§ 1

Aningaasarsianit akileraarutit pillugit Inatsisartut inatsisaanni nr. 12, 2. november 2006-imeersumi, kingullermik Inatsisartut inatsisaanni nr. 72, 20. november 2023-meersumi allanngortinneqartumi, makkua allanngortinneqarput:

1. § 5, imm. 4, imatut oqaasertalerneqarpoq:

”  Imm. 4.  Angajoqqaat, ataatassap/anaanassap, angajoqqaarsiat, aatap aanalluunniit meeqqamut inuussutissaqartitsissutitut tamakkiisumik ilaannakortumilluunniit akilersuutigisimasaat, taakkua akilersuisup inuussutissarsiorluni sulliviutaani sulinermi akissarsiatut tunniunneqarsimanngippata aammalu taassuma aningaasarsiaanit akileraaruteqaataasussanit ilanngaatigineqarsinnaasimanngippata, meeqqap aningaasarsiaanut ilanngullugit naatsorsuunneqassanngillat.”

2. § 25 imatut oqaasertalerneqarpoq:

”  § 25.  Aningaasarsiat akileraaruteqaataasussat naatsorsorneqarneranni § 24, imm. 1 apeqqutaatinnagu, nerisaqarnermut aningaasartuutaanerusut, aningaasarsiaqartup imaluunniit namminersorluni inuussutissarsiummik ingerlatsisup aalisariummi imaluunniit umiarsuarmi sulinini pissutigalugu aningaasartuutigisimasinnaasai, ilanngaatigineqartussaanngillat.”

3. § 26 atorunnaarsinneqarpoq.

4. § 34-imi ilanngunneqarpoq:

”23)  Avinnermi, averusernermi imaluunniit inooqatigiikkunnaarnermi aapparisamut akilersuutit, aapparisamut akilersuutinit, katissimalluni aappariinnermut inatsisit malillugit akilersuutinik tigusaqartartoq aamma akilersuisoq najugaqatigiinngippata imaluunniit sumiiffimmi ataatsimoortumiinngippata, annerpaatut aalajangersarneqarsinnaasumit, annertunerunngitsut.

24)  Ingerlatseqatigiiffinnut Namminersorlutik Oqartussanit pigineqartunut tapiissutit, ineqarnermut politikkikkut suliniutissat piviusunngortinnissaannut ilaatillugu Namminersorlutik Oqartussanit tunniunneqartartut.”

5. § 38 a, imm. 1, imatut oqaasertalerneqarpoq:

”Sulinermut ilanngaat qinnuteqaateqarnani inunnut imm. 2-mi pineqartunut akilerneqartarpoq. Sulinermut ilanngaat kapitalimi matumani aamma akileraaruserinermik ingerlatsineq pillugu Inatsisartut inatsisaanni kapitali 5 a-mi malittarisassat naapertorlugit naatsorsorneqartarpoq akilerneqarlunilu.”

6. § 38 a-p kingorna §§ 38 b-g aammalu qulequttat taakkununnga atasut imatut oqaasertalerneqarput:

”  § 38 b.  Sulinermut ilanngaatip tunniunneqartup nalinga, aningaasarsianut tunngaviusut, takuuk § 38 c, inummut ilanngaatip, takuuk § 67, aamma ilanngaatip aalajangersimasup, takuuk § 21, imm. 2, katinnerannit annertunerusup, 17,5 procentiattut annertussuseqarpoq.

  Imm. 2. Taamaattoq sulinermut ilanngaat tunniunneqartoq ukiumi isertitaqarfiusumi ataatsimi 15.750 koruuninit annertunerusinnaanngilaq. (2025-mi annertussusaa).

  Imm. 3.  Sulinermut ilanngaatip nalinga aningaasarsianut tunngaviusut, takuuk § 38 c, ukiumut 250.000 koruuninit annertunerusup 6,3 procentianik annikillisinneqassaaq. (2025-mi annertussusaa). Taamaattoq sulinermut ilanngaat amigartooruteqarfiusinnaanngilaq.

  Imm. 4.  Imm. 2-3-mi aningaasartat aamma aningaasarsianut tunngaviusunut killiliussat ulloq 1. januar 2026 aallarnerfigalugu ilanngullugulu, ukiumut aningaasaliiffiusumut pineqartumut procenti aaqqiissutissaq atorlugu siullermeersumik ukiumut iluarsineqassapput, takuuk procenti aaqqiissutissaq aamma maannakkorpiaq aningaasarsiat pillugit Inatsisartut inatsisaat.

