Matumuuna Inatsisartuni Naalakkersuisunilu il. il. ilaasortat aningaasarsiaqartitaanerat il. il. pillugit Inatsisartut inatsisissaat nr. 22, 18. december 2003-meersoq, Inatsisartut inatsisaat nr. 1, 27. marts 2006-imeersoq, Inatsisartut inatsisaat nr. 8, 1. juni 2006-imeersoq, Inatsisartut inatsisaat nr. 2, 15-april 2011-imeersoq, Inatsisartut inatsisaat nr. 3, 3. juni 2015-imeersoq, Inatsisartut inatsisaat nr. 10, 6. juni 2016-imeersoq, Inatsisartut inatsisaat nr. 42, 23. november 2017-imeersumi allannguutitalinni nalunaarutigineqarpoq

 

 

Kapitali 1

Inatsisartuni ilaasortat

 

Aningaasarsiat, aningaasartuuteqarnermut tapit, ineqarnermut tunngasut, angalanermi aningaasartuutit ilaqquttanillu ingiallorneqartarneq

 

  § 1.  Aningaasarsiat naatsorsorneqartassapput Kalaallit Nunaanni ilinniagartuut kattuffiata ASG-p tjenestemandit akissarsiaasa il.il. iluarsineqarnerannut isumaqatigiissutai qaqugukkulluunniit atuuttut tunngavigalugit.

  Imm. 2.  Inatsisartuni ilaasortatut atuunnermut atatillugu aningaasartuuteqarnermi matussutissanik soraarnerussutisiaqaataasussaanngitsunik ukiumut kr. 50.000-inik tapisiaqartitsisoqassaaq.

  Imm. 3.  Aningaasarsiat tapisiallu imm. 1 aamma 2-mi taaneqartut qaammammut siumoortumik tunniunneqartassapput. Aningaasarsiat imm. 1-imi taaneqartut iluarsiivigineqartarnerisa AS-G-mut tunngasumi isumaqatigiinniartarnermi ineriartorneq malittaraat. Imm. 2 malillugu tapisiaq ukiumut ataasiarluni qaammatisiutit malillugit ukiorisap aallartinnerani nunatsinni akinut iluarsiissut malillugu iluarsiivigineqartassaaq. Imm. 2 malillugu tapisiap iluarsiivigineqarnera siulleq 2004-mi pissaaq.

  Imm. 4.  Inatsisartuni ilaasortat Nuummi aalajangersimasumik najugaqarnissamik kissaateqartut inissaqartinneqassapput, inissianilu Namminersorlutik Oqartussat attartortittagaanni ineqarnermut akiliutinik naatsorsuisarnermi maleruagassat qanoq ilisukkulluunniit atuuttut naapertorlugit ineqarnerminnut akiliuteqartinneqassapput. Inatsisartuni ilaasortanut Nuummi najugaqareersunut, Inatsisartunili atuunnerminnik aalussineq pissutigalugu suliffigisaminnik ilinniarnerminnilluunniit unitsitsisut taamaalillutillu atorfimmut atatillugu inigisaminnik ilinniar-tulluunniit ineqarfianni inigisaminnik qimatsisariaqartut pillugit aamma tamanna atuuppoq. Najukkamiit najukkamut nuunnermi aningaasartuutit atorfilinnut maleruagassat atuuttut malillugit matussusiivigineqartassapput, imaalillugilli, Inatsisartuni ilaasortap atuuffini ukiunit pingasunit sivikinnerusumik isumagisimagaluarpaguluunniit nuunnermi aningaasartuutit matussusiivigineqassallutik.

  Imm. 5.  Inissiat Inatsisartuni ilaasortanut atugassiissutigineqartut Inatsisartuni ilaasortaaneq atuukkunnaarpat qimanneqassapput.

  Imm. 6.  Piffissami ilaasortaajunnaarnersiaqarfimmi imm. 4-mi akiliutitut taaneqartumik akiliuteqarluni ineqartitsisoqassaaq. Piffissami ilaasortaajunnaarnersiaqarnerup atorunnaarfiani kingusinnerpaamik qaammatip naanerani taamatut inigisaq qimanneqassaaq." Taamaattorli sinniisussat, Inatsisartunut ilaasortamut taartaasut, ilaasortaajunnaarnersiutit sivikinnerpaamik qaammatinut pingasunut tunniunneqarsimasutut isigalugit tamatigut pineqassapput.

 

  § 2.  Inatsisartunut ilaasortaq ullormit qinerneqarfimminiit aningaasarsiaqartinneqalerlunilu aningaasartuuteqarnermut tapisiaqartinneqalissaaq. Ilaasortap allap toqunera Inatsisartunulluunniit ilaasortatut tunuavinnera pissutigalugu ilaasortaq atuutilersimappat, ullormiit atuutilerfimmiit aatsaat aningaasarsiaqartitsisoqalissaaq. Aningaasarsiat aningaasartuuteqarnermullu tapisiat qaammatip Inatsisartuni ilaasortaajunnaarfiup naaneranit atuukkunnaassapput.

  Imm. 2.  Inatsisartunit sulinngiffeqarallartarnermut najuutinngikkallartarnermullu akuersisarnermut malittarisassanik Inatsisartut aalajangersaassapput.

