Siusinaartumik pensionisiaqarnermut maalaaruteqartarfik pillugu Namminersorlutik Oqartussat nalunaarutaat
Kapitali 1
Maalaaruteqartarfiup ilaasortalersugaanera
§ 1. Siusinaartumik pensionisiaqarnermut maalaaruteqartarfik tassaavoq kommunalbestyrelsip siusinaartumik pensionisiat pillugit Inatsisartut inatsisaat naapertorlugu, inuup sulisinnaassusiata procentianik aalajangiineranik allaffissornikkut naammagittaalliortarfik.
§ 2. Siusinaartumik pensionisiaqarnermut maalaaruteqartarfiup ilaasortarai siulittaasoq inatsisilerituutut ilinniarsimasoq ilaasortallu allat marluk.
Imm.2. Siulittaasoq, siulittaasulluunniit tamatumunnga piginnaatitaa maalaaruteqartarfik sinnerlugu kinnertartuuvoq.
§ 3. Siusinaartumik pensionisiaqarnermut maalaaruteqartarfiup siulittaasua (kinguliini taagorneqartoq Siulittaasoq) ilaasortallu allat, kiisalu taakkununnga sinniisussat Naalakkersuisunit toqqarneqartarput. Siulittaasup sinniisussaa ilaasortallu sinniisussaat Siulittaasutuulli aamma maalaaruteqartarfimmi ilaasortatuulli inuttut ilinniakkatigullu piukkunnaateqartuussapput.
Imm.2. Siulittaasoq ilaasortarluunniit ataatsimiinnissami peqataasinnaanngippat Siulittaasup sinniisussaa ilaasortalluunniit sinniisussaa ataatsimiigiaqquneqassaaq. Aamma taamaassaaq Siulittaasoq ilaasortarluunniit suliassamut suliarineqartussamut aalajangersimasumut attuumassuteqarpat.
Kapitali 2
Ingerlatsineq pillugu inatsiseqarnermi maleruagassat il.il.
§ 4. Siusinaartumik pensionisiaqarnermut maalaaruteqartarfik pisortat ingerlatsinerannut ilaavoq. Maalaaruteqartarfimmi ilaasortat taakkununngalu sinniisussat, taamatullu aamma maalaaruteqartarfiup allattoqarfia ingerlatsinerminni pisortat pillugit inatsiseqarnermi maleruagassani atuuttuni, matumani aamma pisortat ingerlatsineranni suliassat suliarineqartarnerat pillugu Inatsisartut inatsisaanni, suliamut attuumassuteqarneq nipangiussisussaatitaanerlu pillugit maleruagassani pineqartunut ilaapput.
Imm.2. Siusinaartumik pensionisiaqarnermut maalaaruteqartarfiup suliamut immikkut ilisimasalik paasissutissat isertuussassat, maalaaruteqartarfiup pineqartumut ingerlateqqissimasai pillugit nipangiusimanneqqullugu allakkatigut peqqussavaa.
§ 5. Siusinaartumik pensionisiaqarnermut maalaaruteqartarfimmi ilaasortat taakkununngalu sinniisussat suliamik isumaginissaanut atortussat tigusimasamik inunnit susassaqanngitsunit pissarsiarineqannginnissaat paasineqannginnissaalluunniit qulakkiigassaraat. Maalaaruteqartarfimmi ilaasortat taakkununngalu sinniisussat suliamik isumaginissaanut atortussat tigusimasatik ilaasortaajunnaarnerminni utertissavaat.
Kapitali 3
Suliassat piareersarneqarnerat aamma aalajangiiffigineqarnerat
Suliassat piareersarneqarnerat
§ 6. Naalakkersuisut Siusinaartumik pensionisiaqarnermut maalaaruteqartarfik, aningaasanut inatsisini ukiumoortuni aningaasaliissutit periarfissarititaat naapertorlugit allattoqarfeqartissavaat.
Imm.2. Naalakkersuisut sulisunik, naammagittaalliuutit tiguneqartut ingerlaavartumik piareersarnissaannut, suliarineqarnissaannut aalajangiiffigineqarnissaannullu pisariaqartumik piukkunnaatilinnik atorfinitsitsissapput.
§ 7. Siusinaartumik pensionisiaqarnermut maalaaruteqartarfiup allattoqarfiata (kinguliini taaneqartoq Allattoqarfik) maalaaruteqartarfiup suliassai aaqqissuutissavai.
Imm.2. Allattoqarfiup suliassat ataasiakkaat maalaaruteqartarfimmit suliarineqartussatut aalajangiiffigisassatullu qaqugukkut saqqummiunneqarnissaat aalajangissavaa.
§ 8. Allattoqarfik suliassat suliarineqarnissaannik piareersaanermik, suliassat paasissutissartaannik pissarsiniarnermik aamma maalaaruteqartarfimmi aalajangiinissamut suliaqarnissamullu siunnersuusiornermik isumaginnittuussaaq.
