Tarnimikkut nappaatilinnik nammineersinnaajunnaarsitsineq allatigullu pinngitsaaliissummik iliuuseqarneq pillugu Inatsisartut inatsisaanni nr. 24-mi, 3. december 2012-imeersumi § 43, imm. 4, naapertorlugu aalajangersarneqarput:

Kapitali 1
Tarnimikkut Nappaatillit Maalaarutaannik Aalajangiisartuni ilaasortat suliassaallu

§ 1.  Tarnimikkut nappaatilinnik nammineersinnaajunnaarsitsineq allatsigullu pinngitsaaliissummik iliuuseqarneq pillugu Inatsisartut inatsisaanni § 41 naapertorlugu Peqqissutsimut Attaveqarnermullu Naalakkersuisoq maalaarutinut aalajangiisartunik Tarnimikkut Nappaatillit Maalaarutaannik Aalajangiisartunik taaguutilimmik pilersitsissaaq.

§ 2.  Pinngitsaaliissummik napparsimavimmut unititsineq, pinngitsaaliissummik tigummigallagassanngortitsineq, qimaasup/takkutinngitsoortup pinngitsaaliissummik utertitaanera, pinngitsaaliissummik katsorsartinneq, napparsimmavimmiit angerlareernermi pinngitsaaliissummik malittarineqarneq, pinngitsaaliissummik nakorsarneqarneq, nukersorfigineqarneq, napparsimasoq illersorniarlugu nakorsaaneq, immikkut nakkutilliineq nal. ak. 24-t sinnerlugit ataavartumik ingerlanneqartoq, kiisalu immikkoortortami matunik parnaarsinissamik aalajangiinerit pillugit maalaarutit Tarnimikkut Nappaatillit Maalaarutaannik Aalajangiisartut suliarisarpaat.
Imm. 2.  Illuatungeriit tassaapput napparsimasoq napparsimmavimmilu oqartussat. Maalaarut peqqinnissakkut sullissisunut aalajangersimasunut tutsinneqarpat, taakku aamma illuatungiliuttutut inississapput.

§ 3.  Tarnimikkut Nappaatillit Maalaarutaannik Aalajangiisartut suliat ataasiakkaat aalajangiiviginissaannut pingasunik ilaasortaqarput: siulittaasoq eqqartuussissuserisoq, Nunatsinni Nakorsaaneq kiisalu napparsimasut peqatigiiffiannit aallartitaq tarnimikkut nappaatilinnut sinniisaasoq imal. ilaasortamut taartaasussanngortitaq.
Imm. 2.  Tarnimikkut Nappaatillit Maalaaruteqartarfianni allaffissornikkut suliassat Nunatsinni Nakorsaaneqarfimmit isumagineqartarput. Aalajangiisartut sulinerannut ilaasortallu akissarsiaqartinneqarunnarnerannut tunngatillugu aningaasartuutit, Peqqissutsimut Attaveqarnermullu Naalakkersuisoqarfimmit akilerneqassapput.

Kapitali 2
Suliassat piareersarneqartarnerat

§ 4.  Inatsimmi § 42 naapertorlugu Dronning Ingridip Napparsimmavissuani tarnimikkut nappaatilinnut immikkoortortaqarfik, napparsimasup siunnersortaataluunniit kissaatigippagu, Tarnimikkut Nappaatillit Maalaarutaannik Aalajangiisartunut suliassanngortitsisinnaavoq.
Imm. 2.  Napparsimasoq siunnersortaalu Tarnimikkut Nappaatillit Maalaarutaannik Aalajangiisartunut toqqaannartumik suliakkiisinnaapputtaaq.
Imm. 3.  Maalaarut napparsimasumit siunnersortaanilluunniit nammineersinnaajunnaarsitsinerup allatigullu pinngitsaaliissummik iliuuseqarfigineqarnerup qaangiunneraniit qaammatit arfinillit qaangiutsinnagit nassiunneqassaaq.