  Imm. 3.  Aningaasarsiaqaataasumik sulinngiffeqarallarsinnaaneq aatsaat akuersissutigineqarsinnaavoq Inatsisartunut ilaasortaq pissutissaqavilluni najuussinnaanngippat imaluunniit malittarisassat imm. 2 malillugu aalajangersarneqartut tassungalu assersuunneqarsinnaasut malillugit.

  Imm. 4.  Inatsisartunut ilaasortaq pisuni immikkorluinnaq ittuni aningaasarsiaqaataanngitsumik sulinngiffeqarnissamut akuerineqarpat, ilaasortaq aningaasarsiaqartitaassanngilaq aningaasartuutinulluunniit tapiissutinik pisartagaqassanani, taamatullu aamma sulinngiffeqarallarnerup nalaani soraarnerussutisiassanut ilaasortaajunnaarnersiutinulluunniit katersaqarsinnaanani.

  Imm. 5.  Inatsisartunut ilaasortaq Naalakkersuisunut ilaasortatut atuuffeqarniarluni sulinngiffeqarallarnissamut akuerineqartoq, sulinngiffeqarallarnerup nalaani ilaasortaajunnaarnersiutissanik katersaqarsinnaanngilaq.

 

  § 3.  § 1, imm. 2-mi tapisiat Inatsisartuni ilaasortap Inatsisartuni ilaasortatut atuunnermini aningaasartuutigiunnagaanut matussutissaapput.

  Imm. 2.  Ilaasortanut Nuummi najugaqanngitsunut Inatsisartut ataatsimiinnerinut atatillugu angalaneq ineqarnerlu kiisalu ullormusiat tjenestemandinut maleruagassat atuuttut malillugit akiliussissutigineqassapput. Angerlarsimaffik qimallugu piffissami sivisunerusumi sulinermut il.il. ilanngaassisoqartassanngilaq.

  Imm. 3.  Qinnuteqaateqarneq tunngavigalugu Inatsisartut Siulittaasoqarfiannit Inatsisartulluunniit siulittaasuannit aalajangerneqarsinnaavoq ataatsimiititaliat ataatsimiinnerini ataatsimiititalialluunniit angalanerini peqataanermi angalaneq ineqarnerlu kiisalu ullormusiat maleruagassat tjenestemandinut atuuttut naapertorlugit akiliussissutigineqassasut, kiisalu ullormusiaqartisisoqassalluni.

 

  § 3 a.  Qanigisamik toqusoqartillugu pinartumilluunniit napparsimasoqartillugu malittarisassat Namminersorlutik Oqartussani tjenestemandinut qaqugukkulluunniit atuuttut malillugit akiliunneqarluni angalasoqarsinnaavoq.

 

  § 4.  Ilaasortanut Nuummi najugaqanngitsunut qaammatisiutit malillugit ukiut tamaasa ataasiarluni Inatsisartuni ilaasortap aapparisaa Inatsisartut ataatsimiinnerannut atatillugu ingialluinermi angalanermut ineqarnermullu akiliunneqartassaaq.

  Imm. 2.  Aappariinnermut naligititaassaaq inuit aqqisa allattorsimaffianni najugaqatigiittut nalunaarsorneqarluni ukiumi ataatsimi inooqatigiinneq.

  Imm. 3.  Ilaasortanut Nuummi najugaqanngitsunut qaammatisiutit malillugit ukiut tamaasa ataasiarluni Inatsisartuni ilaasortap qitornai 18 inorlugit ukiullit angerlarsimaffimmi najugallit Inatsisartut ataatsimiinnerannut atatillugu ingialluinermi angalanermut ineqarnermullu akiliunneqartassapput.

  Imm. 4.  Inatsisartuni ilaasortaq Naalakkersuisuni ilaasortaajutigippat aapparisaa qitornaaluunniit Inatsisartut ataatsimiinnerannut atatillugu ingialluinermi angalanermut ineqarnermullu akiliunneqassanngillat.

 

Inatsisartuni ilaasortat sinniisussaat

 

Aningaasarsiat, aningaasartuuteqarnermut tapit, angalanermi aningaasartuutit ilaqquttanillu

Ingiallorneqartarneq

 

  § 5.  Inatsisartuni ilaasortat sinniisussaat Inatsisartuni ilaasortamut taartaaffitik ullut tamaasa aningaasarsiat § 1, imm. 1-imi taaneqartut 1/365-erarterutaannik aningaasarsiaqartinneqassapput. Aammattaaq sinniisussaq aningaasartuuteqarnermut tapisianik § 1, imm. 2-miittut 1/365erarterutaannik tapisiaqartinneqassaaq.

  Imm. 2.  Aamma sinniisussaq § 3, imm. 2-mi maleruagassaq naapertorlugu angalanermut ine-qarnermullu akiliunneqassaaq kiisalu ullormusiaqartinneqassalluni.

  Imm. 3.  Inatsisartut Siulittaasoqarfiannut qinnuteqarneq tunngavigalugu sinniisussap aapparisaa qitornaalu angerlarsimaffimmi najugallit 18-it inorlugit ukiullit, sinniisussallu angajoqqaatut o-qartussaaffigisai, Inatsisartut ataatsimiinnerannut, sinniisussap Inatsisartuni ilaasortaq taarserlugu piffissami sapaatip akunnerinit pingasunit sivisunerusumik ataatsimeeqataaffigisaanut ingialluinerminni angalanermut ineqarnermullu akiliunneqarsinnaapput. § 4, imm. 2 aamma taamatut atuutissaaq.

