§ 1

Isumaginnittoqarfiup aqunneqarnera aaqqissuussaaneralu pillugit Inatsisartut peqqussutaanni nr. 11, 12. november 2001-imeersumi kingusinnerusukkut Inatsisartut inatsisaat nr. 14, 6. juni 2016-imeersukkut allanngortinneqartumi allannguutigineqassapput:                        

1. § 8 imatutoqaasertaqassaaq:
” § 8.  Isumaginninnermut Naammagittaalliuuteqartarfimmut inatsisitigut naammagittaalliuuteqartoqarsinnaatillugu, suliani kommunalbestyrelsip Naalakkersuisulluunniit aalajangiiffigisimasaanni, illuatungiusup aalajangiineq Isumaginninnermi Naammagittaalliuuteqartarfimmut naammagittaalliutigisinnaavaa. Aalajangiinerup kingorna sapaatip akunneri arfinillit qaangiutsinnagit Isumaginninnermi Naammagittaalliuuteqartarfimmut naammagittaalliuuteqartoqassaaq.
  Imm. 2.  Isumaginninnermi Naammagittaalliuuteqartarfiup aalajangigai allaffissornikkut oqartussanut allanut ingerlateqqinneqarsinnaanngillat.
  Imm. 3.  Akuersisissummik peqaqqaarnani meeqqamik inuusuttumilluunniit 18-it inorlugit ukiulimmik angerlarsimaffiup avataanut inissiinissamik Isumaginninnermi Naammagittaalliuuteqartarfiup aalajangiinera angajoqqaatut oqartussaassusilimmit meeqqamilluunniit Kalaallit Nunaanni Eqqartuussivinnut tunniunneqarsinnaavoq. Aalajangikkap Kalaallit Nunaanni Eqqartuussivinnut tunniunneqarnera pissaaq aalajangiinerup kingorna sapaatit akunnerisa 4-it iluanni.
  Imm. 4.  Suliami (illuatungiulluni) peqataasup Isumaginninnermi Naammagittaalliuuteqartarfiup aalajangiinera, Kalaallit Nunaanni Eqqartuussivinnut suliassanngortissinnaavaa. Aalajangikkap Kalaallit Nunaanni Eqqartuussivinnut tunniunneqarnera pissaaq aalajangiinerup kingorna sapaatit akunnerisa 4-t iluanni.
  Imm. 5.  Isumaginninnermi Naammagittaalliuuteqartarfiup aamma eqqartuussiviup imm. 1-mi, 3-imi aamma 4-imi piffissaliussap malinneqannginnera isiginnginniarsinnaavaat pineqartoq qaangiinermut akisussaatinneqarsinnaanngippat.”

2. § 9 imatutoqaasertaqassaaq:
” § 9.  Isumaginninnermi Naammagittaalliuuteqartarfik siulittaasoqassaaq 4-nillu  ilaasortaatitaqassalluni.
  Imm. 2.  Siulittaasoq Isumaginninnermi Naammagittaalliuuteqartarfiup allattoqarfiani naammagittaalliuuteqartarnermi allatseqarfiup pisortaatut atorfinitsinneqassaaq.
  Imm. 3.  Naalakkersuisut ilaasortaatitat 4-t taakkulu sinniisussaat ukiuni sisamani atuuttussanngorlugit toqqassavaat.
  Imm. 4.  Siulittaasoq inatsisilerituutut soraarummeersimassaaq.
  Imm. 5.  Ilaasortat 2-t sinniisussaallu isumaginninnermut tunngasunik paasisimasaqartuussapput, ilaasortaq 1 sinniisussaalu inatsisilerituujussapput isumaginninneq pillugu paasisimasaqartut, aammalu ilaasortaq 1 sinniisussaalu isumaginninnermut politikkimik tunuliaqutaqassapput.
  Imm. 6.  Inuit isumaginninneq pillugu sulianik ingerlatsinermut imaluunniit aalajangiinernut akuusut toqqarneqarsinnaanngillat.
  Imm. 7.  Isumaginninnermi Naammagittaalliuuteqartarfik pisuni aalajangersimasuni inunnik suliamik sammineqartumik immikkut ilisimasaqartunik aggersaasinnaavoq. Inuit taakku Isumaginninnermi Naammagittaalliuuteqartarfimmi taaseqataasinnaatitaanngillat.
  Imm. 8.  Naalakkersuisut Isumaginninnermi Naammagittaalliuuteqartarfiup suleriaasissaa aamma Naammagittaalliuuteqartarfiup allattoqarfiullu sulinerannut malittarisassat sukumiinerusut nalunaarutitigut aalajangersassavaat, taakkununnga ilaallutik piffissaliussaasut, naammagittaalliuuteqartarnermut periaatsit ilusiliinissamullu piumasaqaatit, taassuma ataani naammagittaalliuutinik periaatsinik ilusiliinissamullu piumasaqaatinik naammassinninngitsunik itigartitsisinnaaneq piumasaqaammullu tassunga atuutitsinnginnissaq, Naammagittaalliuuteqartarfiup siulittaasuata innersuussineratigut Naammagittaalliuuteqartarfiup ilaasortaanik piffissaq sioqqullugu soraarsitsineq kiisalu Naammagittaalliuuteqartarfiup ilaasortaanik akissarsiaqartitsinermut malittarisassat.
  Imm. 9.  Naalakkersuisut Isumaginninnermi Naammagittaalliuuteqartarfimmut allattoqarfeqartitsissapput.”