  § 38 c.  Sulinermut ilanngaammut aningaasarsianut tunngaviusut tassaapput aningaasarsiat A-t aamma B-t akileraaruteqaataasartut katillugit, aningaasat § 41, imm. 2, aamma § 47 b, imm. 6 malillugit aningaasarsiat akileraaruteqaataasussanut naatsorsuinermi ilanngunneqanngitsut, ilassutigalugit.

  Imm. 2.  Aningaasarsianut tunngaviusuni, aktianit iluanaarutit Kalaallit Nunaanni ingerlatseqatigiiffinnit tiguneqartut, ilaapput. Iluanaarutit tiguneqartut, iluanaarutinit akileraaruteqannginnermi aningaasartaannut naatsorsorneqassapput.

  Imm. 3.  Aningaasarsianut tunngaviusuni tunniussinerit, soraarnerussutisiaqalernissamut aaqqissuussinermut peqataasussaatitaaneq pillugu Inatsisartut inatsisaanni § 2, imm. 2-mi aamma 3-mi taaneqartut, ilaatinneqassanngillat tunniussinerit aalajangersakkami imm. 2, nr. 1-4-mi taaneqartut tassani ilaanatik.

  Imm. 4. Aningaasarsianut tunngaviusuni aammattaaq aningaasarsiat § 70, imm. 2-mi, aamma § 71, imm. 4-mi pineqartunut ilaasut, ilaatinneqassanngillat.

Tunniussinerugallartut

  § 38 d.  Sulinermut ilanngaataagallartumik naatsorsuineq tunniussinerlu aningaasarsiat A-t, akileraaruseriffimmut aningaasarsiatut A-tut nalunaarutigineqartut, pineqartunut ilaatinneqartut, tunngavigalugit qaammatikkaartumik pissapput.

  Imm. 2.  Namminersorluni inuussutissarsiummik ingerlatsisut, imm. 1-imi ilaatinneqartunik isertitaqartanngitsut, sulinermut ilanngaataagallartumik akileraarutaagallartut B-t akiligassanngortut akilerneqartullu aallaavigalugit, qaammatikkaartumik naatsorsuunneqassapput tunniussivigineqassallutillu.

  Imm. 3. Aningaasarsiat, aalisarnermit, piniarnermit savaateqarnermillu tunisassianik Kalaallit Nunaanni tunisassiorfinnut tunisinermit pissarsiarineqartut, aningaasarsiatut imm. 2-mi taaneqartutut, suliarineqassapput. Taamaattoq tunniussinermi tunitsivimmit akileraarutit A-t nalunaarutigineqartut aallaavigineqassapput.

  § 38 e.  Ukiumut sulinermut ilanngaammik eqqortumik tunniussisoqarneranit tamanna malitseqassasoq naatsorsuutigineqarpat, sulinermut ilanngaataagallartoq § 38 d-mi taaneqartoq akileraaruseriffiup annikillisissinnaavaa, qaffassinnaavaa imaluunniit pinngitsoortissinnaallugu. Akileraaruseriffiup inuup ataatsimoortumik ukiumut aningaasarsiai ilisimappagit § 38 f malillugu pisuni sulinermut ilanngaammik piumasaqaatigineqartut tunniunneqarsinnaapput. Aammattaaq inuup ukiumut aningaasarsiai taamaakkaluartoq § 38 b, imm. 2-mi akigititanit appasinnerusussaasut naatsorsuutigineqarpat, akileraaruseriffiup qaammatikkaartumik tunniussisarnerit aallarteqqinniarlugit aalajangersinnaavaa.

Sulinermut ilanngaatip naatsorsorneqartarnera tunniunneqartarneralu

  § 38 f.  Akileraaruseriffiup aningaasarsianut tunngaviusunut, ukiumi sulinermut ilanngaatip katillugu nalinganut aammalu sulinermut ilanngaataagallartumut qaammatikkaartumik tunniunneqartumut naatsorsukkat, kingusinnerpaamik ukiup isertitaqarfiusup kingorna ulloq 1. september nassiutissavai. Sulinermut ilanngaammi annikinaarlugit tunniussisimanermi, naatsorsukkat nassiunneqareernerisa kingorna kingusinnerpaamik qaammatip ataatsip qaangiunnerani, taakkua tunniunneqassapput. Annertunaarlugit sunniussisimanermi § 38 g malillugu akiliisitsisoqassaaq.

  Imm. 2.  Aallartitseqqinnermi sulinermut ilanngaammut 2.000 koruuninik annertunerusumilluunniit tunniussisoqartussanngussappat, imm. 1 malillugu naatsorsuineq aallarteqqinneqarsinnaavoq.

