoq.

Namminersorlutik Oqartussat, ulloq 23. april 2024

Agathe Fontain (atsior.)

Peqqissutsimut Naalakkersuisoq

/ Nike Berthelsen (atsior.)