Inigisassaqartitsineq, inigisaqarnermut ikiorsiissuteqarneq, inigisanik attartortitsineq il.il. pillugit Kalaallit Nunaannut inatsimmi nr. 944-mi, 23. decembari 1986-imeersumi § 1 naapertorlugu makku aalajangersarneqarput:

Atuuffissaa il.il.

§ 1. Peqqussut manna inuk attartortoq pineqartillugu Namminersornerullutik Oqartussat kommunillu inissiaataannik attartortittakkanik agguataarinermut tigusinermullu atuutsinneqassaaq, taamaattorli tak. imm. 2 aamma § 3.
Imm. 2. Imm. 1 taamaallaat inissiaatinut attartortittakkanut, Naalakkersuisut imaluunniit kommunalbestyrelsip inissiatut imaluunniit illutut nammineq pigisatut agguataarneqarsinnaasutut tiguneqarsinnaasutullu aalajangersimasaannut atuutissaaq.

§ 2. Namminersornerullutik Oqartussat kommunillu inissiaataat attartortittakkat, tak. § 1, imm. 1, tiguneqarsinnaapput:
1) Inissiatut nammineq pigisatut, inissiaateqarfimmi attartortittakkat ataaseq sinnerlugu amerlassuseqarpata.
2) Illutut nammineq pigisatut, inissiaateqarfimmi attartortittagaq ataasiuppat.

§ 3. Peqqussut atuutsinneqassanngilaq:
1) Inissianut atorfimmut atatillugu inigineqartussatut immikkoortitanut.
2) Inissianut siunertanut aalajangersimasunut imaluunniit sulisorisat ilaannut atugassiaasunut.
3) Namminersornerullutik Oqartussani pisortaatitanut inissianut imaluunniit utaqqiisaasumik inissianut.
4) Inissianut inissiaqarfinni sulisunut Namminersornerullutik Oqartussani imaluunniit kommunimi atorfeqartitaasunut atugassianut.
5) Inissianut innarluutilinnut imaluunniit angallarluttunut immikkut atugassiatut sananeqarsimasunut aaqqissugaasunulluunniit.
6) Inissianut iluarsartuussinermut isaterinermullu atatillugu Namminersornerullutik Oqartussat kommunilluunniit inisseeqqiffissanik pisariaqartitsinerat naammassiniarlugu atorneqartunut.
7) Inissianut kommunalbestyrelsit isumaginninnermi inissaqartitsinissaannut atugassiaasunut.
8) Inissianut najugaqarfittut atorneqarnermit allaanerusumut atorneqartunut.
Imm. 2. Pisuni immikkut ittuni Naalakkersuisut kommunalbestyrelsiluunniit aalajangersinnaapput, inissiat imm. 1-imi nr. 5-imi taaneqartut ataasiakkaat peqqussummi matumani pineqartunut ilaatinneqassasut.

Namminersornerullutik Oqartussat kommunillu inissiaataannik attartortittakkanik pisineq

§ 4. Namminersornerullutik Oqartussat kommunilluunniit inissiaataanni attartortittakkani attartortoq inissiamik attartukkaminik inissiatut imaluunniit illutut nammineq pigisatut tigusinissaminik qinnuteqarsinnaavoq. Qinnuteqaat Naalakkersuisunut imaluunniit kommunalbestyrelsimut nassiunneqassaaq, tassungalu qinnuteqartup tunisinermi akigititaasup ilaata sinneruttup aningaasalersornissaanut periarfissaqarneranik aningaaserivimmiit nalunaarut pisussaaffiliinngitsoq ilanngunneqassaaq, tak. § 14, imm. 1.

§ 5. Inissiamik attartortittakkamik inissiatut nammineq pigisatut qinnuteqaat akuerineqarpat, Naalakkersuisut imaluunniit kommunalbestyrelsip inissiaammi inissiat attartortittakkat inissianut nammineq pigisanut agguataassavai, kiisalu qinnuteqartup piginneqatigiilluni inissiaatillit peqatigiiffiannik pilersitsinissaanik aammalu piginnittut peqatigiiffiata malittarisassaanik suliaqarneranut ikiuutissalluni.
Imm. 2. Naalakkersuisut inissiaammi inissiat attartortittakkat agguataarneqarnissaannik maleruagassanik sukumiinerusunik aalajangersaasinnaapput, taakkununnga ilanngullugit nalunaarsuineq piginnittunullu immikkut ittumik piumasarisat.