Utertillugit akiliisarneq

  § 38 g.  Sulinermut ilanngaammut annertunaarlugit tunniussisimanermi, annertunaarlugit tunniunneqarsimasut, inuup kingusinnerusukkut ukiup isertitaqarfiusup pineqartup ingerlanerani imaluunniit ukiumi isertitaqarfiusumi kingusinnerusumiittumi sulinermut ilanngaammik tunniussinissamik piumasaqaataani, ilanngaatigineqassapput.

  Imm. 2.  Sulinermut ilanngaammi annertunaarlugit tunniunneqarsimasut, imm. 1 malillugu akilersinneqarsinnaanngitsut, piumasaqaat katillugu 2.000 koruuninit annertuneruppat, peqqusissuteqarnermi utertillugit akilerneqassasut piumasarineqarsinnaavoq. Tamakkiisumik akileraartussaatitaajunnaarnermi, sulinermut ilanngaat annertunaarlugu tunniunneqarsimasoq oqaaseqatigiit siulliit malillugit akilersinneqassaaq. Utertillugit akiliinissamut piumasaqaatit ulloq akiligassanngorfiat tassaavoq, peqqusissuteqarluni akileeqqusinissamut aalajangiinerup qaammat kingorna qaammammi ulluinnaq siulleq. Ulloq akiliiffissaq kingulleq tassaavoq qaammat akiliiffissami ulluinnaq kingulleq. Ulloq piffissaq eqqorlugu akiliiffissaq kingulleq sapaataappat imaluunniit nalliuttuuppat imaluunniit arfininngorneruppat, killigititaq ulluinnarmut tullermut sivitsorneqassaaq.

  Imm. 3  Sulinermut ilanngaammut annertunaarlugit tunniussisimanermi akileqqusat akileraartarnermut akiliutissatut isigineqassapput, akileqqusallu Kalaallit Nunaanni eqqartuussisarnermik inatsimmi § 598, imm. 2, nr. 3 aamma Aningaasarsianit akileraarutit pillugit Inatsisartut inatsisaanni §§ 100 aamma 101 naapertorlugit pinngitsaaliilluni akileqquneqarsinnaapput.

  Imm. 4.  Sulinermut ilanngaatip annertunaarlugu tunniunneqarsimasup akilersinneqartarnera pillugu aammalu sulinermut ilanngaammi kingusinnerusukkut piumasaqaateqarnerup tamakkiisunngortinneqarnissaa pillugu maleruagassanik erseqqinnerusunik Naalakkersuisut aalajangersaasinnaapput.”

7. § 67, imm. 1-imi, ”48.000” allanngortinneqarpoq uunga: ”60.000”.

§ 2

Akileraaruserinermik ingerlatsineq pillugu Inatsisartut inatsisaanni nr. 11, 2. november 2006-imeersumi, takuuk Namminersorlutik Oqartussat inatsimmut nalunaarutaat nr. 11, 3. november 2021-meersoq, Inatsisartut inatsisaanni nr. 12, 1. december 2021-meersumi, Inatsisartut inatsisaanni nr. 20, 21. november 2022-meersumi, aamma Inatsisartut inatsisaanni nr. 65, 20. november 2023-meersumi allanngortinneqartumi, makkua allanngortinneqarput:

1. § 29-p kingorna qulequttatut nutaatut ilanngunneqarpoq:

”Kapitali 5 a

Sulinermut ilanngaat”

2. Qulequttap nutaap kingorna ilanngunneqarpoq:

”  § 29 a.  Sulinermut ilanngaatip nalinga tigusisussap nemkontoanut tunniunneqassaaq. Aningaasat oqaaseqatigiit siulliit malillugit tunniunneqarsinnaanngitsut, § 46 a, imm. 5 malillugu suliarineqassapput.

  Imm. 2.  Pisortat sulinermut ilanngaammi tunniunneqartussani ilanngaatiginninnerat, tunniunneqartussat 1/3-anit annertunerusinnaanngilaq, taamaattoq takuuk aningaasarsianit akileraarutit pillugit Inatsisartut inatsisaanni § 38 g, imm. 1. Sulinermut ilanngaammik tunniussinermi akiliussigallartoqarsinnaanngilaq imaluunniit piumasaqaammi ilannguttoqarsinnaanani.

Naammagittaalliorneq

  § 29 b.  Inuit ukiup isertitaqarfiusup ingerlanerani sulinermut ilanngaatip tunniunneqarallartup annertussusaa pillugu Akileraarusiinermik Aalajangiisartunut naammagittaalliorsinnaanngillat.

