Matumuuna Isumaginnittoqarfiup aqunneqarnera aaqqissuussaaneralu pillugit Inatsisartut peqqussutaat nr. 11, 12. decemberi 2001-meersoq, Inatsisartut inatsisaat nr. 14, 6. juni 2016-meersumi, Inatsisartut inatsisaat nr. 47, 23. november 2017-meersumi aamma Inatsisartut inatsisaat nr. 55, 25. november 2024- meersumi allannguutit ilanngullugit, nalunaarutigineqarpoq

 

Suliassaqartitsiniarnermik inunnillu isumaginninnermik Kalaallit Nunaannut inatsit nr. 580, 29. november 1978-imeersoq naapertorlugu makku aalajangersarneqarput:

 

Qitiusumit siulersorneqarnera

 

  § 1.  Naalakkersuisut Kalaallit Nunaanni isumaginnittoqarfiup allaffissornikkut aqunneqarnera siulersorlugulu aaqqissuutissavaat, isumaginninnermilu malittarisassanik kommunit ingerlatsinerat nakkutigisaralugu.

  Imm. 2.  Nakkutilliinerup annertussusia ingerlanneqarneralu pillugit aalajangersakkanik erseqqinnerusunik Naalakkersuisut aalajangersaassapput.

 

  § 2.  Naalakkersuisut Kalaallit Nunaanni isumaginninnermi sanaartugassatigut piorsaanerup pilersaarusiorneqarnera isumagisaraat ataqatigiissaagaralugulu, tamatumanilu kommuninit ataasiakkaanit siunnersuutinik pissarsiniartassallutik.

  Imm. 2.  Piorsaanissamik pilersaarutit sivikinnerpaamik ukiunut sisamanoortuupput. Minnerpaamik ukiumut ataasiarluni nalilersoqqinneqartassapput.

 

  § 3.  Naalakkersuisut §§ 1 aamma 2 naapertorlugit suliassat isumagisassanngortinneqartut suliariniarnerini paasissutissat pisariaqartut kommunalbestyrelsinit piumasarisinnaavaat.

 

  § 4.  Naalakkersuisut isumaginninnermi sanaartukkat pillugit erseqqinnerusunik malittarisassiussapput.

 

  § 5.  Kommunalbestyrelsinut ilaasortanik, qinikkatut isumaginninnermut tunngasunik suliaqartussanik, Naalakkersuisut pikkorissartitsisassapput, kingusinnerpaamik kommunalbestyrelsinut qinersinerit tamaasa kingorna ukioq ataaseq qaangiutsinnagu.

 

Najukkani aqutsineq

 

  § 6.  Kommunalbestyrelsi kommunip isumaginninnikkut suliaani pissutsinut tamanut tunngasutigut inatsisitigut allatigut oqartussanut allanut tunniunneqarsimanngitsunut aalajangiisartuuvoq.

  Imm. 2.  Kommunit aggornerisa avataanni suliassat, kommunini kommunalbestyrelsinit suliarineqartartut Naalakkersuisunit suliarineqassapput.

 

  § 7.  Kommunalbestyrelsi kommunip isumaginninnikkut sanaartugassaasa piorsarneqarnerinik pilersaarutinut siunnersuusiortassaaq Naalakkersuisunullu nassiuttassallugit. Tamatuma kingorna Naalakkersuisut:

1)  kommunit siunnersuutaat tulleriiaarlugit ataqatigiissaarlugillu pingaarnersiussavaat,

2)  kommunit isumaginninnikkut sullissinissamik aqqutissiuisussaanerat naammassineqarsimanersoq nakkutigissavaat, aamma

3)  inuiaqatigiit eqqarsaatigalugit nukissanik naammaginartumik atuisoqarnersoq nakkutigissavaat.

  Imm. 2.  Naalakkersuisut piorsaanissamik pilersaarutinut siunnersuusiornermi periusaasartut, tamakkua annertussusiat, aammalu pilersaarutinut piffissatut killiliussat pillugit erseqqinnerusunik malittarisassiussapput.

 

Isumaginninnermi malittarisassanik kommunit aqutsinerannik atorunnaarsitsineq

 

  § 7 a.  Naalakkersuisut kommunit isumaginninnikkut maleruaqqusat toqqammavigalugit ingerlatsinerannik atorunnaarsitsissallutik aalajangersinnaapput, tamatumani kommuni pineqartoq pisussaaffimminnik imaluunniit innuttaasut pisisinnaatitaaffiinik annertuumik sumiginnaasimappat.