 

Kapitali 2

Inatsisartut siulittaasuat, Naalakkersuisut siulittaasuat Naalakkersuisunilu ilaasortat

 

Aningaasarsiat, ineqarnermut tunngasut, ilassinninnermut aningaasartuutit, angalanermi

aningaasartuutit ilaqquttanillu ingiallorneqartarneq

 

  § 6.  Inatsisartut siulittaasuat, Naalakkersuisut siulittaasuat Naalakkersuisunullu ilaasortat aningaasarsiat § 1, imm. 1-imi taaneqartut saniatigut akissaatit inissisimaffiat 38 malillugu aningaasarsianik tapisianik tamanut atuuttunik ilasanik ukiumut aningaasarsiaqartinneqassapput. Aningaasarsiat naatsorsorneqassapput tjenestemandit akissarsiaasa allallu iluarsiivigineqartarnerat pillugu AS-G-mut isumaqatigiissut qaqugukkulluunniit atuuttoq aallaavigalugu.

  Imm. 2.  Inatsisartut siulittaasuannut Naalakkersuisullu siulittaasuannut kr. 120.930-nik immikkut tapisiaqartitsisoqassaaq.

  Imm. 3.  Naalakkersuisunut ilaasortanut Inatsisartunut ilaasortaanngitsunut Inatsisartunut ilaasortat aningaasarsiaasa § 1, imm. 1-imi taaneqartut annertoqataannik tapisiaqartitsisoqassaaq.

  Imm. 4.  Inatsisartut Siulittaasuat, Naalakkersuisut Siulittaasuat Naalakkersuisunullu ilaasortat ullormit atuutilerfimminniit qaammatip taamatut atuukkunnaarfiup naanissaata tungaanut aningaasarsiaqartinneqassapput. Aningaasarsiat qaammammut siumoortumik tunniunneqassapput. Imm. 1 - 3-mi taaneqartutut aningaasarsiat tapisiallu iluarsiivigineqartarnerisa AS-G-mi isumaqatigiinniuteqartarfimmi ineriartorneq malittaraat.

  Imm. 5.  Inatsisartut siulittaasuat Naalakkersuisullu siulittaasuat ineqartinneqassapput. Siulittaasut inigisap attartorneranut akiliisassanngillat, ukiumulli attartornerup kr. 48.000 kr-inik nalilerneqarnera tunngavigalugu akileraartinneqassallutik. Namminersorlutik Oqartussat inissianik ingerlatsinermut aningaasartuutit akilertassavaat. Inissianut atatillugu ingerlatsinermut aningaasartuutit isertitat akileraaruteqaataasussat naatsorsorneqarneranni ilaatinneqartassanngillat.

  Imm. 6.  Naalakkersuisunut ilaasortanut inissamik atugassiisoqassaaq. Ilaasortat Namminersorlutik Oqartussat atorfimmut atasumik pinngitsoorani inigisassatut inigitittagaanni ineqarnermut akiliutinik naatsorsuisarnermi maleruagassat qaqugukkulluunniit atuuttut 60%-iinik ineqarnermut akiliuteqartassapput.

  Imm. 7.  Procentip imm. 6-imi taaneqartup aamma sulisorisanut inissiamut ineqarnermut akiliutip tamakkiisup assigiinngissutaat inuit pineqartut isertitaasa akileraaruteqaataasussat naatsorsorneqarneranni ilaatinneqassanngillat.

  Imm. 8.  Inigisat imm. 5 aamma 6 malillugit atugassiissutigineqartut atuuffiup naanerani qimanneqassapput. Inissiat pineqartut nutserfigineqarnerinut qimanneqarnerinillu atatillugu aningaasartuutit Namminersorlutik Oqartussanit matussuserneqartassapput.

  Imm. 9.  Piffissami ilaasortaajunnaarnersiuteqarfimmi utaqqiisaasumik ineqartitsisoqassaaq. Inissianut Namminersorlutik Oqartussat attartortittagaannut ineqarnermut akiliutit naatsorsorneqartarnerinut maleruagassat qaqugukkulluunniit atuuttut naapertorlugit ineqarnermut akiliuteqartoqartassaaq. Piffissaq ilaasortaajunnaarnersiuteqarfik naappat inigisaq qimanneqassaaq.

  Imm. 10.  Napparsimaneq aamma qanigisap toquneranut napparsimarulunneranulluunniit atatillugu najuutinnginneq Naalakkersuisut Siulittaasuannut Naalakkersuisunullu ilaasortanut pissutissaqavilluni peqataannginnertut isigineqassaaq. Najuutinnginnermi Namminersorlutik Oqartussani kommuninilu tjenestemandinut malittarisassassat qaqugukkulluunniit atuuttut malillugit akiliunneqarluni angalasoqarsinnaatitaavoq.

  Imm. 11.  Naartunermut, erninermut meeravissiartaarnermullu atatillugu sulinngiffeqarneq Naalakkersuisut Siulittaasuannut Naalakkersuisunullu ilaasortanut pissutissaqavilluni peqataannginnertut najuutinnginnertut isigineqassaaq.