§ 5.  § 4-mi taaneqartutut Tarnimikkut Nappaatillit Maalaarutaannik Aalajangiisartunut suliakkiussisoqarpat, suliamut tunngatillugu allagaatit pinngitsaaliissummik iliuuseqarnernut nalunaarsuivimmit assilisat Dronning Ingridillu Napparsimmavissuani tarnimikkut nappaatilinnut immikkoortortaqarfimmi nakorsaanerup oqaaseqaataa ilanngullugu, Peqqissutsimut Pitsaaliuinermullu Aqutsisoqarfiup Aalajangiisartunut nassiutissavai.

§ 6.  Suliap tiguneqarnerani Aalajangiisartut siulittaasuata maalaarut Aalajangiisartut piginnaatitaaffiisa iluaniinnersoq aalajangiivigissavaa. Maalaarut Aalajangiisartut piginnaatitaaffiisa avataanniittoq qularutissaanngippat, siulittaasup oqartussanut suliarinnittussanut ingerlateqqissavaa, illuatungeriillu tamatuminnga ilisimatillugit. Pisuni allani apeqqut Tarnimikkut Nappaatillit Maalaarutaannik Aalajangiisartunit suliarineqassaaq.

§ 7.  Suliassap tiguneqarnerani Tarnimikkut Nappaatillit Maalaarutaannik Aalajangiisartut siulittaasuata paasissutissat pisariaqartinneqartut nassiunneqarsimanersut, suna maalaarutaanersoq, pinngitsaaliissummik iliuuseqarnernik nalunaarsuiffiup assilinera, nakorsaanerup katsorsaanermi akisussaasup nalunaarutaa, katsorsaanermilu pilersaarut ilanngullugit misissussavai.
Imm. 2.  Napparsimasup siunnersortaataluunniit maalaarut Tarnimikkut Nappaatillit Maalaarutaannik Aalajangiisartunut toqqaannartumik suliakkiuppagu, Aalajangiisartut siulittaasuata Dronning Ingridip Napparsimmavissuani tarnimikkut nappaatilinnut immikkoortortaqarfimmi nakorsaaneq kiisalu Peqqissutsimut Pitsaaliuinermullu Aqutsisoqarfik maalaarut pillugu ilisimatissavai, tamatumalu malitsigisaanik Peqqissutsimut Pitsaaliuinermullu Aqutsisoqarfik, imm. 1 naapertorlugu paasissutissanik pisariaqartitanik Aalajangiisartunut nassiusseqqullugu qinnuigissallugu.
Imm. 3.  Aalajangiisartut siulittaasuata suliap paasissutissiissutaanissaa, pisariaqarpallu nalunaarutinik assigisaannillu allanik pissarsiniarnissaq aamma aalajangiivigissavaa.

§ 8.  Aalajangiisartut imaluunniit tassani ilaasortat arlaata Aalajangiisartunit piginnaatinneqartup, suliamik aalajangersimasumik suliaqarnermut atatillugu Dronning Ingridip Napparsimmavissuani tarnimikkut nappaatilinnut immikkoortortaqarfik misissorsinnaavaat.

Kapitali 3
Ataatsimiittarnerit

§ 9.  Siulittaasup Aalajangiisartut ataatsimiinnissaasa qaqugu sumilu pinissaat aalajangertarpaa, ataatsimiinnernilu aqutsisuusarluni.
Imm. 2.  Pissusissamisuunngitsutut isigineqanngippat, Dronning Ingridip Napparsimmavissuani tarnimikkut nappaatilinnut immikkoortortaqarfimmi, Aalajangiisartut ataatsimiinneri ingerlanneqassapput.
Imm. 3.  Suliat immikkut nukingiuttariallit, Inatsisartut inatsisaanni § 39, imm. 3, naapertorlugu nalinginnaasumik pinngitsaaliissummik iliuuseqarnissap kinguartinneqarneranik kinguneqartartut, ilaatigut pinngitsaaliissummik katsorsartinnissaq pillugu aalajangiinernut maalaarutit, suliassanit allanit siulliullugit suliarineqarnissaat, siulittaasumit aalajangiivigineqarsinnaapput.
Imm. 4.  Napparsimasoq, napparsimasumut siunnersorti, Peqqissutsimut Pitsaaliuinermullu Aqutsisoqarfik, tarnimikkut nappaatilinnut nakorsaaneq pineqartoq, peqqinnissakkullu sullissisut akuusuujunnartut allat, suliap pineqartup Tarnimikkut Nappaatillit Maalaarutaannik Aalajangiisartunit qaqugu sumilu ataatsimiissutaanissaa pillugu ilisimatinneqassapput.

