Tarnimikkut nappaatilinnik kiffaanngissusiiaaneq allatigullu pinngitsaaliissummik iliuuseqarneq pillugu Inatsisartut Inatsisaanni nr. 24-mi, 3. december 2012-imeersumi § 37 naapertorlugu aalajangersarneqarput:

Kapitali 1
Napparsimasunut siunnersortinik atorfinitsitsineq

 

  § 1. Kalaallit Nunaani Eqqartuussivimmi eqqartuussisup qinnuteqartut akornanni napparsimasunut siunnersortissanik atorfinitsitsissaaq.
  Imm. 2. Najukkami tusagassiiuutitigut napparsimasunut siunnersortissanik pissarsiortoqassaaq. Ilinniagaqassuseq tunuliaqutaralugu suliat pillugit atuagassiani imal. allani sulisut imm. 3 naapertorlugu napparsimasunut siunnersortissatut piukkunnaatillit akornanni siunnersortissarsiornerup ilisimaneqalernissaanut qulakkeeriviusuni, aamma pissarsiortoqarsinnaavoq.
  Imm. 3. Napparsimasunut siunnersortit qinnuteqartut akornanni siunnersortitut suliassanut immikkut piukkunnaateqarsorisat, ilaatigut peqqinnissaqarfimmut, inunnik isumaginnittoqarfimmut, ilinniartoqarfinnullu attuumassutillit atorfinitsinneqassapput.
  Imm. 4. Inuit Dronning Ingridip Napparsimavissuani atorfillit uninngasunut siunnersortinngorsinnaanngillat.
  Imm. 5. Napparsimasunut siunnersortissatut atorfinitsinneqartut amerlassusissaat Kalaallit Nunaani Eqqartuussivimmi eqqartuussisumit pisariaqartitsineq tunngavigalugu aalajangerneqassaaq.

 

  § 2. Kalaallit Nunaani Eqqartuussivimmi eqqartuussisup napparsimasunut siunnersortinngortut aqqisa naqinneri siulliit tulleriiaarlugit aqqi, najugaat, oqarasuaataasa normui, qarasaasiakkut attaveqarfiat, suliffiat, suliffiannilu oqarasuaatip normua ilanngullugit nalunaarsussavai.
  Imm. 2. Kalaallit Nunaani Eqqartuussivimmi eqqartuussisup nalunaarsukkat Dronning Ingridip Napparsimmavissuani tarnimikkut nappaatilinnut immikkoortortaqarfianut nassiutissavai.
  Imm. 3. Napparsimasunut siunnersortit najugaasa oqarasuaataasalu normuisa il.il. allannguutaat Dronning Ingridip Napparsimmavissuani tarnimikkut nappaatilinnut immikkoortortaqarfimmi nalunaarsugaassapput. Napparsimasunut siunnersortinik nutaanik atorfinitsitsinermi imal. napparsimasunut siunnersorti § 16, imm. 1 naapertorlugu nalunaarsuivimmit peerneqaqquppat, kiisalu napparsimasunut siunnersorti § 16, imm. 2 naapertorlugu siunnersortaajunnaarsinneqarpat, Kalaallit Nunaani Eqqartuussivimmi eqqartuussisoq nalunaarsuivimmik attavigisassat pillugit paasissutissat allannguutaat ilanngullugit nutarterissaaq, imm. 2-milu periaaseq naapertorlugu nassiussissalluni.

Kapitali 2
Napparsimasunut siunnersortinngortitsineq

 

  § 3. Napparsimasut pinngitsaaliissummik napparsimmavimmut unitsinneqartut, pinngitsaaliissummik tigummigallarneqartut imal. pinngitsaaliissummik katsorsarneqartut, napparsimmavimmiit angerlareernermi pinngitsaaliissummik malittarineqartut, pinngitsaaliissummik aalaakkerneqartut, nukersorfigineqartut, napparsimasorlu illersorniarlugu pinngitsaaliissummik aalaakkerneqartut, immikkut nakkutigineqartut ataannartumik nal. ak. 24-t sinnerlugit sivisussusillit, kiisalu inatsimmi § 26, imm. 1, nr. 2 naapertorlugu immikkoortortami matunik parnaarsinermi eqqugaasut tamarmik siunnersorteqartinneqassapput.

