Qimmit qimuttut kiisalu qimmeqarneq qitsuuteqarnerlu pillugit Inatsisartut inatsisaat nr. 18, 30. oktober 1998-imeersumi § 13-imi imm. 1 aamma § 28-mi imm. 2 aamma 4 naapertorlugit, Inatsisartut inatsisaatigut nr. 23-atigut, 22. novembari 2011-mi kingullertut allanngortinneqar-tumi aalajangerneqarpoq:

Kapitali 1
Aallaqqaasiut

§ 1.  Ileqqoreqqusaq Qeqqata Kommunianut atuuppoq.

Kapitali 2
Qimminik qimuttoqarfiup iluani avataanilu ataatsimoortumik aalajangersakkat

§ 2.  Qeqqata Kommuniani kommunalbestyrelsi allakkatigut akuersissuteqaqqaartillugu Qeqqata Kommuniani qitsuuteqartoqarsinnaavoq.
Imm. 2.  Qitsuuteqarsinnaanermut akuersissummik qinnuteqaat Qeqqata Kommuniani Teknikkimut Avatangiisinullu Immikkoortortamut nassiunneqassaaq.
Imm. 3.  Akuersissut tunineqartuinnarmut atuuppoq, allanullu tunniunneqarsinnaanani.
Imm. 4.  Ileqqoreqqusamik matuminnga annertuumik arlaleriarlutilluunniit unioqqutsitsisimasunut, qitsuuteqarsinnaanermut akuersissummik tunniussinnginnissaminik kommunalbestyrelsi aalajangiisinnaavoq.

§ 3.  Maleruagassat qaqugukkulluunniit atuuttut naapertorlugit qitsuit akiuussutissamik kapineqarsimassapput.
Imm. 2.  Qimminik nakkutilliisup uppernarsaat, akiuussutissamik kapititsisimanermut immersorsimasaa imaluunniit akiuussutissamik kapitissimaneranut uumasut nakorsaata uppernarsaataa uppernarsaatitut atorneqassaaq.
Imm. 3.  Perlerorsinnaanermut akiuussutissamik kapitissimanermut uppernarsaammik takussutissartalimmik, qitsuit qungasequteqartinneqassapput.
Imm. 4.  Imm. 3-mi taaneqarluni perlerorsinnaanermut akiuussutissamik kapitissimanermut uppernarsaatip tunuatungaani piginnittup oqarasuaataata normua kigartorlugu allanneqarsimassaaq.
Imm. 5.  Kigartuut qimminik nakkutilliisumut imaluunniit Teknikkimut Avatangiisinullu Immikkoortortap allatseqarfianut attarsiniarneqarsinnaavoq.
Imm. 6.  Allakkatigut akuersissut piginnittumit tigummineqartassaaq, piumasarineqartillugulu takutinneqartassalluni.

§ 4.  Qitsuit silami angalaannartinneqaqqusaanngillat.
Imm. 2.  Qitsuit illup iluaniisinneqassapput imaluunniit silamiisinneqassagunik ungalusamiisinneqassallutik.
Imm. 3.  Qitsunnik silamiisitsinissamut ungalusaliornissaq kissaatigigaanni, Teknikkimut Avatangiisinullu Immikkoortortamut nunaminertamik atugassinneqarnissamik qinnuteqartoqassaaq.

§ 5.  Qitsuit silami ungalusamiisinneqartut panertumik nallavissaqartinneqassapput, soorluttaaq imissaqartinneqartuassasut imaluunniit aputitugassaqassasut.
Imm. 2.  Qitsuit silami ungalusamiisinneqartut minnerpaamik ullormut ataasiartumik takusarneqartassapput.

§ 6.  Qitsuit illup iluaniisinneqartut panertumik nallavissaqartinneqassapput, soorluttaaq imissaqartinneqartuassasut.

§ 7 .  Qitsuit kinguaassiortinneqaqqusaanngillat.
Imm. 2.  Qitsuit arnavissat nakorsaatitortinneqarnerisigut pilatsinneqarnerisigulluunnit kinguaassiorsinnaajunnaarsinneqarsimassapput.
Imm. 3.  Qitsuit angutivissat suliaritinnermikkut kinguaassiorsinnaajunnaarsinneqarsimassapput
Imm. 4.  Qitsummik imaluunniit qitsunnik piginnittup imm. 2 imaluunniit imm. 3 naapertorlugu kinguaassiorsinnaajunnaarsinneqarsimanera imaluunniit kinguaassiorsinnaajunnaarsinneqarsimaneri, kommunimut uppernarsarsinnaassavaa imaluunniit uppernarsarsinnaassavai.