  Imm. 2.  Atorunnaarsitsinissaq pillugu aalajangerneq piffissamut siumut aalajangeriikkamut imaluunniit killiliinngikkaluarluni atuuttussatut aalajangerneqarsinnaavoq.

  Imm. 3.  Atorunnaarsitsinissamut aalajangernermi isumaginninnermut maleruagassat tamakkerlugit imaluunniit ilaannai pillugit tamatumanilu isumaginninnikkut maleruagassanut aalajangersimasunut tunngatinneqarsinnaapput.

 

  § 7 b.  § 7 a malillugu atorunnaarsitsinissaq pillugu aalajangernermi, Naalakkersuisut isumaginninnermi maleruagassat ataatsimoortut killissaliussaasa iluanni kommunalbestyrelsi saneqqunneqarsinnaanngitsunik pisussaaffilersinnaavaat isumaginninnikkut maleruagassat aalajangersimasumik periuseqarluni ingerlatsivigineqarnissaanut aammalu suliassat aalajangiisarnerillu assigiinngitsut qanoq isumagineqartarnissaanik aalajangersaanikkut.

  Imm. 2.  § 7 a malillugu atorunnaarsitsinissaq pillugu aalajangernermi, kommunalbestyrelsip isumaginninnikkut oqartussaaffii tamakkiisut ilaannakortulluunniit Naalakkersuisunit isumagisassanngortinneqarsinnaapput. Tamatuma saniatigut Naalakkersuisut isumaginninnikkut maleruagassat naapertorlugit suliassat tigullugillu aallartissinnaallugit.

  Imm. 3.  Kommunip isumaginninnermut maleruagassanik ataatsimoortunik ingerlatsivimmi aqutsineranik atorunnaarsitsinissaq pillugu aalajangiineq tunngavigalugu Naalakkersuisut isumaginninnermut maleruagassat ataatsimoortut naapertorlugit aalajangerneri, Isumaginninnermi Naammagittaalliuuteqartarfimmut naammagittaalliuutigineqarsinnaapput. Naammagittaalliorneq, aalajangiineq kommunimit aalajangiunneqarsimappat maleruagassat atorneqarsimasussaagaluit malillugit, pissaaq.

 

  § 7 c.  § 7 a malillugu atorunnaarsitsinissaq pillugu aalajangernerup malitsigisaanik iliuutsit aammalu isumaginninnikkut maleruaqqusat toqqammavigalugit Naalakkersuisunit peqqussutigineqartut imaluunniit suliani aalajangersimasuni Naalakkersuisut aalajangiineri, sioqqutsisumik kommunimit aningaasaliisoqarsimanngikkaluarpalluunniit piviusunngortinniarneqarsinnaapput. Tamatumani kommunalbestyrelsi naak tunngavilersuiffigineqanngikkaluarluniluunniit pisussaaffilerneqarsinnaavoq aningaasanik atugassanik pissarsiorniarnissamut. Taamatullu pisoqartillugu Inatsisartut kommunit aqunneqarnerannut inatsisaani allaqqasut toqqammavigineqassapput.

 

  § 7 d.  Naalakkersuisut § 7 a malillugu atorunnaarsitsinissaq pillugu aalajangernerup malitsigisaanik ingerlatsinermut aningaasartuuteqarneranut kommunalbestyrelsi matussusiisassaaq.

  Imm. 2.  Kommunalbestyrelsip pineqartumi sulisooreersut allaffeqarfigisaallu Naalakkersuisunut atugassiissutigissavai. Sulisut tamatumanilu ilanngullugit kommunini atorfilittut inissisimasut Naalakkersuisut najoqqutassiarisaat toqqammavigalugit atorunnaarsitsinermi pineqartut iluanni suliassaminnik isumaginnittussaatitaapput.

 

  § 7 e.  Kommunalbestyrelsi pisussaavoq sulianut tunngatillugu paasissutissat suugaluartut il.il. Naalakkersuisunit piumasarineqartut ingerlateqqittassallugit. Naalakkersuisut kommunalbestyrelsimut piumaffigineqarsinnaavoq allakkatigut nalunaarsueqqullugu.

  Imm. 2.  Imm. 1-imi taaneqartut toqqammavigalugit kommunip ingerlateqqitai, Naalakkersuisunit susassaqanngitsunut ingerlateqqinneqarsinnaanngillat.

 

  § 7 f.  Naalakkersuisut pisinnaatitaapput kommunimi sulianik ingerlatsiviusunut sumiikkaluartunut tamanut isersinnaatitaanissaminnut.