3. § 10 imatutoqaasertaqassaaq:
” § 10.  Suliani naammagittaalliuuteqarfiusuni Isumaginninnermi Naammagittaalliuuteqartarfik ilaasortaatitaasunik peqataatitaqarani aalajangiissaaq, taamaattoq tak. imm. 2.
  Imm. 2.  Siulittaasup nalilerpagu naammagittaalliuummik suliaq tunngaviusumik pingaaruteqartuusoq, ilaasortaatitaasut peqataatillugit suliamik aalajangiisoqassaaq, sulittaasulli nalilerpagu naammagittaalliuummik suliaq ima nukinginnartigisoq, ilaasortaatitaasut peqataatinnagit aalajangiisoqartariaqartoq peqataatinnagit aalajangiisoqassaaq.
  Imm. 3.  Suliani imm. 2-mut attuumassuteqartuni siulittaasoq aalajangersinnaavoq ilaasortanit allakkatigut innersuussuteqarnikkut aalajangiineq pissasoq. Suliat taamaattut ilaasortap ataatsip piumasaqarneratigut ataatsimiinnermi suliarineqassapput.
  Imm. 4.  Isumaginninnermi Naammagittaalliuuteqartarfiup aalajangiineri allaganngorlugit, tunngavilersorlugit suliarineqartassapput. Ataatsimeereernerit tamaasa allattoqarfiup tunngaviusumik aalajangernerit tamanut saqqummiuttassavai.
  Imm. 5.  Isumaginninermi Naammagittaalliuuteqartarfik ukiut tamaasa suliani pillugit nalunaarusiortassaaq.”

4. § 11 imatutoqaasertaqassaaq:
” Isumaginninnermi Naammagittaalliuuteqartarfik aalajangiisinnaassuseqartarpoq, siulittaasoq ilaasortallu 2-t najuukkaangata, taamaattoq takuuk § 10, imm. 11. Isumaginninnermi Naammagittaalliuuteqartarfik amerlanerussuteqarnikkut aalajangiisassaaq. Naligiimmik taasisoqartillugu siulittaasup taasinera aalajangiisuusaaq.
  Imm. 2.  Isumaginninnermi Naammagittaalliuuteqartarfiup allattoqarfiata allagaatit sulianut tunngasut kommuninit imaluunniit Naalakkersuisunit piniartassavaat.
  Imm. 3.  Kommunit Naalakkersuisulluunniit naammagittaalliuummik tigusaqarnerminnit kingusinnerpaamik sapaatit akunneri sisamat qaangiutsinnagit Isumaginninnermi Naammagittaalliuuteqartarfimmut ingerlateqqereersimassavaat.
  Imm. 4.  Isumaginninnermi Naammagittaalliuuteqartarfiup allattoqarfia suliani nukinginnartuni sapaatit akunnerinik sisamanik sivikinnerusumik piffissaliussisinnaavoq.”

5. § 11-p kingorna ima ilanngussisoqassaaq:
”  § 11a.  Isumaginninnermi Naammagittaalliuuteqartarfiup siulittaasuata § 10, imm. 1 malillugu siulittaasutut piginnaatitaanini Isumaginninnermi Naammagittaalliuuteqartarfiup allattoqarfianut tamakkiisumik ilaannakortumilluunniit tunniussinnaavai.”

§ 2

Isumaginninnermik suliassaqarfimmi pissaanermik atuineq pillugu Inatsisartut inatsisaat nr. 1, 21. november 2013-meersumi makku allannguutigineqassapput:

1.  § 26 ima oqaasertalerneqassaaq:
“  § 26.  Kommunimi sumiiffigisami kommunalbestyrelsip immikkoortoq II-mi malittarisassat naapertorlugit aalajangigaanik naammagittaalliutit Isumaginninnermi Naammagittaalliuuteqartarfimmut apuunneqarsinnaapput Isumaginnittoqarfiup aqunneqarnera aaqqissuussaaneralu pillugit Inatsisartut peqqussutaat malillugu.”

2.  § 48, imm. 1, ima oqaasertalerneqassaaq:
“  § 48.  §§ 31, 33, 34, 35, 36, imm. 2, 38, 39, imm. 2 aamma § 42, imm. 3 naapertorlugit kommunalbestyrelsip aalajangiineri Isumaginninnermi Naammagittaalliuuteqartarfimmut apuunneqarsinnaapput Isumaginnittoqarfiup aqunneqarnera aaqqissuussaaneralu pillugit Inatsisartut peqqussutaat malillugu.”

3.  § 49, imm. 1, ima oqaasertalerneqassaaq:
“  § 49.  Najugaqarfissatut neqeroorutinut aalajangersimasunut § 36, imm. 1 aamma 3 naapertorlugit tigutinnermut Ilaqutariinnermut Naalakkersuisup § 42 naapertorlugu aalajangiineri Isumaginninnermi Naammagittaalliuuteqartarfimmut apuunneqarsinnaapput Isumaginnittoqarfiup aqunneqarnera aaqqissuussaaneralu pillugit Inatsisartut peqqussutaat malillugu.”

§ 3

Suliffeerunnermi ikiorsiissutit pillugit inatsisartut inatsisaat nr. 2, 15. maj 2014-imeersumi makku allannguutigineqassapput:

1. § 19 ima oqaasertalerneqassaaq:
“  § 19.  Kommunalbestyrelsip § 1, § 6, imm. 5, § 13, imm. 1, aamma §§ 16 aamma 17 malillugit aalajangersimasai Isumaginninnermi Maalaaruteqartarfimmut maalaarutigineqarsinnaapput Isumaginnittoqarfiup aqunneqarnera aaqqissuussaaneralu pillugit Inatsisartut peqqussutaat malillugu.”

§ 4

Inatsisartut inatsisaat atortuulerpoq ulloq 1. januaari 2018.

Kalaallit Nunaanni Namminersorlutik Oqartussat, ulloq 23. november 2017

Kim Kielsen