 

  § 4. Inatsisartut i natsisaanni § 1, imm. 2 naapertorlugu pinngitsaaliissummik napparsimmavimmut unitsitsinermi, peqqinnissaqarfiup qitiusumik immikkoortortaani peqqissaavimmiluunniit pinngitsaaliissummik unitsitsineq ilanngullugu, pinngitsaaliissummillu tigummigallagassanngortitsinermi kiffaanngissusiiaanermut atatillugu siunnersorteqartitsisoqassaaq. Napparsimasoq napparsimmavimmut peqqissaavimmulluunniit piniariarpat, pinngitsaaliissummik tigummigallarneqarpat, pinngitsaaliissummik iliuuseqartoqarpat, napparsimasorlu piumassuserinngisaminik tigummineqarpat, siunnersorteqartitsisoqassaaq.
  Imm. 2. Pinngitsaaliissummik iliuuseqarnerni allani pinngitsaaliissummik iliuuseqarnissaq aalajangiunneqarpat, siunnersortinngortitsisoqassaaq.

 

  § 5. Dronning Ingridip Napparsimmavissuani tarnimikkut nappaatilinnut immikkoortortaqarfimmi peqqissaasup pigaartuusup, pisuni ataasiakkaani piaarnerpaamik pinngitsaaliissummik iliuuseqarfiginnittoqarneranik ilisimatitsineragut, siunnersortip tulliuttup siunnersortinngorneranik ilisimatinneratigut siunnersortinngortitsisoqassaaq. Napparsimasoq siusinnerusukkut uninnganermini siunnersorteqartinneqarsimappat, nalinginnaasumik siunnersortaasimasoq taanna siunnersortinngortinneqassaaq. Inatsisartut inatsisaanni § 1, imm. 2 naapertorlugu pinngitsaaliissummik unitsitsinermi, napparsimasup uninngavigigallagaata, piaarnerpaamik Dronning Ingridip Napparsimmavissuani tarnimikkut nappaatilinnut immikkoortortaqarfik, napparsimasumut siunnersortinngortitsisoqarsinnaaqqullugu, unitsitsineq pillugu ilisimatissavaa.
  Imm. 2. Siunnersortinngortitsinnginnermi siunnersortinngortitsiniarnerup oqaaseqarfiginissaanut, napparsimasoq periarfissinneqassaaq.
  Imm. 3. Napparsimasup nalunaarsuiffimmiittumik allamik siunnersorteqartinneqarnissani kissaatigippagu, Dronning Ingridip Napparsimmavissuani tarnimikkut nappaatilinnut immikkoortortaqarfimmi, sapinngisaq tamaat kissaatigineqartoq eqquutsinniarneqassaaq. Aalajangiineq kredsdommerimut allaffissornikkut aalaajangiisuusussamut naammagittaalliutigineqarsinnaavoq.
  Imm. 4. Napparsimasup nalunarsuiffimmiinngitsumik siunnersorteqarnissani kissaatigippagu, siunnersortissatut tullinnguuttoq siunnersortinngortinneqarallassaaq, napparsimasup siunnersortissatut nammineq toqqagaata siunnersortinngortinneqarsinnaanissaa kredsdommerip aalajangiivigissavaa. Napparsimasup siunnersortissamisut kissaatigisaa piumassuseqarpat, napparsimasumullu siunnersortissatut piukkunnaateqarpat, napparsimasup kissaataa eqquutsinneqassaaq.

 

  § 6. Napparsimasup ersarissumik kissaatigalugu oqaatiginngippagu, napparsimasunut siunnersortip pineqartup suliaa assigisaaluunniit, assersuutigalugu napparsimasumut pineqartumut kommunimi sullissisuunikkut, pineqartup napparsimasup soqutigisaasa pissusissamisoortumik isumaginissaannut piukkunnassusaanik nalornilersitsisumik pisoqarpat, napparsimasunut siunnersortissanut nalunaarsuiffimmi nalunaarsimasumik siunnersortinngortitsisoqarsinnaanngilaq.