§ 6. Inissiaateqarfimmi inissiat attartortittakkat inissianut nammineq pigisanut agguataarneqareerpata, Naalakkersuisut imaluunniit kommunalbestyrelsip makku qinnuteqartumut nassiutissavai:
1) Qinnuteqartup inissiamik attartortittakkamik najukkaminik inissiatut nammineq pigisatut tigusisinnaaneranut allakkatigut neqeroorut.
2) Piginnittut peqatigiiffiat pillugu paasissutissat aamma malittarisassat assilineri.
3) Tunisinissamut tamakkiisumut pilersaarusiaq, inissiami nammineq pigisami agguaqatigiisitsinissamut kisitsisitalik.
4) Inissiap nammineq pigisap sananeqarneranut nassuiaatinut paasissutissat, tak. ilanngussaq 1.
5) Inissiap nammineq pigisap niuernermi nalinganut paasissutissat.
6) Najugaqarfimmi imaluunniit ingerlatsinermut aserfallatsaaliuinermullu immikkoortortami, inissiap attartortittakkap attuumassuteqarfigisaani ukiumi pineqartumi ingerlatsinermut missingersuutit.
7) Najugaqarfimmi imaluunniit ingerlatsinermut aserfallatsaaliuinermullu immikkoortortami, inissiap attartortittakkap attuumassuteqarfigisaani naatsorsuutit akuerisat kingulliit.
8) Akiligassat imaluunniit piginnittunut immikkut ittumik piumasarisat nalunaarsorneqarsimasinnaasut, tigusinerup kingorna inissianut nammineq pigisanut attuumassuteqartussatut nalilerneqartut pillugit paasissutissat.
Imm. 2. Tigusinissamik neqeroorut Naalakkersuisut imaluunniit kommunalbestyrelsip allakkatigut neqeroorutaata nassiutereernerani qaammatit pingasut qaangiutsinnagit akuerineqassaaq.
Imm. 3. Inissiaateqarfimmi inissiat attartortittakkat inissianut nammineq pigisanut agguataarneqareerpata, Naalakkersuisut imaluunniit kommunalbestyrelsip attartortutut sinneruttunut uku nassiutissavaat:
1) Inissiamik attartortittakkamik najukkaminnik inissiatut nammineq pigisatut tigusisinnaanerat pillugu nalunaarut.
2) Piginnittut peqatigiiffiat pillugu paasissutissat aamma malittarisassat assilineri.

§ 7. Attartortup inissiamik attartukkaminik inissiatut nammineq pigisatut tigusinissamut periarfissaminik atuinissani kissaatiginngikkuniuk:
1) Inissiaammi inissiamik attartortuuinnarsinnaavoq.
2) Naalakkersuisut imaluunniit kommunalbestyrelsip illoqarfimmi najukkami inissiamik attartortittakkamik allamik neqeroorutaa akuerisinnaavaa, tamanna inissianik attartortitsisarneq pillugu peqqussummi periarfissaqarpat.
Imm. 2. Attartortup inissiaateqarfimmi attartortuuinnartussap ineqarnermut akiliutissaa taamatut attartornermi ineqarnermut akiliutip naatsorsorneqartarneranut maleruagassat nalinginnaasut naapertorlugit aalajangersarneqassaaq.
Imm. 3. Inissiaateqarfimmi inissianik nammineq pigisassanik agguataariffiusumi attartortuuinnartussamut piginnittut peqatigiiffiata malittarisassaani torersaarnissamut aalajangersakkat atuuttussaapput.

§ 8. Attartortup inissiamik attartukkaminik inissiatut nammineq pigisatut tigusisinnaanini pillugu periarfissinneqarsimasup kingusinnerusukkut piffissap qanorluunniit ilinerani inissiamik tigusisinnaanini atorsinnaavaa, tamannali atuutissanngilaq inissiamik attartortittakkamik allamik neqeroorut akuersaarsimappagu.

§ 9. Inissiaammi inissianik nammineq pigisassanik agguataariffiusumi inissiaq attartortittagaq inoqanngitsoq Namminersornerullutik Oqartussanit imaluunniit kommunimit pigineqartoq inissianik attartortitsisarneq pillugu Inatsisartut peqqussutaanni maleruagassat naapertorlugit innersuunneqanngippat, Naalakkersuisut imaluunniit kommunalbestyrelsip inissiaq attartortittagaq inoqanngitsoq tamanut ammasumik tuniniaanikkut tunisinnaavaa. Pisinermut atatillugu aningaasartuutissat tamarmik pisisumit akilerneqassapput.
Imm. 2. Tamanut ammasumik tuniniaanermi § 11 atorneqassanngilaq.