§ 10.  Napparsimasup siunnersortaa maalaarutip Aalajangiisartuni oqaluuserineqarnerani Inatsisartut inatsisaanni § 32, imm. 2, oqaaseqatigiit pingajuat naapertorlugu sapinngisamik peqataatinneqassaaq. Tamanna aamma nakorsamut pinngitsaaliissummik iliuuseqarnermik aalajangiisumut maalaarutaasumut atuuppoq.
Imm. 2.  Inatsisartut inatsisaanni § 43, imm. 2, naapertorlugu, napparsimasup siunnersortaatalu oqaatsitigut imal. peqqinnissaqarfiup qarasaasiakkut attaveqaataa atorlugu, Aalajangiisartunut suliamik saqqummiussinissaq pisinnaatitaaffigaat. Peqqissutsimut Pitsaaliuinermullu Aqutsisoqarfiup sinniisai, tarnimikkut nappaatilinnut nakorsaaneq pisumut attuumassuteqartoq, peqqinnissakkullu sullissisut pisumut akuusuujunnartut allat taamatulli pisinnaatitaaffeqarput.
Imm. 3.  Immikkut ittunik pisoqartillugu napparsimasup peqqissusaanut imal. suliap Aalajangiisartuni suliarineqarnissaanut pingaaruteqarpat, Inatsisartut inatsisaanni § 43, imm. 2, oqaaseqatigiit aappaat naapertorlugu napparsimasup isumaqatigiinniarnermi tamakkiisumik ilaannakortumilluunniit peqataatinneqannginnissaa, aalajangiisartut aalajangiivigisinnaavaat.

§ 11.  Tarnimikkut Nappaatillit Maalaarutaannik Aalajangiisartut ataatsimiinneri tamanut ammasuunngillat.

Kapitali 4
Aalajangiisarnerit il.il.

§ 12.  Pinngitsaaliissummik katsorsartinneq, napparsimmavimmiillu angerlareernermi pinngitsaaliissummik malittarineqarneq pillugit maalaarutinut pinngitsaaliissummik iliuuseqarnissamik kinguartitsisinnaasunut, Inatsisartut inatsisaanni § 43, imm. 3, naapertorlugu, maalaarutit tiguneqarneranniit ulluinnaat arfineq marluk qaangiutsinnagit, Tarnimikkut Nappaatillit Maalaarutaannik Aalajangiisartut aalajangiissapput.
Imm. 2.  Suliani allani Tarnimikkut Nappaatillit Maalaarutaannik Aalajangiisartut sapinngisaq tamaat piaartumik aalajangiissapput. Maalaarutip Aalajangiisartunit tiguneqarneraniit ullut 14-it qaangiunneranni maalaarut suli aalajangiivigineqarsimanngippat, Aalajangiisartut napparsimasoq siunnersortaalu tamassumunnga pissutaasumik, qaqulugu aalajangiisoqarnissaata naatsorsuutigineqarsinnaaneranik ilisimatissavai.

§ 13.  Tarnimikkut Nappaatillit Maalaarutaannik Aalajangiisartut taasinikkut amerlanerussuteqarneq tunngavigalugu aalajangiisarput.
Imm. 2.  Aalajangiineq aalajangiinernut nalunaarsuiffimmut allanneqassaaq. Aalajangiisartuni ilaasortaq isummaminut tunngavilersuutiminik nalunaarsuiffimmut naatsumik ilanngussisoqarnissaanik piumasaqaateqarsinnaavoq.
Imm. 3.  Tarnimikkut Nappaatillit Maalaarutaannik Aalajangiisartut aalajangigaat tunngavilersukkat, aalajangiisartut tamakkerlutik imal. amerlanerussuteqartut isumaqatigiissutigineraat, allaganngorlugit suliarineqassapput. Aalajangiisartut aalajangigaat siulittaasumit imal. tassannga piginnaatinneqartumit atsiorneqassapput.

§ 14.  Tarnimikkut Nappaatillit Maalaarutaannik Aalajangiisartut aalajangigaat illuatungeriinnut nassiunneqassapput.