 

  § 7. Inatsisartut siulittaasuat, Naalakkersuisut siulittaasuat Naalakkersuisunilu ilaasortat Lands-karsip akiligaanik ilassinninnermi aningaasartuuteqarsinnaatitaapput.

 

  § 8.  Inatsisartut siulittaasuata, Naalakkersuisut siulittaasuata Naalakkersuisunilu ilaasortat Inatsisartut siulittaasuattut, Naalakkersuisut siulittaasuattut Naalakkersuisunilu ilaasortatut angalaneri Landskarsimit akilerneqassapput.

  Imm. 2.  Nerisaqarnermut ineqarnermullu aningaasartuutit kingusinnerusukkut Nunatta Karsianit akilerneqartussanngorlugit akiligassaq malillugu matussuserneqartassapput. Taamaattoq Inatsisartut siulittaasuata, Naalakkersuisut siulittaasuata kiisalu Naalakkersuisunut ilaasortat akiligassaq malillugu matussusiinissamut taarsiullugu sulinermut atatillugu malittarisassat Namminersorlutik Oqartussani tjenestemandinut qaqugukkulluunniit atuuttut malillugit angalanernut atatillugu ajunngitsorsiassaqarnissartik toqqarsinnaavaat. Taamatut toqqaaneq qaammatisiutit ukiuat malillugu ukiumut ataatsimut siumut pituttuisuuvoq.

  Imm. 3.  Immikkut pissutissaqartillugu Inatsisartut siulittaasuata, Naalakkersuisut siulittaasuata

Naalakkersuisunilu ilaasortat Inatsisartut siulittaasuattut, Naalakkersuisut siulittaasuattut

Naalakkersuisunilu ilaasortatut suliaminnut atatillugu angalaneranni aapparisat inooqatigisalluunniit angalaqatigineqarsinnaapput. § 8, imm. 2 aamma taamatut atuutissaaq.

  Imm. 4.  Naalakkersuisuni ilaasortap aapparisaanut Nuup avataani illoqarfigisaminiiginnarniarluni aalajangertumut qaammatisiutit malillugit ukiut tamaasa marloriarluni Nuummut angalanermut akiliussisoqartassaaq. § 4, imm. 2 aamma taamatut atuutissaaq.

  Imm. 5.  Aammattaaq Naalakkersuisuni ilaasortap qitornaanut 18-it inorlugit ukiulinnut Nuup

avataani angerlarsimaffimmi najugalinnut qaammatisiutit malillugit ukiut tamaasa marloriarluni Nuummut angalanermut akiliussisoqartassaaq.

 

Kapitali 3

(Atorunnaarpoq)

 

Kapitali 4

Ilaasortaajunnaarnersiat

 

  § 10.  Inatsisartuni Naalakkersuisuniluunniit ilaasortatut atuuffimmit tunuarnermi pineqartup § 1, imm. 1 -mi kiisalu § 6, imm. 1- 3-mi qaammammut isertittagaasa angeqataannik ilaasortaajunnaarnersiaqartitsisoqassaaq.

  Imm. 2.  Pineqartup katillugu piffissami atuuffigisimasaani ukiup atuuffiup aallartinneri tamaasa qaammatip aappaa qeqqanut naatsorsuullugit ilaasortaajunnaarnersiat tunniunneqartassapput.

  Imm. 3.  Naalakkersuisuni ilaasortatut tunuarnermi piffissaq Naalakkersuisutut atuuffigisimasaq tunngavigalugu ilaasortaajunnaarnersiaqartitsisoqassaaq.

  Imm. 4.  Inatsisartuni ilaasortatut tunuarnermi piffissaq Inatsisartuni ilaasortatut atuuffigisimasaq tunngavigalugu ilaasortaajunnaarnersiaqartitsisoqassaaq.

  Imm. 5.  Imm. 1 malillugu ilaasortaajunnaarnersiat sivikinnerpaamik qaammatinut pingasunut sivisunerpaamillu qaammatinut aqqaneq marlunnut, qaammammut siumoortumik, tunniunneqassapput.

  Imm. 6.  Inatsisartuni sinniisussaq, piffissami sivisussusissaa aalajangigaanngitsumi Inatsisartuni ilaasortap atuuffianiilersoq, piffissap atuuffiup naanerani ilaasortaajunnaarnersianik, § 5, imm. 1, oqaaseqatigiit siulliit malillugit, pineqartup ullormut aningaasarsiarisartagaasa angeqataannik aningaasartalimmik tunineqassaaq. Sinniisussap piffissami sivisussusissaa aalajangigaanngitsumi Inatsisartuni ilaasortamut taartaaffigisimasaanut ilaasortaajunnaarnersiat tuniunneqassapput. Ilaasortaajunnaarnersiat pineqartup ullut arfineq pingasukkaarlugit atuuffigisaanut ullormut ataatsimut naatsorsuullugit tunniunneqassapput. Ilaasortaajunnaarnersiat qaammammut siumoortumik tunniunneqassapput.

  Imm. 7.  Ilaasortaajunnaarnersianik tunniussisoqareersimatillugu atuuffimmut pineqartumut ilaasortaajunnaarnersiaqarsinnaaneq sivikillineqassaaq. Ilaasortaajunnaarnersiat anginerpaaffissaannik tunniussisoqarsimappat atuuffimmut pineqartumut ilaasortaajunnaarnersiaqarsinnaaneq aningaasartaarutsinneqassaaq.