  Imm. 2.  Sulinermut ilanngaat 2.000 koruuninik annertunerusunilluunniit sulinermut ilanngaataagallartumi annikinaaraluni tunniussisoqarsimasoq ilimagineqartariaqarpat, akileraartussaatitaasup qinnuteqarnerani sulinermut ilanngaat, akileraaruseriffiup naliliinera malillugu annikinaarlugu tunniunneqarsimasoq, piaartumik tunniunneqassaaq. Naalakkersuisut qinnuteqarnerup ilusissaa imarisassaalu pillugit maleruagassanik aalajangersaasinnaapput, ilanngullugu qinnuteqarneq qarasaasiatigoortumik tunniunneqassasoq.

Sulinermut ilanngaatip allaffissornikkut aqunneqarnera

  § 29 c.  Akileraaruseriffik sulinermut ilanngaatip naatsorsorneqarnissaanut tunniunneqarnissaanullu IT atorlugu periaasissamik pilersitsissaaq aammalu aalajangersakkanik, killissaliussanik aamma algoritmenik IT atorlugu periaatsimi naatsorsuinermi taakkuninngalu tunniussinermi ilaasussanik, aalajangersaassalluni. Paasissutissat aningaasarsianit akileraarutit pillugit Inatsisartut inatsisaanni §§ 38 c-mi aamma d-mi taaneqartut saniatigut, paasissutissat suut, ilanngullugit siusinnerusukkut ukiuni isertitarineqarsimasut pillugit paasissutissat, qaammatikkaartumik tunniussisarnerit annikillisinneqarnerannik malitseqarsinnaanersut imaluunniit tunniunneqanngissinnaanersut, akileraaruseriffiup aalajangersassavaa. 

  Imm. 2.  Naalakkersuisut sulinermut ilanngaatip allaffissornikkut aqunneqarnera pillugu maleruagassanik erseqqinnerusunik aalajangersaasinnaapput.”

§ 3

Sulisoqarnermut akitsuut pillugu Inatsisartut inatsisaanni nr. 10, 2. novembari 2006-imeersumi, Inatsisartut inatsisaat nr. 5, 26. april 2007-imeersumi, Inatsisartut inatsisaanni nr. 11, 3. juni 2015-imeersumi aamma Inatsisartut inatsisaanni nr. 9, 19. november 2020-meersumi allanngortinneqartumi, makkua allanngortinneqarput:

1. § 2, imm. 1, imatut oqaasertalerneqarpoq:

”Sulisoqarnermut akitsuut akissarsiarititat katinnerisa 1,9 procentiattut annertussuseqarpoq.”

§ 4

Atuutilerneranut ikaarsaariarnermullu aalajangersakkat

Inatsisartut inatsisaat ulloq 1. januar 2025 atuutilerpoq.

  Imm. 2.  Inatsisartut inatsisaat ukioq isertitaqarfiusoq 2025 aallarnerfigalugu atuutilerpoq, taamaattoq imm. 3-5 takuuk. 

  Imm. 3.  2024-mi ukioq isertitaqarfiusoq pillugu sulinermut ilanngaammut tunngatillugu akileraaruseriffik ulloq 1. september 2025 tikitsinnagu aningaasarsianut tunngaviusunut naatsorsuissaaq aammalu sulinermut ilanngaat naatsorsussallugu. Aningaasarsianut tunngaviusut amigartooruteqarfiuppata, sulinermut ilanngaat 0 koruuniussaaq. Ukiumut isertitaqarfiusumut 2024-mut sulinermut ilanngaatip nalinga, akileraaruserinermik ingerlatsineq pillugu Inatsisartut inatsisaanni § 25 malillugu akiliutaavallaarsimasoq tunniunneqassaaq allatigullu suliarineqassalluni. Taamaattoq akileraaruserinermik ingerlatsineq pillugu Inatsisartut inatsisaanni § 25, imm. 2 malillugu ajunngitsorsiassaqartitsisoqassanngilaq. Akileraaruseriffiup ukiumi sulinermut ilanngaatip naatsorsorneqarnera nassiutissavaa.

  Imm. 4. § 3 aningaasarsianut allanullu akissarsianut akitsuuserneqartussaatitaasunut, ulloq 1. januar 2025 kingusinnerusumiluunniit tunniunneqartunut, tunngatillugu atuutissaaq.

  Imm. 5. § 1, nr. 4-mi, § 34, nr. 24 siunnersuutigineqartoq, ukiumut isertitaqarfiusumut 2024-mut kingornanullu atuutissaaq.

Namminersorlutik Oqartussat, ulloq 25. novembari 2024

Múte Bourup Egede (atsior.)

Naalakkersuisut Siulittaasuat