  Imm. 2.  Naalakkersuisut pisinnaatitaapput kommunip qarasaasiatigut sullissisarnerni atortorissaarutaannut aammalu taakkua imarisaannut suliallu uppernarsaataannut misissuisinnaatitaanissamut.

  Imm. 3.  Kommunip qarasaasiatigut sullissisarnerni atortorissaarutaannut Naalakkersuisut isersinnaatitaanissaminni kommunip pisinnaatitaaffii naapertorlugit isersinnaatitaassapput.

 

  § 7 g.  Naalakkersuisut atorunnaarsitsinissaq pillugu aalajangernerat Isumaginninnermut Naammagittaalliuteqartarfimmut allatigulluunniit ingerlatsinikkut oqartussaaffimmut ingerlateqqinneqarsinnaanngilaq.

 

Naammagittaalliuuteqartarneq

 

  § 8.  Isumaginninnermut Naammagittaalliuuteqartarfimmut inatsisitigut naammagittaalliuuteqartoqarsinnaatillugu, suliani kommunalbestyrelsip Naalakkersuisulluunniit aalajangiiffigisimasaanni, illuatungiusup aalajangiineq Isumaginninnermi Naammagittaalliuuteqartarfimmut naammagittaalliutigisinnaavaa. Aalajangiinerup kingorna sapaatip akunneri arfinillit qaangiutsinnagit Isumaginninnermi Naammagittaalliuuteqartarfimmut naammagittaalliuuteqartoqassaaq.

  Imm. 2.  Isumaginninnermi Naammagittaalliuuteqartarfiup aalajangigai allaffissornikkut oqartussanut allanut ingerlateqqinneqarsinnaanngillat.

  Imm. 3.  Akuersissummik peqaqqaarnani meeqqamik inuusuttumilluunniit 18-it inorlugit ukiulimmik angerlarsimaffiup avataanut inissiinissamik Isumaginninnermi Naammagittaalliuuteqartarfiup aalajangiinera angajoqqaatut oqartussaassusilimmit meeqqamilluunniit Kalaallit Nunaanni Eqqartuussivinnut tunniunneqarsinnaavoq. Aalajangikkap Kalaallit Nunaanni Eqqartuussivinnut tunniunneqarnera pissaaq aalajangiinerup kingorna sapaatit akunnerisa 4-it iluanni.

  Imm. 4.  Suliami (illuatungiulluni) peqataasup Isumaginninnermi Naammagittaalliuuteqartarfiup aalajangiinera, Kalaallit Nunaanni Eqqartuussivinnut suliassanngortissinnaavaa. Aalajangikkap Kalaallit Nunaanni Eqqartuussivinnut tunniunneqarnera pissaaq aalajangiinerup kingorna sapaatit akunnerisa 4-t iluanni.

  Imm. 5.  Isumaginninnermi Naammagittaalliuuteqartarfiup aamma eqqartuussiviup imm. 1-mi, 3-imi aamma 4-imi piffissaliussap malinneqannginnera isiginnginniarsinnaavaat pineqartoq qaangiinermut akisussaatinneqarsinnaanngippat.

 

Isumaginninnermi Naammagittaalliuuteqartarfik

 

  § 9.  Isumaginninnermi Naammagittaalliuuteqartarfik siulittaasoqassaaq 4-nillu ilaasortaatitaqassalluni.

  Imm. 2.  Siulittaasoq Isumaginninnermi Naammagittaalliuuteqartarfiup allattoqarfiani naammagittaalliuuteqartarnermi allatseqarfiup pisortaatut atorfinitsinneqassaaq.

  Imm. 3.  Naalakkersuisut ilaasortaatitat 4-t taakkulu sinniisussaat ukiuni sisamani atuuttussanngorlugit toqqassavaat.

  Imm. 4.  Siulittaasoq inatsisilerituutut soraarummeersimassaaq.

  Imm. 5.  Ilaasortat 2-t sinniisussaallu isumaginninnermut tunngasunik paasisimasaqartuussapput, ilaasortaq 1 sinniisussaalu inatsisilerituujussapput isumaginninneq pillugu paasisimasaqartut, aammalu ilaasortaq 1 sinniisussaalu isumaginninnermut politikkimik tunuliaqutaqassapput.

  Imm. 6.  Inuit isumaginninneq pillugu sulianik ingerlatsinermut imaluunniit aalajangiinernut akuusut toqqarneqarsinnaanngillat.