  Imm. 8.  Inatsisartuni sinniisussatut atuuffimmut ilaasortaajunnaarnersianik aamma Inatsisartuni ilaasortatut Inatsisartuniluunniit sinniisussatut atuuffimmut aningaasarsianik ataatsikkut tigusaqartoqarsinnaanngilaq, aamma atuuffinnut taakkununnga marlunnut ilaasortaajunnaarnersiummik ataasiinnarmik tunniussisoqarsinnaavoq. Ilaasortaajunnaarnersiaqarnissaq atuuffinni piffissaq atuuffiusoq tamakkerlugu tunngavigalugu naatsorsorneqassaaq. Ilaasortaajunnaarnersiaq atuuffinni arlalinni piffissaq atuuffigisimasaq ataaseq tunngavigalugu tunniunneqartoq sivisunerpaamik qaammatinut 12-inut tunniunneqarsinnaavoq.

  Imm. 9.  Inatsisartut siulittaasuat Naalakkersuisuni ilaasortanut maleruagassat atuuttut naapertorlugit ilaasortaajunnaarnersiaqassaaq. Inatsisartut siulittaasuattut aamma Naalakkersuisuni ilaasortatut atuuffinnut ilaasortaajunnarnersiutinik aningaasarsianillu ataatsikkut pisoqarsinnaanngilaq, aamma atuuffinnut taakkununnga marlunnut ilaasortaajunnaarnersianik ataasiinnarmik tunniussisoqarsinnaavoq. Atuuffinni piffissaq ataatsimut atuuffiusoq tunngavigalugu ilaasortaajunnaarnersiaqarsinnaaneq naatsorsorneqassaaq.

 Imm. 10.  Naalakkersuisut siulittaasuattut Naalakkersuisunulluunniit ilaasortatut ilaasortaajunnaarnersiaqaatigaluni Inatsisartunut ilaasortatut ilaasortaajunnaarnersiaqartoqarsinnaanngilaq. Naalakkersuisut siulittaasuattut Naalakkersuisunulluunniit ilaasortatut ataasiinnarmik ilaasortaajunnaarnersiuteqartitsisoqarsinnaavoq. Atuuffinni piffissaq ataatsimut atuuffiusoq tunngavigalugu piffissami qanoq sivisutigisumi ilaasortaajunnaarnersiaqarsinnaaneq naatsorsorneqassaaq.

 

Kapitali 5

Aapparisat qitornallu aningaasarsiaqartitaaneri ilaasortaajunnaarnersiaqartitaanerilu

 

  § 11.  Inatsisartut siulittaasuata, Naalakkersuisut siulittaasuata, Naalakkersuisuni ilaasortap Inatsisartuniluunniit ilaasortap taamatut atuutsilluni toqusup aapparisaa qaammatini pingasuni aningaasarsianik tigusisinnaatitaavoq. Qaammammut aningaasarsiat Inatsisartut siulittaasuata, Naalakkersuisut siulittaasuata, Naalakkersuisuni ilaasortap Inatsisartuniluunniit ilaasortap § 1, imm. 1 kiisalu § 6, imm. 1-3 naapertorlugit qaammammut isertittagaasa angeqatigaat.

  Imm. 2.  Pineqartoq ilaasortaajunnaarnersianik tigusartagaqarsimappat piffissap ilaasortaajunnaarnersiaqarfiup sinnerani aapparisaq ilaasortaajunnaarnersianik tigusisinnaatitaavoq. Aapparisarli sivisunerpaamik qaammatini pingasuni ilaasortaajunnaarnersianik tigusisinnaatitaavoq.

  Imm. 3.  Inatsisartut siulittaasuat, Naalakkersuisut siulittaasuat, Naalakkersuisuni ilaasortaq Inatsisartuniluunniit ilaasortaq aapparisaminik qimataqanngippat, aapparisarluunniit qimataasoq pineqartup aningaasarsianik ilaasortaajunnaarnersianilluunniit tigusisinnaatitaaffigisaani qaammatit pingasut qaangiutinngitsut toquppat, qitornat 18 inorlugit ukiullit, ilaasortaajunnaarnersiutinik tigusisinnaatitaasup toqunerani pineqartumit angajoqqaatut oqartussaaffigineqarpata, taakku aningaasarsiaqarsianik tigusisinnaatitaalerlutillu ilaasortaajunnaarnersianik tigusisinnaatitaalissapput.

 

Kapitali 6

Soraarnerussutisiat

 

  § 12.  Inunnut, Inatsisartunut, Naalakkersuisunut il.il. ilaasortat aningaasarsiaqartitaanerat il.il. Inatsisartut inatsisaat nr. 11 28. oktober 1993-imeersoq imaluunniit Inatsisartunut, Naalakkersuisunut il.il. ilaasortat aningaasarsiaqartitaanerat il.il. Inatsisartut inatsisaat nr.17 7. december 2001-imeersoq naapertorlugu, soraarnerussutisiaqarsinnaalersunut §§ 13-16-imi maleruagassat malillugit soraarnerussutisiaqartitsisoqassaaq.