§ 10. Inissiamik attartortittakkamik illutut nammineq pigisatut tigusinissamik qinnuteqaat akuerineqarpat, Naalakkersuisut imaluunniit kommunalbestyrelsip makku qinnuteqartumut nassiutissavai:
1) Qinnuteqartup inissiamik attartortittakkamik najukkaminik illutut nammineq pigisatut tigusisinnaaneranut allakkatigut neqeroorut.
2) Inissiap nammineq pigisap sananeqarneranut nassuiaatinut paasissutissat, tak. ilanngussaq 1.
3) Illup nammineq pigisap niuernermi nalinganut paasissutissat.
4) Akiligassat imaluunniit piginnittunut immikkut ittumik piumasarisat nalunaarsorneqarsimasinnaasut, tigusinerup kingorna illumut nammineq pigisamut attuumassuteqartutut nalilerneqartut pillugit paasissutissat.
Imm. 2. Tigusinissamik neqeroorut Naalakkersuisut imaluunniit kommunalbestyrelsip allakkatigut neqeroorutaata nassiutereernerani qaammatit pingasut qaangiutsinnagit akuerineqassaaq.

Pisinermi akiusoq

§ 11. Inissiap attartortittakkap, inissiatut imaluunniit illutut nammineq pigisatut tiguneqartussatut kissaatigineqartup tunineqarnerani akiusoq niuernermi naligititaasut naapertorlugit aalajangerneqassaaq.
Imm. 2. Inissiaateqarfinni pingasunik amerlanerusunilluunniit attartortittakkanik inissiartaqartuni attartortut, tunisinermut akiusup procentianik annertussusilikkamik akikillisaaffigineqassapput, tassani attartortup qanoq sivisutigisumik attartorsimanera apeqqutaatinneqassalluni, tak. imm. 3 aamma ilanngussaq 2. Akikillisaatissaq tunisinermut akiusup procentianik annertussusilikkamik akikillisaaffigineqarneq apeqqutaatinnagu aningaasartaliunneqartunit ukuninnga annertunerussanngilaq:
1) Inissiaq 1-mik aamma 2-nik initalik: 225.000 koruunit.
2) Inissiaq 3-nik initalik: 335.000 koruunit.
3) Inissiaq 4-nik initalik: 445.000 koruunit.
4) Inissiaq 5-nik initalik: 555.000 koruunit.
5) Inissiaq 6-nik amerlanerusunilluunniit initalik: 665.000 koruunit.
Imm. 3. Attartortup qanoq sivisutigisumik attartorsimanerata naatsorsorneqarnerani attartortitsisup inissiaataani attartortittakkami attartortup piffissaq ataannartumik attartortuuffigisaa tunngavigineqassaaq. Attartortoq attartortitsisup inissiaataanni attartortittakkani nuttarluni attartortuusimanersoq aammalu inissiat attartortittakkat sumiiffimmi ataatsimiissimanersut apeqqutaatinneqanngilaq.
Imm. 4. Agguataarinissamut tigusinissamullu atatillugu aningaasartuutinut tamanut, tassunga ilaallutik naliliinermut, siunnersorteqarnermut, eqqartuussissuserisunut naqissusiinermullu aningaasartuutit, matusissutissanik 50.000 koruuninik tunisinermut akiusoq ilaneqassaaq.

§ 12. Namminersornerullutik Oqartussat imaluunniit kommunip suliassamik ilisimasalimmut arlaannulluunniit attuumassuteqanngitsumut niuernermi naligititaasoq naatsorsortissavaa.

Akit nikingassutaannut qularnaveeqqusiissut

§ 13. Namminersornerullutik Oqartussat kommuniluunniit inissiamut nammineq pigisamut akit nikingassutaannut qularnaveeqqusiissummik nalunaarsuissapput, taannalu tunisinermi akiusup § 11, imm. 2 naapertorlugu akikillisaanerup annertoqqataanik nalilerneqassaaq. Namminersornerullutik Oqartussat imaluunniit kommuni akit nikingassutaannut qularnaveeqqusiissummik 50.000 koruunit inorlugit annertussusilimmik nalunaarsuissanngillat.
Imm. 2. Akit nikingassutaannut qularnaveeqqusiissut, Namminersornerullutik Oqartussat kommunilluunniit taarsigassarsiarititaannut qularnaveeqqusiissutip akilereernerani akilerneqartussatut inissisimavoq.
Imm. 3. Akit nikingassutaannut qularnaveeqqusiissut ukiut 10-it ingerlanerini ukiumut 1/10-inik nalikillineqartassaaq, piffissallu nalikillisitsiviusup qaangiunnerani nalunaarsorneqarsimanera peerneqassalluni. Piffissaq nalikillisitsiartuaarfiusoq ullormit tigusiffiusumit aallartissaaq.
Imm. 4. Piginnittut nikinneranni akit nikingassutaannut qularnaveeqqusiissut akiligassanngortinneqassaaq, tassanilu toqusoqarneranut, averusernermut avinnermulluunniit atatillugu piginnittut nikinnerat pineqanngilaq.
Imm. 5. Naalakkersuisut akit nikingassutaannut qularnaveeqqusiissutinut isumakkeerinissamut maleruagassanik aalajangersaasinnaapput.