  Imm. 7.  Isumaginninnermi Naammagittaalliuuteqartarfik pisuni aalajangersimasuni inunnik suliamik sammineqartumik immikkut ilisimasaqartunik aggersaasinnaavoq. Inuit taakku Isumaginninnermi Naammagittaalliuuteqartarfimmi taaseqataasinnaatitaanngillat.

  Imm. 8.  Naalakkersuisut Isumaginninnermi Naammagittaalliuteqartarfiup allattoqarfiatalu suliassaminnik ingerlatsinerannut maleruagassanik sukumiinerusunik, tassunga ilanngullugu qinigaaffiup naanissaa sioqqullugu naammagittaalliuteqartarfiup siulittaasuata inassuteqarneratigut naammagittaalliuteqartarfimmut ilaasortanik soraarsitsisarneq, kiisalu naammagittaalliuteqartarfimmut ilaasortat aningaasarsiaqartinneqarnerat pillugu maleruagassanik, aalajangersaassapput.

  Imm. 9.  Naalakkersuisut Isumaginninnermi Naammagittaalliuuteqartarfimmut allattoqarfeqartitsissapput.

  Imm. 10.  Isumaginninnermi Naammagittaalliuteqartarfiup suleriaasissani nammineq aalajangersassavaa.

 

  § 10.  Suliani naammagittaalliuuteqarfiusuni Isumaginninnermi Naammagittaalliuuteqartarfik ilaasortaatitaasunik peqataatitaqarani aalajangiissaaq, taamaattoq tak. imm. 2.

  Imm. 2.  Siulittaasup nalilerpagu naammagittaalliuummik suliaq tunngaviusumik pingaaruteqartuusoq, ilaasortaatitaasut peqataatillugit suliamik aalajangiisoqassaaq, sulittaasulli nalilerpagu naammagittaalliuummik suliaq ima nukinginnartigisoq, ilaasortaatitaasut peqataatinnagit aalajangiisoqartariaqartoq peqataatinnagit aalajangiisoqassaaq.

  Imm. 3.  Suliani imm. 2-mut attuumassuteqartuni siulittaasoq aalajangersinnaavoq ilaasortanit allakkatigut innersuussuteqarnikkut aalajangiineq pissasoq. Suliat taamaattut ilaasortap ataatsip piumasaqarneratigut ataatsimiinnermi suliarineqassapput.

  Imm. 4.  Isumaginninnermi Naammagittaalliuuteqartarfiup aalajangiineri allaganngorlugit, tunngavilersorlugit suliarineqartassapput. Ataatsimeereernerit tamaasa allattoqarfiup tunngaviusumik aalajangernerit tamanut saqqummiuttassavai.

  Imm. 5.  Isumaginninermi Naammagittaalliuuteqartarfik ukiut tamaasa suliani pillugit nalunaarusiortassaaq.

 

  § 11.  Isumaginninnermi Naammagittaalliuuteqartarfik aalajangiisinnaassuseqartarpoq, siulittaasoq ilaasortallu 2-t najuukkaangata, taamaattoq takuuk § 10, imm. 1. Isumaginninnermi Naammagittaalliuuteqartarfik amerlanerussuteqarnikkut aalajangiisassaaq. Naligiimmik taasisoqartillugu siulittaasup taasinera aalajangiisuusaaq.

  Imm. 2.  Isumaginninnermi Naammagittaalliuuteqartarfiup allattoqarfiata allagaatit sulianut tunngasut kommuninit imaluunniit Naalakkersuisunit piniartassavaat.

  Imm. 3.  Kommunit Naalakkersuisulluunniit naammagittaalliuummik tigusaqarnerminnit kingusinnerpaamik sapaatit akunneri sisamat qaangiutsinnagit Isumaginninnermi Naammagittaalliuuteqartarfimmut ingerlateqqereersimassavaat.

  Imm. 4.  Isumaginninnermi Naammagittaalliuuteqartarfiup allattoqarfia suliani nukinginnartuni sapaatit akunnerinik sisamanik sivikinnerusumik piffissaliussisinnaavoq.

 

  § 11 a.  Isumaginninnermi Naammagittaalliuuteqartarfiup siulittaasuata § 10, imm. 1 malillugu siulittaasutut piginnaatitaanini Isumaginninnermi Naammagittaalliuuteqartarfiup allattoqarfianut tamakkiisumik ilaannakortumilluunniit tunniussinnaavai.

 

Aningaasalersuineq

 

  § 12.  Isumaginninnikkut suliat kommuninit Landskarsimillu aningaasalersorneqassapput.