§ 15.  Tarnimikkut Nappaatillit Maalaarutaannik Aalajangiisartut aalajangigaat tassaasinnaapput pinngitsaaliissummik iliuuseqarnermik akuersineq imal. eqqunngitsutut naliliineq.
Imm. 2.  Pinngitsaaliissummik katsorsaanissamik aalajangiinermik maalaaruteqarnermi, Aalajangiisartut aalajangiineq akuerisinnaavaat itigartissinnaalluguluunniit. Nakorsaasiinermut annertussusiliinermullu aalajangersimasumut maalaarut tunngassuteqarpat, tamatumunngattaaq aamma atuuppoq. Taamaasillutik Tarnimikkut Nappaatillit Maalaarutaannik Aalajangiisartut nakorsaammik allamik imaluunniit annertussutsimik allamik innersuussisinnaanngillat.
Imm. 3.  Maalaarut peqqinnissakkut sullissisumuttaaq/sullissisunuttaaq pinngitsaaliissummut maalaarutaasumut akuusimasumut tunngassuteqarpat, pineqartut isornartorsiorneqarnissaannut tunngavissaqarnersoq, Tarnimikkut Nappaatillit Maalaarutaannik Aalajangiisartut naliliivigissavaat.

§ 16.  Tarnimikkut Nappaatillit Maalaarutaannik Aalajangiisartut ukiut tamaasa suliatik pillugit nalunaarummik tamanut saqqummiussissapput. Nalunaarut Dronning Ingridip Napparsimmavissuani tarnimikkut nappaatilinnut immikkoortortaqarfik suleqatigalugu suliarineqassaaq.

Kapitali 5
Maalaaruteqarsinnaaneq maalaaruteqarnissamullu ilitsersuineq

§ 17.  Tarnimikkut Nappaatillit Maalaarutaannik Aalajangiisartut napparsimasumit siunnersortaanilluunniit piumaffigineqarnertik naapertorlugu, pinngitsaaliissummik napparsimmavimmut unitsitsineq, pinngitsaaliissummik tigummigallagassanngortitsineq, qimaasup/takkutinngitsoortup pinngitsaaliissummik utertitaanera, napparsimmavimmiit angerlareernermi pinngitsaaliissummik malittarineqarneq, pinngitsaaliissummik aalaakkerneqarneq, napparsimasoq illersorniarlugu aalaakkiineq, immikkut nakkutilliineq nal. ak. 24-t sinnerlugit ataavartumik ingerlanneqartut, kiisalu immikkoortortami matunik parnaarsineq pillugit aalajangiinerit, eqqartuussisarneq pillugu inatsimmi kapitali 28-mi maleruagassat naapertorlugit, eqqartuussivimmut tunniutissavaat. Piumasaqaateqarnerup kingorna kingusinnerpaamik ulluinnaat tallimat qaangiutsinnagit eqqartuussivimmut saqqummiussisoqassaaq.

§ 18.  Tarnimikkut Nappaatillit Maalaarutaannik Aalajangiisartut napparsimasoq siunnersortaalu Kalaallit Nunaanni eqqartuussisarneq pillugu inatsimmi kapitali 28 naapertorlugu, eqqartuussivimmi aalajangiivigineqarsinnaanera pillugu ilitsersussavaat. Tarnimikkut Nappaatillit Maalaarutaannik Aalajangiisartut, suliap Aalajangiisartunit eqqartuussivimmut tunniunneqarnissaa, napparsimasoq nammineq eqqartuussissuserisumik illersuisussarsisimanngippat, eqqartuussiviup eqqartuussissuserisumik napparsimasumut illersuisussanngortitsinissaa, napparsimasumut siunnersortaanullu ilisimatitsissutigissavaat.

Kapitali 6
Nipangiussisussaatitaaneq

§ 19.  Tarnimikkut Nappaatillit Maalaarutaannik Aalajangiisartut nipangiussisussaatitaapput.

Kapitali 7
Atuutilersitsinermi ikaarsaariarnermilu aalajangersakkat

§ 20.  Nalunaarut atuutilersinneqarpoq 16. december 2013.

Namminersorlutik Oqartussat, ulloq 2. december 2013

Steen Lynge

/

Ann Birkekær Kjeldsen