 

  § 13.  Soraarnerussutisiaqarsinnaanermut tunngavigineqassaaq pineqartup Naalakkersuisuni ilaasortatut piffissami ataatsimi arlalinnilluunniit katillugit sivikinnerpaamik ukiumik ataatsimik sivisussusilimmik ingerlatsisimanissaa, Inatsisartuniluunniit ilaasortatut piffissami ataatsimi arlalinniluunniit, katillugit sivikinnerpaamik ukiumik ataatsimik sivisussusilimmik ingerlatsisimanissaa.

  Imm. 2.  Pineqartoq 60-inik ukioqalersimappat, atuuffimmut aningaasarsianik ilaasortaajunnaarnersianilluunniit qaammatip tunniussiviup naanerani soraarnerussutisianik tunniussisoqassaaq, taamaattoqanngippallu ukiut taakku anguneqarnerisa kingorna qaammatip ulluisa siulliannit.

  Imm. 3.  Ilaasortaq soraarninngorsimasoq, atuuffimmut soraarnerussutisiaqarfigisaminut nutaamik atuuteqqilersoq, piffissami, aningaasarsianik ilaasortaajunnaarnersianilluunniit tunniussiviusumi soraarnerussutisiaqassanngilaq.

 

  § 14.  Inatsisartuni ilaasortat soraarnerussutisiaasa ukiut atuuffiit aallartinneri tamaasa naatsorsuutigalugit atorfilittut atorfimmi akissaatit inissisimaffianni 31, skalatrin 44-mi soraarnerussutisiat qaffasinnerpaaffiattut anguneqartup 1/20-erai. Soraarnerussutisiat qaffasinnerpaaffissaat ukiut 20-it atuutereernermi anguneqassaaq.

 

  § 15.  Inatsisartut siulittaasuata, Naalakkersuisut siulittaasuata Naalakkersuisunilu ilaasortat soraarnerussutisiaat ukiut atuuffigisat aallartinneri tamaasa soraarnerussutisiat, atorfilittut ator-fimmi akissaatit inissisimaffianni 39, skalatrin 52-mit soraarninngornermi, tamanut atuuttumik tapisiat ilanngunnagit, soraarnerussutisiat qaffasinnerpaaffiattut anguneqartup 1/20-erai. Soraarnerussutisiat qaffasinnerpaaffissaat ukiut 20-it atuutereernermi anguneqassaaq.

 

  § 16.  Aapparisamut qitornanullu soraarnerussutisiat maleruagassat tjenestemandinut atuuttut naapertorlugit tunniunneqassapput.

  Imm. 2.  §§-it 14, 15 aamma 16 imm. 1, malillugit soraarnerussutisiat maleruagassat tjenestemandinut atuuttut naapertorlugit iluarsiivigineqartassapput.

  Imm. 3.  Inatsisartut inatsisaanni taaneqartutut atuuffiit ilaannit ataatsimit ulloq 1. januar 2004 nallertinnagu inuk tunuarsimappat, atuuffimmullu tassunga atuuffinnulluunniit taakku ilaannut arlalinnut soraarnerussutisianik katersukkanik soraarnerussutisiaqarsinnaatitaappat soraarnerussutisiaqarpalluunniit, soraarnerussutisiatut katillugit tunniunneqartut § 15 malillugu soraarnerussutisiarineqarsinnaasut qaffasinnerpaaffiattut taamaallaat angissuseqarsinnaapput.

  Imm. 4.  Inatsisartut inatsisaanni taaneqartunit atuuffimmit atuuffinnilluunniit arlalinnit inuk soraarnerussutisiaqartoq, ullorlu 1. januar 2004 nallertinnagu atuuffimminit tunuarsimasoq, pisortani atorfimmit allamit aningaasarsiaqarsinnaatitaappat, akissarsiaqarsinnaatitaappat soraarnerussutisiaqarsinnaatitaappalluunniit, Inatsisartut inatsisaat una malillugu soraarnerussutisiai ilanngarneqassapput, taamaalilluni aningaasarsiat, akissarsiat soraarnerussutisiallu katillutik § 15, imm. 1 malillugu soraarnerussutisiarineqarsinnaasut qaffasinnerpaaffiattut taamaallaat angissuseqarsinnaanngorlugit.

  Imm. 5.  Inatsisartuni Naalakkersuisuniluunniit siusinnerusukkut ilaasortaasimasoq ulloq 1. januar 2004 nallertinnagu Inatsisartuni Naalakkersuisuniluunniit ilaasortatut atuuffimminit tunuarsimappat, kingusinnerusukkullu Inatsisartunut Naalakkersuisunulluunniit qinigaappat, imm. 3 aamma imm. 4 atorneqassanngillat.

 

  § 17.  Inatsisartut inatsisaata atortuulersinneqarnerani Inatsisartuni Naalakkersuisunilu ilaasortanut, aningaasarsiat il.il. pillugit Inatsisartut inatsisaat nr. 11 28. oktober 1993-imeersoq aamma Inatsisartuni Naalakkersuisunilu il.il. ilaasortatut aningaasarsiaqartitaanerat il.il. pillugit Inatsisartut inatsisaat nr. 17, 7. december 2001-imeersoq naapertorlugit soraarnerussutianik aaqqissuussinerit ulloq 31. december 2003 killigalugu katersukkatut inissinneqassapput.