Kapitali 3
Qimminik nakkutilliisoq aamma qitsuit angalaannartut, pigineqanngitsut kiisalu qimminik qimuttoqarfiup iluani avataanilu unioqqutitsisumik qitsunnik eqqussineq pillugit nalinginnaasumik aalajangersakkat

§ 8.  Tullinnguuttunik suliaqarnissamik akisussaasussanik qimminik nakkutilliisumik imaluuniit nakkutilliisunik kommunalbestyrelsi toqqaassaaq:
1)  qitsunnik piginnittunik nalunaarsuinerit,
2)  qitsunnik angalaannartunik, pigineqanngitsunillu kiisalu unioqqutitsisumik eqqussanik qitsuutigineqartunillu toqutsinerit tigusinerilluunniit,
3)  qitsunnik unioqqutitsisumik eqqussat qitsuutigineqartullu tassaapput, qitsuit kommunimit akuersissutitaqanngitsumik qitsuutigineqartut pineqarput, takuuk § 2,
4)  qitsunnik akiuussutissamik kapuuinerit,
5)  akiuussutissamik kapuuinernik, kapuutillu uninngasuutit nalunaarsorneqarnerat kiisalu taakku uumasut nakorsaannut nalunaarutigineqartarnissaat.

§ 9.  Qitsuit angalaannartut kiisalu qitsuit unioqqutitsisumik eqqussat qitsuutigineqartullu qimminik nakkutilliisunut aatinneqartassapput.
Imm. 2.  Uumasunik imm. 1-imi taaneqartunik piginnittoq, pissutsinik iluarsiissuteqarnissaanut piffissalerlugu siumut ilisimatinneqassaaq. Ullunik pingasunik siumut ilimasaaruteqarneq naammattutut isigineqarpoq. Piffissaliunneqartup iluani pissutsit iluarsiivigineqarsimanngippata, siumut ilisimatitsinertaqanngitsumik piginnittumullu taarsiissutitaqanngitsumik qitsuk toqunneqassaaq.
Imm.3.  Qitsuk angalaannartoq qimminik nakkutilliisumit tiguneqarpat, qitsummik piginnittoq aallersinnaatillugu qitsuk kommunip sannaviani ungalusamiisinneqassaaq. Qimminik nakkutilliisup qitsummik piginnittoq attavigissavaa, ullullu pingasut qaangiutsinnagit piginnittup qitsuutini aasimanngippagu, piginnittumut taarsiissutitaqanngitsumik qitsuk toqunneqassaaq. Patsisissaqarluarluni qitsuk aaneqarsinnaanngippat, qitsuup aaneqarnissaanut piffissaliussap sivitsorneqarnissaanik qimminik nakkutilliisoq isumaqatiginiarneqassaaq.

Kapitali 4
Maalaaruteqarnerit

§ 10.  Qitsuuteqarnermut tunngatillugu maalaarutiginiakkat, kommunalbestyrelsimut nassiunneqartassapput. Malittarisassanut tunngatillugu maalaarutit politiinut nassiunneqartassapput.

Kapitali 5
Pineqaatissiissutaasinnaasut

§. 11.  Ileqqoreqqusamik matuminnga unioqqutitsisoqartillugu, Qimmit qimuttut kiisalu qimmeqarneq qitsuuteqarnerlu pillugit Inatsisartut inatsisaanni § 28-mi imm. 2 naapertorlugu akiligassiisoqarsinnaavoq.
Imm. 2.  Ileqqoreqqusamik matuminnga annertuumik arlaleriartumilluunniit unioqqutitsisoqartillugu, Qimmit qimuttut kiisalu qimmeqarneq qitsuuteqarnerlu pillugit Inatsisartut inatsisaanni § 28-mi imm. 2 naapertorlugu uumasuuteqaqqusaajunnaarsitsisoqarsinnaallunilu uumasunik passussisinnaajunnaarsitsisoqarsinnaavoq.

Kapitali 6
Atuutilerfia

§ 12.  Ileqqoreqqusaq qaammammi atuuttussanngortinneqarfiusumi atuutilerpoq.
Imm. 2.  Atuutilernera ilutigalugu Maniitsumi qimmeqarnermut qitsuuteqarnermullu ileqqoreqqusaq 2005-imi aggustip 17-ianeersoq atorunnaarsinneqarpoq.

Taamaalilluni 2014-imi aggustip 28-ani kommunalbestyrelsimit akuersissutigineqarpoq.

______________________________
Hermann Berthelsen
Borgmesteri

Matumuuna Qeqqata Kommuniani qitsuuteqarnermi ileqqoreqqusaq atuuttussanngortinneqarpoq.

Namminersorlutik Oqartussat, ulloq 11. februar 2015

_____________________________
 Karl-Kristian Kruse
Aalisarnermut, Piniarnermut Nunalerinermullu Naalakkersuisoq