§ 1

Namminersornerullutik Oqartussat kommunillu inissiaataannik attartortittakkanik inissiatut imaluunniit illutut nammineq pigisatut tigusisarneq pillugu Inatsisartut peqqussutaanni nr. 12, 19. november 2007-imeersumi ima allannguisoqassaaq:

1. § 3, imm. 1-imi nr. 8-p kingornagut ikkunneqassaaq:
“ 9)  Ilulissani, Aasianni, Sisimiuni, Nuummi aamma Qaqortumi ilaqutariinnut ataasiakkaanut illut aamma illut affarleriit.”

2. § 14-ip kingornani immikkoortumi ”Pisortanit taarsigassarsiat, qularnaveeqqusiineq akiligassanngortitsisarnerlu” § 14a ikkunneqarpoq:
“  § 14a.  Namminersorlutik Oqartussat kommunillu inissiaataanni ilaqutariinnut ataasiakkaanut illut aamma illut affarleriit attartortittagai, Namminersorlutik Oqartussanit imaluunniit kommuninit pigineqartut, 275.000 kr-nillu ataallugit niueqatigiinnikkut akeqartinneqartumi, qinnuteqartoqarneratigut niueqatigiinnermi akigititaasup tamakkiisumik akiliuteqarnikkut imaluunniit akilersuinissamut isumaqatigiissusiortoqarneratigut tiguneqarsinnaavoq, tak. imm. 2. Qinnuteqaat Naalakkersuisunut kommunalbestyrelsimulluunniit nassiunneqassaaq pisiarinissaanullu aningaaserivimmiit pituttuisuunngitsumik nalunaarummik ilaqartinneqassalluni, tassani aningaaseriviup inissiap pisiarinissaanut akissaqartinnneqarnera nalunaarutigissavaa.
  Imm. 2.  Attartortup annerpaamik 275.000 koruunit tamakkerlugu akigititaq akilersinnaanngippagu, illuummik pisinermi naafferarlugit akilersuinissamut isumaqatigiissusiortoqarsinnaavoq. Naafferaalluni akilersuinermut aaqqissuussineq amerlanerpaamik qaammatit 60-it sinnerlugit ingerlasinnaassanngilaq, annikinnerpaamillu qaammammut 4.000 koruuninik naafferaalluni akilersuisoqartassalluni. Akiliummut ernialersuisoqaranilu akitsuusersuisoqassanngilaq.
  Imm. 3.  Imm. 2 naapertorlugu naafferaalluni akilersuinermut aaqqissuussinermik eqquutsitsisoqarsinnaanngippat, ukiumoortumik 3 %-imik ernialerlugit nationalbankip erniaritittagai ilanngullugit naatsorsuisoqartassaaq. Erniarititat akiligassap sinneranut naatsorsorneqartassaaq qaammammut akilersorneqartartussamik.
  Imm. 4.  Imm. 1-2 naapertorlugit pisinermi peqqussummi § 11, imm. 2-4 aamma §§ 13-16 atuutinngillat.”

§ 2

Inatsisartut inatsisaat 1. januar 2018-imi atuutilissaaq.

Namminersorlutik Oqartussat, ulloq 17. november 2017

Kim Kielsen