§ 9. Allattoqarfiup kommunalbestyrelsi siusinaartumik pensionisiat pillugit naammagittaalliortumut tunngatillugu suliassap paasissutissartaasa tamarmik assilineqarnerinik naammagittaalliuummullu oqaaseqaammik qinnuigissavaa.
§ 10. Allattoqarfiup suliassaq Siusinaartumik pensionisiaqarnermut maalaaruteqartarfiup suliarisinnaasaanut ilaanersoq, naammagittaalliuutillu naammagittaalliornissamut piffissaliussap qaangiutinnginnerani maalaaruteqartarfimmut nassiunneqarsimanersut aalajangissavaa.
Imm.2. Allattoqarfiup aalajangiinerit imm. 1 naapertorlugu aalajangerneqartut maalaaruteqartarfiup ataatsimiinnissaani tulliuttumi siullermi ilisimatitsissutigissavai.
Siulittaasup aalajangiinera, allakkatigut suliarinninneq aamma ataatsimiinneq il.il.
§ 11. Siulittaasup suliassat Siusinaartumik pensionisiaqarnermut maalaaruteqartarfiup maannamut periaaserisai naapertorlugit nalorninartortaqanngitsut aalajangiiffigisinnaavai.
Imm.2. Siulittaasup imm. 1 naapertorlugu piginnaatitaaffini Allattoqarfimmut tamakkiisumik ilaannakuusumilluunniit isumagitissinnaavai.
Imm.3. Siulittaasup aalajangiinerit imm. 1-imiit 2-mut naapertorlugit aalajangerneqartut maalaaruteqartarfiup ataatsimiinnissaani tulliuttumi siullermi ilisimatitsissutigissavai.
§ 12. Suliassat Siulittaasup naliliinera malillugu allakkatigut suliarineqarsinnaallutillu aalajangiiffigineqarsinnaasut aalajangiinissamut inassuteqarluni Siusinaartumik pensionisiaqarnermut maalaaruteqartarfiup ilaasortaanut nassiunneqarsinnaapput. Suliassap ataatsimiinnermi suliarineqarnissaa ilaasortamit ataatsimit qinnutigineqarpat tamanna pissaaq, tak. § 13.
§ 13. Siusinaartumik pensionisiaqarnermut maalaaruteqartarfiup suliassat ataatsimiinnerni suliaralugillu aalajangiiffigissavai. Siulittaasoq malaaruteqartarfiup ataatsimiinnerinik aqutsisuussaaq.
Imm.2. Ataatsimiinnerit videokkut qarasaasiakkut, oqarasuaatikkut assigisaatigulluunniit ingerlanneqartassapput. Immikkut ittunik aalajangersimalluinnartunillu pissuteqarluni imminut tikilluni ataatsimiinnissaq pisariaqarpat siulittaasup imminut tikilluni ataatsimiinnissaq aalajangersinnaavaa.
§ 14. Siusinaartumik pensionisiaqarnermut maalaaruteqartarfiup piffissat ataatsimiiffissai oqaluuserisassaalu Allattoqarfiup aalajangersartassavai. Naammagittaalliuutit tiguneqartut ataatsimiittarnerni ingerlaavartumik suliarineqarlutillu aalajangiiffigineqartassapput.
Imm.2. Ataatsimiigiaqqusinerit ullunik 14-inik piffissaqartitsilluni pisassapput. Ataatsimiigiaqqusinernut ilanngullugit nassiunneqassapput oqaluuserisassat, suliassat saqqummiunneqarnerat aamma naammagittaalliuutit ataasiakkaat maalaaruteqartarfimmit aalajangiiffigineqarnissaannut inassuteqaatit kiisalu suliassanut atortussat pisariallit.
Imm.3. Suliassaq aalajangersimasoq sivikinnerusumik piffissaliilluni ataatsimiigiaqqusinissamut immikkut pissutissaqartitsippat Allattoqarfik, Siulittaasoq isumasioreerlugu taamaaliorsinnaavoq.
§ 15. Siusinaartumik pensionisiaqarnermut maalaaruteqartarfik aalajangiisinnaassuseqaassaaq maalaaruteqartarfimmi ilaasortat taakkununngaluunniit sinniisussat tamarmik ataatsimiinnermi peqataappata.
§ 16. Siusinaartumik pensionisiaqarnermut maalaaruteqartarfiup ataatsimiinneri tamanut ammasuunngillat.
Imm.2. Allattoqarfimmi sulisut maalaaruteqartarfiup ataatsimiinnerini Siulittaasup aalajangiineratigut peqataasinnaapput.
Imm.3. Allattoqarfiup suliamik immikkut ilisimasallit suliassap erseqqissaassutigineqarnerani ikiuussinnaanerat, Siulittaasoq isumasioreerlugu aalajangersinnaavaa. Suliamik immikkut ilisimasallit maalaaruteqartarfiup suliassamik suliaqarnerani aalajangiineranilu peqataasinnaanngillat.