 

  § 7. Nalinginnaasumik oqarasuaatikkut siunnersortinngortitsisoqartassaaq, tamatumali kingorna allaganngorlugu uppernarsarneqassalluni. Dronning Ingridip Napparsimmavissuani tarnimikkut nappaatilinnut immikkoortortaqarfimmi peqqissaasoq pigaartuusoq napparsimasunut siunnersorti, assersuutigalugu aallarsimaneq, napparsimaneq assigisaalluunniit pissutiginagit pisinnaaneranik qulakkeerisuussaaq.
  Imm. 2. Napparsimasunut siunnersorti napparsimasumut allanut siunnersortinngortinneqareernini pissutigalugu siunnersortinngortinneqarniarnermut naaggaarsinnaavoq.

 

  § 8. Napparsimasumut siunnersortissanngortinneqareersup nalunaarsuiffimmiittumik allamik taarserneqarnissaa napparsimasup piumasarippagu, tamannalu tunngavissaqartutut nalilerneqarpat, Dronning Ingridip Napparsimmavissuani tarnimikkut nappaatilinnut immikkoortortaqarfimmi akuerineqassaaq. Tamanna akuersaarneqarsinnaanngippat immikkoortortaq piumasaqaammut tamatumunnga itigartitsippat, tamanna Kalaallit Nunaani Eqqartuussivimmi eqqartuussisumut naammagittaalliutigineqarsinnaavoq.
  Imm. 2. Siunnersortissanngortinneqareersoq allamik siunnersortinngortut nalunaarsuiffianniinngitsumik taarserneqarnissaa napparsimasup piumasarippagu, napparsimasoq siunnersortaasorlu akerleriilersimappata, napparsimasullu kissaatigisaa akuerineqarsinnaanngippat. Kalaallit Nunaani Eqqartuussivimmi eqqartuussisoq aalajangiisuussaaq.

Kapitali 3
Napparsimasunut siunnersortip suliassai pisinnaatitaaffiilu

 

  § 9. Napparsimasunut siunnersorti sapinngisaq tamaat napparsimasoq isumasioqatigalugu iliuuseqartassaaq.

 

  § 10. Tarnimikkut nappaatilinnik sullissinermi kiffaanngissusiiaaneq allatigullu pinngitsaaliissummik iliuuseqarneq pillugu Inatsisartut Inatsisaanni § 32, imm. 2 naapertorlugu suliassat suliarineranni, napparsimasunut siunnersorti ilaatigut pinngitsaaliissutip siunnersuisoqartitsinermut patsisaasup pisariaqanngitsumik sivitsorneqannginnissaanut nakkutilliisuussaaq.

 

  § 11. Napparsimasup aningaasaqarnikkut inissisimanera pissutsillu allat inuttaanut namminermut tunngasut tarnimikkut nappaatilinnut immikkoortortami uninnganermut, katsorsartinnermullu attuumassuteqanngitsut, napparsimasunut siunnersortip suliassaasa avataanniipput.

 

  § 12. Napparsimasumut siunnersortinngortup napparsimasoq piaarnerpaamik pulaassavaa attavigiuassallugulu. Napparsimasoq Dronning Ingridip Napparsimmavissuaniippat, siunnersortinngornerup kingorna nal. ak. 24-t qaangiutsinnagit napparsimasoq siullermik pulaarneqassaaq. Napparsimasoq sinerissami peqqinnissaqarfiup immikkoortuisa arlaanniikkallarpat, siunnersortinngornermiit nal. ak. 24-t qaangiutsinnagit oqarasuaatikkut attavigineqassaaq. Tamatuma kingorna sapinngisamik sapaatip akunneranut ataasiarluni pisariaqartitsinerlu naapertorlugu pulaarneqartassaaq.
  Imm. 2. Napparsimasut uninngareernerup kingorna pinngitsaaliissummik malittarineqartussat, napparsimasoq angerlartinnagu pulaarneqassapput. Angerlareernermi attaveqatigiinneq aatsaat napparsimasup kissaatigippagu, taamaallaallu peqqinnissaqarfiup qarasaasiakkut attaveqaataasa atornerisigut pisassaaq. Napparsimasoq Nuummiippat, oqarasuaatikkut nalunaarasuartaatillu allat atorlugit attaveqatigiinnissaq napparsimasup kissaatigippagu, Dronning Ingridip Napparsimmavissuanut pulaarnermik taarserneqarsinnaavoq.
  Imm. 3. Napparsimasup kissaataa naapertorlugu napparsimasunut siunnersortip pulaarnissaanik oqarasuaatikkulluunniit attaveqarnissamik qulakkeerinissaq, katsorsartiffimmi nakorsap akisussaaffigaa.
  Imm. 4. Akeqanngitsumik akornuserneqaranilu nammineq takkunnikkut, allakkatigut oqarasuaatikkullu napparsimasup uninnganerani attaveqarsinnaaneq, napparsimasunut siunnersortip pisinnaatitaaffigaa.