Pisortanit taarsigassarsiat, qularnaveeqqusiineq akiligassanngortitsisarnerlu

§ 14. Attartortup inissiamik attartukkaminik inissiatut illutulluunniit nammineq pigisatut tigusineranut atatillugu, attartortoq tunisinermut akiusup 40%-ia tikillugu Namminersornerullutik Oqartussanit kommunimilluunniit taarsigassarsitinneqarnissaminik piumasaqarsinnaavoq. Namminersornerullutik Oqartussat kommuniluunniit tunisinermut akiusup sinneranut aningaasalersueqataasinnaanngillat.
Imm. 2. Taarsigassarsiat ukiuni 20-ni erniaqaratillu akilersugassaassanngillat, tamatumalu kingorna taarsigassarsiatut angeqqatigiinnik annertussusilerlugit, ukiumut Nationalbankip erniarititaa 3%-inik ilallugu erniaqartinneqarlutik ukiuni 15-ini akilersugassanngortinneqassallutik.

§ 15. Namminersornerullutik Oqartussat kommunilluunniit taarsigassarsiarititaat inissiap illulluunniit nammineq pigisap qularnaveeqqusiunneratigut qularnaarneqassapput. Taarsigassarsiat, inissiaq illuluunniit nammineq pigisaq qularnaveeqqusiullugu tunisinermi akiusup sinneranut aningaasalersuutissatut taarsigassarsiarititat akilereernerini akilerneqartussatut inissisimassapput.

§ 16. Qularnaveeqqusiussaqarluni taarsigassarsinermi allagartami, tak. § 15, allamik aalajangiisoqarsimanngippat, qularnaveeqqusiussaqarluni taarsigassarsinermi allagartaq naapertorlugu piginnittut nikinneranni aningaasaatit akiligassanngortinneqassapput, tassanili taarsigassarsiat pisinermi akiusup 90%-ianut qularnaveeqquserneqarsimanerat ingerlaannartillugu inuinnaat akornanni piginnittut nikinnerat pineqanngilaq.
Imm. 2. Piginnittut nikinneranni aningaasaatit akiligassanngortinneqanngippata, pisisup nutaap atugassarititaasut allannguuteqartinnagit akiitsut akiitsorilersinnaavai. Qularnaveeqqusiussaqarluni taarsigassarsinermi allagartaq, aningaaserivimmit, sparekassemit, ernianik naleqqussaaniarluni imaluunnit realkredittimit taarsigassarsiat, pisisup nutaap aningaasalersuinissaq eqqarsaatigalugu taarsigassarsiarisariaqagaasa akilereernerini akilerneqartussatut inissisimapput.
Imm. 3. Namminersornerullutik Oqartussat kommunilluunniit taarsigassarsiarititaat akiligassanngortinneqassapput:
1) Qularnaveeqqusiussaqarluni taarsigassarsinermi allagartaq naapertorlugu taarsigassarsititsinermi atugassarititaasut sumiginnarneqarpata.
2) Attartortitsinermut aalajangersakkat inissianik attartortitsisarneq pillugu Inatsisartut peqqussutaanni aalajangersarneqartut unioqqutillugit taarsigassarsisup inissiaq illuluunniit nammineq pigisaq attartortippagu.

Atortuulersinneqarfia il.il.

§ 17. Peqqussut 1. januar 2008-imi atuutilerpoq.
Imm. 2. Tamatumunnga peqatigitillugu atorunnaarsinneqarput:
1) Namminersornerullutik Oqartussat kommunillu inissiaataasa attartortittakkat pigisatut inissianngortissinnaanerat pillugu Inatsisartut peqqussutaat nr. 5, 21. maj 2002-meersoq.
2) Namminersornerullutik Oqartussat kommunillu inissiaataat attartortittakkat sorliit pigisatut inissianngortinneqarsinnaannginnerat pillugu Namminersornerullutik Oqartussat nalunaarutaat nr. 25, 11. september 2002-meersoq.
Imm. 3. Namminersornerullutik Oqartussat kommunillu inissiaataasa attartortittakkat teknikikkut aningaasatigullu naliliivigineqartarnerat pillugu Namminersornerullutik Oqartussat nalunaarutaat nr. 9, 12. maj 2003-meersoq, Namminersornerullutik Oqartussat kommunillu inissiaataasa attartortittakkat pigisatut inissianngortissinnaanerat pillugu Inatsisartut peqqussutaanni nr. 5-imi, 21. maj 2002-meersumi § 7, imm. 4 tunngavigalugu suliarineqarsimasoq, peqqussut manna allalluunniit tunngavigalugit maleruagassanik aalajangersaanikkut taarserneqarnissami atorunnaarsinneqarnissamiluunniit tungaanut atuutiinnassaaq.

Namminersornerullutik Oqartussat, ulloq 19. november 2007

Hans Enoksen

/

Kim Kielsen

Ilanngussaq 1

Ilanngussaq 2