  Imm. 2.  Aningaasanut inatsimmi isumaginninnikkut sulianut tapiissutit utertitsillunilu akiliutit pillugit malittarisassat erseqqinnerusut aalajangersarneqassapput.

 

  § 13.  Isumaginninnermi Naammagittaalliuuteqartarfiup aningaasartuutai Nunatta karsianit aningaasartuutigineqassapput.

 

Pineqaatissiisarnerit pillugit aalajangersakkat

 

  § 14.  Kinaluuniit isumaginninnermi suliat aqunneqarnerini peqataasoq pisortanik sullissitilluni suliffeqartilluniluuniit pinerluttulerinermi inatsimmi pinerluutit pillugit malittarisassat malillugit akisussaaffeqarpoq suliffik qinigaanikkut pigaluarpalluunniit.

 

Atortuulerfia

 

  § 15.  Peqqussut manna 1. januar 2002-mi atortuulerpoq. Peqatigitillugu isumaginnittoqarfiup aqunneqarnera aaqqissuussaaneralu pillugit Inatsisartut peqqussutaat nr. 9, 30. oktober 1998-imeersoq atorunnaarsinneqarpoq. Taanna naapertorlugu allaffissornikkut aqutsinermut maleruagassat atuutiinnassapput, atorunnaarsinneqarnissamik imaluunniit peqqussut manna naapertorlugu allaffissornikkut aqutsinermut maleruaqqusanik taarserneqarnissamik tungaanut.

  Imm. 2.  Isumaginninnermi Naammagittaalliuuteqartarfik isumaginnittoqarfiup aqunneqarnera aaqqissuussaaneralu pillugit Inatsisartut peqqussutaat nr. 9, 30. oktober 1998-imeersoq tunngavigalugu atulersinneqartoq ataannassaaq, Naalakkersuisut Isumaginninnermi Naammagittaalliuuteqartarfimmi ilaasortassanik nutaanik peqqussut una naapertorlugu toqqaareernissaasa tungaannut.

 

Inatsisartut inatsisaat nr. 14, 6. juni 2016-meersoq (Isumaginninnermi malittarisassanik kommunit aqutsinerannik atorunnaarsitsineq)^[1] atuutilernissaanik aalajangersakkanik makkuninnga imaqarpoq:

 

§ 2

 

Inatsisartut inatsisaat atuutilerpoq 1. juli 2016.

 

Inatsisartut inatsisaat nr. 47, 23. november 2017-meersoq (Isumaginninnermi Naammagittaalliuuteqartarfiup sulianik ingerlatsinerata naammassiuminarsagaanera)^[2] atuutilernissaanik aalajangersakkanik makkuninnga imaqarpoq:

 

§ 4

 

Inatsisartut inatsisaat atuutilerpoq 1. januar 2018.

 

Inatsisartut inatsisaat nr. 55, 25. november 2024-meersoq (Naammagittaalliuuteqartarfiit suleriaasiisa aalajangersarneqartarnerannut maleruagassanik allanngortitsineq)^[3] atuutilernissaanik aalajangersakkanik makkuninnga imaqarpoq:

 

§ 7

 

Inatsisartut inatsisaat atuutilerpoq 1. januar 2025.

  Imm. 2.  Peqatigitillugu nalunaarutit tulliuttut atuukkunnarsinneqarput:

1)  Ineqarneq pillugu maalaaruteqartarfiup sulinera pillugu Namminersornerullutik Oqartussat nalunaarutaat nr. 27, 26. november 2008-meersoq.

2)  Unammilleqatigiinnermut Ataatsimiititaliap suleriaasissaa taassumalu suliassai pillugit Namminersorlutik Oqartussat nalunaarutaat nr. 12, 23. juli 2015-imeersoq.

3)  Siusinaartumik pensionisiaqarnermut maalaaruteqartarfik pillugu Namminersorlutik Oqartussat nalunaarutaat nr. 25, 28. oktober 2016-imeersoq.

4)  Pinngortitap illersorneqarnera pillugu naammagittaalliuuteqartarfik pillugu Namminersornerullutik Oqartussat nalunaarutaat nr. 6, 12. februar 2009-meersoq.

 

 

Isumaginninnermut, Suliffeqarnermut Nunamullu Namminermut, Naalakkersuisoqarfik, ulloq

8. maaji 2025

 

 

Aka Grønvold (atsiorn.)

Naalakkersuisoqarfimmi pisortaagallartoq

 

 

/ Mehdi Shams (atsiorn.)