 

  § 13. Ilisimasariaqagaq sunaluunniit suliassap illersorneqarsinnaasumik naammassineqarsinnaanissaanut pisariaqartoq, immikkoortortami sulisut napparsimasup siunnersortaanut ilisimatitsissutigissavaat. Nakorsamit napparsimasumut ilisimatitsissutaanngitsut taamatuttaaq napparsimasup siunnersortaanut ilisimatsitsissutaassanngillat.
  Imm. 2. Napparsimasunut siunnersorti pinngitsaaliissummik iliuuseqarnernik nalunaarsuiffimmi, napparsimasumut siunnersortaaffissamut tunngasunik paasiniaanissamut pisinnaatitaavoq.
  Imm. 3. Napparsimasut inatsisitigut inissisimanerat pillugu Inatsisartut peqqussutaat nr. 6, 31. maj 2001-imeersoq naapertorlugu, napparsimasup nammineq pisinnaatitaaffigippagu, napparsimasorlu akuersippat, napparsimasumut siunnersorti napparsimasoq pillugu napparsimmaviup allattugaataasa imaanik paasiniaanissamut pisinnaatitaavortaaq.

 

  § 14. Napparsimasumut siunnersortaasoq pinerluttulerinermut inatsit malillugu akisussaatinneqarluni atorfiminut atatillugu napparsimasumut namminermut tunngasut paasisani pillugit nipangiussisimasussaatitaavoq, uani peqqissuseq ilaatinneqarpoq.

Kapitali 4
Siunnersortaajunnaarneq il.il.

 

  § 15. Siunnersortaaneq pinngitsaaliissummik iliuuseqarnerup taamaatinneqarnera ilutigalugu atorunnaarsinneqassaaq. Napparsimasunut siunnersorti pinngitsaaliissummik taamaatitsineq pillugu Dronning Ingridip Napparsimmavissuani tarnimikkut nappaatilinnut immikkoortortaqarfimmi peqqissaasumit pigaartuusumit nalunaarfigineqassaaq. Pinngitsaaliissummik iliuuseqarneq sivikitsoq napparsimasumullu siunnersorti suli pulaanngitsoq taamaatinneqarpat, siunnersortaaneq nalunaarasuartaatikkut attaveqareernermi imaluunniit pulaareernermi aatsaat atorunnaassaaq.
  Imm. 2. Imm. 1-imi aalajangersagaq apeqqutaatinnagu napparsimasup maalaarutaanut aallartinneqareersumut imaluunniit pinngitsaaliissummik iliuuseqarnerup taamaatinneqarnerani aallartinneqartumut napparsimasumut siunnersorti ikiuutissaaq.
  Imm. 3. Siunnersortinngortinneqartoq § 8 naapertorlugu allamik taarserneqarpat, siunnersortaaneq taamaatinneqassaartaaq.

 