§ 17. Allattoqarfik Siusinaartumik pensionisiaqarnermut maalaaruteqartarfiup ataatsimiinnerisa imaqarniliornerannik suliaqassaaq. Imaqarniliatut siunnersuutip allaqqaarneqarnera maalaaruteqartarfiup ataatsimiinnerata kingorna kingusinnerpaamik sap.ak. 4-t qaangiunneranni nassiussorneqassaaq. Oqaaseqaatissat nassiussuinerup kingorna kingusinnerpaamik ullut 14-it qaangiunneranni Allattoqarfimmut nassiunneqassapput. Imaqarniliaq tamatuma kingorna naammassineqartutut isigineqassaaq.
Aalajangiinerit
§ 18. Siusinaartumik pensionisiaqarnermut maalaaruteqartarfiup aalajangiineri amerlanerussuteqarnikkut pissapput.
Imm.2. Maalaaruteqartarfiup aalajangiineri allaganngorlugit aammalu tunngavilersorlugit suliarineqassapput. Maalaaruteqartarfiup aalajangiineri Siulittaasup, maalaaruteqartarfik sinnerlugu atsiussavai. Aalajangiineq isumaqatigiinngiffiusumik aalajangiineruppat ilaasortap immikkut isumaata allanneqarnissaa Siulittaasup aalajangersinnaavaa.
Imm.3. Maalaaruteqartarfiup aalajangiinera naammagittaalliuuteqartumut, kommunimut pineqartumut kiisalu Ilaqutariinnermut, Naligiissitaanermut, Isumaginninnermut Inatsisinillu Atuutsitsinermut Naalakkersuisoqarfimmut nassiunneqassaaq.
§ 19. Siusinaartumik pensionisiaqarnermut maalaaruteqartarfiup aalajangiineri, Siulittaasup aalajangiineratigut, kimut tunngasuuneri paasineqarsinnaajunnaarsarlugit tamanut saqqummiunneqarsinnaapput, tamanut pingaaruteqarpata imaluunniit maalaaruteqartarfiup periaaserisaa pillugu ilitsersuutissatut naleqquppata. Tamanut saqqummiussineq nalisaalluni, maalaaruteqartarfiup aalajangiinerani suut pingaaruteqartinneqarneri tamanullu pingaaruteqarsorineqarneri imaluunniit maalaaruteqartarfiup periaaserisaa pillugu ilitsersuutissatut atorneqarsinnaasorineqarneri taallugit issuaanikkut pissaaq.
Kapitali 4
Ilaasortaajunnaarsitsisarneq aamma nutaanik toqqaasarneq
§ 20. Naalakkersuisut Siusinaartumik pensionisiaqarnermut maalaaruteqartarfimmi ilaasortanik ilaasortaajunnaarsitsisinnaallutillu ilaasortanik nutaanik, matumani aamma Siulittaasumik nutaamik toqqaasinnaapput. Nutaanik toqqaaneq utaqqiisaagallartumik aammalu maalaaruteqartarfiup suliffeqarnermut, isumaginninnermut, peqqissutsimut, ilinniartitaanermut nakorsallu suliaannut tunngasuni tamatigoortumik ilisimasaqarnissaa qulaakkerumallugu pisinnaavoq.
Imm.2. Naalakkersuisut ilaasortaq, matumani aamma Siulittaasoq piffissap, pineqartup toqqagaaffigisaata sinnerani ilaasortaajunnaarsissinnaavaat, taassuma sivisuumik napparsimanini allatulluunniit pisinnaannginnini, imaluunniit naleqqutinnginnini pissutigalugu maalaaruteqartarfimmi ilaasortatut sulisinnaannginnera paasineqarpat.
Imm.3. Naalakkersuisut ilaasortaq, matumani aamma Siulittaasoq ilaasortaajunnaarsissinnaavaat:
1) ilasortaq suliffeqarnermut, isumaginninnermut, ilinniartitaanermut peqqissutsimullu tunngasut pillugit inatsisit naapertorlugit pisussaaffimminik sumiginnaasimanini pissutigalugu soraarsitaappat imaluunniit akuersissumminik arsaagaappat, imaluunniit
2) ilaasortaq suliassami Napparsimasut Maalaarutaannik Aalajangiisartunit aalajangiiffigineqartumi isornartorsiorneqarpat.
Kapitali 5
Aalajangersakkat assigiinngitsut
§ 21. Siusinaartumik pensionisiaqarnermut maalaaruteqartarfimmi ilaasortat Inatsisartunut Naalakkersuisunullu ilaasortat il.il. aningaasarsiaqartitaanerat il.il. pillugit Inatsisartut inatsisaanni § 18, imm. 1-imi 2-milu maleruagassat naapertorlugit aningaasarsiaqartinneqassapput il.il.
Atortuulerfia
§ 22. Nalunaarut ulloq1. novemberi 2016-imi atortuulissaaq.
Namminersorlutik Oqartussat, ulloq 28. oktober 2016
Sara Olsvig
/
Julie Præst Wilche