  Imm. 2.  Soraarnerussutisiatut naafferartumik tunniunneqartartussatut, soraarnerussutisiatut inuuneq naallugu tunniunneqartartussatut, taakkunanngaluunniit ataqatigiissitsilluni tunniunneqartartussatut soraarnerussutisiaqalernissamut aaqqissuussinermik pilersitsisoqassaaq Inatsisartunut Naalakkersuisunulluunniit ilaasortat ataasiakkaat innersuussinerat malillugu. Soraarnerussutisiaqalernissamut aaqqissuussineq, soraarnerussutisiaqalernissamut aningaasaateqarfimmi sillimmasiisarnermik ingerlatsineq pillugu inatsimmut ilaatinneqartumi, inuunermik soraarnerussutisiaqalernissamulluunniit sillimmasiisarnermik ingerlatseqatigiiffimmi sillimmasiisarnermik ingerlatsinissamut aningaasaqarnermik nakkutilliisoqarfimmit Finanstilsynimiit akuerineqarsimasumi, imaluunniit aningaaserivimmi Kalaallit Nunaanni angerlarsimaffilimmi aalajangersimasumilluunniit ingerlatsivilimmi nunamilu maani aningaaseriveqarnermik ingerlatsinissaminut Finanstilsynimit akuerineqarsimasumi, pilersinneqassaaq. Inatsisartunulli Naalakkersuisunulluunniit ilaasortat atuuffimminnut ullormi ivertitaanerminni 50-inik ukiullit soraarnerussutisiassanut akiliutinik isertitatut nalinginnaasumik akileraarusigassanik imm. 3-mi taaneqartunik tunineqarumallutik toqqaasinnaapput.

  Imm. 3.  Imm. 2-mi soraarnerussutisiaqarnermik aaqqissuussinermut taaneqartumut Inatsisartuni Naalakkersuisuniluunniit ilaasortap ataatsip aningaasarsiaasa 10%-iinik ingerlaavartumik tunniussisoqartassaaq. Aammattaaq Inatsisartuni Naalakkersuisuniluunnit ilaasortap ataatsip aningaasarsiaasa 5%-iinik ingerlaavartumik ilanngaassuisoqartassaaq. Aningaasat ilanngaatigineqartartut tassaapput Inatsisartuni Naalakkersuisuniluunniit ilaasortap soraarnerussutisiaqarnermik aaqqissuussinermut imm. 2-mi taaneqartumut nammineerluni akiliutai.

  Imm. 4.  Sinniisussat, Inatsisartunut ilaasortamut taartaasut, imm. 2 aamma 3-mi pineqartutut soraarnerussutisianik aaqqissuussinerni ilaatinneqanngillat. Imm. 3-mi taaneqartutut soraarnerussutisianut akiliut taarsiullugu isertitatut nalinginnaasumik akileraarusigassatut tunniunneqassaaq.

 

Kapitali 7

Inatsisartuni ilaasortaanngitsut ataatsimiititaliani, nævnini, sinniisoqarfinni taamaaqataannilu

peqataaneri

 

  § 18.  Inatsisartuni ilaasortaanngitsunut ataatsimiititaliani, nævnini sinniisoqarfinnilu

Namminersorlutik Oqartussat sinnerlugit atuuffimmik isumaginnittunut ullormut ataatsimut aningaasarsianik § 1, imm. 1-imi taaneqartut 1/365-erarterutaannik aningaasarsiaqartitsisoqassaaq. Aammattaaq najugarisaq qimallugu ataatsimiinnermut peqataanermi angalanermut ineqarnermullu akiliussisoqassaaq kiisalu ullormusianik maleruagassat tjenestemandinut atuuttut naapertorlugit tunniussisoqartassaaq.

  Imm. 2.  Imm. 1, oqaaseqatigiit siulliit naapertorlugit aningaasarsiaqartitsinermut taarsiullugu Inatsisartunut ilaasortaanngitsut ataatsimiititaliani, aalajangiisartuni sinniisoqarfinnilu imm. 1-imi taaneqartuni siulittaasutut ilaasortatulluunniit immikkut artornassusilinnik atuuffeqartut immikkut aningaasarsiassaannik Naalakkersuisut aalajangersaasinnaapput.

 

Kapitali 8

Piginnaatitsissut

 

  § 19.  Inatsisartut Siulittaasoqarfiat, naalakkersuisunullu ilaasortat pineqartillugit Naalakkersuisut, Inatsisartunut ilaasortat Naalakkersuisunullu ilaasortat eqqarsaatigalugit Inatsisartut inatsisaat manna malillugu malittarisassanik erseqqinnerusunik aalajangersaasinnaapput.

 

Kapitali 9

Atortuulersitsineq il. il.

 

  § 20.  Inatsit una ulloq 1. januar 2004-imi atortuulissaaq.

  Imm. 2.  Tamatuma peqatigisaanik Inatsisartut inatsisaat nr. 11 ulloq 28. oktober 1993-imeersoq

Inatsisartunut, Naalakkersuisunut il. il. ilaasortat aningaasarsiaqartitaanerat il.il. kiisalu Landsrådimut, Inatsisartunut, Naalakkersuisunut il. il. ilaasortaasimasut soraarnerussutisiaqartinneqarnerat pillugu inatsit aamma Inatsisartut inatsisaat nr. 17 ulloq 7. december 2001-imeersoq Inatsisartunut Naalakkersunullu il. il. ilaasortat aningaasarsiaqartitaanerat il. il. pillugit inatsit atorunnaarsinneqarput.