  § 16. Napparsimasunut siunnersorti sukkulluunniit siunnersortinik nalunaarsuiffimmit peerneqaqqusinnaavoq. Nalunaarsuiffimmit peerneqaqqulluni kissaateqarneq Dronning Ingridip Napparsimmavissuani tarnimikkut nappaatilinnut immikkoortortaqarfimmut, Kalaallit Nunaani Eqqartuussivimmi eqqartuussisumut tamatuminnga ilisimatitsisussamut, nalunaarutigineqassaaq.
  Imm. 2. Napparsimasunut siunnersorti siunnersortit nalunaarsorsimaffianniittoq siunnersortitut pisussaaffimminik annertuumik sumiginnaappat, imaluunniit siunnersortaanissamut piukkunnaateqanngitsoq paasineqarpat, siunnersortaajunnaarsinneqassaaq. Siunnersortaajunnaarsitsinermi pineqartoq nalunaarsuiffimmit peerneqassaaq. Napparsimasunut siunnersortit pisussaaffimminnik sakkortuumik sumiginnaasut Dronning Ingridip Napparsimmavissuani tarnimikkut nappaatilinnut immikkoortortaqarfimmut saaffiginnissutaassapput. Immikkoortortap suliaq piareersaareerlugu tusarniaassutigereerlugulu Kalaallit Nunaani Eqqartuussivimmi eqqartuussisumut tunniutissavaa oqaaseqaatinik peqarunik ilanngullugit.
  Imm. 3. Imm. 2 naapertorlugu napparsimasunut siunnersortaajunnaarnissaq Kalaallit Nunaani Eqqartuussivimmi eqqartuussisumit aalajangiivigineqassaaq. Eqqartuussiviup aalajangiinera Dronning Ingridip Napparsimmavissuani tarnimikkut nappaatilinnut immikkoortortap napparsimasunut siunnersortimut ilisimatitsissutigissavaa.
  Imm. 4. Imm. 1 imaluunniit imm. 2 naapertorlugu siunnersortitut nalunaarsuiffimmit peerneqarneq siunnersortinngortinneqaqqissinnaannginnermik kinguneqassaaq. Imm. 2 naapertorlugu nalunaarsuiffimmit peerneqarneq maannamut siunnersortaaffiit taamaatinneqarnerannik kinguneqassaartaaq.
  Imm. 5. Napparsimasunut siunnersortit nalunaarsuiffimmi nalunaarsorneqarsimanngitsut, imm. 2-mi piumasaqaatit naapertorlugit siunnersortaajunnaarsinneqarsinnaapput. Taamaattoqarnissaa Kalaallit Nunaani Eqqartuussivimmi eqqartuussisumit imm. 2-mi periusaasoq naapertorlugu aalajangiivigineqassaaq.

Kapitali 5
Akissarsiat

 

  § 17. Peqqissutsimut Naalakkersuisoqarfik napparsimasunut siunnersortinngortinneqartunut, napparsimasunut siunnersortit nalunaarsorsimaffianniittunut, napparsimasup pinngitsaaliissummik iliuuseqarfigineqarnerata qanoq sivisutiginera apeqqutaatillugu, akigititat uku naapertorlugit akissarsiaqartitsisuussaaq:
1) Pinngitsaaliinikkut iliuuseqarnerit ullut arfineq marluk angullugit sivisussusillit: 754 kr.
2) Pinngitsaaliinikkut iliuuseqarnerit ullut arfineq pingasuniit 30-t angullugit sivisussusillit: 1.131 kr.
3) Pinngitsaaliinikkut iliuuseqarnerit ullut 30-t sinnerlugit sivisussusillit: 1.508 kr. qaammatit pingajussaat aallartikkaangat.
  Imm. 2. § 5, imm. 1, oqaaseqatigiit aappaat naapertorlugu arlaleriarluni napparsimasumut ataatsimut sivikitsumik siunnersortinngortitaanermi, siullermik siunnersortinngortinneqarnermiit siunnersortinngortinneqaqqinnerni tulliuttuni immikkut ittuni, siunnersortinngortinneqarnerni ataasiakkaani akissarsiat 377 koruuninut apparneqarsinnaapput.

 

  § 18. Aningaasat § 17, imm. 1-imi 2-milu taaneqartut napparsimasumut siunnersortaanermi pulaartarnermut, maalaarutinik ikiuinermut assigisaannullu aningaasartuutit saniatigut, siunnersortaanermi aningaasartuutinut, ilaatigut oqarasuaammik atuinermut assigisaanullu matussutaassapput.
  Imm. 2. Immikkorluinnaq ittumik pisoqartillugu Peqqissutsimut Naalakkersuisoqarfiup suliap qanoq annertutiginera apeqqutaatillugu § 17, imm. 1-imi taaneqartut amerlillugilluunniit ikilisinnaavai.

Kapitali 6
Atuutilersitsineq

 

  § 19. Nalunaarut atuutilersinneqarpoq 1. september 2015.
  Imm. 2. Taamaasilluni namminersorlutik oqartussat nalunaarutaat nr. 19 decembarip 2-neersoq 2013 napparsimasunut siunnersortit pillugit atorunnaarsinneqarpoq

 

 

Namminersorlutik Oqartussat, ulloq 26. august 2015

 

 

Doris Jakobsen

/

Lone Nukaaraq Møller