  Imm. 3.  Taamaattorli Kalaallit Nunaata Landsrådianut aamma Kalaallit Nunaata Landstingianut sivisuumik ilaasortaasimasunut soraarnerussutisiaqartitsinermik aaqqissuussineq pillugu Landstingip inatsisaani nr. 3, 16. maj 1979-imeersumi (Ataqqinaammik tunissutisisitsisarneq pillugu inatsit) aamma Landsstyremut il. il. ilaasortaasimasunut soraarnerussutisiaqartitsineq pillugu landstingip inatsisaani nr. 7-imi ulloq 14. juli 1982-imeersumi kiisalu Kalaallit Nunaanni Naalakkersuisunut, Landsrådimut, Inatsisartunut il.il. ilaasortaasimasut soraarnerussutisiaqartinneqarnerat pillugu Inatsisartut inatsisaat nr. 4, 9. juni 1986-imeersoq maannakkut tunniuttakkat piginnaatitaaffiillu maannamutut angissuseqarlutik, maleruagassallu maannamut atuuttut malillugit, aalajangersakkat taakku malillugit piginnaatitaaffiit taakku atuukkunnaarnissaasa tungaanut, tunniunneqassapput.

 

 

Inatsisartut inatsisaat nr. 1, 27. marts 2006-imeersoq (Soraarnerussutisiatut naafferartumik tunniussassatut imaluunniit inuuneq naallugu soraarnerussutisiatut ilusilerlugit soraarnerussutisiaqartitsinermik aaqqissuussineq kiisalu ukioqqortuneq pissutigalugu soraarnerussutisiassanut akiliutinik tunniussinissamut periarfissaq. Inatsisartunut ilaasortanut sinniisussat soraarnerussutisianut akiliutaat. Inatsisartunut ilaasortat ineqarnerat.)[1] atuutsitsilernissamut aalajangersagaq una imaraa:

 

§ 2

 

Inatsisartut inatsisaat ulloq 1. april 2006 atuutilissaaq. Inatsisartunut Naalakkersuisunulluunniit ilaasortat inatsisip atuutilerfia sioqqullugu atuuffimminnut ivertinneqartut ulloq 1. januar 2004 kingusinnerusukkulluunniit 50-nik ukioqalersimagunik § 17, imm. 2-mi taaneqartutut tunniussinissamut periarfissamik atuiumallutik toqqaasinnaapput.

 

Inatsisartut inatsisaat nr. 8, 1. juni 2006-imeersoq (Partiinut tapiissutit qaffanneqarneri tunngaviusumillu tapiissutinik agguataarisarneq aammalu qinikkamut tapiissutit, kiisalu Inatsisartunut ilaasortat inatsisikkut piginnaatitaaffiusumik ataasiakkaarlutik paasisassarsiorlutik angalasarnerinik atorunnaarsitsinissaq)[2] atuutsitsilernissamut aalajangersagaq una imaraa:

 

§ 3

 

Inatsisartut inatsisaat ulloq 1. juni 2006 atuutilissaaq. 2006-ip sinneranut naalakkersuinikkut sulinermut tapiissutit qaffaataanik qinnuteqaatit kingusinnerpaamik ulloq 1. august 2006 tunniunneqassapput.

 

Inatsisartut inatsisaat nr. 2, 15-april-imeesoq 2011 (Atorfimmut atatillugu ineqartinneqarneq, angalanernut aningaasartuutit, ilaasortaajunnaarnersiutit, sulinngiffeqarnerit allatullu peqataannginnerit kiisalu ataatsimiititalianut aalajangiisartunullu (nævninut) ilaasortat aningaasarsiaqartitaanerat pillugit malittarisassanik allannguineq)[3] atuutsitsilernissamut aalajangersagaq una imaraa:

 

§ 2

 

Inatsisartut inatsisaat ulloq 1. juni 2011 atuutilerpoq.

 

Inatsisartut inatsisaat nr. 3, 3. juni 2015-imeersoq (Inatsisartunut ilaasortat il.il. sulinngiffeqarallarsinnaanerannut il.il. malittarisassanik Inatsisartut aalajangersaanerat)[4] atuutsitsilernissamut aalajangersagaq una imaraa:

 

§ 2

 

Inatsisartut inatsisaat una ulloq 1. juli 2015 atuutilerpoq.

 

Inatsisartut inatsisaat nr. 10, 6. juni 2016-imeersoq. (Aningaasarsiaqartitaanerup aallartiffia)[5] atuutsitsilernissamut aalajangersagaq una imaraa:

 

§ 2

 

Inatsisartut inatsisaat ulloq 1. juli 2016 atuutilissaaq.

 

Inatsisartut inatsisaat nr. 42, 23. november 2017-imeersoq (Inatsisartunut ilaasortanut Naalakkersuisunullu ilaasortanut soraarnerussutisiaqarnissamik aaqqissuussinerit)[6] atuutsitsilernissamut aalajangersagaq una imaraa:

 

§ 2

 

Inatsisartut inatsisaat ulloq 1. januar 2018 atuutilerpoq.

 

 

 

 

Naalakkersuisut Siulittaasuata Naalakkersuisoqarfia, ulloq 21. april 2021

 

 

 

 

Hans-Peder Barlach Christensen

/

Jógvan Svabo Samuelsen